Difuku dimo Yesu wānenene amba: “Nsangaji ya kupāna itabukile ya kupebwa.” (Bilongwa 20:35) Buno bubine bwa kyalwilo butala ne kipwano kyotupwene na Yehova. Mwanda waka? Yehova i mwitupe byabuntu bivule bine bituletela nsangaji, ino tukokeja kutana’nka ne nsangaji mikatampe na kupa Yehova kyabuntu. Le i kyabuntu’ka kyotubwanya kupa Yehova? Nkindi 3:9 unena’mba: “Lēmeka Yehova na bintu byobe bya bulēme.” Mu ‘bintu byetu bya bulēme’ mubadilwa kitatyi, bwino, bukomo, ne bituntwa byetu. Shi twingidija bino bintu mwanda wa kwendeleja butōtyi bwa bine kumeso, tupanga Yehova kyabuntu, kadi kulonga namino kwituletelanga nsangaji mikatampe.

Pa mwanda utala bintu byetu bya ku ngitu, le i bika biketukwasha tuleke kuvulaminwa kupa Yehova kyabuntu kyetu? Mutumibwa Polo wālombwele bene Kodinda ‘balee’ko kantu kampanda’ bu kyabuntu. (1 Kodinda 16:2) Le ukalonga namani shi usaka kuyuka miswelo mivule idi’ko mu wenu mwaba ya mwa kutūdila byabuntu? Tala’po bidi kapango kalonda’ko.

Byabuntu bya pa Entelenete kebibwanyapo kutūlwa mu matanda onso. Inoko, miswelo mikwabo ya mwa kutūdila’byo itanwa pa Entelenete. Mu matanda amo, padi kishinte kileta malondololo ku bipangujo bivudile kwipangulwa pa mwanda utala byabuntu.