1, 2. Ihi ia lungulula Jihova ku muvu ua Pendekoxi ua 33? A nanhi a bhangele mbandu ku kifuxi kia ubhe kia Jihova? (Tala o fota ia dianga.)

KU MUVU ua Pendekoxi ua 33, Jihova ua lungulula o ima. Muéne ua bhange kifuxi kia ubhe, iú ua a bhana o dijina dia ‘Izalaiele ia Nzambi,’ mba Izalaiele mu nzumbi. (Ngalásia 6:16) Bhu kaxi ka nzumbi iê ikôla, Jihova ua solo o athu eji bhanga mbandu ku kifuxi kiki. Phaulu uambe kuila, o athu a tokala ku kifuxi kiki, ka bhingi ku a saia, kala kia kexile mu bhanga o muiji ua Mbalahamu. Mu veji dia kiki, ene akexile ni “ muxima uòsaie,” bhu kaxi ka nzumbi ikôla.—Loma 2:29.

² O athu a diangele ku bhanga mbandu ku kifuxi kia ubhe kia Nzambi, exile o jipoxolo ja Kristu ni hama ia maxibulu ndenge akexile kumoxi mu Jeluzaleme. (Ikalakalu 1:12-15) Nzambi ua a zunzumuna o nzumbi iê ikola, ene a kituka an’a Nzambi. (Loma 8:15, 16; 2 Kolindu 1:21) Kiki kia londekesele kuila, Jihova ua xikinine o sata ia Kristu ni ku zubha o kikutu kia Kitumu, phala ku ki bhingana ku kikutu kia ubhe. (Luka 22:20; tanga Jihebeleu 9:15.) O maxibulu iâ, a a undu, a bhanga mbandu ku kifuxi mba mundu ua ubhe ua Jihova. Bhu kaxi ka nzumbi ikôla Nzambi ua a bhana o uhete ua ku  zuela ni ku tendela madimi avulu ni ku longa “o ima ia makota ia Nzambi.”—Ikalakalu 2:1-11.

3-5. (a) Ihi ia tangele Phetele ku Jijudé mu kizuua kia Pendekoxi? (b) Kiebhi o kifuxi kia ubhe kia kulu ku mivu ia dianga?

³ Bhu kaxi ka poxolo Phetele, Jihova uexana Jijudé ni athu a mukuá phala ku bhanga mbandu ku kifuxi kia ubhe, o kilunga kia Jikidistá a a undu. Mu kizuua kia Pendekoxi, Phetele ua zuela sé uôma ku Jijudé kuila ene a jibhile Jezú, ni kuila ene a tokalele ku mu xikina kala “Ngana, muène Kristu.” Kioso o athu kia mu ibhula se ihi ia tokalele ku bhanga, Phetele ua tambuijila: “Dielenu na mi batizale en’uenu oso, mu dijina dia Jezú Kristu, phala o ituxi ienu a mi loloke-iu, anga mu tambule kua Tata o ujitu ua Nzumbi Ikôla.” (Ikalakalu 2:22, 23, 36-38) Mu kizuua kieniókio, 3.000 ja athu ndenge, a mateka ku bhanga mbandu ku kifuxi kia ubhe kia Izalaiele mu nzumbi. (Ikalakalu 2:41) Mu ku bhita kithangana, o ji poxolo a suluka mu ku boka ni ku suína kuoso, mu kiki, athu avulu a xikina o kidi. (Ikalakalu 6:7) O kifuxi kia ubhe kia kexile mu kula.

⁴ Mu ku bhita thembu, o maxibulu a Jezú a mateka ku boka ku akua Samádia. Avulu mudiâ a xikina o kidi ni kua batizala, maji ene ka tambuile o nzumbi ikôla. O kibuka kia Utuminu mu Jeluzaleme a tumikisine Phetele ni Nzuá phala ku kunda o jiphange jiji ja ubhe, ja mala ni ja ahatu, akua Samádia. O jipoxolo jiiadi jiji, a kuatekesa o jiphange, ‘ene anga a tambula o nzumbi Ikôla.’ (Ikalakalu 8:5,  6, 14-17) Mukonda dia kiki, o Jiphange jiji akua Samádia a a undile, a tenene kiá ku bhanga mbandu ku Izalaiele mu nzumbi.

⁵ Ku muvu ua 36, bhu kaxi ka Phetele, Nzambi uexana athu engi phala ku bhanga mbandu ku kifuxi kia ubhe kia Izalaiele mu nzumbi. Kiki kia bhitile kioso Phetele kia bhana umbangi ku kabhitangu ka masoladi a Loma, Koloneliu, ku muiji uê ni makamba mê. (Ikalakalu 10:22, 24, 34, 35) O Bibidia i longa kuila, kioso Phetele kia kexile hanji mu zuela, o athu oso kexile Jijudé ni ió oso exile mu kuívua, a tambula o nzumbi ikôla. ‘O Jijudé, iá a xikana kiá, a tokala mu kifua kia kusaia, eza ku bheka Phetele, a diuana, mu ku mona kuma Nzambi ni akua jixi jengi ué ua a bhana o ujitu ua ku tambula o nzumbi ikôla ku thandu diâ.’ (Ikalakalu 10:44, 45) Tundé mu kithangana kieniókio, o athu kexile Jijudé ka a saiele a a solele ué phala ku bhanga mbandu ku Izalaiele mu nzumbi.

6, 7. Ihi ia bhangele o athu a tokala ku kifuxi kia ubhe phala ku kala mundu uala ni dijina dia Jihova?

