တၢ်မၤလိ ၉၀
ယ့ၣ်ၡူးသံလၢ ကီၤလၤကီၤသါ
ပှၤလုၢ်တၢ်ဒိၣ်အခိၣ်တဖၣ် လဲၤကိးယ့ၣ်ၡူးဆူ ပဒိၣ်ဖးဒိၣ်အနီပူၤ. စီၤပံၤလး သံကွၢ်အဝဲသ့ၣ်လၢ “သုပာ်ဒ့ၣ်ပာ်ကမၣ် ပှၤတဂၤအံၤလၢ တၢ်ဂ့ၢ်မနုၤလဲၣ်.” ပှၤလုၢ်တၢ်ဒိၣ်အခိၣ်တဖၣ် တဲက့ၤဝဲလၢ “အတဲလီၤအသးလၢ အမ့ၢ် . . . စီၤပၤတဂၤ.” ဒီးစီၤပံၤလး သံကွၢ်ယ့ၣ်ၡူးလၢ “မ့ၢ်နကဲပှၤယူဒၤဖိ အစီၤပၤဧါ.” ယ့ၣ်ၡူး တဲက့ၤအီၤလၢ “ယဘီယမုၢ်န့ၣ် တဘၣ်ဃးဒီး ဟီၣ်ခိၣ်အံၤဘၣ်.”
ဝံၤဒီး စီၤပံၤလး မၢပှၤလဲၤကိးယ့ၣ်ၡူးလၢ စီၤဟ့ၤရိာ်အအိၣ် ဒ်သိး ကသမံသမိးဝဲလၢ မ့ၢ်ယ့ၣ်ၡူး အတၢ်ကမၣ်အိၣ်ဧါ တအိၣ်ဧါ. ဖဲန့ၣ်အခါ စီၤဟ့ၤရိာ် မ့ၢ်ပှၤတဂၤလၢ အပၢကီၢ်ကၤလံၤလါ. ဘၣ်ဆၣ် စီၤဟ့ၤရိာ်ဃုဝဲ ယ့ၣ်ၡူးအတၢ်ကမၣ် တဘၣ်ဘၣ်. အဃိ အဝဲဆှၢကဒါက့ၤ ယ့ၣ်ၡူးလၢ စီၤပံၤလးအအိၣ်. ဝံၤဒီး စီၤပံၤလးတဲဘၣ် ပှၤဂီၢ်မုၢ်လၢ ‘စီၤဟ့ၤရိာ်မ့ၢ်ဂ့ၤ ယၤမ့ၢ်ဂ့ၤ ပတထံၣ် ပှၤတဂၤအံၤ အတၢ်ကမၣ်နီတမံၤဘၣ်. အဃိ ပကပျၢ်ကွံာ်အီၤ.’ ဘၣ်ဆၣ် ပှၤဂီၢ်မုၢ်ကိးပသူထီၣ်လၢ “မၤသံကွံာ်အီၤန့ၣ်, မၤသံကွံာ်အီၤန့ၣ်.” ဝံၤဒီး ပှၤသုးဖိတဖၣ် ဖျ့ယ့ၣ်ၡူးဒီးပျံၤ, ထူးပှဲာ်အီၤ ဒီးတီၢ်အီၤ. အဝဲသ့ၣ် ဒုးဖျီၣ်ထီၣ်ဝဲ ယ့ၣ်ၡူး လၢခိၣ်သလုးတၤဆှုၣ်. ဒီးအဝဲသ့ၣ် တဲဆါယ့ၣ်ၡူးလၢ “ပှၤယူဒၤဖိ အစီၤပၤဧၢ, ပဆၢဂ့ၤဆၢဝါနၤလီၤ.” ဝံၤဒီး စီၤပံၤလး တဲဘၣ်ကဒီး ပှၤဂီၢ်မုၢ်လၢ ‘ပိာ်ခွါတဂၤအံၤ အတၢ်ကမၣ်တအိၣ်ဘၣ်.’ ဘၣ်ဆၣ် ပှၤဂီၢ်မုၢ် ကိးပသူထီၣ်လၢ “ပျၤထီအီၤ လၢသ့ၣ်တၢၣ် အလိၤန့ၣ်.” အဃိ စီၤပံၤလး ဟ့ၣ်လီၤယ့ၣ်ၡူး ဒ်သိး ပှၤကမၤသံအီၤ.
