1, 2. ’Ba kakau yi zita zi ngoni?

OLI akuku ru ambo ’bani omve tsunami ru ri eza angu azi onzi onzi. Agu azi osu be ni e’do ’ba yi ogbi kanisa ma alea, ’ba nya’biliko isupi azini odrapi ’diyi ma kalafe kakau. Oku azi dra azo kansa niri si, ku imvo anzi towi.

² E’yo azi onzi ’dile ’diyi ka eyi ’ye, ’ba kakau eyi zita zi, “E’yo ’dile ’diyi yi ’ye a’dusi?” ’Ba kakau le asisile nguta ni gazu nyakua candi nyaza be tre ri oni ra. Mi ebi oku e’yo ega e’yo ’dileri ma dria ’bo ya?

3, 4. (a) Habakuki zi ndra Yehova ni zita ngo yi si? (b) Yehova omvi di eri ma zita nde ngoni?

³ Ama isu oni Biblia ma alea kini, ’ba Mungu ni a’ita pie okporu ’diyi ndra vini zita ’dile ’diyi ozi indi. Eceta si, nabi Habakuki zi ndra Yehova ni ’dini: ‘Mi fe ma mile ni ambo ndrezu a’disi ya? A’disiku afa opaza pi ma milia indi, e’yo ’bani ’ba yini inzamatara fezu ri pie, omba ’baza pi awata be indi a’dusi?’​—Habakuki 1:3.

⁴ Habakuki 2:2, 3 ma alea, ama eco omvita Mungu ni fe Habakuki ni eri ma zita ’da yi omvizu ri isu, e’yo Erini ondri i nga mu ’ye e’yo nde otuzu ri be. Yehova le ’ba yi saaru. Biblia ’yo kini: ‘Eri asi amasi saaru.’ (1 Petero 5:7) Adani si, e’yo ’ba yini candi isuzu rini fe candi ni fi Mungu ma asia saaru aga erini fizu ama asia ri ra. (Isaya 55:8, 9) Candi nyaza ga nyakua tre ’dini a’dusi? Ama ma oni di nga e’yo zita ’di ma dria.

5. E’yo ’ba kakau dini ma drile ru ’diyi ni imba candi nyaza ma dria ri ngoni? E’yo Biblia ni imba ri ngoni?

⁵ ’Ba pasta ru, atalo ru, azini olupi ru kanisa ma alea ’diyi imba ’ba yini kini, candi ’ba yini isu ri woro e’yo Mungu ni lele ni ri i. Eyi ma azi yi ’yo kini, e’yo dria i ’yepi ’ba yi pie ’diyi, e’yo ewaru eyini dri fuzu ’diyi pie woro e’yo Mungu ni otu eyini niri i. Eyi vini ’yo ama econi asisile niri ngoni yari va ku. Azi ’diyi ’yo kini ’ba yi odra, azini anzi nyiri yi vini odra, eyini ecozu muzu Mungu vu ’bua beni. Te di ’di ovuni e’yo ada ni ku. Yehova feni e’yo onzi ’diyi ni yi ’yezu ni ku. Biblia ’yo kini: “Mungu econi azi onzi ’yezaru ku, Okpoe’i econi e’yo onzi ’yezaru ku!”​—Yobu 34:10.

6. ’Ba kakau eyi candi nyaza nyakua ’dia ri ma e’yo ’ba woro Mungu ma rua a’dusi?

⁶ ’Ba kakau yini egazu Mungu ni wudrikuru ma dri ce ni risi, eyi candi nyaza nyakua ’dia ri ma e’yo ’ba woro Mungu ma rua. Te amani ndra oni Capita 3 ma alea ’bo ri le, Satani ’Ba asu Supiri ni wudrikuru ’di ma dri ce ni.

7, 8. Candi nyaza ga nyakua tre ’dini a’dusi?

⁷ Biblia ece amani “wudrikuru dria ovu ’ba onziri ma palaa.” (1 Yohana 5:19) Satani, dricere wudrikuru niri ma asi onzi, azini eri adraru. Eri “’ba wudrikuru dria icipiri.” (E’yo Eceza 12:9) ’Ba kakau eyi e’yo ’ye eri vuri le. ’Di bani asisile azi alu inzo nzeza, asi onzi, azini adra ni gazu nyakua tre ri i.

⁸ Asisile azi ndu candi nyaza ni gazu nyakua tre ri vini ci. Adamu pini Eva be Yehova ma ti gazu ’bo ri ma vutia, fe ezata anzi eyini ti ’diyi ni indi. Ezata ni di fe ’ba yini e’yo ’yezu ’ba azi ’diyi ma rua onzi. ’Ba eyi sa  driasi le ovu ’ba azi ’diyi ma drilea. Eyi aco co, eyi a’di ’di, azini eyi ’ba azi ’diyi ni candi fe. (Eklesiaste 4:1; 8:9) ’Ba azi ’diyi sa azini si candi isu “drileonzi” ni ’ba dria isuzu risi. (Eklesiaste 9:11) Drile onzi eco mi isu, kaniku afa azi onzi ni mi ’ye mini ovuzu pari onzi ni ma alea, sa onzi ri ma alea risi.

