Timoteo i toko diakala muna nkutakani ya Luseta. Se diandi mwisi Ngerekia kakala. O ngudi andi mwisi Yuda kakala. O ngudi andi Yunike yo nkak’andi Loi banlonga mambu ma Yave tuka muna kileke.

Vava Paulu kayenda kuna Luseta muna nkingul’andi yanzole, wamona vo Temoteo wazolanga kikilu ampangi ye wakala ye luzolo lwa kubasadisa. Paulu wabokela Timoteo kimana bakangalanga entwadi. Paulu walonga Timoteo kimana kakala nteleki azikuka a nsangu zambote.

Mwand’avelela wafilanga Paulu yo Timoteo konso fulu bayendanga. Lumbu kimosi muna fuku, Paulu wamona mona-meso kia muntu wamvovesa vo kenda kuna Makedonia kimana kabasadisa. Muna kuma kiaki, Paulu, Timoteo, Sila yo Luka bayenda kuna Makedonia mu samuna e nsangu zambote yo sikidisa e nkutakani.

Vava bakala muna mbanz’a Tesalonika, kuna Makedonia, wantu ayingi bakituka Akristu. Kansi, akaka muna Ayuda bamuena Paulu ye akwandi a salu e kimpala. E zingu kia Paulu ye kia Timoteo mu vonza kiakala. Muna kuma kiaki, batinina kuna Beroya muna fuku.

Esi Beroya bakala ye luzolo lwa wá e nsangu zambote. Kiakala Mingerekia yovo Ayuda bakwikila. Kansi, vava Ayuda akaka batuka kuna Tesalonika yo yantika sia mavuanga, Paulu wayenda kuna Atenai. Timoteo yo Sila bakwamanana muna Beroya mu kumika ampangi. Kuna kwalanda, Paulu watuma diaka Timoteo kuna Tesalonika kenda sadisa ampangi kimana  bazizidila lubangamu lwakala ko. Muna mvu mialanda, Paulu watuma Timoteo mu kingula nkutakani zankaka yo kasakesa ampangi.

Paulu wavovesa Timoteo vo: ‘Awana bazolele sadila Yave, bangikwa bebangikwa.’ Timoteo wabangikwa yo siwa mu pelezo mu kuma kia lukwikilu lwandi. Wakala ye kiese kia sadila e lau diadi mu songa e kwikizi kiandi muna Yave.

Paulu wavovesa esi Filipi vo: ‘Ikunutwikila Timoteo. Okunulonga e nsas’a kangalela muna ludi yo kunulonga muna salu kia umbangi.’ Paulu wazaya wo vo olenda bunda Timoteo e vuvu. Mvu miayingi basala entwadi nze akundi.