Ukexilu Uahi u Muene mu Londekesa?
Ukexilu Uahi u Muene mu Londekesa?
“O mbote ki i tu tokala ia Ngana Jezú Kristu, i kale kumoxi ni ukexilu u muene mu londekesa.”—FILIM. 25, NW.
U TENA KU TAMBUIJILA?
Mukonda diahi tua tokala ku xinganeka o ukexilu u tu londekesa?
Ukexilu uahi u tua tokala kueha, ni kiebhi ki tu tena ku bhanga kiki?
Ihi i tua tokala o ku bhanga phala o kilunga ki kale ni ukexilu uambote?
1. Kidielelu kiahi kia londekesa Phaulu kioso kia sonekena o jiphange?
MU KU sonekena o jiphange, o poxolo Phaulu ua zuela kiavulu o kidielelu kiê kuma Nzambi ni Kristu, a uabhela o ukexilu uambote ulondekesa o ilunga. Mu kifika, kia sonekena akua Ngalásia muéne uambe: “O mbote ki i tu tokala ia Ngana Jezú Kristu, i kale jinga kumoxi ni ukexilu u muene mu londekesa, phange jami. Kiene.” (Nga. 6:18, NW) Ihi ia mesenene kuzuela kioso kiambe, “ni ukexilu uambote u muene mu londekesa?”
2, 3. (a) Saí ithangana Phaulu ua tumbula o kizuelu ‘ukexilu,’ ihi ia mesenene o kuzuela? (b) Ibhuidisu iahi i tua tokala ku bhanga ia lungu ni ukexilu u tu londekesa?
2 O kizuelu ‘ukexilu,’ mu izuelu ia Phaulu, kilondekesa o nguzu i tu bhangesa kuzuela mba ku bhanga ima mu ukexilu uavulu. Nange o muthu u xila akuá, mukua henda, ua tululuka, ua uabhela o ku bhana, mukua ku loloka akuá. O Bibidia i ximana o ‘muthu ua tululuka o muxima,’ ni ‘ukexilu ua tululuka.’ (1 Phe. 3:4; Jisa. 17:27) Nange o muthu ua mukuá, mukua njinda, u zola kiavulu o jimbote, u luuala mu kima kioso-kioso, ua-ndala ku bhanga ngó ia mesena. Saí hanji ió alondekesa o ukexilu ua iibha ua ku bhukumuka.
3 Maji kioso Phaulu kiambe, o ‘Ngana, a kale ni ukexilu uambote u muene mu londekesa,’ muéne ua kexile mu suínisa o jiphange ku kala ni ukexilu ua uabhela Nzambi, ni ukexilu ua tokala ku kala nau o Kidistá. (2 Tim. 4:22; tanga Kolose 3:9-12.) Lelu tua tokala ku dibhuidisa: ‘Ukexilu uahi u ngi londekesa? Kiebhi ki ngi tena kulondekesa mu maukexilu uoso, o ukexilu ua uabhela Nzambi? O kuila ngi tena ku kuatekesa o kilunga ku kala ni ukexilu uambote?’ Mu kifika, mu díbhia dia ithulu, kala kithulu ki bhangesa o díbhia dioso ku iuka. O kuila tua difu ni “ithulu” íii, i bhangesa o kilunga ku iuka? Tua tokala ku di suinisa phala ku kala kála o ithulu íii. Tua-nda di longa ihi i tua tokala ku bhanga phala kulondekesa o ukexilu ua uabhela Nzambi.
EHA O UKEXILU UA IIBHA UA MUNDU
4. ‘O ukexilu ua iibha ua mundu’ ihi?
