WI PRICHIN wok na sɔntin we rili impɔtant. Bɔt nɔto ɔlman we wi kin prich to de ɔndastand dat. Ilɛksɛf pipul dɛn want fɔ no wetin di Baybul se, nɔto ɔltɛm dɛn kin tink se i impɔtant fɔ stɔdi Gɔd in Wɔd wit wi.

Fɔ ɛgzampul, lɛ wi tɔk bɔt Javin. I bin de go mitin na Kiŋdɔm Ɔl, bɔt i nɔ bin want fɔ stɔdi di Baybul. Javin ɛksplen se na smɔl tin nɔmɔ i sabi bɔt di Baybul ɛn i nɔ bin want fɔ lɛ ɔda pipul dɛn no. I bin de fred se dɛn go tɛl am fɔ jɔyn wan rilijɔn, ɛn i nɔ bin want fɔ lɛ dɛn ful am. Wetin yu tink? Yu tink se i pɔsibul fɔ ɛp Javin? Tink bɔt di gud tin we di Baybul kin du to pɔsin. Jiova bin tɛl di Izrɛlayt dɛn se: “Wetin a de tɔk go tan lɛkɛ we dyu kɔba ples, lɛkɛ we ren de drisul pan yɔŋ gras.” (Ditarɔnɔmi 31:​19, 30; 32:​2) Lɛ wi lan sɔm tin dɛn bɔt dyu ɛn kɔmpia wi prichin wok to am so dat wi go ebul fɔ ɛp “ɔlman” fayn fayn wan.—Fɔs Lɛta To Timoti 2:​3, 4.

Dyu na sɔntin we sɔft ɛn fayn. Dyu kin gɛda gɛda lɛk klawd na di skay ɛn afta sɔm tɛm, i kin tɔn to smɔl smɔl drɔp wata. Aw di tin dɛn we Jiova bin tɔk, tan “lɛkɛ we dyu kɔba ples”? I bin de tɔk to in pipul dɛn fayn fayn wan, saful wan, ɛn di we we de sho se i bisin bɔt dɛn. Wi go falamakata am we wi sho se wi rɛspɛkt wetin ɔda pipul dɛn biliv. Wi fɔ ɛnkɔrej dɛn fɔ tink fɔ dɛnsɛf ɛn disayd wetin dɛn go du. We wi du ɔl dɛn tin dɛn ya fɔ sho pipul dɛn se wi bisin bɔt dɛn, dɛn go gladi fɔ yɛri wetin wi de se, ɛn wi go ebul fɔ prich fayn.

Dyu na sɔntin we de mek wi fil fayn. We wi tink bɔt difrɛn we dɛn fɔ ɛp ɔda pipul dɛn lan mɔ bɔt di tru tin dɛn we de na di Baybul, wi prichin wok go mek dɛn fil fayn. Di fɔs pɔsin we bin tɛl Javin fɔ stɔdi di Baybul wit am, na wan brɔda we nem Kris. Dis brɔda nɔ bin tray fɔ fos Javin fɔ stɔdi di Baybul wit am. Bifo dat, i tray fɔ fɛn difrɛn we dɛn we go mek Javin want fɔ no wetin de insay di Baybul. Kris bin tɛl Javin se wan impɔtant mɛsej de we di wan ol Baybul tɔk bɔt, ɛn if i lan bɔt da mɛsej de, i go ɛp am fɔ ɔndastand di tin dɛn we dɛn de tɔk na mitin. Dɔn, Kris bin ɛksplen se di tin dɛn we di Baybul bin dɔn tɔk se go apin we dɔn apin, bin ɛp am fɔ biliv se di Baybul na Gɔd in Wɔd fɔ tru. Afta dat, dɛn bin tɔk bɔt bɔku difrɛn tin dɛn we di Baybul bin dɔn tɔk se go apin we dɔn apin. Dɛn tin dɛn ya we in ɛn Javin bin tɔk bɔt, bin mek Javin fil fayn, ɛn i bin gri fɔ stɔdi di Baybul.

Dyu na sɔntin we impɔtant na layf. Insay dray sizin na Izrɛl, i kin tek sɔm mɔnt ren nɔ de kam. If dyu nɔ bin de fɔdɔm de, di plant dɛn go dray ɛn dɛn go day. Jiova bin dɔn tɔk se insay wi yon tɛm, i go tan lɛk se wi de insay bad bad dray sizin we ren nɔ de kam, we min se pipul dɛn go tɔsti “fɔ yɛri PAPA GƆD in mɛsej.” (Emɔs 8:​11) Jiova bin prɔmis se di anɔyntɛd Kristian dɛn we i sɛn fɔ prich di gud nyus bɔt in Kiŋdɔm go tan lɛk “ren” we de drisul, ɛn di “ɔda ship” dɛn go sɔpɔt dɛn. (Mayka 5:​7; Jɔn 10:​16) Jiova de yuz di prichin wok we wi de du fɔ gi layf to di wan dɛn we tɔsti fɔ lan di tru tin dɛn bɔt am. Yu valyu di mɛsej we wi de prich bɔt?

Dyu na blɛsin frɔm Jiova. (Ditarɔnɔmi 33:​13) Wi prichin wok kin bi blɛsin ɔ gift to di wan dɛn we de lisin we wi prich to dɛn. Javin bin ebul fɔ gɛt ansa to ɔl in kwɛstyɔn dɛn, so di Baybul stɔdi na bin blɛsin fɔ am. I bin go bifo pan Gɔd biznɛs kwik kwik wan ɛn i bin baptayz. Naw, i de ɛnjɔy fɔ prich di gud nyus bɔt Gɔd in Kiŋdɔm wit in wɛf we nem Jɔys.

We wi kɔmpia wi prichin wok to dyu, dat go ɛp wi bak fɔ ɔndastand se di tin dɛn we wi ɔl de du fɔ ebul prich to ɔda pipul dɛn, na sɔntin we rili impɔtant. Wetin mek wi se so? Wan wan drɔp wata kin ɛp smɔl, bɔt di grɔn kin sok mɔ we di wata we de drɔp bɔku. Semweso, wetin wan pɔsin de du na di prichin wok kin luk smɔl to wi. Bɔt we Jiova in savant dɛn ɔl kam togɛda fɔ du di prichin wok, dɛn kin ebul fɔ “tɛl ɔlman na [di] wɔl” di gud nyus. (Matyu 24:​14) Yu tink se wi prichin wok go bi blɛsin we Jiova de gi to ɔda pipul dɛn? Fɔ tru, wi mɛsej go bi jɔs lɛk dyu we sɔft ɛn fayn, we de mek pɔsin fil fayn, ɛn we impɔtant na layf!