Mwanda Waka Tusakilwa Bulopwe bwa Leza?
Ku ngalwilo kwa mānga ya muzo wa muntu, Umpangi wetu wa dijina dya bu Yehova, ye wādi Muludiki umo kete. Wādi uludika na buswe. Wālongele kīkalo kilumbuluke, budimi bwa Edena, mwanda wa bantu bekale’mo. Wēbatūdīle’mo ne byakudya bivule. Kadi wāpele bantu mwingilo wa mvubu wa kwingila. (Ngalwilo 1:28, 29; 2:8, 15) Bantu bādi ba kwikala mu ndoe shi bāendelele nyeke kuludikwa na Leza wa buswe.
Bantu babajinji bāpelele Leza ekale Muludiki wabo
Bible ulombola’mba mwikeulu umo ntomboki, wāityilwe mwenda mafuku bu Satana Dyabola, wālwile na lupusa lwa Leza lwa kubikala. Wālangile amba bantu bakekala na nsangaji pa kubulwa kwendejibwa ne kuludikwa na Leza. Ino yō, bambutwile betu babajinji ba Adama ne Eva, bālondele milangwe ya Satana, bātombokela Leza.—Ngalwilo 3:1-6; Kusokwelwa 12:9.
Ba Adama ne Eva pa kupela Leza bu Muludiki wabo, bājimije Paladisa kīkalo kyabo ne lukulupilo lwa kwikala’ko babwaninine nyeke kadi bakomo nkē. (Ngalwilo 3:17-19) Butyibi bwabo bwāletēle bana bobābutwile makambakano mwenda mafuku. Bible unena’mba pa mwanda wa bubi bwa Adama ‘bubi bwatwelele mu ino ntanda ne lufu kupityila ku bubi.” (Bene Loma 5:12) Bubi i bulete ne ano makambakano makwabo: ‘Muntu ubikalanga muntu mwanda wa kumusanshija.’ (Musapudi 8:9) Ko kunena’mba, shi bantu beendeja abo bene, kulupukanga makambakano mavule.
BANTU ABASHILULA KULUDIKA
Nimiloda wātombokēle Yehova
Muntu mubajinji kubikala utelelwe mu Bible i Nimiloda. Kadi wātombokēle buludiki bwa Yehova. Tamba mu mafuku a Nimiloda, bantu ba bukomo bengidijanga lupusa lwabo bibi. Pano kepadi kintu kya myaka 3 000, Mulopwe Solomone wālembele amba: “Namwene impolo ya bamweshibwa malwa, ino kekwadipo muntu wa kwibasenga. Kadi boba bebamwesha malwa badi na bukomo.”—Musapudi 4:1.
Bintu ke bishintyilepo kufika ne dyalelo. Mu 2009, dibuku dimo dya Bumo bwa Mizo dyanenene amba, muludikilo mubi “ye ao uleta bintu byonso bibi mu bantu.”
KITATYI KYA KULONGA KINTU!
Ntanda isakilwa baludiki bayampe ne buludiki buyampe. Kadi ye bilaile ne Umpangi wetu!
Enka ne maludiki mayampe a bantu i makomenwe kupwa makambakano a bantu
Leza i mutūle’ko Bulopwe, nansha buludiki, busa kupingakena pa malopwe onso a bantu, kadi “abo kete bukemananga nyeke.” (Danyele 2:44) Buno bo Bulopwe bulombanga midiyo ne midiyo ya bantu. (Mateo 6:9, 10) Inoko Leza kakendejapo buno bulopwe aye mwine. I mutonge muntu wāikele pano pa ntanda ekale Mulopwe wabo. Lelo Leza i mutonge ani?
Tala'po Bidi ne Bino:
BIPANGUJO BYA MU BIBLE BILONDOLWELWE
Ndoe Pano pa Ntanda—Ikekala’po Namani?
Leza i mulaye kuleta ndoe pa ntanda kupityila ku Bulopwe bwandi. Tala mwasa kulongela.
BIPANGUJO BYA MU BIBLE BILONDOLWELWE
Le Bulopwe bwa Leza Budi mu Mutyima Obe?
Le i bika bisaka kunena Bible panena’mba “bulopwe bwa Leza budi munda mwenu”?
