МӘСӘЛА ДЕ-БАВЕ МЬН

Сала 1957-да де-баве мьн жь Италйайе дәрбази Канадайе бун у бажарәки бьчʹукда бь наве Киндерсли, щиԝар бун. Гәләк ԝәхт дәрбаз нәбу кӧ әԝана рʹастийа Кʹьтеба Пироз пеһʹәсийан, у рʹастийа дәрһәԛа Хԝәде әʹмьре мәда бу тьште лапи фәрз. Те бира мьн кӧ гава әз бьчʹук бум, әз гәләк щара тʹәви малбәта хԝә һʹәта еваре хьзмәтийеда бум. Ләма жи мьн һʹәнәк дькьр у дьгот кӧ 8 салийа хԝәда әз ида пешәнге ԝәʹдәлу мә!

Де-баве мьн кʹәсиб бун, ле диса жи ԝана бона Йаһоԝа гәләк тьшт жь хԝә кем дькьрьн. Мәсәлә сала 1963-да ԝана гәләк тьштед хԝә фьротьн, ԝәки һәрʹьнә Дәԝләтед Йәкбуйи бона Щьвата Мәзьнә Һʹәмдьнйайе, йа кӧ Калифорнийайеда гәрәке дәрбаз буйа. Сала 1972-да мә мала хԝә бар кьр у әм чунә щики гәләк дур ль Колумбйа Британи, Канадайеда, кʹидәре кӧ дәшта Италида хьзмәтийеда һʹәԝщәтийа мәзьн һәбу. Баве мьн дькʹанеда дьхәбьти, әԝ ԝедәре һьм ча һостә бу, һьм жи дькʹан тʹәмьз дькьр. Сәва кӧ бькарьбә дина хԝә бь тʹәмами бьдә хьзмәтийе, әԝи хәбатед дьһа баш ԛәбул нәдькьр.

Әз бона мәсәла де-баве хԝә кӧ ԝана мә һәр 4 зарʹарʹа һиштьн, гәләк рʹази мә. Ԝи ԝәʹдәйи мьн дәрсәкә фәрз станд, йа кӧ тʹәмамийа әʹмьре мьн али мьн дькьр: Һәрге әз жь һәр тьшти зедәтьр дина хԝә бьдьмә Пʹадшатийа Йаһоԝа, әԝе һәртʹьм бона мьн хәм бькә (Мәтта 6:33).

ДӘСТПЕКА ХЬЗМӘТИЙА ҺӘРТʹЬМ

Мьн сала 1980-да хушкәкә бәдәԝ бь наве Деби жьнти ани. Нета ԝе әв бу, кӧ бь дьл у щан Йаһоԝарʹа хьзмәт кә. Мә дьхԝәст бьбьнә хьзмәткʹаред һәртʹьм, ләма се мәһ паши дәʹԝата мә, Деби дәстпекьр ча пешәнг хьзмәт кә. Саләк шунда паши зәԝаща мә, әм дәрбази щьватәкә бьчʹук бун кʹидәре аликʹари лазьм бу, у мьн жи дәстпекьр ча пешәнг хьзмәт кьм.

Һьнә ԝәʹдә шунда әм дьлтәнг бун у мә сафи кьр жь ԝедәре һәрʹьн. Ле пешийе мә  тʹәви бәрпьрсийаре мьһале хәбәр да. Әԝи бь һʹәзкьрьне, ле бь һʹәлали мәрʹа гот: «Проблем ԝәда нә. Һун тʹьме дина хԝә дьдьнә тьштед негатив. Һәрге һун дәрәщед хԝәда тьштед позитив бьгәрʹьн, һуне бьвиньн». Әм бь рʹасти жи һʹәԝще ве ширәте бун (Зәбур 141:5). Мә дәрберʹа әв ширәт да хәбате, у гәләк ԝәхт дәрбаз нәбу кӧ мә гәләк тьштед позитив дитьн. Мәсәлә, ве щьватеда һьнә хушк-бьра дьхԝәстьн дьһа зедә хьзмәт кьн, у нав ԝанда ча зарʹ ӧса жи әԝ хушк бун, меред кʹижана Шәʹдед Йаһоԝа нибун. Әв йәк бона мә дәрсәкә гәләк фәрз бу. Әм һин бун дина хԝә бьдьнә тьштед баш у һивийа Йаһоԝа бьн, һʹәта кӧ әԝ һʹале мәйә чәтьн сафи кә (Миха 7:7). Мә диса дәстпекьр шабуне бьстиньн у һʹале мә жи дьһа баш бу.

