Гава Иса һе сәр әʹзмана бу, әԝ һʹӧнӧред баш һин бу, йед кӧ паше али ԝи кьрьн бьбә һәвалкʹарәки баш бона шагьртед хԝә. Гәло әм жь мәсәла Иса чь дәрса дькарьн һин бьн? Ԝәрә әм дина хԝә бьдьн 3 принсипа, йед кӧ ԝе али мә бькьн бьбьнә һәвалкʹаред баш у тʹәви хушк-бьра йәктийеда бьн.

Һәвалкʹаре мьлук тʹәви кʹе дьхәбьтә ԝана ԛимәт дькә у хԝә сәр ԝанрʹа нагьрә. Иса Мәсиһ ве йәке жь Баве хԝә һин бу. Рʹаст ә Йаһоԝа Әʹфьрандаре һәр тьшти йә, ле әԝи диса жи дьхԝәст ԝәки һәр кәс бьзаньбә кӧ Кӧрʹе ԝи жи шьхӧләки фәрз кьр у һәвалкʹаре ԝи бу. Әв йәк жь ван готьнед Хԝәде әʹйан дьбә: «Әм мәри дьлԛе хԝәда у мина хԝә бьхӧльԛиньн» (Дәстпебун 1:26). Бешьк Иса бона ве йәке гәләк шекьрдар бу у дит, ԝәки Йаһоԝа чьԛас мьлук ә (Зәбур 18:35).

Гава Иса сәр әʹрде бу, әԝи жи мьлукти дьда кʹьфше. Гава мәрьва пәсне ԝи дьдан, әԝи дьгот кӧ бь рʹасти тʹәне Йаһоԝа һежайи ван пәсна йә (Марԛос 10:17, 18; Йуһʹәнна 7:15, 16). Иса хирәт дькьр тʹәви шандийед хԝә әʹдьлайеда бә, у әԝи әԝана нә кӧ ча хӧлам, ле ча достед хԝә һʹәсаб дькьр (Йуһʹәнна 15:15). Әԝи һәла һе ньгед ԝан жи шушт, ԝәки әԝана жь мьлуктийа ԝи дәрс һьлдьн (Йуһʹәнна 13:5, 12-14). Ԝе баш бә кӧ әм жи мина Иса һәри зедә бькʹәвьнә нә кӧ һʹәйра хԝә, ле һʹәйра һәвалкʹаред хԝә. Һәгәр әм ԛәдьре  һәвдӧ бьгьрьн у пʹайа нәгәрʹьн, шьхӧле мә ԝе дьһа пешдачуйи бә (Рʹомайи 12:10).

Мәрьве мьлук занә, һәгәр әԝ гӧһ бьдә ширәтед кәсед дьн, әԝе пешдачуйи бә (Мәтʹәлок 15:22). Фьрԛи тʹӧнә әм чьԛас щерʹьбанди нә у чьԛас фәрәсәтед мә һәбьн жи, гәрәке әм фәʹм бькьн, ԝәки мәрьве ӧса тʹӧнә кӧ һәр тьшти занә. Һәла һе Иса Мәсиһ жи ԛәбул дькьр, ԝәки әԝ һәр тьшти ньзанә (Мәтта 24:36). Ӧса жи, шандийед ԝи чьԛас мәрьвед гӧнәкʹар бун жи, Иса дьхԝәст ньһерʹандьн у фькред ԝан пебьһʹәсийа (Мәтта 16:13-16). Ләма жи ԝана тʹәви Иса хԝә рʹьһʹәт тʹәхмин дькьр. Һәгәр әм бь мьлукти ԛәбул бькьн, ԝәки әм һәр тьшти ньзаньн у рʹьнд гӧһ бьдьн фькред кәсед дьн, әме әʹдьлайе ортʹа һәвда пешда биньн у шьхӧлед хԝәда пешдачуйи бьн.

