Щьмшид: Сьлав Ԝәзир, ша мә диса тә бьвиньм. Ча һʹәԝас ә кӧ һәр һʹәфтийе әм Кʹьтеба Пироз шеԝьр дькьн. * Тӧ чаԝа ни?

Ԝәзир: Баш ьм, зәʹф рʹази мә.

Щьмшид: Ша мә ԝәки баш и. Ԝе рʹоже мә хәбәр дьда кӧ чьма Шәʹдед Йаһоԝа баԝәр дькьн, ԝәки Пʹадшатийа Хԝәде жь сала 1914 дәстпекьрийә Сәрԝертийе бькә. * Мә шеԝьр дькьр пʹехәмбәртийа жь кʹьтеба Данийел сәре 4. Те бира тә ԝедәре дәрһәԛа чь те готьне?

Ԝәзир: Ԝедәре те готьне дәрһәԛа бахәки мәзьн, кʹижан кӧ Пʹадша Нәбукәднәсәр хәԝна хԝәда дитьбу.

Щьмшид: Бәле, рʹаст ә. Нәбукәднәсәр хәԝна хԝәда бахәки мәзьн дит, кʹижан кӧ дьгьһиштә әʹзмен. Паше әԝи бьһист ча мәләке Хԝәде әʹмьр кьр, ԝәки ԝи бахи бьбьрʹьн, ле кочʹе бах у кʹока ве гәрәке әʹрдеда бьмана. Паши «һʹәфт дәма» әв бах гәрәке диса шин буйа. * Әм ӧса жи пеһʹәсийан, ԝәки әв пʹехәмбәрти гәрәке дӧ щара бьһата сери. Те бира тә щара пешьн ча һатә сери?

Ԝәзир: Ча те бира мьн әв пʹехәмбәрти сәр Нәбукәднәсәр һатә сери. Әԝи һʹьше хԝә ӧнда кьр у ӧса һʹәфт сал кʹьшанд.

Щьмшид: Рʹаст ә. Нәбукәднәсәр һьнә ԝәʹдә һʹьше хԝә ӧнда кьрьбу, ләма жи сәрԝертийа ԝи һатьбу сәкьнандьне. Ле әв пʹехәмбәрти бь щурʹе мәзьн һатә сери чахе сәрԝертийа Хԝәдейә сәр әʹрде һʹәфт дәма һатә сәкьнандьне. Ча әм пеһʹәсийан һʹәфт дәм дәстпебу һьнге чахе сала 607 Б.Д.М. Оршәлим һатә ԝеранкьрьне. Һьнгеда тʹӧ кәс алийе Хԝәдеда нәдьһатә кʹьфшкьрьне кӧ сәрԝертийа щьмәʹта ԝи бькә. Ле хьлазийа һʹәфт дәма Хԝәде гәрәке Сәрԝерәки тʹәзә сәр щьмәʹта хԝәрʹа кʹьфш кьра, ле ижар жь әʹзмен. Щурʹәки дьн бежьн, паши һʹәфт дәма Пʹадшатийа Хԝәде гәрәке сәрԝерти дәстпекьра. Әм пеһʹәсийан, ԝәки һʹәфт дәм кʹәнге дәстпебу. Һәрге әм бькарьбьн тедәрхьн әв һʹәфт дәм чьԛас ԝәʹдә кʹьшанд, әме бьзаньбьн ԝәки кʹәнге Пʹадшатийа Хԝәде дәстпекьр сәрԝертийе бькә. Әв һаԛас тьшт фәʹмдари йә?

Ԝәзир: Әре, әԝе хәбәрдане ани бира мьн әв фькьред кӧ мә пешда шеԝьр кьрьбу.

Щьмшид: Зәʹф баш. Ԝәки ӧса нә, ԝәрә әм бьньһерʹьн һәла әв һʹәфт дәм чьԛас ԝәʹдә кʹьшанд. Дәрһәԛа ԝе йәке мьн тʹәзә диса хԝәнд, сәва кӧ фькьред сәрәкә биньм бира хԝә. Ньһа чьԛас дькарьм, әзе зәлал шьровәкьм.

