1-2. Бона Йаһоԝа чь фәрз ә, у әԝ дьхԝазә кӧ әм чь бькьн?

 БОНА Йаһоԝа гәләк фәрз ә, кӧ һәләԛәтийа мә тʹәви мәрьва чаԝа нә. Иса һин дькьр ԝәки әм гәрәке мәрьва ӧса һʹәз бькьн, чаԝа кӧ хԝә һʹәз дькьн (Мәтта 22:37-39). Әв йәк те һʹәсабе, ԝәки әм гәрәке һьндава ԝан мәрьвада жи ԛәнщ бьн, йед кӧ хьзмәткʹаред Йаһоԝа ниньн. Гава әм ве йәке дькьн, әм чʹәʹв дьдьнә Йаһоԝа Хԝәде. Чаԝа Кʹьтеба Пирозда те готьне: «Әԝ тәʹве дәрдьхә һьм сәр кәсед хьраб, һьм жи сәр кәсед ԛәнщ, у әԝ баране һьм сәр кәсед рʹаст у һьм жи сәр кәсед нәрʹаст дьбаринә» (Мәтта 5:45).

² Рʹаст ә Йаһоԝа һʹәму мәрьва һʹәз дькә, ле һәмьки әԝ кәсед кӧ гӧһ дьдьнә ԝи һе зедә һʹәз дькә (Йуһʹәнна 14:21). Әԝ дьхԝазә кӧ әм чʹәʹв бьдьнә ԝи. Йаһоԝа мә һелан дькә ԝәки хушк-бьред хԝә жь дьл һʹәз бькьн у һьндава ԝанда дьлгәрм бьн (1 Пәтрус 4:8; Рʹомайи 12:10). Һʹәзкьрьн у дьлгәрмийа ви щурʹәйи мина ве һʹәзкьрьн у дьлгәрмийе йә, кӧ әм һьндава мәрьвед хԝәйә незик у һәвалед хԝәйә дәлал әʹйан дькьн.

3. Әм гәрәке дәрһәԛа һʹәзкьрьне чь бир нәкьн?

³ Һʹәзкьрьн мина кӧлирка мале йә, кӧ лазьм ә тʹьме мьԛати ве бьн. Паԝлосе шанди ширәтәкә ӧса да Мәсиһийа: «Тʹьме чаԝа хушк-бьра һәвдӧ һʹьз бькьн» (Ибрани 13:1). Йаһоԝа дьхԝазә кӧ әм бәрдәԝам кьн  һʹәзкьрьне һьндава кәсед дьнда пешда биньн. Ве готареда әме бьвиньн, кӧ чьма әм гәрәке дьһа незики хушк-бьра бьн у ча әм дькарьн һәләԛәтийа незики тʹәви ԝан хԝәй кьн.

ЧЬРʹА ӘМ ГӘРӘКЕ ДЬҺА НЕЗИКИ ҺӘВДӦ БЬН?

4. Әм ча дькарьн бәрдәԝам кьн йәктийа нав хушк-бьрада ԛимәте кьн, дәрһәԛа кʹижани Зәбур 133:1-да те готьне? (Бьньһерʹә ӧса жи шькьл.)

⁴ Бьхунә Зәбур 133:1. Әм тʹәви зәбурбеж ԛайил ьн, йе кӧ готьбу ԝәки һәвалтийа тʹәви кәсед кӧ Йаһоԝа һʹәз дькьн «ԛәнщ ә» у «хԝәш ә». Ле чаԝа кӧ мәрьв ида дина хԝә надә бахәкә хԝәш у бьльнд, йа кӧ әԝ һәр рʹож бәр мала хԝә дьвинә, дьбәкә әм жи щарна бир кьн, кӧ йәктийа нав мәда тьштәки чьԛас ԛәнщ у хԝәш ә. Әм хушк-бьра гәләк щар дьвиньн, дьԛәԝьмә һʹәфтийеда чәнд щара жи. Ле әм гәрәке чь бькьн, ԝәки бәрдәԝам кьн ԝана ԛимәт кьн? Сәва кӧ әм хушк-бьра һе зедә һʹәз бькьн, лазьм ә кӧ әм тʹьме бира хԝәда хԝәй кьн, ԝәки һәр йәк жь ԝан бона мә у бона щьвате чьԛас ԛимәт ә.

