Deuteronomium 7:1-26
7 “Apa nga mu twara Karunga gweni Jehova mosirongo esi muna kuza mu ka pinge, age nga tjida mo nomuhoko edi dononene komeho zeni: Vaheti, Vagiregasi, Vaamoli, Vakanani, Vaperesi, Vahevhi noVajebusi. Nomuhoko edi ntambali nonene ntani nonkondo kumupitakana.
2 Karunga gweni Jehova ngava gava momawoko geni ntani ngomu va funda. Mwa hepa kuvazonagura po, kapisi ngomu tulise po egwanekero* kumwe nawo ndi mu va fire nkenda.
3 Kapisi ngomu likwarere-kwarere kumwe nawo; mu gave vana veni wovakadi va kware vana vawo wovagara ndi mu guse vana vawo wovakadi va kware vana veni wovagara.
4 Yeeyi awo ngava ninkisa vana veni va hageke kukarera nge yipo va karere yikarunga yapeke, makura Jehova nga mu handukire ntani nga mu zonagure po usimbu-simbu.
5 “Nye eyi yiyo ngomu va rugana: Ngomu zonagure yizambero yawo nomamanya gawo gokupongoka nonongundi dawo dokupongoka* ntani ngomu hwike mafano aga va liruganena.
6 Yeeyi one mwa pongoka kwaJehova, ano Karunga gweni Jehova kwa mu horowora mokatji kovantu navenye vepevhu, yipo mu kare vantu vendi ndi emona lyendi lyokulikarera.
7 “Jehova kapi ga mu likida eharo ndi a mu horowore morwa muvanzi kupitakana vantu navenye. One kwa kere vantu wovasesu mokumuhetakanesa nonomuhoko dapeke.
8 Nye Jehova kwa mu gusire moEgipite omu mwa kere vapika nononkondo dendi dononene, a mu mangurure kwaFarawo hompa goVaegipite, morwa Jehova kwa mu hara ntani kwa sikisire mo eyi ga tumbwidilire ozinyakurweni.
9 One mwa yi diva asi Jehova yige Karunga gousili, age mulimburukwi ntani kusikisa mo egwanekero lyendi nokulikida eharo lyanarunye koruvharo rokomeho rovantu ava va mu hara, ava ava sikisa mo yipango yendi.
10 Nye ava va mu nyenga, age ngava futisa pokuvazonagura po. Age kapi nga liranga kutengeka ava va mu nyenga, nye age ngava futisa.
11 Yipo nye, sikiseni mo yipango yendi nonompangera dendi ntani nonoveta dendi edi nina kumutantera neina mu di limburukwe.
12 “Nsene mu twikira kupurakena konoveta edi mu di sikise mo, Karunga gweni Jehova nga sikisa mo egwanekero lyendi ntani nga mu likida eharo lyanarunye eli ga tumbwidira ozinyakurweni.
13 Age nga mu hara, nga mu tungika ntani nga mu vhukisa. Age nga mu tungika mosirongo esi ga tumbwidira ozinyakurweni pokumupa vana wovanzi ntani nga tungika evhu lyeni, mbuto zeni, vhinyu zeni zompe, magadi geni, yitana ntani nononzwigona noyikombogona.
14 One ngava mu tungika kupitakana nomuhoko nadinye. Kwato mugara ndi mukadi ogu nga dira kukara novana ntani kwato simuna esi nga si dira kuvhara.
15 Jehova nga mu ninka mu dire kuvera ntani kapi nga mu retera mauvera aga mwa mwene moEgipite. Nye age ngaga ninka ga gwane vantu navenye ava va mu nyenga.
16 Mwa hepa kuzonagura vantu navenye ava nga mu pa Karunga gweni Jehova. Kapisi ngomu va fire nkenda ntani kapisi ngomu karere yikarunga yawo. Nsene ngomu yi rugana one ngomu ligwanekera nomaudigu.
17 “Nsene mu litantera nyamweni asi: ‘Vantu womonomuhoko edi vanzi unene kutupitakana, kapi tatu vhuru kuvatjida mo.’
18 Kapisi mu va tjire, diworokeni eyi ga rugene Karunga gweni Jehova kwaFarawo noVaegipite navenye,
19 ntani mahepeko aga mwa mwene, noyidiviso noyitetu nononkondo dononene edi ga ruganesere Jehova a mu guse moEgipite. Eyi yiyo nga rugana Karunga gweni Jehova kovantu navenye ava muna kutjira.
20 Karunga gweni Jehova nga va ninka va kare nowoma,* dogoro ngava va zonagure po ava ngava hupa po nava ngava vanda.
21 Kapisi mu va tjire, yeeyi Karunga gweni Jehova kumwe none ana kara, age Karunga gononkondo ogu va hepa kutjira vantu ntani va mu fumadeke.
22 “Karunga gweni Jehova nga tjida mo nomuhoko edi komeho zeni kanunu-kanunu. Age kapi nga mu pulisira mu va zonagure po usimbu-simbu yipo yikasama yi dire kuligwederera yi mu homokere.
23 Karunga gweni Jehova ngava gava momawoko geni ntani one ngomu va funda, mu va zonagure po.
24 Age nga gava vahompa vawo momawoko geni, one ngomu va zonagura po ntani kwato ogu nga diworoka madina gawo. Kwato ogu nga vhura kumurwanesa dogoro ngomu va zonagure po navenye.
25 Mwa hepa kuhwika mafano goyikarunga yawo, kapisi ngomu dowokere sisiliveli nongorodo zawo ndi mu yi guse, yipo ngayi dire kukara ngwendi siraha kweni, yeeyi Karunga gweni Jehova kwa yi nyenga.
26 Kapisi ngomu rete yininke eyi ga nyenga Karunga momambo geni, yipo Karunga nga dire kumuzonagura po kumwe nayo. Mwa hepa kuyinyenga nomutjima nagunye morwa ayo kwa fira kuyizonagura po.
