Жь кʹәрәма хԝә, мәрʹа дәрһәԛа бьчʹуктайа хԝә гьли кьн.

Әз сала 1979, Дәԝләтед Йәкбуйида һатьмә буйине. Чахе әз се сали бум, де-баве мьн жь һәв ԛәтийан. Дийа мьн ль гора әʹйд-ԛәйдед Щьһуйа әз мәзьн дькьрьм, әԝе әз шандьмә мәкʹтәба Щьһуйа бь наве Йәшива. Чахе әз бумә һʹәфт сали, әм сәр саләке чунә Исраеле, ԝедәре һәремәкида әз чумә мәкʹтәба бь наве кубитс. Паше әз у дийа мьн дәрбази Мәксикайе бун.

Рʹаст ә, кʹидәре әм дьман кʹьништ тʹӧнә бу, ле диса жи мә әʹрф-әʹдәте Щьһуйа дани сери. Мьн һәр Шәми мом ведьхьстьн, Тʹәԝрат дьхԝәнд у бь сайа сидуре, демәк кʹьтеба дӧа, дӧа дькьр. Мәкʹтәбеда мьн тʹьме һәвалдәрсханед хԝәрʹа дьгот, кӧ религийа мьн йа лапә кәвьн у рʹаст ә. Мьн Пәймана Ну, кʹидәре кӧ дәрһәԛа жийин у һинкьрьнед Иса те готьне, тʹӧ щар нәхԝәндьбу. Дийа мьн, ԛә нәдьхԝәст әз Пәймана Ну бьхуньм, чьмки әԝе тʹьре һинкьрьнед Пәймана Ну дькарьн мьн жь рʹе дәрхьн.

Ле чьрʹа ԝә диса жи сафи кьр кӧ Пәймана Ну бьхуньн?

Чахе әз бумә 17 сали, әз пашда вәгәрʹийамә Дәԝләтед Йәкбуйи, ԝәки хԝәндьна хԝә бәрдәԝам кьм. Мәрьвәки нас кӧ Мәсиһи бу, мьнрʹа гот кӧ бе Иса Мәсиһ жийина мьн бе нет ә.

Мьн щаба ԝи да у гот: «Тʹәне йед хальфи Иса Мәсиһ баԝәр дькьн».

Ле әԝи жь мьн пьрси: «Ле тә ԛә Пәймана Ну хԝәндийә?»

Мьн гот: «На».

Әԝи гот: «Һәрге тә нәхԝәндийә, тӧ ча дькари ньһерʹандьна хԝә дәрһәԛа ԝан тьшта бежи, чь кӧ тӧ ньзани?»

Әв гьлийе ԝи әз дамә шәрме, чьмки әз тʹьме дьфькьрим, ԝәки мәрьве кӧ дьхԝазә тьштәки избат кә, ле дәрһәԛа ԝе йәке тʹӧ тьшти ньзанә, бь рʹасти әԝ бе фәʹм ә. Ләма жи мьн Кʹьтеба ԝийә Пироз һьлда бьрә мал у дәстпекьр Пәймана Ну бьхуньм.

Гава ԝә Пәймана Ну хԝәнд, әԝ йәк ча сәр ԝә һʹӧкӧм бу?

Әз гәләк әʹщебмайи мам, ԝәки Пәймана Ну Щьһуйа ньвисийә. Чьԛас зедә мьн дьхԝәнд, һаԛас әз избат дьбум, ԝәки Иса Мәсиһ Щьһуки рʹәʹм у мьлук бу, йе кӧ дьхԝәст али мәрьва бькә, нә кӧ бь сайа ԝан дәԝләти бә. Мьн һәла һе жь кʹьтебхане жи һьнә кʹьтебед дәрһәԛа ԝи һьлдан у дьхԝәнд. Ле тʹӧ кʹьтебе мьнрʹа избат нәкьр, ԝәки Иса бь рʹасти Мәсиһ ә. Һьнә кʹьтебада дьһатә готьне кӧ әԝ Хԝәде йә, чь кӧ мьн тʹӧ щар баԝәр нәкьрийә. Ԝәки ӧса нә, Иса хԝәха хԝәрʹа дӧа дькьр? Хенщи ԝе йәке Иса мьр, ле Кʹьтеба Пирозда дәрһәԛа Хԝәде те готьне: «Те нәмьри, (ИМ)». *

Ԝә ча щабед пьрсед хԝә дитьн?