Ԝәзир: Баш.

Щьмшид: Чахе әв пʹехәмбәрти щара пешьн һатә сери, кʹижан кӧ дәрһәԛа Нәбукәднәсәр бу, һʹәфт дәм дьһатә һʹәсабе рʹастә-рʹаст һʹәфт сал. Ле чахе әв бь щурʹе мәзьн һатә сери, кʹижан кӧ дәрһәԛа Пʹадшатийа Хԝәде бу, һʹәфт дәм гәрәке һʹәфт сала зедәтьр бькʹьшанда.

Ԝәзир: Чьрʹа тӧ ӧса дьфькьри?

Щьмшид: Бинә бира хԝә, ԝәки һʹәфт дәм һьнге дәстпебу, чахе сала 607 Б.Д.М. Оршәлим ԝеран бу. Һәрге жь ве сале һʹәфт сала һʹәсаб кьн, ԝе бьгьһижә сала 600 Б.Д.М. Ле ве сале тʹӧ ԛәԝьмандьнәкә сәрԝертийа Хԝәдева гьредайи нәԛәԝьми. Хенщи ԝе йәке, ча әм щара майин пеһʹәсийан, чахе Иса сәр әʹрде бу, әԝи да кʹьфше ԝәки һʹәфт дәм һе хьлаз нәбьбу.

Ԝәзир: Әре. Тʹәзә һатә бира мьн.

Щьмшид: Демәк, әв һʹәфт дәм нә кӧ рʹастә-рʹаст һʹәфт сал ьн, ле ԝәʹдәки дьһа дьреж.

Ԝәзир: Чьԛас дьреж?

Щьмшид: Кʹьтеба Әʹйанти, кʹижан кӧ гьредайи йә тʹәви кʹьтеба Данийел, али мә дькә тедәрхьн, ԝәки әв һʹәфт дәм чьԛас ԝәʹдә кʹьшанд. Ԝедәре те готьне, ԝәки се дәм у нив дькә 1 260 рʹож. * Һʹәфт дәм, демәк дӧ дәрба сьсе нив, дькә 2 520 рʹож. Әԝа һаԛас фәʹмдари йә?

Ԝәзир: Әре, фәʹмдари йә. Ле әз фәʹм накьм әв йәк ча дьдә кʹьфше, ԝәки Пʹадшатийа Хԝәде сала 1914 дәстпекьрийә сәрԝертийе бькә.

Щьмшид: Баш, ԝәрә әм бьньһерʹьн. Пʹехәмбәртийед Кʹьтеба Пирозда щарна бь симболики рʹож тенә һʹәсабе сал. * Һәрге әм әве принсипе бьдьнә хәбате, һʹәфт дәм дькә 2 520 сал. Һәрге әм жь сала 607 Б.Д.М. һʹәсаб кьн 2 520 сала, әме бьгьһижьнә сала 1914. * Һәма ве сале һʹәфт дәм хьлаз бун у Иса дәстпекьр ча Пʹадше Пʹадшатийа Хԝәде сәрԝертийе бькә. Жь сала 1914 дьнйайеда дәстпебу тьштед ӧса бьԛәԝьмьн, чь кӧ ль гора Кʹьтеба Пироз нишана рʹожед ахьрийе нә.

Ԝәзир: Әв чь ԛәԝьмандьн ьн?

Щьмшид: Дина хԝә бьдә гьлийед Иса, кʹижан кӧ Мәтта 24:7-да ньвисар ьн. Иса дәрһәԛа ви ԝәʹдәйи, кʹәнге кӧ ԝе дәстпекьра ль әʹзмана сәрԝерти бькьра, ӧса гот: «Мьләте рʹабә ль сәр мьләт, пʹадшати ль сәр пʹадшатийе, щи-щийа ԝе хәлайи-щәлайе у әʹрдһʹәже бьбьн». Дьвини ԝьра Иса пешда гот, ԝәки хәлайи-щәлайи у әʹрдһʹәж ԝе бьбьн. Ԛьрʹна дәрбазбуйида тьштед ӧса гәләк ԛәԝьмин. Тӧ ԝе йәкерʹа ԛайил и?

