BI KɄ ná ndrŭ churie Yesu ma le tingʉe tsuba djo aro kʉ ná gbʉ dhi kpa ma na nari chu. (Mt. 27:35-38) Nì mai ri kʉ føro, nja ndrŭ adi ripo Yesu le d’øngʉe kabbuli na ná føri djo Biblia po nari nga kʉ bbʉbbʉ kʉ ná lo ri.​—Mk. 15:42-46.

Enjili djo adi loti ná kpa pori tsuba djo le ti ná ke ro nzá le ka le d’øe kabbuli na nja ndrŭ le adi d’ø nari bbai ri. Nì mai ri kʉ fø ro, kpa adi riddi nari kʉ Yesu na nzá le njingʉeni ddiddi aro kʉ ná fø gbʉ dhi kpa ma na ri. Ariel Sabar ró dho kʉ ná jurnaliste ndi Smithsonian le nzǐ ná gazeti nǎ ná lo addudho ma nja ndrŭ dhó nganjadha kʉ fø nari nanga tú ɨ: “Musalaba djo le rá ddikpa ke ti ná føri ngʉe chelo nji ná ke dho le bbʉ ná malipizi. Ndirigoti nja ndrŭ pori Waroma nzá ka ndima ue fø di ná ke le d’ø kabbuli na nari tso ro ri.” Waroma ngʉ adi riji chelo nji ná ke djo le d’ilo do ka ndi pa nari bbai, føri dho b’lo le ti ke tsuba djo nari goti le ngʉ adi ke bba tso nǎ zǎ a. Føri goti ke ndí gʉ ma nari le ngʉ adi d’ø ndrŭ krʉ dhó kabbuli na.

Nì mai ri kʉ føro, Arkeologi d’ra njonjo kʉ ná lo che chengʉeni ná nja Wayaudi djo. Cho 1968 na le bangʉe karne kwanza na le hwingʉe ná ke ró kpà (skelete). Fø kpà le bangʉe Wayaudi le ngʉ adi d’ø Yerusalemu nǎ ná ngana. Fø ngana le singʉe ro nari ngʉe kpà dhé. Fø kpà kana ma mangʉe nari ngʉe le kó djuti ró kpà. Ri le tingʉe tsú djo na ná musumari ngʉe 11.5 satimetre. Sabar pori, “Føri ngʉe Yehochanan ró dho kʉ ná ke kó djuti ró kpà. Føri ridho, Enjeli po Yesu le d’øngʉe kabbuli na ná føri kʉ bbʉbbʉ lo. Yehochanan kó djuti ró kpà le bangʉe kabbuli na ná føri ridho, Yesu dhó saa djó ro, Waroma ungʉe ritso u musalabba djo le ti ná ke le d’ø Wayaudi ngʉ adi tsuba djo le ti ná ke d’ø nari bbai.”

Yehochanan kó djuti ró kpà ridho nari bbai, ngbaribbai ma Yesu le tingʉe tsuba djo nari djo ndrŭ adi njonjo loti. Bbʉbbʉ dhé, nja kʉ ná chelo nji ná kpa le ngʉ adi d’ød’ø kabbuli na, ro kpa nzɨ le ngʉ adi bubu dhé ri. Biblia ripo Yesu le d’øngʉe bblo kʉ ná kabbuli na ná føri kʉ bbʉbbʉlo. Njonjo kʉ ná lo ridho nari kʉ, Yesu ndí ronga le thɨngʉe ndirigoti ke le d’øngʉe kabbuli na ná føri kʉ bbʉbbʉlo.

Føri djolu pli Yova d’rangʉeri nari kʉ, Yesu le ka le d’øe mali dhi ke dhó kabbuli na, ndirigoti ddikpa le ma nzá ddi ka ndi choe Mungu poe ná lo si njini nari tso ro ri.​—Isa. 53:9; 55:11.