Йаһоԝа бь рʹасти жи ԛәԝат дьда ван мьзгинванед бьхирәт. Ԝе сале, һәжмара пешәнга жь 225 гьһишт 350. Щара пешьн, зедәтьри 8 000 мьзгинвани офиса сәрәкәрʹа һʹәсабе хьзмәта хԝә тʹәсмил кьрьн. Бь сайа бәрәкʹәта Йаһоԝа, гәләк инсана гӧһ да ԝан.

Ль 21 Адаре, сала 1920, Щозеф Рутерфорд, йе кӧ ль ԝе дәме рʹебәрийа Леколинкʹаред Кʹьтеба Пироз дькьр, готарәкә бь наве «Бь Милйона Кәсед кӧ Ньһа Дьжин ԝе Тʹӧ Щара Нәмьрьн» хԝәнд. Леколинкʹаред Кʹьтеба Пироз чь жь дәсте ԝан дьһат кьрьн, кӧ мәрьва тʹәглиф бькьн ԝәки ве готаре бьбьһен. Ԝана йәк жь театра һәри мәзьн йа Нийу Йорке кʹьре гьртьн у ԝәкә 320 000 тʹәглиф бәла кьрьн.

Гәләк кәс һатьн. Театр бь зедәтьри 5 000 тʹәмашәванива тʹьжә бу, у ԝәкә 7 000 кәс нькарьбу бькʹәвьне. Журнала «Бьрща Ԛәрәԝьлийе» гот кӧ әв щьвин, «йәк жь щьвинед һәри пешдачуйи бу, йа кӧ жь алийе Леколинкʹаред Кʹьтеба Пирозва һат организә кьрьн».

Һәр кәси дьзаньбу кӧ Леколинкʹаред Кʹьтеба Пироз хәбәра кӧ «бь милйона кәсед кӧ ньһа дьжин ԝе тʹӧ щара нәмьрьн» бәла дькьр. Ль ԝе дәме, ԝана фәʹм нәдькьр кӧ гәрәке мьзгина Пʹадшатийе һе зедә бе әʹлам кьрьн. Диса жи, ԝана хирәтәкә мәзьн әʹйан дькьр. Иде Олмстед, йа кӧ дь сала 1902-да щара пешьн һатьбу щьвина, ӧса ани бира хԝә: «Мә заньбу кӧ инсана ԝе бәрәкʹәтед мәзьн бьстандана, у мә әв мьзгин дьда һәр кәсе кӧ әм ль хьзмәте рʹасти ԝан дьһатьн».

Жь бо кӧ хԝарьна рʹӧһʹани бәла бькьн, бьрайед ль Бәйтʹәле дәст бь чапкьрьна һьнә әʹдәбйәта кьр. Ԝана макʹинәйед чапкьрьне кʹьрʹин у ль авайәкә кʹьрекьри йа ль незьки Бәйтʹәле данин.

Лео Пелле у Ԝалтер Кесслер ль мәһа Чьләйе йа сала 1920 дәст бь хьзмәта Бәйтʹәле кьр. Ԝалтер ӧса ани бира хԝә: «Гава әм һатьн Бәйтʹәле, сәркʹаре чапханәйе ль мә ньһерʹи у гот ‹Һʹәта хԝарьна нивро сьһʹәтәк у нив ԝәхта ԝә һәйә›. Әԝи мәрʹа гот кӧ гәрәке әм ԛутʹийед бь кʹьтеба жь жермале биньн».

Лео гот кӧ рʹожа дьн, ԝана чь кьр: «Мә диԝаред ль ԛате йәке шуштьн. Мьн тʹӧ щара  ишәки һаԛас ԛьреж нәкьрьбу. Ле бәле, ише кӧ мә дькьр, ише Хӧдан бу, ләма әм һазьр бун кӧ ви иши бькьн».

Нава чәнд һʹәфтийада, чапкьрьна журнала «Бьрща Ԛәрәԝьлийе» дәстпебу. Хьзмәткʹаред бьхирәт ль чапханәйа ль ԛате дӧда 60 000 һәв журналед «Бьрща Ԛәрәԝьлийе» йа 1 Сьбате 1920 нәшьр кьрьн. Хенщи ве, ль жермале чапханәйәкә дьн һат саз кьрьн. Жь һәжмара 14 Нисане 1920, журнала «Ԛьрʹна Зерʹин» жи ида һат чап кьрьн. Әʹйан ә кӧ Йаһоԝа хирәта ван хәбаткʹаред рʹәзәдьли бьбәрәкʹәт дькьр.