Гава әм щара пешьн чунә Мәкʹтәба бона Пешәнга, дәрсдаред мә бьред щерʹьбанди бун, йед кӧ ԝәлатед дьнда жи хьзмәт кьрьбун. Ԝана һьнә шькьл нишани мә кьрьн у дәрһәԛа хьзмәтийа хԝә гьли дькьрьн, кӧ ԝәʹде хьзмәтийе ԝана чьԛас кʹәрәм дьстандьн. Әве йәке хԝәстьна мә зедә кьр, кӧ әм жи бьбьнә мисйонер.

Сәва кӧ әм бьгьһижьнә ве нете, әм сала 1984-да дәрбази Кԝебеке бун. Әв һәрем зедәтьри 4 000 км дури Колумбйа Британи бу у мәрьвед ԝедәре сәр зьмане Франси хәбәр дьдан. Ләма жи лазьм бу кӧ әм һини култур у зьманәки тʹәзә бьн. Проблемәкә дьн жи әв бу, кӧ гәләк щар дәсте мәда пʹәрә тʹӧнә бу. Щарәке әм мәщбур бун, ԝәки зәвийа щоткʹарәкида картолед майи тʹоп кьн. Деби ида һин бьбу кӧ пе ван картола щурʹә-щурʹә хԝарьнед хԝәш чекә. Һьмбәри ван тәнгасийа, мә хирәт дькьр кӧ бь шабуне сәбьр кьн. Бь рʹасти жи мә дьдит кӧ Йаһоԝа мә дьбә хԝәйи (Зәбур 64:10).

Рʹожәке мәрʹа тʹелехьстьн у мә тʹәглифи Бәйтʹәла Канадайе кьрьн. Бәре мә бона Мәкʹтәба Гиләде бланк тʹьжә кьрьбу, ләма жи һʹәԝаса мә һаԛас тʹӧнә бу, кӧ һәрʹьнә Бәйтʹәле. Диса жи мә тʹәглифа Бәйтʹәле ԛәбул кьр. Гава әм гьһиштьнә Бәйтʹәле, мә жь бьре Кенет Литьл, йе кӧ әндәме Комитейа Бәйтʹәле бу, пьрси: «Һәрге мә тʹәглифи Гиләде бькьн, ԝи чахи әме чь бькьн?» Әԝи гот: «Әме дәрһәԛа ве йәке хәбәр дьн, чахе һун тʹәглифе бьстиньн».

Һʹәфтек шунда, ԝана әм тʹәглифи Гиләде кьрьн. Мә гәрәке сафи кьра кӧ чь бьжберьн.  Бьре Кенет мәрʹа гот: «Һун чь бьжберьн жи, һуне щарна бежьн ‹хԝәзи мә йа дьн бьжбарта›. Бь рʹасти һәр дӧ сафикьрьн жи баш ьн, Йаһоԝа дькарә һәрда жи кʹәрәм кә». Һьнге мә сафи кьр, һәрʹьн Гиләде, у әм избат бун кӧ гьлийед бьре Кенет рʹаст ьн. Чахе лазьм ә ԝәки хушк-бьра бьжберьн, кӧ кʹижан щабдарийа ԛәбул кьн, әм гәләк щар бәʹса гьлийед бьре Кенет дькьн.

ӘʹМЬРЕ МИСЙОНЕРТИ

Әм гәләк ша бун кӧ мәщала мә һәбу нава ԝан 24 шагьртада бьн, йед кӧ Мәкʹтәба Гиләде кʹома 83-да һин дьбун. Һинбуна мә мәһа Нисане сала 1987-да ль Бруклине дәстпебу (Нийу Йорк). Бьред Йулисес Глас у Щек Редфорд дәрсдаред мәйи сәрәкә бун. Пенщ мәһ зу дәрбаз бун, у 6 Илоне сала 1987, мә мәкʹтәб хьлаз кьр у тʹәви Щон у Мари Гуд мә шандьнә Һаитйе.

Жь сала 1962 дәԝләте дәстпекьр мисйонера жь Һаитйе дәрхьн, у жь ве сале ида жь Гиләде мисйонер нәдьшандьнә ԝедәре. Се һʹәфте шунда, паши кӧ мә мәкʹтәб хьлаз кьр, әм ида нава чʹийайед Һаитйеда бун, у мә дәстпекьр тʹәви щьватәке, кʹидәре кӧ 35 мьзгинван бун, хьзмәт кьн. Әм щаһьл у нәщерʹьбанди бун, у әм мала сәва мисйонерада тʹәне дьман. Ԝедәре щьмәʹт кʹәсиб бу у һʹәчʹи зәʹф мәрьв нәхԝәнди бун. Гава әм ԝедәре бун, һʹале политики гәләк тʹәвльһәв бу. Мәрьва протест дькьрьн, у һьнәка дьхԝәст сәрԝере дәԝләте жь тʹәхт бавежьн. Ӧса жи щарна фьртонед мәзьн рʹадьбун.