4 O Mikanda Ikola i tu ambela: ‘Etu ki tu tambula o ukexilu ua iibha ua mundu maji o ukexilu uambote u tunda kua Nzambi.’ (1 Kol. 2:12) ‘O ukexilu ua iibha ua mundu’ ihi? Uene o ukexilu umoxi ua tange mu divulu dia Efezo 2:2, diambe: ‘Mu thembu’omo enu mua kexile mu kuendela mu ukexilu ua ima ia mundu iú, kala kia tumu ngana ioio, o mutumini ua mulenge ua ukexilu ua mundu iú ua iibha, o ukexilu uala lelu moxi dia an’a bhukumuka, a kambe ku xila Nzambi.’ O ‘mulenge iu’ o ukexilu ua iibha ua mundu, o ima i bhanga athu mba i banza o athu, a tu kondoloka kála o mulenge. Tu u sanga ku mundu uoso. Ene mu ulondekesa mu ukexilu iú, se-ku muthu ua tokala ku ngi tangela ihi i nga tokala o ku bhanga mba mu ukexilu ua kuila bhanga o ima ia ku tokala, iu uene o ukexilu u tuene mu u mona ku athu avulu lelu. O athu enhá, o “ana abhukumuka, a kamba kutumaka Nzambi,” a tokala ku mundu ua Satanaji.
5. Ukexilu uahi ua londekesa o athu mu Izalaiele?
5 O ukexilu iu ua mateka ukulu. Mu izuua ia Mozé, Kola ua bhukumukine o atuameni a kilunga kia Izalaiele. Muéne ua bhukumukine Ala ni mon’ê, exile akunji. Nange muéne uejidile o iluezu iâ. Nange muéne uambe kuila Mozé ua kexile mu bhana ujitu—ku jindandu jê. Né muene se ki kiene kia bhitile, maji Kola ua mateka ku banza kála ki banza o athu akua ituxi, iu ua longolola, ni kuzuela sé ku xila ió a a solele kua Jihova, mu kuzuela: “O kiki ue kia vulu kiá . . . Enu-phe mua di zangelekela’hi ku kionge kiangene kia Jihova?” (Dia. 16:3) Kiene kia bhangele ué Datane ni Abilamu, ene alongolola Mozé, mu kuamba kuila muéne ua mesenene ‘ku di bhanga ngana ku thandu diâ.’ Kioso kia exana Mozé, ene a di zangelekele: “Etu-phe, koko ki tua-nda kubanda-ku!” (Dia. 16:12-14) Jihova ka uabhela o ukexilu ua londekesa. Muéne ua jibha athu oso a bhukumukine.—Dia. 16:28-35.
6. Kiebhi o athu ku hama ia dianga alondekesa kuila akexile ni ukexilu ua iibha, ni mukonda diahi akexile ni ukexilu uenhó?
6 Saí athu ku hama ia dianga akexile ué mu longolola o atuameni mu kilunga, “a di tuna ku a tumina kuala Nzambi.” (Jud. 8) O mala enhó ka sangulukile ni ujitu uâ, ia mesenene kuila akuâ a kala ue ni ukexilu uâ ua ku bhukumukina o atuameni a solele Nzambi.—Tanga 3 Nzuá 9, 10.
7. Mu ukexilu uahi mu tua tokala ku aluka mu kilunga lelu?
7 Mu kidi o ukexilu iú, ki u tokala ku ulondekesa mu kilunga. Mukonda dia kiki, tua tokala ku aluka ni ukexilu iú. O muadiakimi mu kilunga mukua ituxi ué, kála kiexile mu izuua ia Mozé ni mu izuua ia poxolo Nzuá. O tufunga nange a lueza mba a tu luualesa. Se kiki ki bhita, o phange mu kilunga ka tokala kulondekesa o ukexilu ua iibha ua mundu, kála o ku jijila ku “fundisa” mba “ku bhinga kuila o phange a tokala ku mu bazela!” Jihova nange ka jijila ku fundisa muthu mu ima iofele ia bhange. Ki tu tokala ku kaiela o phangu iê? Mukonda dia iluezu ia mona ku tufunga, saí athu a ta ituxi mu kilunga a dituna kioso kia exana ku tufunga mu kilunga phala ku a kuatekesa. O ukexilu iú a tena ku u sokesa ni haxi, ka katula mbote mu milongo, mukonda ka uabhela o dotolo.
