ການ​ປົກຄອງ​ຂອງ​ພະເຈົ້າ​ປົກຄອງ​ໃນ​ສະຫວັນ​ແລ້ວ. ອີກ​ບໍ່​ດົນ​ການ​ປົກຄອງ​ນີ້​ຈະ​ປົກຄອງ​ທົ່ວ​ທັງ​ໂລກ​ແລະ​ປ່ຽນ​ແປງ​ໂລກ​ຂອງ​ເຮົາ​ໃຫ້​ດີ​ຂຶ້ນ. ໃຫ້​ເຮົາ​ມາ​ເບິ່ງ​ນຳ​ກັນ​ວ່າ ເຈົ້າ​ຈະ​ໄດ້​ເຫັນ​ສິ່ງ​ດີໆ​ຫຍັງ​ເກີດຂຶ້ນ​ແດ່​ເມື່ອ​ການ​ປົກຄອງ​ຂອງ​ພະເຈົ້າ​ປົກຄອງ​ໂລກ.

1. ການ​ປົກຄອງ​ຂອງ​ພະເຈົ້າ​ຈະ​ເຮັດ​ໃຫ້​ໂລກ​ນີ້​ສະຫງົບ​ສຸກ​ແລະ​ມີ​ຄວາມຍຸຕິທຳ​ໄດ້​ແນວ​ໃດ?

ພະ​ເຢຊູ ກະສັດ​ໃນ​ການ​ປົກຄອງ​ຂອງ​ພະເຈົ້າ ຊິ​ກຳຈັດ​ຄົນ​ຊົ່ວ​ແລະ​ລັດຖະບານ​ຕ່າງໆ​ໃນ​ສົງຄາມ​ອາມາເຄໂດນ. (ພະນິມິດ 16:14, 16) ໃນ​ຕອນ​ນັ້ນ ຄຳ​ສັນຍາ​ໃນ​ຄຳ​ພີ​ໄບເບິນ​ທີ່​ບອກ​ວ່າ: “ອີກ​ຈັກ​ໜ້ອຍ​ຈະ​ບໍ່​ມີ​ຄົນ​ຊົ່ວ​ເລີຍ” ຈະ​ເກີດຂຶ້ນ​ແທ້. (ຄຳເພງ 37:10, ລ.ມ.) ພະ​ເຢຊູ ກະສັດ​ຂອງ​ການ​ປົກຄອງ​ນີ້​ຈະ​ເຮັດ​ໃຫ້​ທົ່ວ​ທັງ​ໂລກ​ມີ​ແຕ່​ຄວາມ​ສະຫງົບ​ສຸກ​ແລະ​ຄວາມຍຸຕິທຳ.—ອ່ານ​ເອຊາອີ 11:4

2. ເມື່ອ​ໂລກ​ເປັນ​ແບບ​ທີ່​ພະເຈົ້າ​ຕັ້ງ​ໃຈ​ໄວ້​ຕັ້ງ​ແຕ່​ທຳ​ອິດ ຊີວິດ​ຂອງ​ເຮົາ​ຈະ​ເປັນ​ແນວ​ໃດ?

ເມື່ອ​ການ​ປົກຄອງ​ຂອງ​ພະເຈົ້າ​ປົກຄອງ ໃນ​ຕອນ​ນັ້ນ “ຄົນ​ດີ​ຈະ​ໄດ້​ຢູ່​ໃນ​ໂລກ ເຂົາເຈົ້າ​ຈະ​ໄດ້​ຢູ່​ໃນ​ໂລກ​ຕະຫຼອດ​ໄປ.” (ຄຳເພງ 37:29, ລ.ມ.) ລອງ​ຄິດ​ເບິ່ງ​ວ່າ​ເຈົ້າ​ຈະ​ມີ​ຄວາມສຸກ​ສ່ຳ​ໃດ​ທີ່​ໄດ້​ຢູ່​ໃນ​ໂລກ​ທີ່​ທຸກ​ຄົນ​ເປັນ​ຄົນ​ດີ ຮັກ​ກັນ ແລະ​ຮັກ​ພະ​ເຢໂຫວາ! ບໍ່​ມີ​ໃຜ​ຕ້ອງ​ເຈັບ​ປ່ວຍ ແລະ​ທຸກ​ຄົນ​ຈະ​ມີ​ຊີວິດ​ຕະຫຼອດ​ໄປ.

3. ການ​ປົກຄອງ​ຂອງ​ພະເຈົ້າ​ຈະ​ເຮັດ​ຫຍັງ​ຫຼັງ​ຈາກ​ທີ່​ຄົນ​ຊົ່ວ​ຖືກ​ທຳລາຍ​ແລ້ວ?