5. Һʹәзкьрьна кӧ нав мәда һәйә, ча дькарә сәр кәсед дьн һʹӧкӧм кә?

⁵ Кәсед кӧ щара пешьн тенә сәр щьвата мә, чахе һʹәзкьрьна ортʹа мәда дьвиньн, әв йәк гәләк дьле ԝан дьгьрә. Щарна әв йәк сәр мәрьва ӧса һʹӧкӧм дькә, ԝәки әԝана фәʹм дькьн кӧ әва йә рʹийа рʹастийе. Чаԝа кӧ Иса готьбу: «Бь ве йәке гьшк ԝе бьзаньбьн кӧ һун шагьртед мьн ьн, һәрге нав ԝәда һʹәзкьрьн һәбә» (Йуһʹәнна 13:35). Ԝәрә әм дина хԝә бьдьнә сәрһатийа Читайе,  йа кӧ университетеда һин дьбу. Шәʹдед Йаһоԝа һинбуна Кʹьтеба Пироз тʹәви ԝе дәрбаз дькьрьн. Паши ве йәке ча әԝ щара пешьн чу щьвата мәзьнә серʹожи, әԝе хушкерʹа, йа кӧ ле һин дькьр, ӧса гот: «Де-баве мьн тʹӧ щара әз һʹәмез нәдькьрьм. Ле сәр щьвина ԝә, нава рʹожәкеда мәрьва әз 52 щара һʹәмез кьрьм. Мьн тʹәхмин кьр, ԝәки Йаһоԝа бь сайа малбәта хԝә, һʹәзкьрьна хԝә нишани мьн дькә. Әз жи дьхԝазьм бьбьмә пʹара ве малбәте». Чита рʹӧһʹанида пешда чу у сала 2024-да һатә ньхӧмандьне. Бәле, гава кәсед тʹәзә һʹәзкьрьн у дьлованийе нав мәда дьвиньн, гәләк жь ԝан дьхԝазьн бьбьнә хьзмәткʹаред Йаһоԝа (Мәтта 5:16).

6. Һәвалтийа незик тʹәви хушк-бьра ча дькарә мә бьпʹарезә?

⁶ Һәвалтийа незик тʹәви хушк-бьра дькарә мә бьпʹарезә. Паԝлос Мәсиһийарʹа ӧса гот: «Һәр рʹож дьл бьдьнә һәв . . . ԝәки жь ԝә тʹӧ кәс бь гӧна нәхапә, нәбә сәрһʹьшк» (Ибрани 3:13). Һәрге әм гәләк дьлтәнг бьн у дәстпекьн һеди-һеди жь рʹийа рʹастийе дур кʹәвьн, Йаһоԝа дькарә бь сайа хушк йан бьраки дьлован али мә бькә (Зәбур 73:2, 17, 23). Аликʹарийа ви щурʹәйи дькарә кʹарәкә мәзьн мәрʹа бинә.

7. Һʹәзкьрьн у йәкти ча һәвва гьредайи нә? (Колоси 3:13, 14)

⁷ Жь бо ве йәке кӧ әм пʹара малбәтәкә жь мәрьвед дьлован ьн, йед кӧ бь дьл у щан хирәт дькьн һәвдӧ һʹәз бькьн, әм гәләк кʹәрәма дьстиньн (1 Йуһʹәнна 4:11). Мәсәлә, бь сайа һʹәзкьрьне әм һазьр ьн һьндава һәвда дьлован у бь сәбьр бьн, у әв йәк али мә дькә йәктийе нав хԝәда хԝәй кьн (Бьхунә Колоси 3:13, 14; Әфәси 4:2-6). Сәр тʹәмамийа дьнйайе, йәктийа ӧса тʹәне нав мәда һәйә, у ләма жи әм жь щьвина шабуне дьстиньн.

