KIFUNDWA 8
Mwanda Waka Leza Ulekele’ko Bubi ne Masusu?
1. Bubi bwaānjile muswelo’ka?
Leza i muleke bantu baludike mu kitatyi kampanda, mwa kulombwela’mba bantu kebabwanyapo kupwija makambakano abo
Bubi bwaānjile pano pa ntanda kitatyi kyābepele Satana bubela bubajinji. Satana wādi bidi mwikeulu mubwaninine, ino “kāimanijepo mu bubine.” (Yoano 8:44) Wātamije mutyima wa kusaka kutōtwa, ako kuntu kufwaninwe enka Leza kete. Satana wāongwele Eva, mwana-mukaji mubajinji ne kumutonona amukōkele aye kupita’ko kukōkela Leza. Adama nandi wēlunga kudi Eva na kutombokela Leza. Byālongele Adama byo biletele masusu ne lufu.—Tanga Ngalwilo 3:1-6, 19.
Satana pa kunena Eva aleke kukōkela Leza, i kushilula kwaāshilwile butomboki bwa kutombokela bubikadi bwa Leza, nansha kifuko kyandi kya bu Mwine wa Peulu Mwine. Bavule i belunge kudi Satana na kupela kubikalwa na Leza. Mu uno muswelo, Satana wāikala ke “mulopwe wa ino ntanda.”—Tanga Yoano 14:30; 1 Yoano 5:19.
2. Le bupangi bwa Leza i bukankalwe?
Byonso bilongele Leza i bibwaninine. Leza wāpangile bantu ne bamwikeulu na bukomo bwa kumukōkela mu muswelo mubwaninine. (Kupituluka 32:4, 5) Leza wētupangile na bwanapabo bwa kutonga kulonga kiyampe nansha kibi. Buno bwanapabo bwitupanga mukenga wa kulombola motusanshilwe Leza.—Tanga Yakoba 1:13-15; 1 Yoano 5:3.
3. Mwanda waka Leza ukilekele masusu?
Mwanda waka Yehova i muleke mu bula bwa kitatyi kampanda butomboki bobatombokēle bubikadi bwandi? I mwanda wa kulombola’mba bukomo bwa kwiludika kwampikwa Leza kebukendekapo. (Musapudi 7:29; 8:9) Mānga ya muzo wa muntu mu bula bwa myaka 6 000 ibingija uno mwanda. Buludiki bwa bantu i bukomenwe kupwija mavita, butapani, bukondame, ne bipupo bya misongo.—Tanga Yelemia 10:23; Loma 9:17.
Kwishila na buludiki bwa bantu, boba betabija buludiki bwa Leza bamwenanga’mo. (Isaya 48:17, 18) Panopano ponka, Yehova usa kufudija umbikalo wa muntu. Enka boba batonga kuludikwa na Leza kete, bo bakapyana ntanda.—Isaya 11:9; Tanga Danyele 2:44.
Tala video Mwanda Waka Leza Ulekele’ko Masusu?
4. Le kitūkijetyima kya Leza kitukwasha tulonge bika?
Satana wānenene amba i kutupu muntu ukengidila Yehova ku buswe bitupu. Le abe ukimba kumubepulula? Bine ubwanya! Kitūkijetyima kya Leza kitukwasha tulombole shi tusaka kuludikwa na Leza nansha na muntu. Byotulonga mu būmi byo bilombola byotutongele.—Tanga Yoba 1:8-12; Nkindi 27:11.
5. Le tukatonga namani Leza bu Mulopwe wetu?
Byotutonga bilombola shi tusakanga kubikalwa na Leza
Tukatonga Leza bu Mulopwe wetu na kukimba ne kutwela mu kipwilo kya bine kilonda Kinenwa kya Leza, Bible. (Yoano 4:23) Pamo bwa Yesu, netu tukokeja kupela kubikalwa na Satana, na kuleka kutwela mu politike ne mu mavita.—Tanga Yoano 17:14.
Satana wingidijanga bukomo bwandi mwanda wa kutumbija bilongwa bibi kadi bileta musala. Shi tupele’byo, balunda ne babutule betu bamo bakokeja kwitusepa ne kwitulwa. (1 Petelo 4:3, 4) Pano bitulomba kutonga. Le tukapwana na bantu baswele Leza? Le tukakōkela bijila byandi biyampe kadi bya buswe? Shi tulonge namino, tubabepulula bubela bwa Satana bwa amba shi muntu watanwa na bikoleja kabwanyapo kukōkela binena Leza.—Tanga 1 Kodinda 6:9, 10; 15:33.
Buswe bwa Leza bwaswele bantu bwitukulupija’mba bubi ne masusu bisa kupwa. Bonso balombola’mba betabije uno mwanda, bakamona būmi bwa nyeke pano pa ntanda.—Tanga Yoano 3:16.