ဖဲန့ၣ် အဝဲသ့ၣ်လဲၤကိးယ့ၣ်ၡူးလၢ တၢ်လီၢ်တတီၤ ကိးဝဲလၢ ကီၤလၤကီၤသါ ဒီးပျၤထီအီၤလၢ သ့ၣ်တၢၣ်အလိၤ. ဒီးယ့ၣ်ၡူး ဃ့ဘါထုကဖၣ်လၢ “ပါဧၢ, အဝဲသ့ၣ် မၤမနုၤလဲၣ်န့ၣ် တသ့ၣ်ညါဝဲဘၣ်အဃိ ပျၢ်အဝဲသ့ၣ် အတၢ်ကမၣ်တက့ၢ်.” ပှၤဂီၢ်မုၢ်တဲဆါယ့ၣ်ၡူးလၢ ‘နမ့မ့ၢ်ယွၤအဖိခွါန့ၣ် ဟဲက့ၤလီၤလၢ သ့ၣ်တၢၣ်အလိၤ ဒီးမၤပူၤဖျဲး နသးသၢၤ.’
ပှၤအၢပှၤသီတဂၤလၢ အိၣ်လၢယ့ၣ်ၡူးအကပၤန့ၣ် တဲဘၣ်ယ့ၣ်ၡူးလၢ “ဖဲနနုာ်လီၤလၢ နဘီမုၢ်အပူၤအခါ သ့ၣ်နီၣ်ထီၣ်က့ၤယၤနီၤ.” ဒီးယ့ၣ်ၡူး အၢၣ်လီၤအီၤလၢ “နကအိၣ်ဒီးယၤလၢ ပၤရဒံစူးအပူၤ.” ဖဲမုၢ်ဃ့ၢ်လီၤအဆၢကတီၢ် တၢ်ခံးလီၤဝဲလၢ ကီၢ်ဒီဘ့ၣ်ညါ ဒီးယံာ်ဝဲသၢနၣ်ရံၣ်. ယ့ၣ်ၡူးအပျဲၢ်အဘီၣ်တနီၤ ဒီးအမိၢ်နီၢ်မၤရံန့ၣ် ဆၢထၢၣ်ဝဲဘူးဒီး သ့ၣ်တၢၣ်. ဒီးယ့ၣ်ၡူး မၢဝဲစီၤယိၤဟၣ်လၢ ကကွၢ်ထွဲက့ၤနီၢ်မၤရံ ဒ်အမိၢ်တဂၤအသိး.
လၢခံကတၢၢ်န့ၣ် ယ့ၣ်ၡူးတဲဝဲလၢ “တၢ်ခဲလၢာ်ဝံၤလံ.” ဝံၤဒီး ယ့ၣ်ၡူး အခိၣ်လီၤဖျး ဒီးသံဝဲ. ဖဲန့ၣ်အဆၢကတီၢ် ဟီၣ်ခိၣ်ဟူးဝဲဖးဒိၣ်. ဒီးလၢ တၢ်လုၢ်ဟံၣ်အပူၤန့ၣ် ယၣ်ဘျးသဒၢဖးဒိၣ်တဘ့ၣ် လၢအအိၣ်ဝဲလၢ တၢ်လီၢ်စီဆှံ ဒီးတၢ်လီၢ်စီဆှံကတၢၢ် အဘၢၣ်စၢၤန့ၣ် ညာ်ကွံာ်ဝဲခံက့. ပှၤသုးဖိတဂၤ တဲဝဲလၢ “ပှၤတဂၤအံၤမ့ၢ် ကစၢ်ယွၤအဖိခွါ နီၢ်ကီၢ်.”
“ကစၢ်ယွၤ အတၢ်အၢၣ်လီၤတဖၣ် မ့ၢ်အိၣ်အါထဲလဲၣ် သနာ်က့ အတၢ်အၢၣ်လီၤတဖၣ် ကဲထီၣ် ‘မ့ၢ်’ ခီဖျိလၢ ယ့ၣ်ၡူး.”—၂ ကရံၣ်သူး ၁:၂၀
တၢ်ဂ့ၤအဂၤလၢ နကဘၣ်သး
လံာ်စီဆှံ အတၢ်သိၣ်လိလၢ အရ့ဒိၣ်တဖၣ်
ဘၣ်မနုၤအဃိ ယ့ၣ်ၡူးတူၢ်သံအသးလဲၣ်
လံာ်စီဆှံ ပာ်ဖျါထီၣ်ဝဲလၢ ယ့ၣ်ၡူးအတၢ်သံန့ၣ် မ့ၢ်တၢ်လၢအရ့ဒိၣ်ဒိၣ်မးလီၤ. ဒီးအတၢ်သံန့ၣ် ကဲဘျုးဒ်လဲၣ်.
