Mvese idi kuulu ne idi kuinshi kua mvese eu idi ituambuluisha bua kumvua ne: Paulo uvua wakula bua mukenji udi utangila tshivua Nzambi mulongolole anu bu mutudi tubimona mu Bible.

Tutu misangu ya bungi tutela Ebelu 4:12 mu mikanda yetu bua kuleja ne: Bible udi ne bukole bua kushintulula nsombelu wa bantu, ne ke mudibi. Kadi, bidi bikengela tumanye tshivua Paulo wakuila pavuaye mufunde mêyi adi mu Ebelu 4:12. Uvua ukankamija bena Kristo bena Ebelu bua kueleshangana diboko bua kukumbaja malu avua Nzambi mulongolole. A bungi a kudiwu avua mu mifundu ya tshijila. Paulo uvua mufile tshilejilu tshia bena Isalele bavua Nzambi mupatule mu bupika mu Ejipitu. Bavua ne ditekemena dia kubuela mu buloba bulaya ‘muvua mabele ne buitshi bia bungi’ muvuabu mua kuikala mu dikisha dilelela.​—Ekesode 3:8; Dutelonome 12:9, 10.

Ebu buvua bualu buvua Nzambi mulongolole. Kadi bena Isalele bakabenga buludiki bua Yehowa ne kabavua baleje ditabuja to, nunku ba bungi ba kudibu kabakabuela mu dikisha adi to. (Nomba 14:30; Yoshua 14:6-10) Nansha nanku, Paulo wakaleja kabidi ne: “dilaya dia kubuela mu dikisha” dia Nzambi ditshivua anuku. (Ebelu 3:16-19; 4:1) “Dilaya” edi didi bushuwa tshitupa tshia malu adi Nzambi musokolole pa bidi bitangila tshidiye mulongolole. Anu bu bena Kristo bena Ebelu, tudi mua kubala malu adi akula bua tshidi Nzambi mulongolole etshi ne kueleshangana diboko bua kutshikumbaja. Bua kuleja mudi dilaya edi dishindamene mu Mifundu minsantu, Paulo wakatela mêyi a mu Genese 2:2 ne a mu Musambu wa 95:11.

Bidi bitulenga ku muoyo bua kumona ne: ‘kutshidi dilaya dia kubuela mu dikisha’ dia Nzambi. Tudi batuishibue ne: tshidi Bible ulongesha bua dibuela mu dikisha dia Nzambi netshikumbane, ne tukadi tuenza malu adi akengedibua bua kubuela mu dikisha edi. Katuena tuenza nunku patudi tutumikila Mikenji ya Mose anyi patudi tuenza malu mimpe anu bua kuanyishibua kudi Yehowa to. Kadi tudi tueleshangana diboko ne disanka bua kukumbaja tshidi Nzambi mulongolole ne tutungunuka ne kuenza nunku bualu tudi ne ditabuja kudiye. Bantu ba bungi pa buloba bujima mbatuadije kulonga Bible ne malu adi Nzambi musokolole pa bidi bitangila tshidiye mulongolole. Ebi mbisake ba bungi ba kudibu bua kushintulula nsombelu wabu, kuleja ditabuja diabu ne kutambula. Mushindu udibu bashintuluke udi uleja patoke ne: “dîyi dia Nzambi didi ne muoyo ne bukole.” Malu adi Nzambi musokolole mu Bible pa bidi bitangila tshidiye mulongolole mmashintulule nsombelu wetu, ne neatungunuke ne kuikala ne bukole mu nsombelu wetu.