9. Ama ni ngoniru asisile Yehova ni kuzu candi nyaza ma mu nga drile ri ovuni onzi ku?

⁹ Yehova feni ’ba yini candi isuzu ni ku. Ama econi a’di ’diza, e’yo onzi ’yeza, azini candi ’ba yini fe ’ba azi ’diyi ni ri ma e’yo ’ba Mungu ma rua ku. Mungu econi afa azi angu ezapi ekile oyakia le, oli amboru akukuru rile, azini yi tiza le ’diyi eji ni ku. Mi eco di e’yo ega, ‘Yehova ka di ’ba dria aga okpo si ra, econi e’yo onzi yi ’yepi ’diyi atri ku a’dusi?’ Amani nizu ra Mungu asi amasi saaru risi, le asisile erini kuzu e’yo onzi ’diyi ni muzu drile ri ma ovu asisile azi muke ni.​—1 Yohana 4:8.

10. Satani eza ndra Yehova ma ru ngoniru?

¹⁰ ’Ba asu Supiri ole ndra Adamu pi Eva be amvu Edeni ni ria. Satani ’yo kini Mungu ovuni Dricere muke ni ku. ’Yo kini, Mungu zi ndra afa azi onyiru ni Adamu pini Eva be ci. Satani le ndra ma egaki driceza ivu ri aga Yehova vuri onyisi ra, azini e’yo azi eyini le Mungu vu okporu ra ni yo.​—E’doza 3:2-5; mi ne E’yo O’bazaru ’Diyi 27 ri.

11. Zita amani le omvita niri oni ra ri ngo i?

¹¹ Adamu pi ga Eva be Yehova ma ti eriko si. Eyini ndra ega risi, eyi eco e’yo onyiru, kaniku onzi ri pe eyi ni yima ngulupi si ra. Yehova eco di ndra e’yo ’ba ima ti gapi si ’dayi ni ega ri inzo ni, azini ima nita afa amani onyiru ’diyi ma dria ri ndeni ri e’da ngoniru?

12, 13. (a) Yehova awini ’ba ima ti gapi si ’dayi ma dri ja coti coti ku a’dusi? (b) Yehova ku Satani ni wudrikuru ma dri cezu azini ’ba yini eyi ma dri cezu ceni ceni a’dusi?

 ¹² Yehova awini Adamu pi ma dri ja Eva be coti coti ku. Kani ra ria, ku eyini sa ecozu anzi tizu. Yehova nzi di geri anzi Adamu pini ti Eva be ’diyi ni, eyini ecozu ’ba eyi ma dri cepi ri pezu. Yehova le ndra nyaku ’di ma ga tre ’ba rua be alaru ’diyi si, dika e’yo erini le ’da ni vini nga i ’ye ra, ’Ba asu Supiri ka tro le a’du ’ye i ka ti.—E’doza 1:28; Isaya 55:10, 11.

¹³ Malaika milioni milioni yi ndra ci, sa Satani ni inzo nzezu Yehova ma rua risi. (Yobu 38:7; Danieli 7:10) Yehova fe di ani sa Satani ni, erini ecozu e’yo ini eji ri e’yo adani yari e’dazu. Fe di vini sa ’ba yini, eyini ecozu yi ma dri cezu ceni de eyi Satani ma palaa. ’Dileri ni di nga e’da kini, ’ba ada econi ovu idri onyiru ri be azakoma Mungu niri kokoru ku.

14. Sa ebipi agapi ’bo ri e’da di amani a’du ma e’yo ni?

¹⁴ ’Ba ada ebi di ima dri ce eli alifu alifu ’bo, te driceza eyi niri awini eyi ma aza ko ku. Satani e’da di i ’ba inzo nzepi ri ru nditiri ’bo. ’Ba ada le di azakoma Mungu niri ecekokoru ra. Nabi Yeremia nze ndra e’yo ada ni erini ’yozu ’dini risi: “Yehova la, ma ni ra geri ’bani ovuni i ngulupi ma alia ku, eri ovuni ’ba acipi aciri ma alia ima acita otizuni ku.”​—Yeremia 10:23.

15, 16. (a) Yehova ku candi nyaza ni muzu sa angiri ’dini adusi? (b) Yehova le nga e’yo Satani ni eza diyi otu ku a’dusi?

