Langa o Ukexilu Uambote ua Kilunga
Langa o Ukexilu Uambote ua Kilunga
“O henda ia Ngana Jezú Kristu, i kale ni ukexilu uenu u muene mu londekesa.” —FIL. 4:23, NW.
KIEBHI KI TU TENA KU KUATEKESA O KILUNGA KU KALA NI UKEXILU UAMBOTE . . .
kioso ki tu kala kumoxi ni jiphange jetu?
mu ku suína mu ukunji uetu?
mu ku tangela o tufunga o kituxi kia te phang’etu?
1. Mukonda diahi o kilunga kia Filipe, ni kia Tiiatila, a ki ximana kiavulu?
O JIKIDISTÁ akua Filipe mu hama ia dianga, exile jingadiama. Maji né kiki, ene a uabhele o ku bhana, a londekesele ué o henda ku jiphange jâ. (Fil. 1:3-5, 9; 4:15, 16) Mu ku a sonekena o mukanda ua sukina, o poxolo Phaulu uambe: “O henda ia Ngana Jezú Kristu, i kale ni ukexilu uenu u muene mu londekesa.” (Fil. 4:23, NW.) Mukonda dia Jikidistá akua Tiiatila kulondekesa ué o ukexilu iú, Jezú Kristu uambe: “Eme nga ku ijiia o ima ioso i ua mu bhanga kindala. Ngejiia ni henda ié, ni kuxikana, ni kukalakala kué ni muanu. Ngejiia ue kuila o ima ua sukidila kubhanga iala kota, ia diangele-ku ndenge.”—Dij. 2:19.
2. Kiebhi ki tu tena ku kuatekesa o kilunga ku kala ni ukexilu uambote?
2 O ukexilu iú, ene ué mu ulondekesa mu ilunga ia Jimbangi ja Jihova lelu. Saí ilunga a i ximana mu kulondekesa kisangusangu kiavulu, ni henda. A mukuá a boka o Utuminu ni ku suína kuoso, ni kulondekesa o vondadi ia ku bhanga o sidivisu ia thembu ioso. O ukexilu uetu uambote, u langa o kilunga, u bhangesa ué o kilunga ku kula mu nzumbi. (1 Kol. 1:10) Maji se tu kala ni ukexilu ua iibha, ni kueha ngó o ituxi mu kilunga, o ukexilu iú u tena ku tu bhangesa ku zeka mu nzumbi. (1 Kol. 5:1; Dij. 3:15, 16) Ukexilu uahi uene nau o kilunga kiê? Kiebhi ki u tena ku kuatekesa ku langa o ukexilu uambote ua kilunga?
SUÍNISA O UKEXILU UAMBOTE MU KILUNGA
3, 4. Kiebhi ki tu tena ‘ku ximana Jihova mu kilunga?’
3 O mukua jisalamu uimbi: “Phala ngi ku ximane mu kionge kia dikota; ngi ku sakidile bhua bhongoloka o mundu uavulu.” (Jisá. 35:18) O mukua jisalamu ka kambe ku ximana Jihova, kioso kia kexile bhu kaxi ka jiselevende ja Nzambi. O iônge ia semana, ni Milongi ia Mulangidi, i tu bhana kithangana kiambote phala kulondekesa o ku suína kuetu, kioso ki tu tambuijila o ibhuidisu, ni ku fisala o kixikanu kietu. Etu oso tua tokala ku dibhudisa: ‘O kuila ngene mu katula mbote mu tambuijila mu iônge? O kuila ngene mu di pelepalala kiambote phala ku tambuijila mu iônge? Eme ngi tata o kuila ngene mu kuatekesa o tuana tuami ku di pelepalala mu kithangana kia tokala, ni ku a longa ku tambuijila mu izuelu iâ?’
4 O mukua jisalamu Davidi, ua sokesa o ku suína kua muxima uetu, ni kuimbila. Muéne uambe: “Muxima uami ua ku dielela, Ngana Nzambi, muxima uami ua ku dielela; ngi ku imbila jinga eie, ngi ku ta muene ku mukumbi.” (Jisá. 57:7) O mimbu iene mu kuimba mu iônge i tu bhana kithangana kia “ku imbila” Jihova ni muxima uoso. Se ki tuejiia kiambote o mimbu, mukonda diahi ki tu di longo mu Kizuua kia Ubhezelu ku Muiji? Tua tokala ku bhanga ioso phala ‘ku ximana Jihova katé bhua ka suka o muenhu uetu.’—Jisá. 104:33.