Әм жь хушк-бьред Һаитйе дәрсед ԛимәт һин бун. Әʹмьре ԝан чьԛас чәтьн бу жи, ԝана Йаһоԝа у хьзмәти һʹәз дькьрьн у бь шабуне бәр чәтьнайа сәбьр дькьрьн. Хушкәкә әʹмьрда мәзьн, йа кӧ нькарьбу бьхунә, 150 рʹез әзбәри  кьрьбу. Чахе мә дьдит кӧ мәрьвед ԝедәре рʹасти чьԛас кӧл-дәрда тен, хԝәстьна мә дьһа зедә дьбу ԝәки мьзгинийа дәрһәԛа Пʹадшатийа Хԝәде ԝанрʹа гьли кьн, чьмки тʹәне әԝ дькарә һʹәму проблема сафи кә. Әм гәләк ша нә ԝәки һьнә кәс, тʹәви кʹе мә һинбуна Кʹьтеба Пироз дәрбаз дькьр, паше бунә пешәнгед һәртʹьм, пешәнгед мәхсус у рʹуспи.

Ль Һаитйе әз рʹасти хортәки бь наве Тревор һатьм, йе кӧ мисйонерәки Мормон бу, у мә чәнд щара дәрһәԛа Кʹьтеба Пироз хәбәр да. Гәләк сал шунда, мьн жь ԝи нәʹмәк станд. Әԝи ньвиси: «Әзе һьнә ԝәхт шунда сәр Щьвата Мәзьн бемә ньхӧмандьне. Әз дьхԝазьм вәгәрʹьм Һаитйе у ве һәреме, кʹидәре кӧ әз бәре мисйонере Мормон бум, ча пешәнге мәхсус хьзмәт кьм». Бь рʹасти жи, әԝи у жьна ԝи гәләк сал һәма ӧса жи кьрьн.

ӘԜРОПА, ПАШЕ АФРИКА

Паше мә шандьнә Словенйайе. Ԝедәре тʹәзә изьн һатьбу дайине кӧ Шәʹдед Йаһоԝа мьзгинийе бәла кьн. Сала 1992-да әм гьһиштьнә бажаре Лйублйанайе. Пешийа кӧ де-баве мьн дәрбази Италйайе бун, әԝана незики ԝедәре дьжитьн. Ԝи чахи һьнә һәремед Йугославйа кәвьнда һе шәрʹ дьчу. Бәре, Бәйтʹәла Вийенайе (Австрйа) у офисед ль Загрәб (Хорватйа) у Бәлграде (Сербйа) бона ԝе һәреме щабдар бун. Ле ньһа лазьм бу ԝәки һәр ԝәлатәкида Бәйтʹәләкә башԛә бе сазкьрьне.

Ләма жи лазьм бу ԝәки әм диса һини зьман у културәкә тʹәзә бьн. Мәрьвед ве һәреме дьготьн «Йежек йе тежек», демәк «Зьмане мә чәтьн ә». Бь рʹасти жи ӧса бу! Әм жь амьнийа хушк-бьра һʹәйр-һʹӧжмәкʹар дьман. Әԝана тʹьме һазьр бун кӧ рʹебәри у гӧһастьнед тʹәшкиләте ԛәбул кьн, у Йаһоԝа ԝана кʹәрәм дькьр. Мә диса щарәке дит кӧ Йаһоԝа ча чәтьнайа бь һʹәзкьрьне у ԝәʹдәда сафи дькә. Словенйайеда әм гәләк тьшт һин бун, у гәләк тьштед кӧ әм пешийа кӧ бьһатана вьра һин бьбун, али мә кьрьн чәтьнайада тәйах кьн.

Паше әʹмьре мә диса һатә гӧһастьне. Сала 2000-да, тʹәшкиләте әм шандьнә Кот Девуаре, ль Африкайа Рʹоавайе. Паше, мәһа Мьждареда сала 2002, жь бо шәрʹе һьндӧрʹе ԝәлат, мә  шандьнә Сиерра-Леоне. Ԝедәре шәрʹе һьндӧрʹе ԝәлат, йе кӧ 11 сала кʹьшандьбу, тʹәзә хьлаз бу. Бона мә чәтьн бу кӧ ньшкева жь Кот Девуаре һәрʹьн. Ле дәрсед кӧ әм һин бьбун, али мә кьрьн шабуна хԝә ӧнда нәкьн.

