Nkonko ya babadi

Mu mushindu kayi muvua Yehezekele mulue “kamama” tshikondo tshia ditshintshimika ne dibutuka dia Yelushalema?

Yehezekele wakalua “kamama” mu mushindu wa se: kavua ne tshintu tshia kukumbaja ku mukenji wa buprofete wa Yehowa ukavuaye mumanyishe.

Muprofete Yehezekele wakabangisha mudimu wende wa mutentekedi wa lulamatu wa bena Isalele bavua bapika mu Babulona mu ‘tshidimu tshitanu tshia bupika bua Mukalenge Yehoyakina,’ mbuena kuamba ne: mu tshidimu tshia 613 kumpala kua bikondo bietu ebi. (Yehezekele 1:2, 3) Mu dituku dia dikumi dia ngondo wa dikumi mu tshidimu tshia 609 kumpala kua bikondo bietu ebi, Nzambi wakamumanyisha ntuadijilu wa ditshintshimika dia Yelushalema kudi bena Babulona. (Yehezekele 24:1, 2) Ntshinyi tshivua ne bua kuenzeka ku ndekelu kua ditshintshimika edi? Yelushalema ne bantu bapange lulamatu bavuamu bavuaku mua kupanduka anyi? Bu muvuaye mutentekedi, Yehezekele ukavua mumane kumanyisha mukenji wa kabutu wa Yehowa uvua anu ne bua kukumbana, ne kabivua ne mushinga bua Yehezekele kukumbajaku tshinga tshintu, muenze bu uvua ukeba kuvuija mukenji au mutambe kukumbane bua kutuisha bantu. Yehezekele wakalua kamama pa bidi bitangila diamba bunga bualu bua ditshintshimika dia Yelushalema.​—Yehezekele 24:25-27.

Ngondo bu isambombo panyima pa dibutuka dia Yelushalema mu tshidimu tshia 607 kumpala kua bikondo bietu ebi, muntu mukuabu uvua mupanduke wakatuadila Yehezekele lumu lua dibutuka dia tshimenga tshinsantu pavuaye mu Babulona. Dilolo dia kumpala kua muntu eu uvua mupanduke kufika, Yehowa ‘wakabulula mukana mua [Yehezekele] ne kakadi bu kamama kabidi.’ (Yehezekele 33:22) Bukamama bua Yehezekele buakajika.

Yehezekele uvua mushale kamama tshia bushuwa mu tshikondo atshi anyi? Bidi bimueneka ne: kabivua nanku to, bualu nansha kunyima kua mumane kulua “kamama,” wakamanyisha milayi ivua itangila nangananga matunga mena mutumba avua asanka bua dikuluka dia Yelushalema. (Yehezekele, nshapita 25-32) Ku ntuadijilu kua mudimu wa Yehezekele wa muprofete ne mutentekedi, Yehowa ukavua mumuambile ne: ‘Nendamike ludimi luebe mu tshilakalaka tshiebe, bua wewe wikale bu kamama, kuyi mumanye mua kubabela; bualu bua badi dîku dia bantombokedi. Kadi pangakula nebe, nembulule mukana muebe.’ (Yehezekele 3:26, 27) Pavua Yehowa kayi ne mukenji wa kutumina bena Isalele, Yehezekele uvua ne bua kushala kamama kayi ne bualu bua kuambila tshisamba atshi. Yehezekele uvua ne bua kuakula anu malu avua Yehowa musue ne anu pa dîba divuaye musue bua aambe. Bukamama bua Yehezekele buvua bumvuija ne: kavua ne bua kuambila bena Isalele mêyi avua ne diumvuija dia tshiprofete to.

Kasumbu ka mutentekedi ka lelu (bena Kristo bela manyi) nkadimuije bua kabutu ka Bukua-Buena-Kristo, budi buikale tshimfuanyi tshia Yelushalema wa kale. Pikala “dikenga dinene” ne bua kutuadija ne pabutuladi “Babulona Munene,” nsangilu wa bitendelelu bia dishima bia buloba bujima, kasumbu ka Yehezekele muela manyi kakakuikala ne tshia kuamba tshikuabu pa bidi bitangila nshikidilu wa Bukua-Buena-Kristo, budi tshitupa tshinene tshia nsangilu eu wa bitendelelu bia dishima.​—Matayo 24:21; Buakabuluibua 17:1, 2, 5.

Bushuwa, dituku nedilue dikala bashadile bela manyi ne balunda babu ne bua kulua tumama, kabayi ne tshintu tshikuabu tshia kuambila Bukua-Buena-Kristo nansha. Bualu ebu nebuenzeke pikala “nsengu dikumi” ne “nyama wa luonji” ne bua kuvuija Babulona Munene tshintu tshia patupu ne butaka. (Buakabuluibua 17:16) Kadi bualu ebu kabuena buleja ne: bena Kristo nebikale tumama tua bushuwa etu to. Anu mudibu benza mpindieu, nebatumbishe Yehowa ne nebakule bualu buende dituku dionso ne “mu bikondo bionso.”​—Musambu 45:17; 145:2.