Гәләк фәрз ә, ԝәки рʹуспийед щьвате чʹәʹв бьдьнә мьлуктийа Иса, гава тʹәвайи шьхӧл дькьн. Әԝана гәрәке бир нәкьн ԝәки сәр щьвинед кʹома рʹуспийа, рʹӧһʹе пироз дькарә ль сәр һәр йәк жь ԝан һʹӧкӧм бькә. Һәгәр һәр кәс жь ԝан бькарьбә фькред хԝә бь рʹьһʹәти бежә, әԝана ԝе сафикьрьнед баш бькьн, йед кӧ ԝе тʹәмамийа щьватерʹа кʹаре биньн.

Һәвалкʹаре баш һьндава һәвалкʹаред хԝә нәрм у бәрбьһер ә. Әԝ ль сәр йа хԝә насәкьнә у рʹе дьдә кәсед дьн. Иса гәләк щар дьдит кӧ Баве ԝи бәрбьһери у нәрмийа хԝә ча әʹйан дькьр. Мәсәлә, инсанәт чьԛас һежайи мьрьне бу жи, Йаһоԝа диса жи Кӧрʹе хԝә Иса шанд, ԝәки ԝана хьлаз кә (Йуһʹәнна 3:16).

Гава һʹәԝщә у лайиԛ дьбу, Иса Мәсиһ хԝәстьнед кәсед дьн ԛәбул дькьр. Щарәке, гава жьнькәкә Кәнани жь ԝи аликʹари хԝәст, әԝи жерʹа гот кӧ әԝ һатийә шандьн бал щьмәʹта Исраел, ле паше, әԝи диса жи али ԝе кьр (Мәтта 15:22-28). Ӧса жи, әԝи бь нәрми у бәрбьһери синоред шандийед хԝә һьлдьда һʹәсаб. Чахе досте ԝи Пәтрус бәр һʹәмушка әԝ инкʹар кьрьбу, Иса диса жи һазьр бу бьбахшинә ԝи. Сәрда жи паше әԝи һьнә щабдарийед фәрз да дәсте Пәтрус (Луԛа 22:32; Йуһʹәнна 21:17; Кʹаред Шандийа 2:14; 8:14-17; 10:44, 45). Мәсәла Иса зәлал нишан дькә кӧ гәрәке «бәрбьһерийа ԝә һʹәму мәрьвава әʹйан бә» (Филипи 4:5).

Бәрбьһери ԝе али мә бькә тʹәви һʹәму мәрьва бь рʹьһʹәти у йәктийеда бьхәбьтьн.  Иса һьндава кәсед дәр-доре хԝә ӧса баш бу, ԝәки дьжмьнед ԝийә чʹәʹвнәбар ԝи сущдар дькьрьн у дьготьн, кӧ әԝ «досте хәрщгьр у гӧнәкʹара йә» (Мәтта 11:19). Гәло әм жи дькарьн мина Иса тʹәви кәсед кӧ жь мә щӧда нә, һәвкʹарийе бькьн? Бьраки бь наве Лоис, йе кӧ һьм ча бәрпьрсийаре мьһале һьм жи шьхӧле Бәйтʹәледа тʹәви щурʹә-щурʹә кәса һәвкʹари дькьр, ӧса дьбежә: «Һәр кʹомәкә кӧ әз тʹәви ԝан кʹар дькьм, бәрамбәри диԝарәки жь щурʹә-щурʹә кәвьра дькьм. Гава мәрьв кәвьра рʹаст датинә, диԝарәки рʹаст чедьбә. Ӧса жи, әз хирәт дькьм алийе хԝәда һәр тьшти бькьм, ԝәки диԝар рʹаст бә». Ньһерʹандьнәкә чьԛас баш ә!

