▪ Kudi bualu budi bujadika ne: Yezu wakalua Muakuidi munene pakabatijibuaye mu 29 B.B. Mbualu kayi abu? Pakabatijibua Yezu, wakadifila bu mulambu pa tshioshelu tshia mu tshimfuanyi tshivua tshileja “disua” dia Nzambi. (Gal. 1:4; Eb. 10:5-10) Bu muvua tshioshelu tshia mu tshimfuanyi etshi tshienjibue katshia anu dîba divua Yezu mubatijibue, ntempelo munene wa mu nyuma udi ne bua kuikala pende muenjibue dîba adi. Ntempelo eu udi tshimfuanyi tshia malu adi Yehowa mulongolole bua ntendelelu wende mukezuke, adi mashindamene pa mulambu wa kupikulangana nawu. Tshioshelu ke tshintu tshinene tshia mu ntempelo wa mu nyume au.​—Mat. 3:16, 17; Eb. 5:4-6.

Bu mukavuaku ntempelo munene wa mu nyuma, bivua bikengela kuikale muakidi munene bua kuenzamu mudimu. Bua kukubaja dijinga adi, ‘bakela [Yezu] manyi a nyuma muimpe ne bakamupesha bukole.’ (Bien. 10:37, 38; Mâko 1:9-11) Kadi ntshinyi tshidi tshitujadikila ne: bakateka Yezu Muakuidi munene kampala kua kufuaye ne kubishibuaye? Tshilejilu tshia Alona ne bakuidi banene bakalua panyima pende netshituambuluishe bua kuandamuna lukonko elu.

Bilondeshile mikeji ya Mose, anu muakuidi munene ke uvua mua kubuela muaba mutambe tshijila wa mu ntenta wa tshitendelelu anyi kubuela muaba mutambe tshijila wa mu ntempelo wakaluabu kuenza pashishe. Bavua bele tshilamba tshivua tshikosolola muaba mutambe tshijila ne muaba wa tshijila. Muakuidi munene uvua ubuela uye dia muamua dia tshilamba atshi anu Dituku dia dibuikila dia mpekatu. (Eb. 9:1-3, 6, 7) Anu muvuabu bele Alona ne bakuidi banene bakalua panyima pende manyi kumpala kua kupitshilabu “mu tshilamba tshia kukosolola natshi” tshiena dîna tshia ntenta wa tshitendelelu, bavua ne bua kuikala bateke pende Yezu Muakuidi munene wa ntempelo munene wa mu nyuma wa Yehowa kumpala kua kufuaye ne pashishe kupitshila “mu tshilamba tshia kukosolola natshi, mbuena kuamba ne: mubidi wende,” bua kuya mu diulu. (Eb. 10:20) Ke bualu kayi mupostolo Paulo wakakula bua Yezu wamba mudiye mulue “muakuidi munene” ne pashishe ubuela “mu ntenta mutambe bunene ne mutambe bupuangane udi kayi muenza ku bianza” ne mu “diulu muine.”​—Ebelu 9:11, 24.

Kakuena dishilangana pankatshi pa dîba divuabu bajadike tshipungidi tshipiatshipia ne dîba divuabu batshibanjije to. Bua tshinyi tudi tuamba nanku? Pavua Yezu muye mu diulu ne muleje tatuende mushinga wa mulambu wende mupuangane bua bualu buetu, wakenza bualu bua kumpala bua ku malu asatu avua ne bua kujadika tshipungidi tshipiatshipia anyi kutshipesha bukole. Malu amue amue au ke avua mabanjije kabidi tshipungidi tshipiatshipia anyi matshipeshe bukole. Mmalu kayi au?

Bua kumpala: Yezu wakamueneka kumpala kua Yehowa. Buibidi: wakaleja Yehowa mushinga wa mulambu wende, ne bua ndekelu: Yehowa wakitaba mushinga wa mashi avua Yezu muele panshi au. Tshipungidi tshipiatshipia katshivua mua kubanga mudimu watshi pavua malu asatu aa kaayi manji kuenzeka to.

Bible kena utuambila dîba menemene divua Yehowa muitabe mushinga wa mulambu wa Yezu to. Ke bualu kayi tuetu petu katuena mua kuamba kujadika dîba divuabu bajadike tshipungidi tshipiatshipia ne batshipeshe bukole to. Kadi tshitudi bamanye ntshia ne: Yezu wakabanda mu diulu matuku dikumi kumpala kua Pentekoste. (Bien. 1:3) Mu matuku dikumi au, wakaleja Yehowa mushinga wa mulambu wende, Yehowa kuwitabaye. (Eb. 9:12) Bualu buvua buenzeke patoke mu Pentekoste budi bujadika ne: tshipungidi tshipiatshipia tshivua tshibange mudimu watshi. (Bien. 2:1-4, 32, 33) Dîba adi ke diakatuadijatshi mudimu watshi.

Mu mêyi makese, bakajadika tshipungidi tshipiatshipia ne kutshibanjijabu pakavua Yehowa mumane kuitaba mushinga wa mashi avua Yezu muele panshi ne mubueje bela manyi mu tshipungidi atshi. Nunku tshipungidi tshipiatshipia tshiakabanga mudimu ne Yezu Muakuidi munene, uvua wenza mudimu bu Mutuangaji watshi.​—Eb. 7:25; 8:1-3, 6; 9:13-15.