5, 6. Kiebhi ki tu tena kulondekesa o ukexilu ua ku zalela, ni ua ku bhana, ni ihi ijila mu ku bhanga kiki mu kilunga?
5 O ukexilu ua mukuá ua ku langa o kilunga, o ku zalela o jiphange jetu. Mu kibatulu kia sukina, kia mukanda ua sonekena ku Jihebeleu, Phaulu ua tendelesa: “O kudizola ni jiphange ki mu ku ehe. Kana kufula kutambulula asonhi mu mabhata menu.” (Jihe. 13:1, 2) Tu tena kulondekesa o ukexilu iú, mu ku zalela o kafunga ka ilunga, ni muhatu uê, ni jiphange ja mukuá ala mu sidivisu ia thembu ioso. Tu tena ku bhanga ué kiki ku atudi, ku an’a itungu, mu ku a exana phala ku kala n’etu mu kizuua kietu kia ubhezelu ku muiji.
6 Phaulu ua tendelesa Timote phala ku tendelesa o jiphange: “A tume kuila a bhange jinge o mbote, mbé a kale ni umvuama ua ikalakalu iafuama, ende ni kubhana, ende ni kubindumuna akuá oso kala ni kima. Mu kubhanga kiki, a kele mu lunda dimanenu diambote katé bhu thembu ia hàdia, phala kienhokio a tene kunganhala muenhu, uene o muenhu ua kidi.” (1 Tim. 6:17-19) Phaulu ua kexile mu tendelesa o jiphange jê ku kala ni kifua kia ku bhana. Né muene mu ithangana ia nzala tu tena kulondekesa o kídifua kiki. Tu tena ku bhanga kiki, mu ku ambata o jiphange a bhindama mu dikalu dietu mu sidivisu ia kuboka, ni mu iônge. Ihi ia tokala o ku bhanga o jiphange a tambula o kikuatekesu kiki? Ene a tena kulondekesa o kisakidilu kiâ, mu ku kuatekesa o phange mukua dikalu ku sumba o kazolina. O kuila tu tena ku kala ni kithangana phala ku kala ni jiphange jetu, phala kulondekesa kuila ene ala ni valolo, ni kuila tua a zolo kiavulu? Kioso ki tu bhanga ima iambote kua ‘ió ala kumoxi ni etu mu kixikanu,’ ni ku ngastala o kithangana kietu, ni jimbote jetu, ki tu bandekesa ngó o henda ietu kua ene, maji tu langa ué o ukexilu uambote ua kilunga.—Nga. 6:10.
7. Kiebhi o kuijiia ku bhaka o kikutu, ki tu kuatekesa ku langa o kilunga?
7 Tu di longe o ukexilu ua mukuá ua ku bandekesa o henda ku jiphange jetu: O ukamba ni kuijiia ku bhaka o kikutu. (Tanga Jisabhu 18:24.) O makamba a kidi, ejiia ku bhaka kikutu. Kioso o jiphange jetu kia tu tangela o kikutu kiâ, a dielela kuila o kikutu kiki, se-ku dingi muthu ua-nda k’ijiia, o henda i di bandekesa dingi. Tu tena kulondekesa o ukexilu iú mu kilunga, mu ku kala dikamba dia kidi, di tena ku bhaka o kikutu.—Jisa. 20:19.
SUÍNA MU UKUNJI
8. Kitendelesu kiahi kia tambula akua Laodiseia, ni mukonda diahi?
8 Kioso kia kexile mu zuelela o kilunga kia Laodiseia, Jezú uambe: ‘Nga ku ijiia o ima i uene mu bhanga. Ngejiia kuma eie ku talala, ku tema. Nginda-phe u talala. mba u tema! Maji o ki ual’iki, ua labhuka ngó, ku tema ku talala, ngi ku lukula mu kanu diami!’ (Dij. 3:15, 16) O akua Laodiseia ka suínine mu ukunji uâ. O ukexilu iú nange ua zozesa o ukamba uâ. Kienhiki, ni henda ioso, Jezú ua a tendelesa: “Oso u nga zola, ng’a bazela ng’a beta. Phaphumuka-phe, u diele o ituxi ié.”—Dij. 3:19.