ຫຼັງ​ຈາກ​ທີ່​ຄົນ​ຊົ່ວ​ຖືກ​ທຳລາຍ ພະ​ເຢຊູ​ຈະ​ປົກຄອງ​ເປັນ​ກະສັດ 1.000 ປີ. ໃນ​ໄລຍະ​ເວລາ​ນັ້ນ ພະ​ເຢຊູ​ກັບ 144.000 ຄົນ​ທີ່​ປົກຄອງ​ກັບ​ເພິ່ນ​ຈະ​ຊ່ວຍ​ໃຫ້​ທຸກ​ຄົນ​ທີ່​ຢູ່​ເທິງ​ໂລກ​ກັບ​ມາ​ເປັນ​ມະນຸດ​ທີ່​ສົມບູນແບບ. ເມື່ອ​ຄົບ 1.000 ປີ ທົ່ວ​ທັງ​ໂລກ​ຈະ​ເປັນ​ສວນ​ອຸທິຍານ​ທີ່​ສວຍ​ງາມ ແລະ​ທຸກ​ຄົນ​ຈະ​ມີ​ຄວາມສຸກ​ເພາະ​ເຂົາເຈົ້າ​ເຊື່ອ​ຟັງ​ກົດໝາຍ​ຂອງ​ພະ​ເຢໂຫວາ. ແລ້ວ​ພະ​ເຢຊູ​ກໍ​ຈະ​ຄືນ​ການ​ປົກຄອງ​ທີ່​ເພິ່ນ​ປົກຄອງ​ໃຫ້​ພະ​ເຢໂຫວາ​ພໍ່​ຂອງ​ເພິ່ນ. ແລະ​ໃນ​ທີ່​ສຸດ ຊື່​ຂອງ​ພະ​ເຢໂຫວາ​ຈະ “ເປັນ​ທີ່​ເຄົາລົບ​ນັບຖື​ຢູ່​ສະເໝີ.” (ມັດທາຍ 6:9, 10) ທຸກ​ຄົນ​ຈະ​ໄດ້​ເຫັນ​ວ່າ​ພະ​ເຢໂຫວາ​ເປັນ​ຜູ້​ປົກຄອງ​ທີ່​ດີ​ທີ່​ສົນ​ໃຈ​ແລະ​ຫ່ວງໃຍ​ປະຊາຊົນ. ພະ​ເຢໂຫວາ​ຊິ​ທຳລາຍ​ຊາຕານ ພວກ​ປີສາດ ແລະ​ທຸກ​ຄົນ​ທີ່​ກະບົດ​ຕໍ່​ເພິ່ນ. (ພະນິມິດ 20:7-10) ການ​ປົກຄອງ​ຂອງ​ພະເຈົ້າ​ຊິ​ເຮັດ​ໃຫ້​ໂລກ​ນີ້​ເປັນ​ສວນ​ອຸທິຍານ​ທີ່​ສວຍ​ງາມ​ແລະ​ຜູ້​ຄົນ​ຈະ​ມີ​ຊີວິດ​ທີ່​ມີ​ຄວາມສຸກ​ຕະຫຼອດ​ໄປ.

 ຮຽນ​ຮູ້​ຫຼາຍ​ຂຶ້ນ

4. ການ​ປົກຄອງ​ຂອງ​ພະເຈົ້າ​ຈະ​ມາ​ແທນ​ທີ່​ການ​ປົກຄອງ​ຂອງ​ມະນຸດ

“ການ​ທີ່​ມະນຸດ​ປົກຄອງ​ມະນຸດ​ມີ​ແຕ່​ສ້າງ​ຄວາມ​ເສຍຫາຍ​ໃຫ້​ເຂົາເຈົ້າ.” (ຜູ້​ເທສະໜາ​ປ່າວ​ປະກາດ 8:9, ລ.ມ.) ໂດຍ​ທາງ​ການ​ປົກຄອງ​ຂອງ​ພະເຈົ້າ ເພິ່ນ​ຊິ​ຈັດການ​ກັບ​ຄວາມ​ເສຍຫາຍ​ທີ່​ເກີດ​ຈາກ​ຄວາມ​ບໍ່​ຍຸຕິທຳ.

ອ່ານ​ດານຽນ 2:44 ແລະ 2 ເທຊະໂລນິກ 1:6-8 ແລ້ວ​ລົມ​ກັນ​ກ່ຽວ​ກັບ​ຄຳຖາມ​ຕໍ່​ໄປ​ນີ້:

• ພະ​ເຢໂຫວາ​ແລະ​ພະ​ເຢຊູ​ລູກ​ຊາຍ​ຂອງ​ເພິ່ນ​ຊິ​ເຮັດ​ຫຍັງ​ກັບ​ການ​ປົກຄອງ​ຂອງ​ມະນຸດ​ແລະ​ຄົນ​ທີ່​ສະໜັບສະໜູນ​ເຂົາເຈົ້າ?

• ຈາກ​ທີ່​ໄດ້​ຮຽນ​ມາ ເປັນ​ຫຍັງ​ເຈົ້າ​ຈຶ່ງ​ໝັ້ນ​ໃຈ​ໄດ້​ວ່າ​ສິ່ງ​ທີ່​ພະ​ເຢໂຫວາ​ແລະ​ພະ​ເຢຊູ​ເຮັດ​ຈະ​ຍຸຕິທຳ?