ԚӘДРЕ ҺӘВ БЬГЬРЬН

8. Йаһоԝа ча али мә дькә, ԝәки нав мәда йәкти һәбә?

⁸ Йәктийа кӧ нав мәда һәйә бь рʹасти жи кʹәрәмәт ә. Әм чьԛас ԛьсурдар ьн жи, Йаһоԝа али мә дькә, ԝәки нав мәда йәкти һәбә (1 Корьнтʹи 12:25). Кʹьтеба Пироз дьбежә, ԝәки әм «жь Хԝәде һин бунә, кӧ һәв һʹьз бькьн» (1 Тʹесалоники 4:9). Бь сайа Кʹьтеба Пироз, Йаһоԝа дьбежә кӧ әм гәрәке чь бькьн, ԝәки дьһа незики һәв бьн. Гава әм Хәбәра Хԝәде кʹур лекʹолин дькьн у ль гора ве дьжин, әм жь алийе Хԝәдева тенә һинкьрьне (Ибрани 4:12; Аԛуб 1:25). Шәʹдед Йаһоԝа хирәт дькьн, кӧ ве йәке бькьн.

9. Әм жь Рʹомайи 12:9-13 дәрһәԛа ԛәдьргьртьна һьндава һәвдӧда чь һин дьбьн?

⁹ Кʹьтеба Пироз ча мә һин дькә, ԝәки әм дьһа незики һәв бьн? Ԝәрә әм дина хԝә бьдьне, кӧ Паԝлосе шанди Рʹомайи 12:9-13-да чь готьбу (бьхунә). Илаһи дина хԝә бьдьнә ван хәбәра: «Ԛәдьргьртьнеда һун гава пешьн бавежьн». Гәло мәʹнийа ван гьлийа чь йә? Әм гәрәке гава пешьн бавежьн ԝәки дьлованийа хԝә нишан кьн, бьбахшиньн кәсед дьн, у ӧса жи меванһʹәз у дәствәкьри бьн (Әфәси 4:32). Нәлазьм ә кӧ әм һивийе бьн һʹәта хушк йан бьрак незики мә бә. Әм дькарьн «гава пешьн бавежьн» у хԝәха незики ԝан бьн. Һәрге әм ӧса бькьн, әме бьвиньн, ԝәки әв гьлийед Иса чьԛас рʹаст ьн: «Бәхтәԝари һе зедә дайинеда йә, нә кӧ стандьнеда» (Кʹаред Шандийа 20:35).

10. Әм ча дькарьн «ԛәдьргьртьнеда» хирәт бьн? (Бьньһерʹә ӧса жи шькьл.)

 ¹⁰ Чахе Паԝлос готьбу, кӧ әм гәрәке гава пешьн бавежьн ԝәки ԛәдьре һәвдӧ бьгьрьн, әԝи гот кӧ әм гәрәке хирәт бьн «нә кӧ тʹәмбәл». Гава мәрьвәки хирәтрʹа щабдари те дайине, әԝ ве щабдарийе бь дьл у щан тинә сери. Кʹьтеба Пирозда ӧса те готьне: «Гава жь дәсте тә те, кӧ аликʹарийа дәсттәнга бьки, хԝә жь ве йәке нәдә паш» (Мәтʹәлок 3:27, 28). Ль гора ве ширәте, чахе әм дьвиньн ԝәки кәсәк һʹәԝще аликʹарийе йә, әм гәрәке һазьр бьн кӧ чь жь дәсте мә те бькьн, ԝәки али ԝи бькьн. Әм гәрәке хԝә паш нәхьн у нәфькьрьн, кӧ бьра кәсәки дьн бона ԝи хәм бькә (1 Йуһʹәнна 3:17, 18).