8. Ibatulu iebhi ia Bibidia i tu kuatekesa ku kala ni ibanzelu iambote ia lungu ni tufunga mu kilunga?
8 Phala kueha o ukexilu iú, tua tokala ku lembalala kuila Jezú a mu tange mu Bibidia kuila, “bhu lúkuaku luê lua [kadilu] ua kuata sambuadi dia théthembua.” O “jithéthembua” jilombolola o tufunga a a undu, ala ku pholo ni tufunga tuoso mu ilunga. Jezú u tena kuendesa o jithéthembua jala bhu lukuaku luê kala kia mesena. (Dij. 1:16, 20) Mukonda dia ku kala o Mutuameni ua kilunga, Jezú muéne uendesa o ibuka ioso ia tufunga. Se kafunga mu kibuka kia tufunga, u bhinga ku mu bazela, o Ió uala ni ‘mesu mê a lekujuka kala mulengu ua túbhia’ ua-nda bhangesa kuila o kafunga a mu bazela mu kithangana Kiê kia tokala. (Dij. 1:14) Maji kioso ki tua mu kingila, tua tokala ku xila o atuameni mu kilunga a a solo ku nzumbi ikôla, mukonda Phaulu ua soneka: ‘Enió oso a mi kala ku pholo mu a belesela, mu bhange-nu ioso ia mi bhingi o ku bhanga. Kuma ene a mi langa o mienhu ienu, mbata athu a bhinga hinu a kà ki bhela konda kua Nzambi. Se enu mu a belesela, ene o kikalakalu a ki bhanga ni ngalasa, kuma se o kikalakalu a ki bhanga ni malamba, ki kala kima kia kuxixima kuenu.’—Jihe. 13:17.
9. (a) Polova iahi i tena ku bhita ni Kidistá se a mu bhana itendelesu mba a mu bazela? (b) Uebhi o ukexilu u tua tokala kulondekesa se a tu bazela?
9 O ukexilu ua Kidistá a tena ué ku u polovala se muéne a mu bhana milongi mba a mu katula o ujitu uala nau mu kilunga. Saí munzangala a mu bhana itendelesu ku tufunga mukonda dia ku jokala jividiu game ji londekesa o ujibhânganga. Maji muéne ka xikina o milongi ia mu bhana, kienhiki a mu katula o ujitu ua ku kala múkuatekexi ua tufunga, mukonda ka kexile dingi mu kumbidila o milongi ia Mikanda Ikola. (Jisá. 11:5; 1 Tim. 3:8-10) O phange ua londekesa ku athu kuila ka xikinine o milongi, iu ua soneka mikanda iavulu ku fiiliale mu ku longolola o tufunga, iu ua sambukisa o ukexilu ué ku jiphange mu kilunga. O ukexilu iú ki ukexilu uambote, ki tu tokala ku katula o kutululuka mu kilunga mukonda tua mesena kulondekesa kuila tua lungu. Kima kiambote o ku mona kuila o milongi i kuatekesa kuijiia o iluezu ietu i tua kambele kuijiia, mu ku suka-ku ni ku tululuka kuoso, tu xikina o milongi.—Tanga Kuditenda 3:28, 29.
10. (a) Jimbulula ihi i tu tena ku di longa mu divulu dia Tiiaku 3:16-18, ia lungu ni ukexilu uambote ni ukexilu ua iibha. (b) Mbote iahi i tu katula mu kulondekesa ‘unjimu u tunda bhulu?’
10 O divulu dia Tiiaku 3:16-18, di lombolola maukexilu a iiadi, o ukexilu ua iibha ni ukexilu uambote ua tokala kulondekesa mu kilunga. Diene diambe: “‘Kuma bhuoso bhuala o difuba ni jimvunda, bhu kala ué kavuanza ni ima ioso ia iibha.’ Maji o unjimu-phe u tunda bhulu u dianga kuzela, anga u tululuka, u lenduka, u bhekela ukamba. Uene u vula kukuatela henda, u bhekela kubhongolola ibundu ia ibhangelu iambote. Ki u moneka katungu, mba u kala ni mangonha. Mukonda o ibhangelu ia tokala o kuiuka, iene o ibundu ima ku mbutu ja kunu ni kutululuka kuala athu ka moneka mvunda.” Se tu bhanga o ima ni “unjimu-phe u tunda bhulu,” o ukexilu uetu uambote, ua-nda kuatekesa o kilunga ku kala ni ukexilu ua tululuka bhu kaxi ka jiphange.