¹⁵ Yehova fe di candi nyaza ni muzu sa angiri a’du ma e’yo si? Yehova atrini e’yo onzi i ’yepi ’diyi ku a’dusi? ’Du sa angiri e’dazu driceza Satani vuri orodri kokoru. ’Ba ada ebi driceza ndu ndu ’diyi o’bi, te di  driceza azi ecopi eyi ma aza kopi ra ni aluni yo. Onita ma omgbo ni tuzu uru geri sayansi pi ma alea si ra ti, e’yo liza kililiru ku ri, alio, e’yo onzi, azini a’di ’diza ma omgbo tu aga ndra oko ri ra. Ama econi ama dri cezu azakoma Mungu niri kokoru ku.

¹⁶ Yehova otu ni nga kiri e’yo Satani ni eza ’diyi ku. Ka e’yi otu ra, eri nga e’da Mungu ni driceza Satani vuri ati. Te Mungu econi e’yo ’dileri ’ye ku. ’Ba yi nga vini ega, eyini eyi ma dri cezu eyi si ceni ri kililiru. Te ’daleri econi i ’ye ku, dika Yehova econi vini eyi ati ku. Yehova econi inzo nze ku.​—’Ba Ebraniani 6:18.

17, 18. Yehova ni nga e’yo dria Satani ni eza ’bo ’diyi otu ngoniru?

¹⁷ Yehova eco e’yo Satani ni eza ’diyi otu ’ba ada ni eza ’diyi pie dria ra ya? Ee, eco ra. E’yo azi ecopi Mungu ni ndepi ’yezaru ni yo. Yehova ni sa ini ngazu e’yo dria Satani ni eji ’diyi omvizu ri ra. ’Di ma vutia, eri di nga nyaku ’di oja paradisi ru erini ndra lele ri le. ’Ba dria ovupi “nyadria” diyi nga enga ra. (Yohana 5:28, 29) ’Ba azi econi di nga eca azoru ku, dika ’ba azi econi vini dra ku. Yesu ni nga e’yo Satani ni eza ’bo ’diyi otu dria o’diru. Yehova ni nga Yesu ni ayu “’yeta ’Ba asu Supirini” ’diyi ma dri jazu. (1 Yohana 3:8) Ama awa’difo si tu, Yehova ni sa ’di kuzu amani ecozu e’yo onizu ima dria, azini amani ecozu i pezu ama Dricere ru ri si. (Mi la 2 Petero 3:9, 10.) Amani tro muzu e’yo ewaru ma alea si ra ti, eri amani azakoma fe e’yo ti tazu.​—Yohana 4:23; mi la 1 ’Ba Korintoa ’Diyi 10:13.

¹⁸ Yehova econi ama omi i pezu ama Dricere ru okpo si ku. Fe ’ba dria ni driwala ecozu e’yo pezu ceni ri ra. Ama ma oni di nga feta ’di ma efi amani ngoni yari.

19. Feta ndrizaru Yehova ni fe amani ri ngo i? Le ama ma ovu awa’difo si feta nde si a’dusi?

¹⁹ Driwala Yehova ni fe amani ecozu e’yo pezu ceni ri fe esele coza ni ovuzu ama eselea anyapa yi pie angiri. Anyapa yi e’yo ’ye ’bani oti eyi ma omia rile, te ama eco geri amani lezu o’azu idri amani ma alea ri pe ra. Ama vini pe Yehova ni inzizu engazu ama asia. (E’yo O’beza 30:24) Ama ovuni vini lu kompiota le e’yo ’bani oti ama omia ’bo ri ’yezu i a’dule ’dini ku. Ama driwala be ecozu idri amani lezu o’azu alenia ri pezu, ama agyi yi pezu, azini e’yo amani le ’ye idri amani ma alea ri pezu. Yehova le ama ma o’a ayikosi.

20, 21. Peta mini eco pe kililiru ndeni ri ngo i?

²⁰ Yehova le ama ma le i asi alusi. (Matayo 22:37, 38) Mva azi ka ’yo ima ati ni “Ale mi saaru,” ayiko ni eri ma ati ni fu saaru a’dusiku mva ’da nze e’yo nde engazu ima asia, ovuni ’bani eri omizu okposi risi ku. Yehova ni vini ’dile indi. Yehova fe amani driwala ecozu pezu i inzizu, kaniku i inzizu ku. Satani pi, Adamu pie, azini Eva pie, ga ndra Yehova ni si. Mi di nga mi ma driwala peta pezu ri ayu geri ngole risi?

²¹ Mi ma ayu mi driwala peta pezu ri Yehova ni inzizu. ’Ba pepi Mungu ni inzizu, te Satani ma ti gapi si ’diyi ma kalafe milioni milioni. (E’yo O’beza 27:11) Afa di mini eco ’ye sa ’di ma alea, ecozu ovuzu wudrikuru Mungu ni o’di, candi nyaza ni ngazu ovuzu alenia yo ri ma alea ci ri a’duni? Ama nga zita ’di ma omvita isu capita ’di ma drilea ri ma alea.