Timote vuandaka ntuenia mosi ya bakala na kimvuka ya Listra. Tata na yandi vuandaka Mugreki, mpe mama na yandi vuandaka Muyuda. Mama na yandi, Enise, mpe nkaka na yandi Loise longaka Timote mambu metadila Yehova ntangu yandi vuandaka ntete muana fioti.

Ntangu Paulo kuizaka tala kimvuka ya Listra na vuayaje na yandi ya zole ya kisalu ya kusamuna, yandi bakusaka ti Timote vuandaka zola mpenza bampangi na yandi mpe yandi vuandaka mpenza na nsatu ya kusadisa bau. Paulo lombaka Timote yandi kuenda na yandi na vuayaje na yandi. Na manima ya mua ntangu, Paulo pesaka Timote formasion samu yandi kuma nsamuni mpe nlongisi ya makoki ya nsangu ya mbote.

Mpeve ya nlongo vuandaka tuadisa Paulo mpe Timote konso kisika yina bavuandaka kuenda. Na mpipa mosi, na nzila ya vizion mosi, muntu mosi tubilaka Paulo yandi kuenda na Masedonia samu na kusadisa bantu ya mbanza yango. Na yau Paulo, Timote, Silasi, mpe Luka kuendaka kuna samu na kusamuna mpe kubimisa bimvuka.

Na Tesalonika, mbanza mosi ya Masedonia, babakala mpe banketo mingi kumaka Baklisto. Kasi Bayuda yankaka vuandaka na kimpala samu na Paulo mpe bankundi na yandi. Basanganaka kintuadi na bantu ya yimbi mpe banataka Paulo na bankundi na yandi na bamfumu ya mbanza, na kutubaka ngolo ti: ‘Babakala yayi kele bambeni ya kimfumu ya Roma!’ Luzingu ya Paulo mpe Timote kumaka na kivonza, na yau batinaka na Beroya na mpipa.

Bantu ya Beroya vuandaka sepela mpenza kulonguka nsangu ya mbote, na yau Bagreki mpe Bayuda yina vuandaka zinga kuna kumaka Baklisto. Kasi ntangu Bayuda yankaka yina katukaka na Tesalonika kuizaka na Beroya mpe bakotisaka mvualangani, Paulo kuendaka na Atene. Timote mpe Silasi bikanaka na Beroya samu na kukindisa bampangi. Na manima, Paulo tindaka Timote yandi vutuka na Tesalonika samu na kusadisa bampangi banunga minioko ya ngolo yina vuandaka kuna. Na manima, Paulo tindaka Timote yandi kuenda tala bimvuka mingi yankaka mpe yandi kindisa bau.

 Paulo tubilaka Timote: ‘Bantu yina zola sadila Yehova keniokuama.’ Baniokolaka Timote mpe bakotisaka yandi na buloko samu na kiminu na yandi. Yandi vuandaka na kiese samu na diluaku yina yandi vuandaka na yau ya kumonisa ti yandi vuandaka ya kukuikama na Yehova.

Paulo tubilaka bantu ya Filipi: ‘Munu kena kutindila beno Timote. Yandi kelonga beno mutindu ya kutambula na kedika, mpe yandi kepesa beno formasion na kisalu ya kusamuna.’ Paulo zabaka ti yandi lenda tudila Timote ntima. Basalaka kintuadi lokola bankundi mpe bampangi na kisalu ya Mfumu samu na bamvula mingi.