9. Kiebhi o ku suína kuetu mu ukunji ku langa o ukexilu uambote ua kilunga?
9 Phala ku langa o ukexilu uambote ua kilunga, tua tokala tu suína mu ukunji uetu. O kilunga kiala ni kikalakalu kia ku bhanga o ukunji, ku kenga athu ala ni ukexilu uambote, ni ku a kuatekesa mu nzumbi. Kienhiki, tua tokala ku bhanga o kikalakalu kia ku bhanga maxibulu, ni kisangusangu kioso, kála kia bhangele Jezú. (Mat. 28:19, 20; Luk. 4:43) O ku suína kuetu mu ukunji, ku tu bhangesa ku kala tu ‘akunji a Nzambi.’ (1 Kol. 3:9) Kioso ki tu mona o jiphange jetu ku zokela o kixikanu kiâ, ni kulondekesa o kisakidilu kiâ mu milongi ia Nzambi, ki tu suínisa dingi ku a zola ni ku a xila. Mu kiki, o ku sidivila ni “muxima umoxi” mu ukunji, ku langa o kilunga.—Tanga Sofoniia 3:9.
10. O kuila o uhete uetu ua ku longa u kuatekesa o jiphange mu kilunga?
10 O uhete u tu londekesa mu ukunji, u kuatekesa ué o jiphange. Kioso ki tu thandanganha ni athu u tu sanga mu ukunji uetu, tu kala dingi ni kisangusangu, ni uhete ua ku kuatekesa o athu ku tendela kiambote o milongi ietu. (Mat. 9:36, 37) Se tu kala ni kisangusangu, o jiphange jetu a-nda kala ué ni kisangusangu. Jezú ua tumikisa o maxibulu mê ku boka o njimbu mu kiiadi-kiiadi, ka tumikisa muthu umoxi kana. (Luk. 10:1) Ka bhange kiki phala ku suínisa ngó, mba ku longa, maji phala ku di suínisa mudiâ mu ukunji. Ki tu uabhela ku kalakala ni jiphange a suína mu ku boka? O kisangusangu kiâ ki tu suínisa ué, ki tu bhangesa ué ku kalakala dingi mu ukunji uetu.—Lom. 1:12.
DILANGE KU UKEXILU UA KU LONGOLOLA NI KU KAMBA KU BATULA NI KU IUKA
11. Ukexilu uahi ua londekesa akua Izalaiele mu izuua ia Mozé, ni ihi ia bhange?
11 Akua Izalaiele exile kifuxi kiobhe mu ithangana iavulu, maji ka sangulukile ni ima ia kexile na-iu, akexile mu longolola. O ukexilu iú ua a bhangesa ku bhukumukina Jihova, ni ió akexile ku pholo. (Mak. 16:1, 2) Kibuka kiofele ngó kia akua Izalaiele kia xisa Ijitu, a bokona mu Ixi ia a Kanene. Mozé ka bokona mu ixi íii mukonda dia kulondekesa o ukexilu ua iibha mu kilunga kia Izalaiele! (Mate. 32:48-52) Ihi i tua tokala o ku bhanga phala ki tu kale ué ni ukexilu iú?
12. Kiebhi ki tu tena ku dilanga ku ukexilu ua ku longolola?
12 Tua tokala ku dilanga ku ukexilu ua ku longolola. Se tu londekesa o ku lenduka, ni ku xila ió ala ku pholo, kua-nda tu kuatekesa, tua-nda thandanganha ni jiphange jetu. Se ki tu solo kiambote o itonokenu, mba tu ngastala kithangana kiavulu ni jikoleka jetu ja sidivisu, mba ja xikola ki jiphange jetu, a tena ku tu bhekela ibhidi. Etu tua tokala ku sola kiambote o makamba u tua tokala ku dilunga nau, ki tu sola athu ala ni ukexilu ua iibha, mba a di tumina mudiâ.—Jisa. 13:20.
13. Iluezu iahi i bheka o ukexilu ua ku longolola mu kilunga?
13 O ukexilu ua ku longolola mu kilunga, u tena ku bhangesa o muthu ku di ta mu kiluezu kia mukuá mu nzumbi. Mu kifika o ukexilu ua ku longolola u tena ku bheka kavuanza mu kilunga. O ku longolola o jiphange ki ku bheka ngó kavuanza, maji ku bheka ué o kituxi kia ku tatela, ni ku vutula phonzo. (Iji. 19:16; 1 Kol. 5:11) Saí jiphange mu kilunga ku hama ia dianga akexile mu longolola, ‘a ditunine ku a tumina kuala Nzambi, ni ku bhukumukina o tufunga.’ (Jud. 8, 16) Uoso u longolola o tufunga mu kilunga ka mu xikina kua Nzambi.
14, 15. (a) O ku bhaka o kituxi ki tena ku fidisa o kilunga kioso ku tambula ihi? (b) Ihi i tua tokala o ku bhanga se tuejiia kuila o phang’etu ua te kituxi?