5. ພະ​ເຢຊູ​ເປັນ​ກະສັດ​ທີ່​ດີ​ທີ່​ສຸດ

ພະ​ເຢຊູ​ທີ່​ເປັນ​ກະສັດ​ໃນ​ການ​ປົກຄອງ​ຂອງ​ພະເຈົ້າ​ຈະ​ເຮັດ​ຫຼາຍ​ຢ່າງ​ທີ່​ເປັນ​ປະໂຫຍດ​ຫຼາຍ​ເພື່ອ​ປະຊາຊົນ​ຂອງ​ເພິ່ນ. ເປີດ​ວິດີໂອ ເພື່ອ​ເບິ່ງ​ວ່າ​ພະ​ເຢຊູ​ເຮັດ​ໃຫ້​ເຫັນ​ແນວ​ໃດ​ວ່າ​ເພິ່ນ​ຢາກ​ຊ່ວຍ​ຜູ້​ຄົນ​ແລະ​ພະເຈົ້າ​ກໍ​ໃຫ້​ອຳ​ນາດ​ເພິ່ນ​ທີ່​ຈະ​ເຮັດ​ແບບ​ນັ້ນ.

ຕອນ​ທີ່​ຢູ່​ເທິງ​ໂລກ ພະ​ເຢຊູ​ເຮັດ​ໃຫ້​ເຫັນ​ວ່າ​ການ​ປົກຄອງ​ຂອງ​ພະເຈົ້າ​ຈະ​ເຮັດ​ຫຍັງ​ແດ່​ໃນ​ອະນາຄົດ. ເຈົ້າ​ຢາກ​ໃຫ້​ເລື່ອງ​ໃດ​ເກີດຂຶ້ນ​ຫຼາຍ​ທີ່​ສຸດ? ອ່ານ​ຂໍ້​ຄຳ​ພີ​ຕ່າງໆ​ທີ່​ຢູ່​ໃນ​ຕອນ​ທ້າຍ​ຂອງ​ຂໍ້​ນີ້​ກ່ຽວ​ກັບ​ສິ່ງ​ດີໆ​ທີ່​ຈະ​ເກີດຂຶ້ນ.

6. ການ​ປົກຄອງ​ຂອງ​ພະເຈົ້າ​ຈະ​ເຮັດ​ໃຫ້​ເຈົ້າ​ໄດ້​ຮັບ​ສິ່ງ​ດີໆ​ໃນ​ອະນາຄົດ

 ສະຫຼຸບ

ການ​ປົກຄອງ​ຂອງ​ພະເຈົ້າ​ຈະ​ເຮັດ​ໃຫ້​ສິ່ງ​ທີ່​ພະ​ເຢໂຫວາ​ຕັ້ງ​ໃຈ​ໄວ້​ເກີດຂຶ້ນ​ແທ້. ການ​ປົກຄອງ​ນີ້​ຈະ​ເຮັດ​ໃຫ້​ທົ່ວ​ທັງ​ໂລກ​ເປັນ​ສວນ​ອຸທິຍານ​ແລະ​ຈະ​ມີ​ແຕ່​ຄົນ​ດີ​ຢູ່​ຫັ້ນ ເຂົາເຈົ້າ​ຈະ​ນະມັດສະການ​ພະ​ເຢໂຫວາ​ຕະຫຼອດ​ໄປ.

ຄຳຖາມ​ທົບ​ທວນ

• ການ​ປົກຄອງ​ຂອງ​ພະເຈົ້າ​ຈະ​ເຮັດ​ຫຍັງ​ເພື່ອ​ເຮັດ​ໃຫ້​ຊື່​ຂອງ​ພະ​ເຢໂຫວາ​ເປັນ​ທີ່​ເຄົາລົບ​ນັບຖື​ຢູ່​ສະເໝີ?

• ເປັນ​ຫຍັງ​ເຮົາ​ໝັ້ນ​ໃຈ​ໄດ້​ວ່າ​ການ​ປົກຄອງ​ຂອງ​ພະເຈົ້າ​ຈະ​ເຮັດ​ໃຫ້​ຄຳ​ສັນຍາ​ທຸກ​ຢ່າງ​ທີ່​ເພິ່ນ​ບອກ​ໄວ້​ໃນ​ຄຳ​ພີ​ໄບເບິນ​ເກີດຂຶ້ນ​ແທ້?

• ການ​ປົກຄອງ​ຂອງ​ພະເຈົ້າ​ຈະ​ເຮັດ​ສິ່ງ​ດີໆ​ຫຼາຍ​ຢ່າງ ເຈົ້າ​ຢາກ​ໃຫ້​ເລື່ອງ​ໃດ​ເກີດຂຶ້ນ​ຫຼາຍ​ທີ່​ສຸດ?