Kalasi kia 126 kia Sikola ya Ngiladi

Aweyi Olenda Kadila Misionario Ambote

NDONGA ayingi yakutakana kun’eseka dia Centro Educacional da Torre de Vigia, em Patterson, Nova York mu kuma kia diambu dimosi diamfunu diavangama ko. Kina kia Sabala, kia 14 kia ngonde a Malusu a mvu wa 2009, kiafokoka e kalasi kia 126 kia Sikola ya Ngiladi (Escola Bíblica de Gileade da Torre de Vigia). Awana bakota sikola yayi bafilwa mu 22 ma nsi mu kwenda samuna nsangu zambote za Kintinu.​—⁠Matai 24:⁠14.

Alongoki bafokola ngonde tanu za malongi ma ngolo ma Nkand’a Nzambi malenda kubasadisa mu kituka misionario ambote. E lumbu kia nsuka kia kalasi kiaki, kivananga elau kw’ampangi mu wá malongi mamfunu ma mpila balenda lungisila e salu kiau.

O mfidi a lukutakanu lwalu mpangi Anthony Morris, una muna Buka kia Selo Yambuta ya Mbangi za Yave, wasungamena vo e Sikola ya Ngiladi yikubikanga misionario, mu mvu a 1943 yayantika. Tuka ntangwa yayina, ampangi bekubikwanga muna sikola yayi salu kiambote besalanga mu salu kia samuna nsangu zambote mu nza yawonso.

Kana una vo Afarisi bavezanga alongoki a Yesu wau vo “wantu balembi longwa,” o mpovi wavova vo, atantu awaya bazaya wo vo alongoki bakala ye unkabu kadi yo Yesu bakedinge. (Mavangu 4:​13) Malongi batambula ampangi, mabasadisa mu kala ye unkabu.

“Kuswaswanisi Wantu ko,” owau i ntu a diambu kavovela o mpangi Robert Ciranko wa nsadisi a Buka kia Asoneki kia Selo Yambuta. Wavova vo alongoki bewanana ye wantu a mpila mu mpila ye fu ya kisi nsi yaswaswana. Ke dikala diampasi ko muna kubasila umbangi kele vo alongoki betanginina e fu kia Yave. Muna Mavangu 10:34 tutanganga vo “o Nzambi ke nkwa mandangi ko” i sia vo ‘Nzambi ke swaswanesanga ko.’ (Mavangu 10:​35) Mpangi Ciranko wavova vo, “muna tanginina Nzambi yo badikila konso muntu nze otondakana kwa Nzambi, nusikila nze misionario a Nzambi.”

“Luna ye Yina Nuvwidi o Mfunu mu Sikila Muna Salu Kieno”

O mpangi Samuel Herd una muna buka kia Selo Yambuta wavova vo, “akaka bebadikilanga samo nze bulu kiambi, kansi i bulu kiamfunu kikilu muna zingu kia makanga.” Diau adimosi mpe e misionario zampa bena ye dina balenda nata muna sikila mu nsi bekwenda sadila. Mambu matanu malenda kubasadisa.

1. Zola muna Yave. (Matai 22:​37, 38) Alongoki babaka e nzengo za sadila Yave.

2. Lunda Zayi wa Diambu dia Nzambi. O Samo olundilanga madia muna mazi ma kunki diandi. Kana una vo i wau, kevwenanga dia ko, muna ntangw’a mpasi obundanga e vuvu muna lundilu diandi. Diau adimosi mpe a misionario ke bafwete bunda kaka e vuvu ko mu malongi balongoka muna Sikola ya Ngiladi, kansi bafwete kwamanana siamisa kimwanda kiau.

3. Zola muna wantu. (Matai 22:​39) Alongoki bezolanga wantu.

4. Ntim’amvevo. (Nkunga 110:⁠3) Vava ngolo za misionario zifokokanga, Yave okubawokesanga e nkuma.​—⁠Yesaya 40:⁠29.

5. Ngolo za kileke. Nze una samo kesadisanga mu nata o muntu muna makanga, a misionario mpe bafwete “natanga” Akristu akw’au ana bebwanga mu mpasi mu zingu kiau kia Kikristu. Ngolo zayingi zivavwanga muna wo vanga, ye misionario bavwidi ngolo za kileke za vanga wo.

 Mambu Makaka Mamfunu ma Lukutakanu Lolo

Michael Burnett mosi muna alongi a sikola ya Ngiladi wavova vo: Amande yakala se mosi muna mbongo ambote ina Yakobo katwikila ntinu a Engipito. (Etuku 43:​11) Kana una vo kiakete, e bundu kiaki kivwidi vitamina yayingi. Alongoki baniakuna amande yayingi ya mwanda ekolo bakala muna sikola yayi. Dimosi muna mambu mamfunu balongoka i yangalela e nkubika zawonso za Yave yo zola e salu muna zunga kiau kiampa.

