Tuka vana zianela a nzo andi kuna Yizerele, Akabi wa ntinu wamonanga mpatu a vinyo ya muntu mosi wayikilwanga vo Nabote. Akabi wazola vo katambula e mpatu yayi, wavava vo kasumba yo kwa Nabote. Kansi, Nabote kazola kuntekela yo ko kadi o Nsiku a Yave wavovanga vo e mpatu ina muntu katambula se vua ke ifwete tekwa ko. Nga Akabi wazitisa Nabote wau kavanga edi diansongi? Ve, kanzitisa ko. Akabi wafunga kikilu makasi, kazola nkutu vaika mu suku diandi ko ngatu dia.

Izebele wa nkaz’a Akabi wamvovesa vo: ‘Ngeye i ntinu a Isaele. Olenda baka konso kina ozolele. Omono isinga baka e mpatu yayina mu kuma kiaku.’ Izebele wasoneka nkanda yo twika wo kwa mbuta za mbanza, wabavovesa vo bavunina Nabote mambu vo Nzambi katiangwini yo kumvondela muna matadi. Ambuta bavanga dina Izebele kabavovesa. I bosi, Izebele wavova kwa Akabi vo: ‘Nabote ofwidi. E mpatu a vinyu ikitukidi se yaku.’

Ke Nabote kaka ko Izebele kavonda kondwa kuma. Wantu ayingi kavonda ana bazolanga Yave. Izebele teke kasambilanga yo vanga mambu mankaka mambi. Yave wamona mambu mawonso mambi kavanganga Izebele. Adieyi Yave kavanga kwa Izebele?

Vava Akabi kafwa, o mwan’andi Yorame wakituka se ntinu. Yave watuma muntu mosi wakala ye nkumbu a Yeu mu tumba Izebele ye esi nzo andi.

Yeu wayenda ye kalu diandi kuna mbanza Yizerele kuna kwazingilanga Izebele. Yorame wayizila muna kalu mu wanana yo Yeu yo kunyuvula vo: ‘Nga mu luvuvamu wizidi?’ Yeu wavova vo: ‘Ke vekala luvuvamu ko ekolo ngudi aku kevanganga mambu  mambi.’ Yorame wavava vutulwisa e kalu diandi manima mu tina. Kansi, Yeu wanonga Yorame e dionga yo kumvoda.

I bosi, Yeu wayenda kuna nzo a Izebele. Vava kawá vo Yeu olweke, olengwele meso mandi, oviengese e nsuki yo kumvingila vana zianela kuna suku diandi dia ntandu. Vava Yeu kalwaka, Izebele wankayisa kuna makasi mawonso. Yeu wavovesa ntaudi zandi ana bakala vana ndambu vo: “Nuntuba ova nsi.” Batubidi Izebele vana zianela, owandamene vana ntoto, ofwidi.

Kuna kwalanda, Yeu wavonda 70 lwa wan’a Akabi yo fokola e nsambila ya Bale muna nsi. Nga kumuene ko vo Yave ozeye mawonso ye muna ntangw’andi otumbanga awana bevanganga mambu mambi?