Kuht nuhkewa tiac oacna sie sulaclah la ke nuknuk ac mwe nahweyuck. Kuht fin ahkos kuhtuh kahs in kahsruh in Bible, kuht kuh in sulaclah nuknuk ma kuht luhngse ac oacyacpac kuht kuh in ahkenganye Jeova. Lwelah kuht in sramsramkihn kuhtuh sin oakwuck wo in Bible inge.

1. Oakwuck wo in Bible fuhkah ke nuknuk ac mwe nahweyuck ac kuh in kahsre kuht?

Kuht enenuh in nokomacng nuknuk, ‘ma wo nuhke nahweyuck lasr,’ ac atacsr enenuh in nwacsnwacs tuh kuht kuh in ahkkahlwemye lah kuht “mwet alu nuh sin God.” (1 Timothy 2:9, 10) Nuhnkuh ahkwoyac ke kahs in kahsruh ahkosr inge: (1) Nuknuk lasr enenuh in “wo.” Sahp, kom liye ke miting luhn congregation lah tiac oacna sie atacn nuknuk ma mwet luhn Jeova uh nukum, tuhsruhktuh nuknuk lasr ac style ke aunsifacsr ahkkahlwemye suhnak nuh sin God suc kuht alu nuh se. (2) In nokomacng nuknuk wi ohiyen “efahl” kalmackihn lah atacsr ac tiac pihrihk nuhnak luhn mwet nuhke ohiyac fohkfohk, kuh in tiac pwen muhtuhn mwet nuh yohrohsr. (3) Kuht ahkkahlwemye nuhnak “wo” ke kuht tiac etahi style ke nuknuk ac nahweyuck ma pwengpweng uh. (4) Nahweyuck lasr enenuh in kahlwem lah kuht “mwet alu nuh sin God,” ac ahkkahlwemye lah kuht kuhlwacnsap nuh sin God pwacye.​—1 Corinth 10:31.

2. Meac atacsr kuh in oruh nuh sin mwet lili wiyacsr uh?

Finne oasr sukohsohk lasr in sulaclah nuknuk ma kuht ac nukum, tuhsruhktuh kuht enenuh pac in nuhnkuh lah meac ma inge kuh in oruh nuh sin mwet sahyac uh. Kuht kwacfeacng in tiac ahktihkuclkuclye kuhtwena mwet, ac kuht nuhnkuh in “oruh ma ac wo nuh selos tuh in mwe ahkkweyaclos.”​—Riti Rome 15:1, 2.

3. Atacsr kahsruh fuhkah tuh mwet uh in luhngse etuh Jeova?

Kuht nukum nuknuk fal pacl nuhkewa ke kais sie pacl, tuhsruhktuh kuht lohacng ahkwoyac nuhke nuknuk lasr ke kuht wi miting luhn congregation ac ke orekma in luti lasr. Kuht luhngse mwet uh in lohacng nuhke pweng lasr ma arlac yohk srihpac, ac tiac ke atacsr. Pwacye lah mwet uh ac fah luhngse in lohng ac etuh ma pwacye ke srihpen atacsr ac “kuh in nahwelah mwe luti ke God, Mwet Lango lasr.”​—Titus 2:10.

 AHKYOHKYE LUTLUT LOM

4. Atac wo lasr ahkkahlwemye suhnak nuh sin Jeova

Meac srihpac yohk emeet lasr pwacnacng kuht luhngse atacsr in wo? Riti Psalm 47:2, tohkohyang sramsramkihn kihsen siyuck inge:

• Ke srihpen kuht aholyen inen Jeova, efuh kuht in sulaclah wo nuknuk ma kuht nukum uh?

• Kom nuhnkuh muh yohk srihpac in nuhnkuh yohk ke atacsr ke kuht wi miting ac oruh orekma in luti uh? Efuh?

 5. Kuht ac oruh fuhkah sulaclah wo ke nuknuk ac nahweyuck uh

Liye VIDEO se.

Finne nuknuk lasr uh yohk molo kuh tiac, ma inge enenuh in nwacsnwacs ac fal nuhke pacl. Riti 1 Corinth 10:24 ac 1 Timothy 2:9, 10. Tohkohyang, sramsramkihn lah efuh kuht enenuh in fahsr liki in nukum nuknuk ma . . .

• okahrkahr kuh rahtraht.

• arlac tingting, ahkkahlwemye ipin mahnosr, kuh pihrihk nuhnak luhn mwet nuhke ohiyac fohkfohk.

Mwet Christian uh tiac enenuh in ahkos Masap ma ituckyang nuh sel Moses ac, ne ohinge kuht kuh in lotwelah kac nuhnak luhn Jeova uh. Riti Deuteronomy 22:5, tohkohyang sramsramkihn kihsen siyuck se inge:

• Efuh kuht enenuh in fahsr liki nuknuk ac mwe nahweyuck ma oruh mukul in oacna muhtwacn kuh muhtwacn in oacna mukul?

Riti 1 Corinth 10:32, 33 ac 1 John 2:15, 16, tohkohyang sramsramkihn kihsen siyuck inge:

• Efuh kuht enenuh in nuhnkuh lah kuhtuh mwet ke acn sesr kuh ke congregation uh kuh in tihkuclkucl ke atacsr?

• Kain in style fuhkah ke nuknuk ac mwe nahweyuck pwengpweng ke acn kom muhta we uh?

• Kom nuhnkuh muh oasr kuhtuh sin style inge tiac fal nuh sin sie mwet Christian uh? Efuh?

 MA KUHT LOTWELAH

Ke kuht oruh sulaclah wo ke ma kuht nukum ac ke atacsr, kuht ahkkahlwemye suhnak lasr nuh sin Jeova ac nuh sin mwet sahyac uh.

Kalweni

• Efuh nuknuk lasr ac nahweyuck lasr uh yohk srihpac nuh sin Jeova?

• Meac kuhtuh oakwuck wo in Bible ke nuknuk ac nahweyuck lasr ma kuh in kahsre kuht ke sulaclah lasr?

• Meac atacsr kuh in oruh ke nuhnak luhn mwet sahyac ke alu pwacye?