LONGI 12
Mwan’a Nsang’a Paulu Nkwa Unkabu Kakala
Yambula twalongoka mu kuma kia toko dimosi ona wavuluza ngudi andi ankazi. O ngudi ankazi kavuluza i Paulu wa ntumwa. E nkumbu a toko diadi ke izayakene ko. Kansi tuzeye wo vo diambu dia unkabu kavanga. Nga zolele zaya dina kavanga?—
Paulu mu pelezo kakala kuna Yerusaleme. Wasiwa muna pelezo wau vo nsangu zambote kasamunanga mu kuma kia Yesu. Wantu akaka ambi bamenganga Paulu. Muna kuma kiaki, bakala y’ekani dia vonda Paulu. Bavova vo: ‘Tulomba kwa mfumu a makesa katuma makesa mandi batwasa Paulu kuna mbazi a nkanu. Tukwenda swekama muna nzila. Vava Paulu kevioka, tukumvonda.’
Mwan’a nsang’a Paulu wazayisa ekani dia yimpumbulu kwa Paulu yo mfumu a makesa
O mwan’a nsang’andi wawá ekani bakala diau. Adieyi kavanga? Wayenda kuna Pelezo yo zayisa e diambu diadi kwa Paulu. Vana vau, Paulu wamvovesa vo kazayisa diambu diadi diansoki kwa mfumu a makesa. Nga obenze vo diasazu diakala kwa mwan’a nsang’a Paulu mu kwenda mokena yo mfumu?— Ve, e kuma kadi mfumu ndioyo ke mpasi muntu ko. Kana una vo i wau, o mwan’a nsang’a Paulu wakala yo unkabu yo kwenda zayisa diambu diadi kwa mfumu.
O mfumu a makesa wazaya dina kafwete vanga. Wabokela tezo kia 500 za masoladi kimana batanina Paulu. Wabavovesa vo banata Paulu kuna Kaisaria muna fuku. Nga Paulu kavuluka?— Elo, kadi yimpumbulu ke balenda kumvonda ko. Ekani diau diambi diafunga.
Adieyi olenda longoka muna lusansu lwalu?— Ngeye mpe olenda songa unkabu nze mwan’a nsang’a Paulu. Tufwete kalanga yo unkabu vava tuzayisanga kw’akaka oma ma Yave. Nga osonga unkabu yo kwamanana sila umbangi mu kuma kia Yave?— Avo ovangidi wo, ngeye mpe olenda vuluza wantu.