14 Ihi i tua tokala o ku bhanga se tuejiia kuila saí phange uene mu ta kituxi mu kasuekele, kála ua ku kodiua, mba ku tala o ima ia ufusa, mba ku bhanga undumbu? (Efe. 5:11, 12) Se tu bhaka o kituxi, ki tena ku fidisa o nzumbi ikôla ia Jihova ku kala mu kilunga, ni ku ta o kilunga kioso mu kiluezu. (Nga. 5:19-23) O Jikidistá mu kilunga kia Kolindo, a tokalele ku zelesa o kilunga, lelu ué o ukexilu uoso ua iibha, ki ua tokala ku kala mu kilunga, phala ku langa o kilunga. Ihi i ua tokala o ku bhanga phala ku langa o kilunga?
15 Kála ki tua di longo kiá, tua tokala kuijiia ku bhaka o maka a jiphange jetu, bhenge-bhenge se ene a tu tangela o maka mâ. Kima kia iibha ku ta jimbuémbue ja lungu ni maka a tu tangela! Maji se tuijiia kuila saí phange ua te kituxi, o kibatulu kiki kia Bibidia, kia tokala ku tu kuatekesa ku batula o maka—o tufunga mu kilunga—a tokala ku a tangela. (Tanga Ijila 5:1.) Se tuejiia kuila phange’etu ia diiala, mba ia muhatu, ua te kituxi, tua tokala ku mu suínisa phala ku kenga o kikuatekesu kia tufunga. (Tiia. 5:13-15) Se o kithangana ki tua mu bhana, muéne ka kenga o tufunga, tua tokala ku tanga o kituxi ku tufunga.
16. Kiebhi o ku tangela o tufunga o kituxi kia te phang’etu, ki kuatekesa ku langa o kilunga?
16 O kilunga, disuamenu mu nzumbi, tua tokala ku ki langa mu ku tanga o ituxi i tuejiia. Se o tufunga a zuela ni phange ua te kituxi, muéne u diela, u tambula o kikuatekesu kia tokala, muéne ka te dingi o kilunga mu kiluezu. Ihi i tuamba se o phange ua te kituxi ka mesene ku diela, ka xikina o ki kuatekesa kia tufunga? O kueha ku kala mbangi ia Jihova ki mu bhangesa ku ‘texi o muenhu uê,’ mba ku katula o ukexilu ua iibha bhu kaxi k’etu, kiki ki bhangesa ku langa o kilunga. (Tanga 1 Kolindo 5:5.) Phala ku langa o kilunga, ku bhinga kuila etu enioso tu bhanga kima, kala o ku kuatekesa o tufunga, ni ku langa o jiphange jetu.
SUÍNISA ‘O KU TULULUKA MU KILUNGA’
17, 18. Ihi ia-nda tu kuatekesa ‘ku bhaka mu usoko ua kuongama kua tu bhana o nzumbi?’
17 O ku “kolokota mu ulongelu ua jipoxolo,” ua kuatekesa o akaiedi a Jezú ku kala ni ukexilu uambote mu kilunga. (Ika. 2:42) Ene a bhanene valolo mu milongi ia Bibidia, ni ku kikuatekesu kia tufunga. Mukonda dia tufunga ku kalakala kumoxi ni kibuka kia kimbadi kia fiiele, o jiphange joso mu kilunga a tokala ku a kuatekesa, phala ku kalakala kála kibuka kimoxi ngó. (1 Kol. 1:10) Kioso ki tu belesela o milongi ia Bibidia, i tu tambula mu kilunga kia Jihova, ni itendelesu ia tufunga, tu londekesa kuila tua mu ‘kuata muanhu ua ku bhanga kioso ki tua tena mu ku di bhaka mu usoko ua kuongama kua tu bhana o nzumbi, mu dijikita diê dia paze.’—Efe. 4:3.
18 Kienhiki tua tokala ku bhanga ioso phala ku langa o ukexilu uambote ua kilunga. Se tu bhanga kiki, tu tena ku dielela kuila ‘o henda ia Ngana Jezú Kristu, i kale ni ukexilu uetu u tuene mu londekesa.’—Fil. 4:23, NW.
[Ibhuidisu ia ku dilonga]
[Foto ku mbandu 24]
O kuila uene mu langa o ukexilu uambote ua kilunga, mu ku pelepalala kiambote o milongi phala ku tambuijila o ibhuidisu mu kilunga?
[Foto ku mbandu 25]
O kuijiia o mimbu ietu i tu bhangesa ué ku kala ni ukexilu uambote ku muiji
