ဖဲယ့ၣ်ၡူးသံဝံၤအလီၢ်ခံ ပှၤကဲဒိၣ်အိၣ်ဝဲတဂၤ လၢအမံၤမ့ၢ် စီၤယိၤသးန့ၣ်​ အဝဲလဲၤဃ့အခွဲးလၢ စီၤပံၤလးအအိၣ်​ ဒ်သိး အကဟံးန့ၢ် ယ့ၣ်ၡူးအစိၣ်​ လၢသ့ၣ်တၢၣ်အလိၤ. ဝံၤဒီး စီၤယိၤသး ဘိၣ်ဘံထီၣ်​ ယ့ၣ်ၡူးအစိၣ်လၢ တၢ်ကံးညာ် လၢအညၣ်ဂ့ၤတဘ့ၣ်​ ဒီးတၢ်နၢမူ. ဒီးအလဲၤပာ်လီၤအီၤလၢ တၢ်သွၣ်ခိၣ်သီသီတဖျၢၣ်အပူၤ. ဝံၤဒီး အဝဲတလ့ၣ်တံၢ် လၢၢ်ဖးဒိၣ်တဖျၢၣ်လၢ တၢ်သွၣ်ခိၣ်​ အခိၣ်ထိး. ပှၤလုၢ်တၢ်ဒိၣ်အခိၣ်တဖၣ်​ တဲဘၣ်​ စီၤပံၤလးလၢ ‘ပပျံၤလၢ ယ့ၣ်ၡူးအပျဲၢ်အဘီၣ်တနီၤ ကဟဲဟံးန့ၢ်အစိၣ်​ ဒီးတဲဝဲလၢ ယ့ၣ်ၡူးဂဲၤဆၢထၢၣ်​ သမူထီၣ်က့ၤလံ.’ အဃိ စီၤပံၤလး တဲဘၣ်အဝဲသ့ၣ်လၢ ‘ကးတံာ်ဃာ် တၢ်သွၣ်ခိၣ်လၢလၢၢ် ဒီးခိးကွၢ်တၢ်သွၣ်ခိၣ်န့ၣ်ဂ့ၤဂ့ၤ.’

သၢသီဝံၤအလီၢ်ခံ ဖဲဂီၤခီဂီၤဂီၤန့ၣ်​ ပိာ်မုၣ်တနီၤ လဲၤလၢ တၢ်သွၣ်ခိၣ်​ ဒီးထံၣ်ဝဲလၢ တၢ်သွၣ်ခိၣ်အခိၣ်ထိးန့ၣ်​ ပှၤတလ့ၣ်ကွံာ်လၢၢ်လံ. လၢတၢ်သွၣ်ခိၣ်အပူၤန့ၣ်​ မူခိၣ်ကလူးတဂၤ တဲဘၣ်အဝဲသ့ၣ်လၢ ‘ပျံၤတၢ်တဂ့ၤ, ယ့ၣ်ၡူးဂဲၤဆၢထၢၣ်​ သမူထီၣ်က့ၤလံ. က့ၤတဲဘၣ်​ အပျဲၢ်အဘီၣ်တဖၣ်လၢ ကလဲၤထံၣ်လိာ်သးဒီးအီၤ လၢကၤလံၤလါတက့ၢ်.’

နီၢ်မၤရံမၤကဒၤလ့ၣ်​ ကရီလဲၤဝဲဆူ စီၤပ့းတရူး ဒီးစီၤယိၤဟၣ်အအိၣ်. နီၢ်မၤရံတဲဘၣ်​ အဝဲသ့ၣ်လၢ ‘ပှၤတဂၤ ဟဲဟံးန့ၢ်ယ့ၣ်ၡူးအစိၣ်လံ.’ အဃိ စီၤပ့းတရူး ဒီးစီၤယိၤဟၣ်​ လဲၤဃ့ၢ်ဝဲဆူ တၢ်သွၣ်ခိၣ်. ဖဲအဝဲသ့ၣ်​ လဲၤတုၤဝဲအခါ တထံၣ်ယ့ၣ်ၡူးအစိၣ်လၢ တၢ်သွၣ်ခိၣ်အပူၤလၢၤဘၣ်​ အဃိ အဝဲသ့ၣ်​ က့ၤဝဲဆူဟံၣ်.

ဖဲနီၢ်မၤရံ က့ၤကဒါဆူ တၢ်သွၣ်ခိၣ်အခါ ထံၣ်ဝဲ မူခိၣ်ကလူးခံဂၤ အိၣ်လၢတၢ်သွၣ်ခိၣ်အပူၤ. နီၢ်မၤရံ တဲဘၣ်အဝဲသ့ၣ်လၢ “ပှၤက့ၤစိာ်ကွံာ် ယကစၢ် ဒီးလဲၤပာ်ဝဲဖဲလဲၣ်န့ၣ်​ ယတသ့ၣ်ညါဘၣ်.” ဝံၤဒီး နီၢ်မၤရံ ထံၣ်ဝဲပိာ်ခွါတဂၤ ဒီးဆိကမိၣ်ဝဲလၢ အမ့ၢ်ပှၤပၢၤတၤသၣ်အလီၢ် အဃိ အတဲဘၣ်အီၤလၢ ‘နလဲၤပာ် ယကစၢ်အစိၣ်ဖဲလဲၣ်, ဝံသးစူၤတဲဘၣ်ယၤမီၤ.’ ဘၣ်ဆၣ်​ ဖဲပိာ်ခွါတဂၤအံၤ တဲဝဲလၢ “နီၢ်မၤရံဧၢ” အခါ နီၢ်မၤရံ သ့ၣ်ညါဝဲလၢ အဝဲမ့ၢ် ယ့ၣ်ၡူး. နီၢ်မၤရံ ကိးပသူထီၣ်လၢ “သရၣ်” ဒီးဖီၣ်ဃာ်အီၤ. ဒီးယ့ၣ်ၡူး တဲဘၣ်အီၤလၢ ‘က့ၤတဲဘၣ်​ ယဒီပုၢ်ဝဲၢ်တဖၣ်လၢ နထံၣ်ဘၣ်ယၤတက့ၢ်.’ တဘျီဃီန့ၣ်​ နီၢ်မၤရံ က့ၤဃ့ၢ်ဝဲဆူ ယ့ၣ်ၡူးအပျဲၢ်အဘီၣ်တဖၣ်အအိၣ်​ ဒီးတဲဘၣ်အဝဲသ့ၣ်လၢ အထံၣ်ဘၣ်​ ယ့ၣ်ၡူးလံ.