Мә дина хԝә дьда мәрьвед кӧ һазьр бун гӧһ бьдьнә мьзгинийе у ӧса жи хушк-бьред мәйә һʹәзкьри, йед кӧ гәләк сала нав шәрʹда дьман. Рʹаст ә, әԝана жь алийе материйалида кʹәсиб бун, ле диса жи ԝана дьхԝәст чь дәсте ԝанда һәбу тʹәви кәсед дьн пʹарәвәкьн. Мәсәлә, хушкәке дьхԝәст һьнә кʹьнща бьдә Деби. Серида Дебийе нәхԝәст һьлдә, чьмки шәрм кьр, ле хушка мә готе: «Ԝәʹде шәрʹ хушк-бьред жь ԝәлатед дьн аликʹари дьданә мә. Ньһа дора мә йә кӧ әм али хушк-бьра бькьн». Мә хԝәрʹа нет дани, ԝәки чʹәʹв бьдьнә ԝан.

Паше әм вәгәрʹийанә Кот Девуаре, ле һьнә ԝәʹдә шунда шәрʹ диса дәстпебу. Ләма жи мәһа Мьждаре, сала 2004-да, әм бь фьрʹьнде һатьнә хьлазкьрьне. Бал һәр кәси жь мә тʹәне чәнтʹәки 10 кило һәбу. Шәв әм зома әскәред Франсида сәр әʹрде рʹазан, ле рʹожа дьн әм бь тәйарә чунә Сԝисрәйе. Ниве шәве, гава әм гьһиштьнә Бәйтʹәле, Комитейа Филиале у дәрсдаред Мәкʹтәба Башкьрьна Хьзмәтийе тʹәви жьнед хԝә бь дьлгәрми мә ԛәбул кьрьн у һʹәмез кьрьн, хԝарьна гәрм данин бәр мә у шоколадед Сԝисрәйе пʹешкʹеши мә кьрьн. Дьлгәрмийа ԝан бь рʹасти жи гәләк дьле мә гьрт.

Паше сәр ԝәʹдәки кьн мә шандьнә Ганайе, у гава шәрʹе ԝәлатда хьлаз бу, әм диса чунә Кот Девуаре. Ԝан рʹожед чәтьнда ԛәнщийа хушк-бьра гәләк али мә кьр. Мьн у Деби мә фәʹм кьр, кӧ тʹәшкиләта Йаһоԝада әв һʹәзкьрьн чьԛас тьштәки нормал бә жи, әм гәрәке тʹӧ щара бир нәкьн, ԝәки әԝ тьштәки чьԛас ԛимәт ә. Чәнд сал шунда мә фәʹм кьр, кӧ чәтьнайед мә пʹарәкә фәрз бу бона ве йәке, кӧ әм дьһа щерʹьбанди бьн, чьмки әм гәләк тьшт һин бун.

РʹОҺЬЛАТА НАВИН

Сала 2006-да мә нәʹмәке жь офиса сәрәкә станд. Тʹәшкиләте әм бона кʹьфшкьрьна тʹәзә шандьнә Рʹоһьлата Навин. Лазьм бу ԝәки әм диса һини дәрәщә у чәтьнайед тʹәзә бьн, ӧса жи һини зьман у културед тʹәзә бьн, чьмки әв һәрем жь алийе политики у религида гәләк тʹәвльһәв ә. Мә зьманед щурʹә-щурʹә, йед кӧ щьватеда хәбәр дьдан, гәләк һʹәз дькьр, у мә дит кӧ гава әм гӧһ дьдьнә рʹебәрийа тʹәшкиләте, йәкти те хԝәйкьрьне. Әм хушк-бьрарʹа фьрнаԛ дьбун, чьмки гәләк жь ԝан һьмбәри пәйкʹәтьна жь алийе малбәте, һәвалдәрсхана, һәвалкʹар у щинаред хԝә бь мерхаси тәйах дькьрьн.

Сала 2012-да әм чунә щьвата мәзьнә мәхсус кӧ Тәл Авиведа (Исраел) дәрбаз дьбу. Паши Рʹожа Пенщийә Һʹәсаб, сала 33 Д.М., әв щара пешьн бу кӧ ԝе һәремеда һаԛас хьзмәткʹаред Йаһоԝа тʹәвайи тʹоп бун. Бь рʹасти жи әв щьвата мәзьн гәләк мәхсус бу!

