Mu bitatyi byālembelwe Bible, kalama wādi upelwe kutala njibo nansha bintu bya muntu mukwabo. Kishima kya mu Kihebelu ne mu Kingidiki kyalamwinwe bu “kalama” kifunkila kyaba kimo pa mutadi nansha muntu ulama njibo.

Yosefa mwanā Yakoba paādi bu mupika mu Edipito, wāikele bu kalama wa njibo ya mfumwandi. Na bubine mfumwandi mwine Edipito “wāshīla Yosefa kulama byonso byaādi nabyo.” (Ngo. 39:2-6) Mwenda mafuku Yosefa paāikele ke mwendeji mu Edipito, nandi wātudile’ko kalama wa kulama njibo yandi.​—Ngo. 44:4.

Mu mafuku a Yesu, benē matanda bādi bavudile kushikata kulampe na madimi abo. O mwanda bano benē matanda bādi batūla batulama ba kutala mingilo ingilwa difuku ne difuku na bengidi bādi bengila ku ano madimi.

Le i ani wādi ubwenye bisakibwa bya kwingila bu kalama? Culumella, mulembi mwine Loma wa mu myaka katwa kabajinji, wādingile amba mupika wādi utūlwa bu mutadi nansha bu kalama wādi ufwaninwe “bidi kutompibwa shi uyukile mingilo senene.” Wādi ufwaninwe kwikala “na ngikadila imulengeja engidije lupusa senene, katalepo bengidi kilomonyeka kadi wampikwa kasusu.” Ubweja’ko amba: “Kikwabo kyasakilwa kipityile byonso i kino​—kafwaninwepo kwimona bu uyukile byonso, ino ufwaninwe nyeke kukimba kuyukila’ko bipya.

Kinenwa kya Leza i kingidije kishima kalama mu muneneno wa kyelekejo mwanda wa kwisambila pa mingilo imoimo ingilwa mu kipwilo kya bwine Kidishitu. Kimfwa, mutumibwa Petelo ukankamika bene Kidishitu bengidije byabuntu bibapele Leza ‘mwanda wa kwiingidila abo bene na bene byobadi batulama balumbuluke ba kanye ka ku buntu bitupu ka Leza.’​—1 Pe. 4:10.

Yesu wāingidije kimfwa kya kalama mu kyelekejo kidi mu Luka 16:1-8. Kadi, mu bupolofeto bwisambila pa kiyukeno kya kitatyi kya kwikala’po kwandi bu Mulopwe, Yesu wākulupīje balondi bandi amba ukatūla’ko “umpika mukōkele ne mudyumuke” nansha’mba “kalama mukōkele.” Mwingilo mukatampe upelwe uno kalama i wa kuleta byakudya bya ku mushipiditu kyaba ne kyaba ku balondi ba Kidishitu mu kitatyi kya ku mfulo. (Mat. 24:45-47; Luka 12:42) Tufwijanga’ko mwanda tudi mu bantu batambula mabuku akomeja lwitabijo ateakanya kalama mukōkele ne kwiatuma ntanda yonso.