Дь нав хьзмәткʹаред Йаһоԝа йед амьнда, хьзмәт у бьрати жь нува гәш бун. Ле бәле, һьнә Леколинкʹаред Кʹьтеба Пироз ль дәма тәнгасийа жь сала 1917 һʹәта 1919 жь тʹәшкиләте дәркʹәтьбун. Гәло тʹәшкиләте чаԝа али ԝан кьр?

Ль журнала «Бьрща Ԛәрәԝьлийе» йа 1 Нисан 1920, готарәкә бь наве «Бьра Әм дь Аштийеда Бьн» дәркʹәт. Дь ве готареда, ӧса һат готьн: «Әм баԝәр ьн . . . кӧ һәр кәсе кӧ хԝәйе рʹӧһʹе Хӧдан ә . . . һазьр ә кӧ тьштед бәре бир бькә, . . . дь йәктийеда бә у бь һәврʹа бәрдәԝам бькә шьхӧле Хԝәде бинә сери».

Гәләк кәса әв тʹәглиф ԛәбул кьр. Жьн у мерәки ӧса ньвиси: «Ль салед бәре, гава кәсед дьн мьзгин бәла дькьр, мә тьштәк нәдькьр. Мә ида фәʹм кьрийә кӧ әв йәк шаш бу. . . . Әм һевидар ьн кӧ әме ида жь рʹе дәрнәкʹәвьн». Бона ван хәбаткʹаред кӧ жь нува һатьн ԛазанщ кьрьн, пʹьрʹ иш һәбу.

Ль 21 Һʹәзиране йа сала 1920, Леколинкʹаред Кʹьтеба Пироз дәст бь бәлакьрьна кʹьтеба «Сӧрʹа Хьлазкьри» (пʹара һʹәфта йа «Леколина Ньвисара») кьр. Әв кʹьтеб ԝәк һәжмара журнала «Бьрща Ԛәрәԝьлийе» йа 1 Адаре 1918 һатьбу чап кьрьн. Гава әв кʹьтеб дь сала 1918-да һатә ԛәдәхә кьрьн, кʹьтеб вәшартьн.

Тʹәшкиләте дьхԝәст кӧ бьра һʹәму кәсед ньхӧманди – демәк нә тʹәне пешәнг, ле  хушк у бьрайед дьн жи – кампанйайеда кʹар бькьн у кʹьтеба «Сӧрʹа Хьлазкьри» бәла бькьн. Едмунд Һупер гот кӧ дь ве кампанйайеда, гәләк кәс щара пешьн дәркʹәтьн хьзмәта мал бь мал. Әԝи гот: «Мә һеди-һеди фәʹм кьр, кӧ ише мә ԝе бь аԝайәки нәһевикьри зедә бьбә».

Ль дәма Шәрʹе Һʹәмдьнйайе йа Йәке текьлийа бь хушк у бьрайед ль ԝәлатед дьнрʹа пʹьрʹ зор бу. Ләма, бьрайе Рутерфорд дьхԝәст ван хушк у бьра һелан бькә у ише бәлакьрьна мьзгине жь нува организә бькә. У ль 12 Тʹәбахе йа сала 1920, бьре Рутерфорд тʹәви чар бьред дьн рʹе кʹәтьн у чун Әԝропа у Рʹожһьлата Навин.

Гава бьре Рутерфорд ль Британйайе бу, Леколинкʹаред Кʹьтеба Пироз се щьвинед мәзьн у 12 готар дәрбаз кьрьн. Ԝәкә 50 000 мәрьв һатьн ван щьвина. Журнала «Бьрща Ԛәрәԝьлийе» дәрһәԛа ве щьвине ӧса гот: «Һәвалед мә мерхаси у һелан станд. Әԝ һʹьзкьрьнеда у хьзмәтеда һе зедә бунә йәк, у гәләк дьлед хәмгин ша бун». Ль Парисе, бьре Рутерфорд диса дәрһәԛа готара «Бь Милйона Кәсед кӧ Ньһа Дьжин ԝе Тʹӧ Щара Нәмьрьн» хәбәр да. Гава готаре дәстпекьр, одә тʹьптʹьжә бу. 300 кәса зедәтьр һе зедә әʹламәти хԝәст.

