STORI 116
Aw fɔ Gɛt Layf we Go De Sote Go
YU NO wetin di smɔl titi ɛn in padi dɛn de rid? Na dis sem Mi Baybul Stori Buk we yu de rid so. Ɛn na dis sem stori dɛnsɛf de rid.
Yu no wetin dɛn de lan? Dɛn de lan se, fɔ mek wi go ebul de sote go, wi fɔ lan bɔt Jiova ɛn in pikin we na Jizɔs. Di Baybul se: ‘Wi go gɛt layf we go de sote go, we wi lan bɔt di wan gren tru Gɔd ɛn in pikin we i sɛn, we na Jizɔs Krays.’
Aw wi go lan bɔt Jiova Gɔd ɛn in pikin we na Jizɔs? Wi go lan bɔt dɛn we wi rid ɔl di stori dɛn na Mi Baybul Stori Buk. Dis buk de tɛl wi plɛnti tin bɔt Jiova Gɔd ɛn in pikin we na Jizɔs Krays. I de tɛl wi bɔt di tin dɛn we dɛn dɔn du, ɛn di tin dɛn we dɛn gɛt fɔ du. Bɔt nɔto dis buk nɔmɔ wi fɔ rid.
Yu de si di ɔda buk we de na grɔn? Na di Baybul. Tɛl pɔsin fɔ rid fɔ yu di pat dɛn na di Baybul usay di stori dɛn na dis buk kɔmɔt. Di Baybul de tɛl wi ɔl wetin wi fɔ no we go ɛp wi fɔ sav Jiova di rayt we. Ɛn i go ɛp wi fɔ gɛt layf we go de sote go. So wi fɔ mek shɔ se wi rid di Baybul ɔltɛm.
Nɔto we wi lan bɔt Jiova Gɔd ɛn Jizɔs Krays nɔmɔ go mek wi gɛt layf we go de sote go, bikɔs wi kin lan plɛnti tin bɔt dɛn, ɛn stil nɔ gɛt layf we go de sote go. Yu no wetin bak wi fɔ du?
Wi fɔ du di tin dɛn we wi de lan. Yu mɛmba Judas Iskariɔt? In na bin wan pan di 12 man dɛn we Jizɔs bin pik fɔ bi in apɔsul. Judas bin sabi bɔku tin bɔt Jiova ɛn Jizɔs. Bɔt wetin apin to am? Afta sɔm tɛm, Judas bigin tink bɔt insɛf nɔmɔ, ɛn i sɛl Jizɔs to sɔm bad pipul dɛn fɔ 30 silva mɔni. So Judas nɔ go gɛt layf we go de sote go.
Yu mɛmba Geazi we wi lan bɔt na Stori 69? I bin want sɔm klos ɛn sɔm mɔni we nɔto in yon. So i lay fɔ lɛ i gɛt dɛn. Bɔt Jiova pɔnish am. Ɛn i go pɔnish wisɛf if wi nɔ du wetin in lɔ se.
Bɔt bɔku gud pipul dɛn bin de we bin de du wetin Jiova want ɔltɛm. Wi go want tan lɛk dɛn gud pipul ya, nɔto so? I fayn fɔ mek wi tan lɛk Samiɛl we wi bin lan bɔt na stori 55. Wi bin lan se i bin ol lɛk fɔ ɔ fayv ia so we i bigin sav na Jiova in Os. So ilɛk yu smɔl te, yu nɔ smɔl fɔ sav Jiova.
Di pɔsin we wi ɔl want fɔ tan lɛk, na Jizɔs Krays. Ɛn wi lan na stori 87 se we Jizɔs bin smɔl, i bin de tɔk to pipul dɛn na di tɛmpul bɔt in Papa. Lɛ wi falamakata am. Lɛ wi tray fɔ tɔk to bɔku bɔku pipul dɛn bɔt Jiova ɛn in pikin we na Jizɔs Krays. If wi du ɔl dɛn tin ya, wi go ebul gɛt layf we go de sote go na di Paradays we Gɔd go mek na di wɔl.