Рʹасти тʹӧ щар мьԛабьли хԝә дәрнайе, ләма жи мьн сафи кьр ԝе рʹастийе бьгәрʹьм. Мьн щара пешьн бе кʹьтебед дӧа бь дьл у щан у бь һесьра Хԝәдерʹа дӧа кьр. Мьн һәла һе дӧайе хԝә хьлаз нәкьрьбу, дәре мьн хьстьн. Әԝ дӧ Шәʹдед Йаһоԝа бун. Ԝана кʹьтебәкә бона һинбуне данә мьн. Әве кʹьтебе у паше жи хәбәрдана тʹәви ԝан, әз дамә баԝәркьрьне, ԝәки һинкьрьнед ԝан сәр һʹиме Кʹьтеба Пироз ьн. Мәсәлә, әԝана баԝәр дькьн, ԝәки Иса Мәсиһ пʹарәкә Сейәканә нинә, ле «Кӧрʹе Хԝәде» йә * у жь һʹәму әʹфьринед Хԝәде ньхӧри йә. *

Һьнә ԝәхт шунда әз вәгәрʹийамә Мәксикайе, ԝедәре тʹәви Шәʹдед Йаһоԝа мьн бәрдәԝам кьр пʹехәмбәртийед дәрһәԛа Мәсиһ леколин бькьм. Әз гәләк әʹщебмайи мам кӧ әԝ пʹехәмбәрти ӧса зәʹф ьн! Ле диса жи һьнә пьрсада шьк дькʹәтә дьле мьн. Әз дьфькьрим: «Гәло әԝ пʹехәмбәрти тʹәне сәр Иса һатьнә сери? Дьԛәԝьмә әԝ артистәки ԛайим бу, йе кӧ ча лазьм ә рола Мәсиһ дьлист?»

Чь бу мәʹни, кӧ ньһерʹандьна ԝә һатә гӧһастьне?

Шәʹдед Йаһоԝа пʹехәмбәртийед ӧса мьнрʹа нишан кьрьн, кʹижан кӧ мәрьв хԝәха нькарә чекә. Мәсәлә 700 сала зедәтьр пешийа буйина Иса Мәсиһ, Миха пʹехәмбәрти кьрьбу, ԝәки Мәсиһ ԝе Щьһустанеда, бажаре Бәйтләһʹмеда бе буйине. * Кʹи дькарьбу һʹӧкӧм кьра сәр ԝе йәке кӧ Иса Мәсиһ кʹидәре бьһата буйине? Ишайа пʹехәмбәрти кьр кӧ Иса Мәсиһ ԝе мина ԛачахәки бе дардакьрьне у тʹәви дәԝләтийа бе дәфьнкьрьне. * Әԝ һʹәму пʹехәмбәрти сәр Иса һатьнә сери.

Избатийа лапә мәзьн әԝ бу, кӧ Иса жь кʹижан рʹькʹьнийате һат. Кʹьтеба Пирозда һатьбу пʹехәмбәртикьрьне, кӧ Иса Мәсиһ ԝе жь рʹькʹьнийата Даԝьд Пʹадша бе. * Бәре архивед Щьһуйа һәбун, ԝана хәза рʹькʹьнийата хԝәй дькьрьн, ләма жи һәрге Иса жь рʹькʹьнийата Даԝьд нибуйа, дьжмьнед ԝи ԝе дәрһәԛа ԝе йәке бь дәнге бьльнд һʹәмушкарʹа бьготана! Ле ԝана нькарьбу инкʹар кьрьна, ԝәки Иса жь рʹькʹьнийата Даԝьд бу. Һәла һе әʹлаләте жи Иса нав дькьрьн «Кӧрʹе Даԝьд». *

Сала 70 Д.М.-да, демәк 37 сал паши мьрьна Иса, ордийа Рʹомайа Оршәлим һьлшанд, ньвисаред дәрһәԛа рʹькʹьнийата у һʹәму архивед ԝан йан ӧнда бун йан жи һатьнә кʹӧтакьрьне. Ләма жи Мәсиһ гәрәке пешийа сала 70 Д.М. бьһата сәр әʹрде, һʹәта кӧ әв архив һәбун у мәрьва пе ԝан ньвисара дькарьбун тедәрхьстана, кӧ жь кʹижан рʹькʹьнийате әԝ һатийә.

Ча әԝ йәк һʹӧкӧм бу сәр ԝә?

Ԛануна Дӧщари 18:18, 19-да һатийә готьне кӧ Хԝәде ԝе нава Исраелийада пʹехәмбәрәки дәрхә, кʹижан кӧ ԝе мина Муса бә. Хԝәде гот: «Әԝ мәрьве кӧ гӧрʹа хәбәред мьн нәкә, аԝа готи ԝан хәбәред кӧ пʹехәмбәре бь наве мьн бежә, әзе жь ԝи мәрьви бьхԝазьм». Гава мьн тʹәмамийа Кʹьтеба Пироз леколин кьр, мьн баԝәр кьр кӧ Исайе жь Ньсрәте һәма әԝ пʹехәмбәр бу.