ໂຢຊາຟາດວາງໃຈໃນພະເຢໂຫວາ
ບົດ 67
ໂຢຊາຟາດວາງໃຈໃນພະເຢໂຫວາ
ເຈົ້າຮູ້ບໍວ່າຊາຍເຫຼົ່ານີ້ຄືຜູ້ໃດແລະພວກເຂົາພວມເຮັດຫຍັງ? ພວກເຂົາພວມອອກໄປສູ້ຮົບແລະພວກຜູ້ຊາຍທີ່ຢູ່ແຖວໜ້າພວມຮ້ອງເພງ. ແຕ່ເຈົ້າອາດຈະຖາມວ່າ: ‘ເປັນຫຍັງພວກນັກຮ້ອງບໍ່ມີດາບຫຼືຫອກເພື່ອໃຊ້ໃນການສູ້ຮົບ?’ ຈົ່ງໃຫ້ເຮົາເບິ່ງ.
ໂຢຊາຟາດເປັນກະສັດຂອງສອງກະກູນແຫ່ງລາຊະອານາຈັກຍິດສະລາເອນ. ທ່ານມີຊີວິດຢູ່ໃນສະໄໝດຽວກັນກັບກະສັດອາກາບແລະເຢຊາເບນແຫ່ງອານາຈັກ 10 ກະກູນຝ່າຍເໜືອ. ແຕ່ກະສັດໂຢຊາຟາດເປັນກະສັດທີ່ດີ ແລະກະສັດອາຊາພໍ່ຂອງທ່ານເປັນກະສັດທີ່ດີດ້ວຍ. ດັ່ງນັ້ນຜູ້ຄົນແຫ່ງອານາຈັກພາກໃຕ້ 2 ກະກູນມີຄວາມສຸກຢູ່ດີກິນດີເປັນເວລາຫຼາຍປີ.
ແຕ່ໃນຂະນະນີ້ມີບາງຢ່າງເກີດຂຶ້ນທີ່ເຮັດໃຫ້ຜູ້ຄົນມີຄວາມຢ້ານ. ຜູ້ສົ່ງຂ່າວມາລາຍງານແກ່ໂຢຊາຟາດວ່າ: ‘ກອງທັບໃຫຍ່ຈາກປະເທດໂມອາບ ອາມໂມນ ແລະພວກຄົນຢູ່ພູເຊອີເຣພວມມາສູ້ຮົບກັບທ່ານ.’ ຊົນຍິດສະລາເອນຫຼວງຫຼາຍທ້ອນໂຮມກັນຢູ່ທີ່ເຢຣຶຊາເລມສະແຫວງຫາພະເຢໂຫວາເພື່ອຂໍຄວາມຊ່ວຍເຫຼືອ. ພວກເຂົາໄປທີ່ວິຫານ ແລະໂຢຊາຟາດກໍ່ອະທິດຖານຢູ່ທີ່ນັ້ນ: ‘ໂອ້ພະເຢໂຫວາພະເຈົ້າຂອງພວກຂ້າພະເຈົ້າ ພວກຂ້າພະເຈົ້າບໍ່ຮູ້ຈັກຈະຕ້ອງເຮັດປະການໃດ. ພວກຂ້າພະເຈົ້າບໍ່ມີແຮງທີ່ຈະຕໍ່ສູ້ກອງທັບອັນໃຫຍ່ນີ້. ພວກຂ້າພະເຈົ້າສະແຫວງຫາຄວາມຊ່ວຍເຫຼືອຈາກພະອົງ.’
ພະເຢໂຫວາຟັງຄຳອະທິດຖານນັ້ນ ພະອົງໃຫ້ຄົນນຶ່ງທີ່ເປັນຜູ້ຮັບໃຊ້ຂອງພະອົງບອກຜູ້ຄົນວ່າ: ‘ການສູ້ຮົບບໍ່ແມ່ນຂອງພວກເຈົ້າ ແຕ່ເປັນຂອງພະເຈົ້າ ພວກເຈົ້າຈະບໍ່ຕ້ອງສູ້ຮົບ ຈົ່ງໄປແລະຢືນຢູ່ທີ່ນັ້ນແລະເຫັນຄວາມພົ້ນແຕ່ພະເຢໂຫວາ.’
ດັ່ງນັ້ນຕອນເຊົ້າມື້ຕໍ່ມາໂຢຊາຟາດບອກຜູ້ຄົນວ່າ: ‘ຈົ່ງວາງໃຈໃນພະເຢໂຫວາ!’ ຈາກນັ້ນທ່ານໃຫ້ພວກນັກຮ້ອງເພງລຽນແຖວຢູ່ຕໍ່ໜ້າພວກທະຫານຂອງທ່ານ ແລະພວກເຂົາເດີນຂະບວນອອກໄປພ້ອມທັງຮ້ອງເພງສັນລະເສີນແດ່ພະເຢໂຫວາ. ເຈົ້າຮູ້ບໍວ່າມີສິ່ງໃດໄດ້ເກີດຂຶ້ນເມື່ອພວກເຂົາເຂົ້າໄປໃກ້ບ່ອນການເລວເສິກ? ພະເຢໂຫວາໄດ້ບັນດານໃຫ້ພວກທະຫານໂຈມຕີຂ້າຟັນກັນໃນທ່າມກາງພວກເຂົາເອງ. ແລະເມື່ອພວກຍິດສະລາເອນມາເຖິງ ທະຫານທຸກໆຄົນກໍ່ຕາຍໄປແລ້ວ!
ການທີ່ໂຢຊາຟາດວາງໃຈໃນພະເຢໂຫວານັບວ່າສະຫຼາດແມ່ນບໍ? ພວກເຮົາກໍ່ຈະເປັນຄົນສະຫຼາດຖ້າເຮົາວາງໃຈໃນພະເຢໂຫວາດ້ວຍ.
1 ກະສັດ 22:41-53; 2 ຂ່າວຄາວ 20:1-30.