Ԝан салада тʹәшкиләте әм шандьнә ԝәлатәки, кʹидәре кӧ шьхӧле Шәʹдед Йаһоԝа ԛәдәхәкьри бу. Мә һьнә әʹдәбйәт дәрбази ԝедәре дькьр, дьчунә хьзмәтийе у щьватед мәзьн бь кʹомед бьчʹук дәрбаз дькьр. Һʹәму щийа әскәред бь чʹәка сәр рʹе бона контроле сәкьни бун, ле гава әм тʹәви мьзгинванед  ве мьһале фәсал дьчун-дьһатьн, әм нәдьтьрсийан.

ӘМ ДИСА ВӘДЬГӘРʹЬНӘ АФРИКАЙЕ

Сала 2013-да мә щабдарикә тʹәзә станд. Әм һатьнә кʹьфшкьрьне кӧ филиала Киншасайеда (Конго) хьзмәт кьн. Конго ԝәлатәки мәзьн ә у тʹәбийәта ԝедәре гәләк бәдәԝ ә, ле сәд һʹәйф кӧ ԝедәре мәрьв кʹәсиб ьн, у гәләк щар шәрʹ дьԛәԝьмьн. Дәстпекеда мә гот: «Әм Африкайе рʹьнд заньн, әм һазьр ьн». Ле диса жи лазьм бу ԝәки әм һини гәләк тьштед тʹәзә бьн. Мәсәлә, лазьм бу ԝәки әм щийед кӧ рʹе-дьрб тʹӧнә бун, рʹеԝитийе бькьн. Йәкә мә гәләк тьштед хԝәш жи дитьн, мәсәлә сәбьр у шабун кӧ хушк-бьра һьмбәри чәтьнайед економики дьданә кʹьфше, ӧса жи һʹәзкьрьна ԝан һьндава хьзмәтийе у хирәта ԝан кӧ щьват у щьватед мәзьн бәрʹнәдьн. Мә бь чʹәʹве хԝә дит, кӧ бь сайа аликʹарийа у кʹәрәма Йаһоԝа, шьхӧле Пʹадшатийе ԝи ԝәлатида рʹьнд пешда дьчу. Ԝан салада кӧ мә ль Конгойе дәрбаз кьр, әм гәләк тьшт һин бун, у хушк-бьред ԝедәре бь рʹасти жи бона мә бун малбәт.

Хьлазийа сала 2017-да, мә диса кʹьфшкьрьнәкә тʹәзә станд, кӧ Африкайа Башуреда хьзмәт кьн. Һʹәта ньһа әв филиаләкә һәри мәзьн бу, кʹидәре кӧ мә хьзмәт дькьр у шьхӧле кӧ мәрʹа һатә дайине бона мә тʹәзә бу. Диса лазьм бу кӧ әм гәләк тьшта һин бьн, ле бона ве йәке, дәрсед кӧ мә бәре стандьбун, кери мә һатьн. Әм хушк-бьред кӧ бь дәһа сала бь амьни хьзмәт дькьн, гәләк һʹәз дькьн. Ӧса жи гава әм дьвиньн, кӧ мәрьвед жь гәләк мьләт у култура ча бь йәкти Бәйтʹәледа һәвкʹарийе дькьн, дьле мә ша дьбә. Әшкәрә йә кӧ Йаһоԝа хьзмәткʹаред хԝә, йед кӧ хирәт дькьн ԝәки мәрьве ну ль хԝә кьн у ль гора принсипед Кʹьтеба Пироз бьжин, кʹәрәм дькә, ԝәки әʹдьлайи у йәкти нав ԝанда һәбә.

Бь сала, әз у Деби, мә щабдарийед һʹәԝас дьстанд, әм һини щурʹә-щурʹә култура у зьмана дьбун. Щарна һеса нибу, ле бь сайа тʹәшкиләта Йаһоԝа у хушк-бьра, мә һʹәзкьрьна Йаһоԝа тʹьме дьдит (Зәбур 144:2). Әм баԝәр ьн ԝәки дәрсед кӧ мә хьзмәтийа һәртʹьмда стандийә, али мә дькьн дьһа баш Йаһоԝарʹа хьзмәт кьн.

Әз гәләк ԛимәт дькьм әмәке кӧ де-баве мьн данә мьн, аликʹарийа кӧ жьна мьнә дәлал, Деби, дьдә мьн у мәсәлед баԝәрийа малбәта мәйә һʹәмдьнйайе. Гава әз у кʹӧлфәта мьн дәрһәԛа ахьрийе дьфькьрьн, сафикьрьна мә диса жи әв ә, кӧ жь Дәрсдаре Мәзьн тʹьме һин бьн.