လၢခံ ဖဲနံၤအဝဲန့ၣ်​ ယ့ၣ်ၡူးအပျဲၢ်အဘီၣ်ခံဂၤ အိၣ်လၢဝ့ၢ်ယရူၤၡလ့ၣ်​ ဒီးလဲၤဝဲဆူ အ့းမၤအူ. ဖဲအဝဲသ့ၣ်​ လဲၤလၢကျဲအခါ ပိာ်ခွါတဂၤ ဟဲပိာ်ထီၣ်​ အဝဲသ့ၣ်အခံ ဒီးသံကွၢ်ဝဲလၢ သုတဲသကိး တၢ်ဂ့ၢ်မနုၤလဲၣ်. အဝဲသ့ၣ်တဲဘၣ်​ ပိာ်ခွါအံၤလၢ ‘ဖဲအပူၤကွံာ် သၢသီန့ၣ်​ ပှၤလုၢ်တၢ်ဒိၣ်အခိၣ်တဖၣ်​ မၤသံယ့ၣ်ၡူးန့ၣ်​ နတနၢ်ဟူဧီၤ. ဘၣ်ဆၣ်ခဲအံၤ ပိာ်မုၣ်တနီၤတဲဝဲလၢ ယ့ၣ်ၡူးဂဲၤဆၢထၢၣ်​ သမူထီၣ်က့ၤလံ.’ ပိာ်ခွါန့ၣ်သံကွၢ်က့ၤ အဝဲသ့ၣ်လၢ ‘ဝံအတၢ်စံးပာ်လၢ အတဲဝဲလၢ ခရံာ်ကဘၣ်တၢ်မၤသံအီၤ ဒီးကဂဲၤဆၢထၢၣ်​  သမူထီၣ်က့ၤန့ၣ်​ သုတနာ်ဘၣ်ဧါ.’ ဝံၤဒီး ပိာ်ခွါတဂၤအံၤ ဆဲးတဲနၢ်ပၢၢ် အဝဲသ့ၣ်လၢ လံာ်စီဆှံအဆၢတဖၣ်. ဖဲအဝဲသ့ၣ်​ လဲၤတုၤလၢ အ့းမၤအူအခါ အဝဲသ့ၣ်​ မၢပိာ်ခွါတဂၤအံၤ လဲၤတၢ်ဒီးအဝဲသ့ၣ်. ဒီးဖဲအဝဲသ့ၣ်​ ကအီၣ်ဟါတၢ်အီၣ်အခါ ပိာ်ခွါအံၤ ဃ့ထုကဖၣ်တၢ်ဝံၤဒီး အဝဲသ့ၣ်​ သ့ၣ်ညါဝဲလၢ ပိာ်ခွါအံၤမ့ၢ်ဝဲ ယ့ၣ်ၡူး. ဝံၤဒီး ယ့ၣ်ၡူးလီၤမၢ်ဝဲ.

ဝံၤဒီး ယ့ၣ်ၡူးအပျဲၢ်အဘီၣ်ခံဂၤအံၤ ကရီက့ၤကဒါဆူ ဝ့ၢ်ယရူၤၡလ့ၣ်အပူၤ ဖဲတၢ်မၢဖိတဖၣ်​ အိၣ်ဝဲအလီၢ် ဒီးအဝဲသ့ၣ်တဲဘၣ်​ တၢ်မၢဖိတဖၣ်လၢ တၢ်မၤအသးတဖၣ်အံၤအဂ့ၢ်. ဖဲအဝဲသ့ၣ်အိၣ်လၢ ဟံၣ်ပူၤအခါ ယ့ၣ်ၡူး လီၣ်ဖျါထီၣ်သးလၢ အဝဲသ့ၣ်ခဲလၢာ် အမဲာ်ညါ. ခီၣ်ထံးခါန့ၣ်​ တၢ်မၢဖိတဖၣ်​ တနာ်ဝဲလၢ အဝဲမ့ၢ်ယ့ၣ်ၡူးဘၣ်. ဝံၤဒီး ယ့ၣ်ၡူးတဲဝဲလၢ ‘ကွၢ်ယစု ဒီးဖီၣ်ကွၢ်ယၤမီၤ. တၢ်ကွဲးအသးလၢ ခရံာ်သံဝံၤအလီၢ်ခံ အကဂဲၤဆၢထၢၣ်သမူထီၣ်က့ၤ.’