11. Чь дькарә али мә бькә дьһа незики һәвдӧ бьн?

¹¹ Ӧса жи сәва кӧ әм ԛәдьре һәвдӧ бьгьрьн, әм гәрәке зу бьбахшиньн ԝи кәси, йе кӧ дьле мә ешандийә. Кʹьтеба Пироз ӧса дьбежә: «Бьра рʹо сәр һерса ԝәрʹа нәчә ава» (Әфәси 4:26). Гәло чьма? Чаԝа кӧ рʹеза 27-да те готьне, сәва кӧ әм «щи нәдьнә Мирещьн». Ньвисаред Пирозда Йаһоԝа мәрʹа тʹьме дьбежә, кӧ әм гәрәке «бьбахшиньнә һәв» (Колоси 3:13). Чахе әм шашийед һәв дьбахшиньнә һәв, әм дьһа незики һәв дьбьн. Бь ви щурʹәйи әм дькарьн «йәктийа Рʹӧһʹ пе һәвгьредана әʹдьлайийе хԝәй кьн» (Әфәси 4:3). Демәк бахшандьн рʹастә-рʹаст йәкти у әʹдьлайа мәва гьредайи йә.

12. Йаһоԝа ча али мә дькә кӧ әм бьбахшиньнә мәрьва?

¹² Дьбәкә мәрʹа һеса нинә бьбахшиньн ԝи мәрьви, йе кӧ дьле мә ешандийә. Ле бь аликʹарийа рʹӧһʹе пироз, әм дькарьн ве йәке бькьн. Чахе Паԝлос һелан кьр, ԝәки әм гәрәке хирәт бьн «нә кӧ тʹәмбәл», әԝи ӧса гот: «Бьра рʹӧһʹе пироз дьле ԝәда агьре хирәте вехә» (Рʹомайи 12:11). Бәле, рʹӧһʹе пироз дькарә али мә бькә, ԝәки әм дьлгәрм бьн у бь дьл у щан бьбахшиньн һәв. Ләма жи әм жь Йаһоԝа рʹәща дькьн, ԝәки ве йәкеда али мә бькә (Луԛа 11:13).

 БЬРА НАВ ԜӘДА ДӦТИРӘТИ ТʹӦНӘ БӘ

13. Жь бо чь ортʹа мәда дькарә дӧтирәти пешда бе?

¹³ Щьватеда мәрьвед жь гәләк култур у мьләта һәнә (1 Тимотʹейо 2:3, 4). Ләма жи һәрге әм фәсал нибьн, әв тьшт, мәсәлә щурʹе кʹьнщхԝәкьрьна мә, хәмьландьн, ԝәʹдәдәрбазкьрьн у әв йәк кӧ әм ча мьԛати сьһʹәт-ԛәԝата хԝә дьбьн, дькарьн дӧтирәтийе нав мәда пешда биньн (Рʹомайи 14:4; 1 Корьнтʹи 1:10). Хԝәде әм һин кьрьнә ԝәки һәвдӧ һʹәз бькьн, ләма жи әм гәрәке һаж хԝә һәбьн у нәфькьрьн кӧ ньһерʹандьна мә жь ньһерʹандьна кәсед дьн четьр ә у ньһерʹандьна хԝә сәр ԝанва нәкьн (Филипи 2:3).

14. Ԝе баш бә кӧ әм тʹьме чь бькьн у чьма?