Дь һʹәфтийед паши ве щьвине, һьнә бьра чун Атʹина, Ԛаһирә у Оршәлиме. Жь бо кӧ мәрьв бькарьбьн һе зедә информасийайе бьстиньн, бьре Рутерфорд ль бажаре Рамәллайе, незики Оршәлиме, щики бона әʹдәбйәта саз кьр. Паше, әԝ вәгәрʹийа Әԝропайе. Ль ԝе дәре, әԝи Офиса Әԝропайа Навәнд саз кьр у һазьри кьр кӧ әʹдәбйәт бен чап кьрьн.

Ль пайиза сала 1920, Леколинкʹаред Кʹьтеба Пироз № 27 йа журнала «Ԛьрʹна Зерʹин» дәрхьстьн. Әв журнала мәхсус әшкәрә дькьр кӧ сала 1918-да, Леколинкʹаред Кʹьтеба Пироз чаԝа зӧльм дитьбу. Чапханәйа мә бь шәв у рʹож хәбьти у зедәтьри 4 милйон журнал чап кьрьн.

Ве журнале дәрһәԛа диԝанкьрьна хушкәкә бь наве Емма Мартин әʹламәти да. Хушка мә ль Сан Бәрнардинойе (Калифорнийа, ДЙА) пешәнг бу. Ль 17 Адаре йа сала 1918, хушка мә тʹәви бьред Едԝард Һамм, Едԝард Сонненбург у Ернест Стивенс чу  щьвинәкә бьчʹук йа Леколинкʹаред Кʹьтеба Пироз.

Ле бәле, йәк жь мәрьвед кӧ һатьн ве щьвине, нә жь бо әʹламәтийа дәрһәԛа Кʹьтеба Пироз, ле жь бо нетәкә дьн һат. Паше, әԝи диԝанерʹа ӧса гот: «Әз бь хԝәстьна офиса диԝане чубум ве щьвине . . . Мьн дьхԝәст һьнә избата бьвиньм». «Избата» кӧ ԝи дит, кʹьтеба «Сӧрʹа Хьлазкьри» бу. Чәнд рʹож шунда, хушка мә у се бьра һатьн гьртьн. Әԝана бь тʹәрьбандьна Ԛануна Щәʹсусийе һатьн сущдар кьрьн, чьмки ԝана кʹьтеба ԛәдәхәкьри бәла кьрьбу.

Диԝане се сал щәзайа кәле да Емма у һәвалед ԝе. Ԝана ԛьрара диԝане чәнд щар ԛәбул нәкьр у диса данә сәр леколине, ле ль 17 Гӧлане йа сала 1920, әԝ ида кʹәтьн кәле. Ле пʹьрʹ ԝәхт дәрбаз нәбу кӧ әԝ жь ве нәһәԛийе хьлаз бун.

Ль 20 Һʹәзиране йа сала 1920, бьре Рутерфорд ль щьвинәкә мәзьн, йа кӧ ль Сан Франсискойе дьһат дәрбаз кьрьн, бәʹса сәрһатийа ԝан кьр. Гава гӧһдарвана бьһист кӧ чь һатьбу сәре хушк у бьред мә, ԝана тәләграмәк шанд сәроке Дәԝләтед Йәкбуйирʹа йед Амәрикайе. Ԝана ӧса ньвиси: «Әв йәк кӧ Мартин ль гора Ԛануна Щәʹсусийе һат сущдар кьрьн . . . нәһәԛийәкә гьран ә. Сәрԝеред дәԝләте оторитәйа хԝә бь аԝайәки хьраб данә хәбате . . . кӧ жь бо Мартин тʹәльк дайньн у ԝе бь нәһәԛи бьшиньн кәле».

Рʹожәк шунда, Сәрок Ԝудроԝ Ԝилсон хушк у бьред мә дәрберʹа әʹфу кьрьн, у әԝ жь кәле дәркʹәтьн.

Ль хьлазийа сала 1920, Леколинкʹаред Кʹьтеба Пироз сәва гәләк тьшта ша бун. Ише ль офиса сәрәкәда чьԛас дьчу бәрфьрәтьр дьбу, у шагьртед Иса мьзгина Пʹадшатийа Хԝәде бь дьл у щан чьԛас дьчу һе зедә бәла дькьр (Мәт. 24:14). Ле бәле, сала дьн, демәк сала 1921, бона әʹламкьрьна мьзгина Пʹадшатийе саләкә һе фәрз бу.