ກະສັດທີ່ດີອົງສຸດທ້າຍຂອງຍິດສະລາເອນ
ບົດ 73
ກະສັດທີ່ດີອົງສຸດທ້າຍຂອງຍິດສະລາເອນ
ໂຢເຊຍເຊມີອາຍຸພຽງແຕ່ແປດປີເທົ່ານັ້ນເມື່ອເພິ່ນໄດ້ຖືກແຕ່ງຕັ້ງເປັນກະສັດແຫ່ງສອງກະກູນພາກໃຕ້ຂອງຍິດສະລາເອນ. ນີ້ນັບວ່າອາຍຸນ້ອຍເກີນໄປທີ່ຄົນໃດຄົນນຶ່ງຈະເປັນກະສັດ. ດັ່ງນັ້ນຕອນທຳອິດມີບາງຄົນທີ່ມີອາຍຸສູງຊ່ວຍເພິ່ນໃນການປົກຄອງຊົນຊາດນັ້ນ.
ເມື່ອໂຢເຊຍເຊເປັນກະສັດໄດ້ເຈັດປີເພິ່ນເລີ່ມສະແຫວງຫາພະເຢໂຫວາ. ເພິ່ນຕິດຕາມຕົວຢ່າງຂອງກະສັດທີ່ດີຢ່າງກະສັດດາວິດ ໂຢຊາຟາດ ແລະເອເຊເກຍເຊເປັນຕົ້ນ. ເມື່ອເພິ່ນຍັງເປັນຄົນຫນຸ່ມນ້ອຍຢູ່ ໂຢເຊຍເຊໄດ້ເຮັດກິດຈະການຢ່າງນຶ່ງທີ່ນັບວ່າຕ້ອງມີໃຈກ້າຫານ.
ຊົນຍິດສະລາເອນສ່ວນຫຼາຍໄດ້ປະພຶດຊົ່ວເປັນເວລາດົນແລ້ວ. ພວກເຂົານະມັດສະການພະປອມ. ພວກເຂົາຂາບລົງຕໍ່ໜ້າຮູບພະຕ່າງໆ. ດັ່ງນັ້ນໂຢເຊຍເຊອອກໄປກັບພວກຂ້າລາຊະການຂອງເພິ່ນແລະເລີ່ມກຳຈັດການນະມັດສະການປອມອອກຈາກແຜ່ນດິນ. ງານນີ້ເປັນງານໃຫຍ່ເພາະວ່າຜູ້ຄົນຫຼວງຫຼາຍນະມັດສະການພະປອມ. ເຈົ້າຈະເຫັນໂຢເຊຍເຊແລະຂ້າລາຊະການຂອງເພິ່ນທີ່ນີ້ພວມທຸບຮູບພະໃຫ້ແຕກເປັນປ່ຽງໆ.
ຫຼັງຈາກນັ້ນ ໂຢເຊຍເຊຈັດຂ້າລາຊະການສາມຄົນໃຫ້ຄວບຄຸມການສ້ອມແປງວິຫານຂອງພະເຢໂຫວາ. ມີການຮິບໂຮມເງິນຈາກຜູ້ຄົນແລະມອບໃຫ້ຄົນເຫຼົ່ານີ້ຈ່າຍຄ່າງານທີ່ຈະຕ້ອງເຮັດ. ຂະນະທີ່ພວກເຂົາພວມເຮັດງານຢູ່ທີ່ວິຫານ ຫີນເກຍປະໂລຫິດຜູ້ໃຫຍ່ພົບສິ່ງສຳຄັນທີ່ສຸດສິ່ງນຶ່ງ. ນັ້ນຄືໜັງສືກົດໝາຍທີ່ພະເຢໂຫວາໃຫ້ໂມເຊຂຽນໄວ້ເປັນເວລາດົນແລ້ວ. ໜັງສືນີ້ຫາຍໄປເປັນເວລາຫຼາຍປີແລ້ວ.
ເຂົາໄດ້ນຳໜັງສືນັ້ນໄປໃຫ້ໂຢເຊຍເຊ ແລະເພິ່ນຈຶ່ງສັ່ງໃຫ້ອ່ານ. ຂະນະທີ່ຟັງຢູ່ ໂຢເຊຍເຊກໍ່ເຫັນວ່າຜູ້ຄົນບໍ່ໄດ້ຮັກສາກົດໝາຍຂອງພະເຢໂຫວາ. ເພິ່ນຮູ້ສຶກເສົ້າໃຈຫຼາຍກ່ຽວກັບເລື່ອງນີ້ ຈົນເຖິງຈີກເສື້ອຂອງຕົນ ຕາມທີ່ເຈົ້າເຫັນທີ່ນີ້. ເພິ່ນກ່າວວ່າ: ‘ພະເຢໂຫວາຄຽດໃຫ້ພວກເຮົາຍ້ອນວ່າບັນພະບຸລຸດຂອງເຮົາບໍ່ໄດ້ຖືຮັກສາກົດໝາຍທີ່ໄດ້ຂຽນໄວ້ໃນໜັງສືນີ້.’
ໂຢເຊຍເຊສັ່ງໃຫ້ຫີນເກຍປະໂລຫິດຜູ້ໃຫຍ່ສືບເບິ່ງວ່າພະເຢໂຫວາຈະກະທຳປະການໃດກັບເຂົາ. ຫີນເກຍຈຶ່ງໄປຖາມຫຶເລດາຜູ້ທຳນວາຍຍິງຄົນນຶ່ງ. ນາງມອບຂ່າວຈາກພະເຢໂຫວາໃຫ້ທ່ານເອົາກັບໄປໃຫ້ໂຢເຊຍເຊວ່າ: ‘ເຢຣຶຊາເລມແລະຜູ້ຄົນທັງໝົດຈະຖືກລົງໂທດ ເພາະເຫດທີ່ເຂົານະມັດສະການພະປອມແລະແຜ່ນດິນກໍ່ເຕັມໄປດ້ວຍຄວາມຊົ່ວ. ແຕ່ເພາະເຈົ້າໂຢເຊຍເຊໄດ້ເຮັດຄວາມດີ ການລົງໂທດນີ້ຈະບໍ່ເກີດຂຶ້ນຈົນກະທັ່ງຫຼັງຈາກການຕາຍຂອງເຈົ້າ.’