Әм ча дькарьн щьвата хԝәда һәвкʹарийе бькьн? Мәсәлә, гава әм тʹәви кʹома хԝәйә хьзмәте шьхӧлкʹарийе дькьн, ԝе баш бә ԝәки әм тʹәви мьзгинванед кӧ жь мә бьчʹуктьр йан жи мәстьр ьн, кӧ һʹале ԝан жь йе мә щӧда йә, хьзмәт бькьн. Гәло әм дькарьн бәрбьһерийе бьдьнә кʹьфше у методед хьзмәта хԝә ль гора дәрәщә у фәрәсәтед ԝан бьгӧһезьн, ԝәки әԝана жь хьзмәте һе зедә шабуне бьстиньн?

Һәвалкʹарәки баш һазьр ә занәбун у щерʹьбандьна хԝә тʹәви һәвалкʹаред хԝә пʹарәвәкә (1 Тимотʹейо 6:18). Чахе Иса кʹеләка Баве хԝә дьхәбьти, әԝи бешьк дьдит ԝәки Йаһоԝа занәбуна хԝә жь ԝи вәнашерә. Гава Йаһоԝа әʹзман чедькьр, Иса ‹ль ԝьр бу› у жь ԝи һин дьбу (Мәтʹәлок 8:27). Паше, Иса жи ‹һәр тьштед кӧ [әԝи] жь Баве хԝә бьһистьн›, бь мәʹрдани шагьртед хԝәрʹа гьли дькьр (Йуһʹәнна 15:15). Әм жи гәрәке мина Йаһоԝа у Иса һазьр бьн занәбун у щерʹьбандьна хԝә тʹәви һәвалкʹаред хԝә пʹарәвәкьн. Һьнә мәрьв занәбуна хԝә жь һәвалкʹаред хԝә вәдьшерьн, ԝәки әԝана бьн дәсте ԝанда бьминьн, ле һәвалкʹаре баш ӧса накә. Һәвалкʹаре баш һазьр ә тьштед керһати, йед кӧ әԝ һин буйә, һәвалкʹаред хԝәрʹа пʹарәвәкә.

Ӧса жи, әм дькарьн бь готьнед хԝә һәвалкʹаред хԝә һелан кьн. Нә әм ша дьбьн гава кәсәк кʹәда мә дьвинә у рʹазибуна хԝә дьдә кʹьфше? Иса жи пʹайе һәвалкʹаред хԝә дьда (Бәрамбәр кьн Мәтта 25:19-23; Луԛа 10:17-20). Әԝи һәла һе жи ԝанрʹа гот, ԝәки әԝана ԝе жь кьред ԝи дьһа мәстьр бькьн (Йуһʹәнна 14:12). Шәва пешийа мьрьна хԝә, әԝи шандийед хԝәйә амьнрʹа ӧса гот: «Һун ьн, йед кӧ нава щерʹьбандьнед мьнда һʹәта ньһа тʹәви мьн манә» (Луԛа 22:28). Бинә бәр чʹәʹве хԝә кӧ әԝана сәва готьнед ԝи чьԛас ша бун у бь ԛәԝате тʹьжә бун. Һәгәр әм жи пʹайе һәвалкʹаред хԝә бьдьн, әԝана ԝе дьһа зедә шабуне бьстиньн у шьхӧле хԝәда һе хирәт бьн.

Бьраки бь наве Кайоде ӧса дьбежә: «Һәвалкʹаре баш мәрьве беԛьсур нинә, ле әԝ мәрьве ӧса йә, кӧ дьле һәвалкʹаред хԝә ша дькә у баре ԝан сьвьк дькә». Гәло тӧ йәки ӧса йи? Дьбәкә тӧ дькари жь һьнә һәвалкʹаред хԝә бьпьрси, һәла әԝана тә һәвалкʹаре ча һʹәсаб дькьн. Һәгәр әԝана жь шьхӧлкʹарийа тʹәви тә шабуне дьстиньн, чаԝа кӧ шандийед Иса жь һәвкʹарийа тʹәви ԝи шабун дьстандьн, тӧ жи дькари ча Паԝлосе шанди бежи: «Әм тʹәви ԝә дьхәбьтьн бона шабуна ԝә» (2 Корьнтʹи 1:24).