O Kuila ku Dimatekenu o Edene Iexile Muene o Dibhata Dia Athu?

DIXINGANEKE eie mu jaludim. Kididi sé jibuia ja kima, sé jibuia ji tunda mu mbanza muala athu. O jaludim íii, kididi kia dikota, se-ku kima ki tena ku katula o ku tululuka kua muthu. Mu kididi kiki, o kilunji ki ki thandanganha ni kima, eie u divua kiambote, sé kuívua ndolo ku mukutu. Mu kiki, eie u sanguluka kiavulu ni ima ioso ia ku kondoloka mu kididi kiki.

O mesu mê, a sanguluka kiavulu mu ku mona o ithulu ia uabha, ni menha a ngiji, ni muanha u tula ku mafué, ni kilembeketa. Eie uivua o jibuia ja kitembu, ni dizumba dia uabha mu kididi kiki. Eie uivua o jibuia ja menha ja mu dibeta ku matadi, o jibuia ni muimbu ua jinjila, ni jibuia ja ibamba mu kididi kiki. Eie u tena ku dixinganeka, ku kala mu kididi kiki?

Athu mu ngongo, a xikina kuila o mundu ku dimatekenu ua kexile kiki. Tundé m’ukulu, athu mu Judaismu, mu Kidistándade, ni mu Islamismu, ene mu longa ia lungu ni jaludim ia Edene, o kididi kua tudile Nzambi Adá ni Eva. Kála ki tanga o Bibidia, ene akexile mu kididi kia tululuka, ni ku zediua ku muenhu. Ene akexile ni ukamba uambote mudiâ, ni iama, ni Nzambi, mu henda iê, ua a bhana o kidielelu kia ku kala ku muenhu ua kalelaku.—Dimatekenu 2:15-24.

Akua Hindu ala ué ni ibanzelu iéngi ia lungu ni palaízu. O akua Budista, a xikina kuila o atuameni a makota, mba Budismu, a tukulukile mu kithangana kia ulu kioso o mundu uexile hanji palaízu. Maji mu África, jingeleja javulu, ene mu longa misoso i lembalesa Adá ni Eva.

Maji mu kidi, o ilongesu ia lungu ni palaízu iokulu, tu tena ku i sanga mu jingeleja, ni mu ijila ia athu. Saí diiala diambe:  “Athu avulu a xikina kuila o palaízu kididi kia iuka, mua kexile ufolo, ku tululuka, ku zediua, sé maka, sé jiphaxi. . . . O ilongesu íii, i bhangesa athu ku mesena kuijiia o palaízu ia texika, ni ku mesena kuila o kididi kiki, ki kale dingi palaízu.”

O kuila o misoso ioso íii ni ijila, ia tundu ku kibanzelu kimoxi ngó? O kuila o ‘ibanzelu ia athu oso’ mu ngongo ia lungu ni kididi kiki, kima kia kidi? O kuila m’ukulu kua kexile muéne o jaludim ia Edene, iexile kididi kia kidi phala Adá ni Eva?

O akua jiphata (céticos) ka xikina o milongi íii. Mu ithangana íii, saí athu amba kuma o milongi íii, ki misoso ia kidi, ia makutu. Maji ki o athu oso akua jiphata a dituna o milongi íii. Saí atuameni a jingeleja, kene mu longa ia lungu ni jaludim ia Edene. Ene amba kuma, mu ixi nuka mua kexile o kididi kiki. Ene amba ué kuma, misoso ngó ia makutu, ki kididi kia kidi.

Sé phata, o Bibidia ki i tanga misoso ia makutu. Jezú ua tange misoso iavulu ia kidi. Kienhiki, o Bibidia ki izuela o Edene, kála musoso ua makutu, maji kididi kia kidi. Mu kiki, se o izulukutu ia tange mu Bibidia ki kima kia bhiti, kiebhi-phe ki tu tena ku dielela mu misoso ia mukuá izuela o Bibidia? Tua-nda di longa se mukonda diahi, saí athu a kala jiphata ja lungu ni jaludim ia Edene, ni mukonda diahi. Tua-nda di longa ué se mukonda diahi o musoso iú ua tu tokala ué.