IMBATA 28

Mi O’a Awa’difo si Feta Yehova Pini Fe Yesu be Mini Risi

MI AVI

Mi trumu ni ovu ngoni mi agyi azi ka mini feta azi onyiru ni feria? Eri fe mi o’a ayikosi azini mi le e’da mi agyi ni mi o’a awa’difo si feta ’dasi. Yehova pi Yesu be feki amani feta ndepi niri i. Feta ’da ngo i, azini ama eco e’da ama awa’difo si feta nde si ngoniru?

1. Geri azi alu amani e’dazu ama awa’difo si feta Mungu pini fe amani Kristo be risi ri ngo i?

Aziza Biblia ma alea rini e’da risi “’ba dria alu alu eri [Yesu ni] a’ipiri” ma ovu idri ’dani ’dani ri be. (Yohana 3:16) A’ita e’dazu ri ma efi ngoni? Efini ovuni lu mini Yesu ni a’izu ri i a’dule ku. Le ama e’da a’ita amani ri peta amani ’diyi si azini ’yeta amani ’diyi si. (Yakobo 2:17) Aka a’ita amani ri e’da e’yo amani ’ye azini amani nze ’diyi si, ama agyi amani Yesu be azini eri ma ati Yehova be ri si okporu.—Mi la Yohana 14:21.

2. O’du amani e’dazu ama awa’difo si feta Yehova pini fe amani Yesu be risi ri ngo i?

Ondre Yesu ni muzu drazu ’dasi, e’da ’ba ima vuti bipi ’diyi ni geri azi yini e’dazu yi awa’difo si owita ini ’dasi ri. E’do omu nyaza o’diru Biblia ni omve ‘Ondreta Opi niri,’ ’bani vini omve Drata Yesu Niri ma E’yo Egazu ri i. (1 ’Ba Korintoa ’Diyi 11:20) Yesu ’ba o’du ’di ’ba ti opele ’diyi ni—azini Kristiani ada emupi yi ma vutia ’diyi ni—ecozu owita ini ima idri owizu amani ri ma e’yo egazu beni. O’du ’di ma e’yosi, Yesu ’yo ndra ’dini: “Emi ’ye ’diri ma egazu.” (Luka 22:19) Ika emu Drata Yesu Niri ma E’yo Egazu ra, mi e’da mi awa’difo si leta angiri Yehova pini e’da amani Yesu be risi.

OVAZU ALI

Mi oni geri azi awa’difo e’dazu leta angiri Yehova pini e’da amani Yesu be risi ’diyi. Mi oni vini drata Kristo niri ma E’yo Egazu ri ma orodri ci a’dusi yari.

3. Ama awa’difo e’da ’yeta si

Mi ega nga agu azi inze mi isu de mi avu yi ma alea. Mi eco e’yo agu nde ni ’ye mini ri avi ra ya? Kani mi geri e’dazu erini mi awa’difo si ’diyi nda i?

’Ba amani idri fepiri Yehova i. Mi la 1 Yohana 4:8-10, zita ’diyi omvizu:

Owita Yesu niri feta azi orodriru tu ri a’dusi?
Feta Yehova pini fe mini Yesu beri ni fe mi trumu ngoni?

Ama eco e’da ama awa’difo si feta Yehova pini fe amani Yesu be risi ngoniru? Mi la 2 ’Ba Korintoa ’Diyi 5:15 azini 1 Yohana 4:11; 5:3. Zita ’di omvizu:

E’yo siza ’dani e’da risi, ama eco e’da ama awa’difo si ngoniru?

4. Mi obi eceta Yesu niri ma vuti

Geri azi amani e’dazu ama awa’difo si ri amani eceta Yesu niri o’bizu risi. Mi la 1 Petero 2:21, zita ’di omvizu:

Geri azi mini ecozu pamvu Yesu niri ma vuti obizu ’diyi ngo yi?

Yesu le ndra o’duko Mungu niri, olu e’yo baru ri, azini ko ’ba yi ma aza

5. Mi ma emu drata Yesu niri ma E’yo Egaria indi

Ecozu a’du ma e’yo ’ye ndra i Ondreta Opi Niri ma alea ni yari nizu, mi la Luka 22:14, 19, 20. Zita ’diyi omvizu:

A’du ma e’yo ’ye ndra i Ondreta Opi Niri ma alea ni?
Mikate azini vino so pa a’du ma paria?—Ine vasi 19 pi 20 be.

Yesu ’ba ndra o’du Ondreta Opi Niri ma e’yo egazu ri ’ba ima vuti bipi ’diyi ni ’yezaru eli aluri ma alea pale alu, ima drata ma e’yo egazu. Ani ’Ba Yehova ma E’yo Eti Nzepi ’Diyi yi oku tualu eli alu alu vusi drata Yesu niri ma e’yo egazu geri ndra erini ’yezu risi. E’yo onizu angiri okuta ’di ma dria, mi avi VIDIO ’di. Zita ’di omvizu.