Mu Bible, kishima kyalamwinwe bu “lusangukilo” i kitambe ku kishima kya Kingidiki anastasis, kishintulula “kwimana” nansha “kwimana monka.” Muntu musanguke wimananga mu lufu, wajokela ku būmi enka mwaadi wikadile.—1 Bene Kodinda 15:12, 13.

 Nansha kishima “lusangukilo” byokekidipo mu Bisonekwa bya Kihebelu, bivudile kwitwa bu Kipwanino Kikulu, inoko mudi bufundiji bwa lusangukilo. Kimfwa, Leza wālaile kupityila kudi mupolofeto Hosea amba: “Nkebakūla ku bukomo bwa Kibundu; nkebapandija ku lufu.”​—Hosea 13:14; Yoba 14:13-15; Isaya 26:19; Danyele 12:2, 13.

 Le bantu bakasangwilwa kwepi? Bantu bamo basangwilwanga mūlu mwanda wa kubikala na Kidishitu bu balopwe. (2 Bene Kodinda 5:1; Kusokwelwa 5:9, 10) Bible wilwitanga bu “lusangukilo lubajinji” ne bu “lusangukilo . . . lukabadikila,” bishima bilombola’mba kukekala lusangukilo lukwabo. (Kusokwelwa 20:6; Bene Fidipai 3:11) Luno lusangukilo lwa mfulo i lwa kukasangwilwa pano pa ntanda, lwine lukasangulwa bantu bavule.—Ñimbo ya Mitōto 37:29.

 Le bantu bakasangulwa namani? Leza wāpele Yesu bukomo bwa kusangula bafwe. (Yoano 11:25) Yesu ukajokejeja “boba bonso badi mu bibundu bivulukwa” ku būmi, muntu ne muntu na pa kumuyukila, ngikadila yandi, ne luté lwandi. (Yoano 5:28, 29) Boba bakasangwilwa mūlu bakekala na umbidi wa mushipiditu, ino boba bakasangwilwa pano pa ntanda na ngitu mikomo ya misunya, miyampe senene.—Isaya 33:24; 35:5, 6; 1 Bene Kodinda 15:42-44, 50.

 Le i bāni bakasangulwa? Bible unena’mba, “kukekalanga lusangukilo lwa boloke ne bakondame bene kumo.” (Bilongwa 24:15) Mu boloke mubadilwa bantu ba kikōkeji, kimfwa Noa, Sala, ne Abalahama. (Ngalwilo 6:9; Bahebelu 11:11; Yakoba 2:21) Mu bakondame mubadilwa bantu kebādipo balēmekele misoñanya ya Leza pa mwanda wa kubulwa mukenga wa kwifunda’yo ne kwiilonda.

 Inoko, boba batokamine mu kulonga bibi kushinta mpika, kebakasangulwapo. Kitatyi kifwanga bano bantu, bonakananga lonso pampikwa lukulupilo lwa kujokela ku būmi.—Mateo 23:33; Bahebelu 10:26, 27.

 Le lusangukilo lukekala’ko kitatyi’ka? Bible wālaile amba lusangukilo lwa kwenda mūlu lwādi lwa kwikala’ko mu kitatyi kya kwikala’po kwa Kidishitu, kine kyashilwile mu 1914. Lusangukilo lwa kukekala’ko pano pa ntanda lukalongeka mu Umbikalo wa Yesu Kidishitu wa Myaka Kanunu, kitatyi kikālamunwa ntanda ke paladisa.​—Luka 23:43; Kusokwelwa 20:6, 12, 13.

 Mwanda waka i byendele’mo kukulupila mu lusangukilo? Bible unena myanda mivule itala nsangukilo kitema, kadi yonso yābingijibwe na batumoni bēmwenine na meso. (1 Balopwe 17:17-24; 2 Balopwe 4:32-37; 13:20, 21; Luka 7:11-17; 8:40-56; Yoano 11:38-44; Bilongwa 9:36-42; 20:7-12; 1 Bene Kodinda 15:3-6) Kusangula kobāsangwile Lazalasa kudi Yesu i kwa kutendelwa, mwanda Lazalasa wāfwile ke papite ne mafuku aná, kadi Yesu wālongele kino kingelengele ku meso a kibumbo kya bantu. (Yoano 11:39, 42) Enka ne balwana na Yesu kebābwenyepo kupatana bubine bwa ino myanda, o mwanda bākutyile kitumba kya kwipaya Yesu ne Lazalasa mwine.—Yoano 11:47, 53; 12:9-11.

 Bible unena’mba Leza udi na bukomo bwa kusangula bafwe ne amba usakanga kwibasangula. Ulamine mu luté lwandi myanda yonso ya muntu wakasangula na bukomo bwandi bukatakata. (Yoba 37:23; Mateo 10:30; Luka 20:37, 38) Leza ubwanya kwalwija bafwe ku būmi, kadi usakanga kwibalwija’ko! Pa kwisambila pa lusangukilo lwiya’ko, Bible unena pangala pa Leza amba: “Ukabilanga bininge mingilo ya makasa obe.”—Yoba 14:15.

Milangwe ya bubela itala lusangukilo

 Lufumo: Lusangukilo i kwitana monka kwa muya ne ngitu.

 Bubine: Bible ufundija’mba muya i muntu mutuntulu, ke kipindipo kishalanga kyūmi shi muntu wafu. (Ngalwilo 2:7; Ezekyele 18:4) Muntu musangulwe ketanangapo monka na muya wandi; i mupangululwe bu muya mūmi.

 Lufumo: Bantu bamo basangulwanga ne kwipaibwa kiponka na ponka.

 Bubine: Bible unena’mba “boba badi balongalonga bibi” bakapebwa “lusangukilo lwa butyibi.” (Yoano 5:29) Inoko buno butyibi bukemanina pa byobakalonga pa kupwa kusangulwa, ke pa byobālongelepo pa kala. Yesu wānenene amba: “Bafwe bakevwana diwi dya Mwanā Leza, kadi boba badi batele’ko mutyima bakekala bōmi.” (Yoano 5:25) Boba ‘bakata mutyima’ ku kukōkela bintu byobakefunda pobakasangulwa, majina abo akalembwa mu “muvungo wa būmi.”—Kusokwelwa 20:12, 13.

 Lufumo: Kitatyi kikasangulwa muntu, ukekala’nka na umbidi waādi nao kumeso kwa kufwa.

 Bubine: Shi muntu wafu umbidi wandi onekanga.—Musapudi 3:19, 20.