Mark Noumair wa nlongi akaka wa sikola ya Ngiladi wavova vo e diambu dia Nzambi dina nze ‘nkutu yazala ye ngangu.’ (Nkunga 126:⁠6) Tufwete ziula e nkutu yoyo yo sadila e lekwa ina mo. Kele vo e salu ki’amisionario ka kina vangamena nze una bayindulanga ko, bafwete sungamena dina diabwila Paulu wa ntumwa. Alongoki a Yesu bantuma mu mvu nana kenda sila umbangi kuna mbanza kawutukila. Vana fulu kia yindula wau vo yandi i ‘natinwa kiasolwa’ kafwete kwenda sadila kuna zunga kiakaka, Paulu wakivana mu sadila konso fulu kakalanga. (Mavangu 9:​15, 28-​30) Dilenda kala diampasi mu zitisa awana kesolanga Yave muna vit’o ntu. Mosi muna awana bavanga wo i Yonatane. Vava kazaya wo vo Davidi i ntinu wasolwa kwa Yave, Yonatane wanyikama.

Elongi diakala ye ntu a diambu vo: “Selo ya Nzambi Bevovanga Kuna Unkabu,” alongoki bavanga e nsongesela ya mambu mababwila mu salu kia umbangi ekolo bakala muna sikola. Ndonga muna yau bayantika longoka Nkand’a Nzambi yo wantu. Mun’elongi dialanda diakala ye ntu a diambu vo: “Bakubikwa Muna Nkubik’a Yave,” vakala ye mbokena ye mpangi tatu ana basala salu kia misionario se kolo kiayingi. Konso muntu muna yau wayika una kakubikilwa mu sala ye nkubik’a Nzambi.

“Kala Misionario Akiese”

Gerrit Lösch wa mpangi akaka a Buka kia Selo Yambuta wafila elongi diasina dia lukutakanu lwalu vo: “Kala Misionario Akiese.” Wavova vo, e salu yayingi yibadikilwanga vo “yambote” ke yitwasanga kiese kiakieleka ko. (Ngana 14:13; Kimpovi 2:​10, 11) E kiese kiakieleka kitukanga mu vanga luzolo lwa Nzambi kana una vo ke dikalanga diakete ko mu vanga wo. E sikola ya Ngiladi yampasi yakala, kansi kiese kiayingi yatwasa.

Vena ye mambu mayingi metwasanga kiese kwa Akristu akieleka. Besambilanga Nzambi akiese. (Nkunga 33:12; 1 Timoteo 1:​11) Oyau bezingilanga kuna luvuvamu ye kintwadi kia wan’angudi muna nza yawonso kina vo i paradiso ya kimwanda. O Nkand’a Nzambi usianga nsilu vo o ntoto ukituka se paradiso. Oyau besololanga e nsasa zingu, besadilanga Yave ye kukembelela. Vana ntandu, bezolwanga kwa Yave yo Yesu.

O mpovi wavova diaka vo, “okala misionario akiese avo oyangalela ina una yau.” O zola akaka yo zolwa mpe kwa yau i diambu diakaka ditwasanga kiese. Vana fulu kia monanga kaka o vilwa w’akaka, ofwete kubayambulwilanga. Vanga ewete kw’akaka, sadisa atovoki, ubazaisa mambu mambote owanananga mau. (Nkunga 41:​1, 2; Mavangu 20:​35) E kiese, kitukanga muna kuyivana mu salu kia samun’e nsangu zambote.​—⁠Luka 11:⁠28.

 Mpangi Lösch wafokola ye mvovo emi: “Nuenda kuntwala nze misionario akiese. Ke nuyivani kwasaka ko mu mambu ma nsaka. Nusia sungididi kieno mu kembelela Yave wa Nzambi eto a kiese yo yangidika mpe akaka.”

O mpangi Anthony Morris vava kamana sunzula mavimpi m’ampangi za nsi zakaka, wavana alongoki e diploma zau. I bosi, mosi muna alongoki a sikola ya 126 watanga e nkanda una basonekena e Buka kia Selo Yambuta. Muna nkanda wau, alongoki basonga luyangalalu lwau muna kota mu Sikola ya Ngiladi.

Muna fokola, o mfidi a lukutakanu lwalu wavova vo, e “yikilwa ye mianzi” iyikakesanga e to, nkubika zawonso za Yave yisunzulanga, zina kesadilanga “ntaudi akwikizi yo lulungalalu” muna ludika yo dikila nkangu a Yave. (Kolosai 2:​18, 19; Matai 24:​45) Ampangi bakota sikola ya Ngiladi avo besala entwadi y’awana kasola o Nzambi mu kala se ntu, besikila muna salu kiau kia sila umbangi.​—⁠2 Timoteo 4:⁠5.

[Babu kina muna lukaya lwa 31]

OMA M’ALONGOKI

Lutangu lwa nsi zina batuka: 6

Lutangu lwa nsi zina bafilwa: 22

Lutangu lw’alongoki:56

Lutangu lw’awana basompa: 28

Tezo kia mvu: 32.8

Tezo kia mvu bena mu ludi: 17.9

Tezo kia mvu bena muna salu kia ntangwa ke ntangwa: 13.5

NSI BAFILWA ALONGOKI

Alongoki bafilwa mu nsi ya Benin, Bolívia, Bulgária, Burkina Fasso, Camarões, Costa Rica, Gana, Guatemala, Honduras, Quênia, Libéria, Madagascar, Moçambique, Nicarágua, Panamá, Paraguai, Peru, Romênia, Serra Leoa, África do Sul, Togo, ye Uganda.

[Foto ina muna lukaya lwa 31]

Kalasi kia 126 kia Sikola ya Ngiladi

Nlonga bakiatamene miyantikidi ku ntwala yakuna nima, e nkumbu zau zasonekwa tuka kuna koko kwalumonso yaku koko kwalunene muna konso nlonga.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.