LONDEKESA O UKEXILU UA KU XILA MU KILUNGA
11. (a) O ku kala ni ukexilu uambote, ua-nda tu fidisa ku bhanga ihi? (b) Phangu iahi i tu katula kua Davidi?
11 Ki tu tokala ku jimba kuila Jihova ua solo o tufunga phala ‘kuinga o kilunga kia Nzambi.’ (Ika. 20:28; 1 Phe. 5:2) Kienhiki, etu tu xikina o kitendelesu kia ku belesela o athu a te ku pholo kua Nzambi, ki kale tu tufunga mba kana. O kulondekesa ukexilu uambote ku tu fidisa ku thandanganha ni ujitu mu kilunga. Kioso o Sobha Saúlu kia mono kuila Davidi ueji mu katula o kididi kia usobha, muéne “u kala mu toka mesu kua Davidi.” (1 Sam. 18:9) O sobha ua kexile ni ukexilu ua iibha katé muene ua mesenene ku jibha Davidi. Mu veji dia ku thandanganha ni ujitu kála kia bhangele Saulu tua tokala tu kaiela o phangu ia Davidi. Sumbala ni ima ioso ia iibha ia kexile mu ku mu bhanga, o munzangala ua xila o sobha ia solele Nzambi.—Tanga 1 Samuuele 26:23.
12. Ihi i tena ku kuatekesa o kilunga ku kala ni kutululuka?
12 O ibanzelu ia kambe o ku difua, i tena ku bhekela maka avulu mu kilunga—né muene bhu kaxi ka tufunga. O milongi ia Bibidia i tena ku tu kuatekesa mu maka enhá: “O mu ujitu kala muthu a xile mukuâ,” “ki mu di zangeleke ni ukumbu, maji mu xikina kubhanga ikalakalu ia kikexilu kiatolo.” (Lom. 12:10, 16) Mu veji dia ku jijidika kuila etu tua lungu, tua tokala ku mona kuila saí maukexilu avulu a ku batula o maka. Se tu xila o ibanzelu ia akuetu, tu tena ku kuatekesa o kilunga ku kala ni kutululuka.—Fil. 4:5.
13. Kiebhi ki tu tokala ku mona o ibanzelu ietu ia lungu ni ku bhana ndunge, ni phangu ia nanhi ia tange mu Bibidia?
13 O kuila kiki kilombolola kuma ki tu tokala kuzuela se tu mona kuma saí kima mu kilunga ki kia mu kuenda kiambote? Kana. Saí kilunga ku hama ia dianga mua monekene maka a tokalele ku a batula. O jiphange “anga a sola Phaulu ni Barnabé, ni akuâ dingi, phala a bande ku Jeluzaleme ku Jipoxolo ni adiakime, phala a tetulule o mak’ama.” (Ika. 15:2) Sé phata, o ibanzelu ia jiphange ki difuile, kala muthu ua kexile ni ndunge iê ia ku batula o maka. Maji kala muthu ua zuela ia kexile mu banza, kienhiki ni ki kuatekesu kia nzumbi ikôla, a tena ku batula o maka, mu kiki o jiphange ka jijila dingi mu ibanzelu iâ. Kioso kia tambula o mukanda mua kexile o itendelesu o kilunga, kia ‘sanguluka kiavulu mukonda dia maka akexile-mu, a bhekela ku suína dingi,’ ia kolokota ‘mu ku xikana kuâ.’ (Ika. 15:31; 16:4, 5) Kiene kimoxi ué lelu, se tu sota kikuatekesu ku jiphange ala ku pholo mu kilunga, tua tokala kuehela o maka bhu maku mâ.
