Bia muomumue, tuetu bonso tudi basombele muaba udi “tshipepele” tshibi tshitambe tshienda tshilua, tshivua Yezu mubikile ne: “dikenga dinene.” (Matayi 24:21) Kakuena muaba utudi mua kuya bua kusokoma dikenga edi to. Kadi tudi mua kuenza bualu kampanda bua kudikuba. Mbualu kayi abu?

Yezu Kristo wakaleja tshia kuenza mu muyuki wende wa pa mukuna pakambaye ne: “Nunku, tungunukayi ne kukeba tshia kumpala Bukalenge [bua Nzambi] ne buakane buende.” (Matayi 6:33) Mmunyi mutudi mua kuenza bualu ebu?

Keba tshia kumpala Bukalenge bua Nzambi. Bidi biumvuija ne: tudi ne bua kuangata malu a Bukalenge bua Nzambi ne mushinga kupita tshintu kayi tshionso. (Matayi 6:25, 32, 33) Bua tshinyi? Bualu bantu kabena mua kujikija ntatu ya bukua bantu to. Anu Bukalenge bua Nzambi ke budi mua kuyijikija.

Keba buakane bua Nzambi. Tudi ne bua kudienzeja ne muetu muonso bua kutumikila mikenji miakane ya Nzambi ne mêyi ende manene. Bua tshinyi? Bualu tuetu badiangatshile mapangadika a tshidi tshimpe ne tshidi tshibi netupete bipeta bibi. (Nsumuinu 16:25) Tuetu batumikile mikenji ya Nzambi, netumusankishe ne netuikale ne nsombelu wa disanka.​—Yeshaya 48:17, 18.

Tungunuka ne kukeba tshia kumpala Bukalenge ne buakane bua Nzambi. Yezu wakadimuija ne: bamue bantu bavua mua kudilekelela ku malu a panu bela meji ne: bobu bapete  makuta a bungi nebikale mu bukubi. Bakuabu badi mua kufila dîba diabu ne bukole buabu bua kujikija ntatu yabu ya ku dituku ne ku dituku, bibapangisha ne dîba dia kukeba Bukalenge bua Nzambi.​—Matayi 6:19-21, 25-32.

Kadi Yezu wakalaya ne: bantu badi batua Bukalenge bua Nzambi mpanda nebapete bintu bidibu nabi dijinga mpindieu ne masanka a tshiendelele mu matuku atshilualua.​—Matayi 6:33.

Nansha muvua bayidi ba Yezu ba mu bidimu lukama bia kumpala bakeba tshia kumpala Bukalenge ne buakane bua Nzambi, ntatu yonso ne makenga kabiakajika tshikondo tshivuabu ne muoyo to. Kadi bavua mu bukubi. Mushindu kayi?

Bavua batumikila mikenji miakane ya Nzambi, ne bivua bibakuba ku ntatu ivua bantu bavua kabayi bamanye tshivua Nzambi wamba bapeta. Ditabuja diabu dikole dia ne: Bukalenge buvua ne bua kulua divua dibambuluishe bua kutantamena nansha ntatu mikole menemene. Nzambi wakabapesha “bukole budi bupite bua pa tshibidilu” bua batantamene ntatu yabu.​—2 Kolinto 4:7-9.

Bena Kristo ba mu bidimu lukama bia kumpala, bakatumikila dîyi dituma dia Yezu dia kukeba tshia kumpala Bukalenge. Bakayisha lumu luimpe lua Bukalenge abu mu tshitupa tshijima tshia buloba tshivuabu basombele. (Kolosayi 1:23) Kudiku bantu bakuabu badi baluyisha pabu lelu anyi?

Eyowa! Bantemu ba Yehowa mbamanye ne: nkushale tshikondo tshîpi menemene bua Bukalenge bua Nzambi kubutulabu ndongoluelu wa malu eu. Ke bualu kayi badi benza tshionso tshidibu mua kuenza bua kutumikila mêyi a Yezu a ne: “Nebayishe lumu luimpe elu lua Bukalenge pa buloba bujima budi bantu basombele bua luikale bujadiki kudi bisamba bionso, ne pashishe, nshikidilu nealue.”​—Matayi 24:14.

Newitabaku lumu luimpe elu anyi? Tudi tukulomba bua widikije bantu ba mu bidimu lukama bia kumpala ba mu Makedonia mu tshimenga tshia Beloya. Pakumvuabu lumu luimpe lua Bukalenge kudi mupostolo Paulo, bakitaba mukenji wende au “ne luzuku lukole.” Pashishe ‘bakakonkonona Mifundu bimpe menemene’ bua kujadika ne: malu avuabu balonge avua malelela, ne bakaatumikila.​—Bienzedi 17:11, 12.

Udi mua kuenza pebe bia muomumue. Paudi ukeba tshia kumpala Bukalenge ne buakane bua Nzambi, neupete muaba wa kusokomena ne newikale mu ditalala ne bukubi bia tshiendelele mu matuku atshilualua.