¹⁴ Ӧса жи сәва кӧ щьватеда дӧтирәти пешда нәйе, әм гәрәке тʹьме һелане бьдьнә һәв у һәвдӧ ԛәԝи кьн (1 Тʹесалоники 5:11). Ван пашԝәхтийа, гәләк хушк-бьред нәактиф у йед кӧ ида нәдьһатьнә һʹәсабе Шәʹдед Йаһоԝа, диса вәгәрʹийанә бал Йаһоԝа. Әм бона ԝан гәләк ша нә! (2 Корьнтʹи 2:8) Хушкәкә кӧ 10 сала нәактиф бу у паше вәгәрʹийа Ода Щьвате, ӧса дьбежә: «Һәр кәси бь дьл у щан сьлав дьда мьн» (Кʹаред Шандийа 3:19). Әв йәк ча сәр ԝе һʹӧкӧм кьр? Әԝ дьбежә: «Бь сайа дьлгәрмийа ԝан, мьн сәр хԝә тʹәхмин кьр, ԝәки Йаһоԝа али мьн дькә диса бәхтәԝар бьм». Һәрге әм һьндава һәр кәси дьлгәрм бьн, Иса дькарә хушк-бьред  «ԝәстийайи у баргьран» бь сайа мә дьлрʹьһʹәт кә (Мәтта 11:28, 29).

15. Диса ча әм дькарьн йәктийе пешда биньн? (Бьньһерʹә ӧса жи шькьл.)

¹⁵ Әм бь хәбәрдана хԝә жи дькарьн йәктийе пешда биньн. Ибо 12:11-да ӧса те готьне: «Чаԝа дәв, тәʹма тьште дьхԝә һьлтинә, гәло гӧһ жи готьне ӧса нащерʹьбинә?» Чаԝа кӧ кәсәк пешийе хԝарьне тәʹм дькә у паше датинә сәр сьфьре, әм жи гәрәке рʹьнд бьфькьрьн пешийа кӧ тьштәки бежьн (Зәбур 141:3). Бәле, бьра хәбәрдана мә тʹьме «кери гӧһдара» бе (Әфәси 4:29).

16. Илаһи кʹе гәрәке бь дьловани хәбәр дә?

¹⁶ Илаһи малхед мале у де-бав гәрәке бь дьловани хәбәр дьн (Колоси 3:19, 21; Тито 2:4). Рʹуспийед щьвате гәрәке бәрхед Йаһоԝа бьшьдиньн у бәр дьле ԝанда бен (Ишайа 32:1, 2; Галати 6:1). Кʹьтеба Пироз ӧса дьбежә: «Чьԛас хԝәшә һәр хәбәр ԝәхте хԝәда!» (Мәтʹәлок 15:23).

«БЬ КЬРА У РʹАСТИЙЕ» ҺʹӘЗ БЬКЬН

17. Сәва кӧ әм хушк-бьра бь дьл у щан һʹәз бькьн, әм гәрәке чь бькьн?

¹⁷ Йуһʹәннайе шанди ӧса гот: «Нә кӧ әм бь хәбәр йан заре хԝә һʹьз бькьн, ле бь кьра у рʹастийе» (1 Йуһʹәнна 3:18). Бәле, әм дьхԝазьн хушк-бьра жь дьл һʹәз бькьн. Бона ве йәке әм гәрәке чь бькьн? Чьԛас әм тʹәви хушк-бьра ԝәʹдә дәрбаз кьн, һаԛас әме дьһа незики һәв бьн у һе зедә һәвдӧ һʹәз бькьн. Ләма жи ԝәрә әм мәщала бьгәрʹьн, ԝәки сәр щьвата у ԝәʹде хьзмәтийе тʹәви хушк-бьра ԝәʹдә дәрбаз кьн. Ӧса жи ԝәʹдә кʹьфш кьн, ԝәки тʹәсәлийа хушк-бьра бькьн. Бь ԝи щурʹәйи әм дьдьнә кʹьфше, ԝәки әм «жь Хԝәде һин бунә, кӧ һәв һʹьз бькьн» (1 Тʹесалоники 4:9). Ӧса әме сәр хԝә тʹәхмин кьн, кӧ «чаԝа ԛәнщ ә, чаԝа хԝәш ә, кӧ бьра һәврʹа йәктийеда нә!» (Зәбур 133:1).