Ԝәзир: Әре, рʹаст ә.

Щьмшид: Ве рʹезеда Иса ӧса жи пʹехәмбәрти кьр, ԝәки чахе әԝ ча Пʹадшайе Пʹадшатийа Хԝәде сәрԝертийе бькә, һьнге сәр әʹрде ԝе шәрʹ-дәʹԝ һәбьн. Кʹьтеба Әʹйантида һатьбу пʹехәмбәртикьрьне нә кӧ тʹәне дәрһәԛа шәрʹед щи-щийа, ле ӧса жи дәрһәԛа шәрʹед нав тʹәмамийа дьнйайеда. * Те бира тә шәрʹе һʹәмдьнйайейә йәке кʹәнге дәстпебу?

Ԝәзир: Сала 1914, ԝи чахи, чаԝа тә гот, Иса дәстпекьр сәрԝертийе бькә. Ле мьн тʹӧ щар әв дӧ ԛәԝьмандьн һәвва гьренәдайә.

Щьмшид: Һәрге әм пʹехәмбәртийа дәрһәԛа һʹәфт дәма у ӧса жи пʹехәмбәртийед жь Кʹьтеба Пироз йед дәрһәԛа рʹожед ахьрийе һәвва гьредьн, һьнге һәр тьшт ԝе фәʹмдари бә. Шәʹдед Йаһоԝа баԝәр ьн, ԝәки Иса дәстпекьр сала 1914 сәрԝертийе бькә ча Пʹадшайе Пʹадшатийа Хԝәде у һәма ве сале рʹожед ахьрийе дәстпебун. *

Ԝәзир: Баш, ле мьнрʹа лазьм ә диса сәр бьфькьрьм, ԝәки сәре мьнда рʹуне.

Щьмшид: Әз тә фәʹм дькьм. Ча мьн готьбу, мьнрʹа жи ԝәʹдә лазьм бу ԝәки әԝан һʹәму тьшта рʹьнд фәʹм кьм. Ле әз баԝәр ьм ԝәки әв шеԝьркьрьна мә али тә кьр тедәрхи, ԝәки рʹаст ә әв һәжмар, сала 1914, конкрет Кʹьтеба Пирозда найе кʹьфшкьрьне, ле баԝәрийа Шәʹдед Йаһоԝайә дәрһәԛа ве сале, сәр һʹиме пʹехәмбәртийед Кʹьтеба Пироз ә.

Ԝәзир: Әре, тʹьме мьнрʹа һʹәԝас буйә, ԝәки һун тʹӧ тьшти жь хԝә набежьн, дәԝсе һун баԝәрийа хԝә бь сайа Кʹьтеба Пироз избат дькьн. Ле әз фәʹм накьм чьма әв һʹәму тьшт ӧса чәтьн ә? Чьрʹа Хԝәде рʹастә-рʹаст Кʹьтеба Пирозда нәдайә кʹьфше, ԝәки сала 1914 ԝе бьбуйа әв сал, чахе Иса ль әʹзмана дәстпекьра сәрԝертийе бькә.

Щьмшид: Пьрсәкә гәләк баш ә, Ԝәзир. Бь рʹасти гәләк тьшт һәнә чь кӧ Кʹьтеба Пироз рʹастә-рʹаст надә кʹьфше. Ԝәрә әм әве пьрсе щарәкә майин шеԝьр кьн. Демәк, чьрʹа Кʹьтеба Пироз ӧса һатийә ньвисаре, ԝәки мәрьварʹа лазьм ә ԛәԝате бьдьнә хәбате сәва кӧ ле фәʹм кьн?

Ԝәзир: Зәʹф баш.