LONDEKESA UKEXILU UAMBOTE MU KU DIBHANA NI AKUENU
14. Kiehi ki tu tena kulondekesa o ukexilu uambote ku muenhu.
14 Muthu ni muthu uala ni ithangana iavulu ia kulondekesa ukexilu uambote. Muthu ni muthu u tena ku bhanga mbote se tu londekesa o ukexilu ua ku loloka kioso kia tu ta kituxi. O Mak’â Nzambi a tu tangela: “Mu di lendukile ni kudikuatekesa mudienu, mu di loloka, se bhuala muthu ua di kuata ni mukuá. Kala muthu a loloke mukuá kala kioso Nzambi kia mi loloka enu, kiene ue ki mu bhanga jinga.” (Kol. 3:13) O kizuelu “se bhuala muthu ua di kuata ni mukuá,” kilondekesa kuila saí ithangana muthu u tena ku dikuata ni akuâ. Maji mu veji dia ku dibanza kiavulu, ni ku katula o kutululuka mu kilunga, tua tokala ku kaiela o phangu ia Jihova ia ku loloka sé kijijidiku, ni ku kolokota ku kalakala kumoxi.
15. (a) Phangu iahi i tu longa Jobe ia lungu ni ku lolola akuetu? (b) Kiebhi ki tu kuatekesa o musambu ku kala ni ukexilu uambote?
15 Jobe u tu bhana phangu iambote ia lungu ni ku loloka. O makamba mê atatu ka mu londekesa henda, a mu zuela ima ia mu xixima ku muxima. Maji né kiki, Jobe ua a loloka. Kiebhi kia tena ku bhanga kiki? ‘Muéne ua sambela hanji o makamba mê.’ (Jobe 16:2; 42:10) O ku sambela akuetu ku tu kuatekesa ku lungungulula o ibanzelu ietu ia lungu ni ene. O ku sambela o phange jetu ku mundu uoso ku tu kuatekesa ku kala ni ukexilu ua Kristu. (Nzu. 13:34, 35) Kioso ki tu samba tua tokala ué ku bhinga o nzumbi ikôla. (Luk. 11:13) O nzumbi ia Nzambi ia-nda tu kuatekesa kulondekesa o ukexilu ua Jikidistá kioso ki tu dibhana ni akuetu.—Tanga Ngalásia 5:22, 23.
LONDEKESA O UKEXILU UAMBOTE MU KILUNGA KIA NZAMBI
16, 17. Ni ‘ukexilu u tuene mu londekesa’ ihi i ua banze o ku bhanga?
16 O kilunga kia-nda kala ni ukexilu uambote se muthu ni muthu u suua mbambe ia ku kala ni ukexilu uambote mu kilunga! Kioso ki tua-nda zubha ku di longa o milongi íii, muthu ni muthu ua tokala ku di suinisa phala kulondekesa o ukexilu uambote. Tua tokala ku di tongininina ni kikuatekesu kia Mak’â Nzambi. (Jihe. 4:12) Phaulu ua thandanganhele kiavulu ni ima ia kexile mu bhanga mu kilunga, muéne uambe: ‘Ki ngejiia kikuma ki ngala na-kiu. Maji né kiki, ki ngi dilondekesa kuila nga iuka. U ngi tonginina muéne Jihova.’—1 Kol. 4:4.
17 Kioso ki tu di suinisa ku bhanga o ima ni unjimu u tunda bhulu, mu ku kamba ku di banza kiavulu, mba o ujitu uetu, tua-nda bheka ukexilu uambote mu kilunga. O ku kala ni ukexilu ua ku loloka ni ku kala ni ibanzelu iambote ia lungu ni akuetu, tua-nda dibhana kiambote ni phange jetu. (Fil. 4:8) Se tu kaiela o itendelesu íii, tu tena ku xikina kuila Jihova ni Jezú a-nda uabhela ‘o ukexilu uambote u tu londekesa.’—Filim. 25.
[Ibhuidisu ia ku dilonga]
[Foto ku mbandu 20]
O ku xinganeka mu ujitu ua Jezu, u ku kuatekesa kiebhi, kioso kia tu bhana milongi?