⁶ Mu kiônge kia kibuka kia Utuminu ku muvu ua 49, o dixibulu Tiiaku uambe: ‘Ximá [Phetele] ua mu jimbulula kioso kia diangele Nzambi ku akua jixi jengi, ku katula-mu mundu uê mu dijina diê.’ (Ikalakalu 15:14) O “mundu uê mu dijina diê,” exile o Jikidistá Jijudé, ni ió ki Jijudé a a solele kua Nzambi phala ku bhanga mbandu ku kifuxi kia ubhe. (Loma 11:25, 26a) Mu ku bhita kithangana, Phetele ua soneka: ‘M’okulu ki mu kexile mu mundu ua Nzambi, kiki-phe mu mundu uê.’ Phetele ua jimbulula o disukilu dia kifuxi kiki kia ubhe, kioso kia zuela: ‘Maji enu-phe mu muiji uosole, mu akunji a sobha, kifuxi kia zele, mu mundu ua ngene ua Nzambi muéne. A mi tungula phala muende ni ku jimbulula o imbamba ia madiuanu iene mu bhanga Nzambi, ió ua mi katula mua vundu iú ua mi bheka mu mukengeji uê u diuanesa.’ (1 Phetele 2:9, 10) Ene a tokalele ku kala Jimbangi ja suína ja Jihova, ni ku boka mu ku ximana Jihova, o Muteni-a-ioso.

⁷ Jihova ua solele o kifuxi kia ubhe kia Izalaiele mu nzumbi ni ku zuela kuila, o ‘mundu uenhú nga u solo phala ende ni ku ngi ximana.’ (Izaia 43:21) Ene a boko ni ku suína kuoso ku athu kuila, Jihova muéne o Nzambi ia kidi, ni kuila o jinzambi joso ja mukuá, jexile ja makutu. (1 Tesalonika 1:9) Ene exile Jimbangi ja Jihova ni ja Jezú “mu Jeluzaleme, ni mu Judeia ioso, ni mu Samádia katé ni ku maxokololo ma jixi.”—Ikalakalu 1:8; Kolose 1:23.

8. Kitendelesu kiahi kia bhana poxolo Phaulu ku mundu ua Nzambi ku hama ia dianga?

⁸ Phaulu uexile mbangi ia suína ia Jihova, ni ku mu zokela kala Nzambi ia kidi, ua bhangele kiki, katé muene kioso kia zuela ni akua ku longa o makutu. Muéne uambe kuila, Jihova muene ‘ua bhange o ixi, ni ioso iala-mu,’ ni kuila muéne, “Ngana ia diulu ni oxi.” (Ikalakalu 17:18, 23-25) Phaulu ua tendelesa ué o kilunga: “Ngejiia kuma, ki nganda kutunda-bhu’iki, kuanda kuiza jimbinji ji kaka mu’axaxe kenu, ki ji kala ni henda ia kilunga. Ni mudienu muene, hinu mu moneka athu a tanga ima ia makutu, ia kutondalesa, hé a sunga jixibulu ku mbandu iâ.” (Ikalakalu 20:29, 30) Ku disukilu dia hama ia dianga kua kexile athu avulu akexile mu lungulula o kidi.—1 Nzuá 2:18, 19.

9. Ihi ia bhitile ni mundu ua Nzambi kioso kiafu o jipoxolo?

 ⁹ Kioso kiafu o jipoxolo, o akua ku longa o makutu a di bandekesa mu ilunga, mu ku suluka, a bhange o jingeleja ja Kidistándade. Mu veji dia ku kala kifuxi kia ubhe phala o dijina dia Jihova, o athu iá exile Jikidistá ja makutu, mu kiki a katula o dijina dia Nzambi mu ji Bibidia javulu. Ene a xidisa ué o dijina dia Nzambi mu maukexilu a mukuá. Ene akexile mu kaiela o ijila ia jiphagão ni ku longa milongi ki i kexile mu Bibidia. Ene akexile mu luua ita ni ku zuela kuila, akexile mu bhanga kiki mu dijina dia Nzambi. Ene exile akua mangonha, ni akua ku bhanga o ufusa. Mu ku bhita kithangana, kioso o athu kia matekene ku longa o makutu, o abhezi a fiiele a Jihova mu ixi a tolele, mu kiki, ki ku kexile kibuka kiexile o ‘mundu ua kexile ni dijina diê.’

10, 11. (a) Ihi ia zuela Jezú ia lungu ni “jimbutu jambote,” ni “jimbundu ja iangu”? (b) Kiebhi kia di kumbidila o kifika kia Jezú kioso kia bhiti o muvu ua 1914?

¹⁰ Bhu kaxi ka kifika kia lungu ni jimbutu jambote ni jimbundu ja iangu, Jezú ua zuela kuila, o ulongelu ua makutu ueji fidisa o athu kuijiia o kilunga kia kidi. Muéne uambe kuila, “Kioso-phe kiai athu ku kilu,” o Diabhu ueji kuna jimbundu ja iangu, mu kididi mua kunu o Mon’a muthu o jimbutu jambote. O jimbutu jambote ni jimbundu ja iangu jeji kula kumoxi katé “ku dizubhilu dia mundu.” Muéne ua jimbulula kuila, o “jimbutu jambote,” ji lombolola “o an’a Utuminu ua Nzambi,” ni kuila, o “jimbundu ja iangu,” ji lombolola “o an’a Dimonho.” Mu kithangana kia izuua ia sukidila-ku, o Mon’a muthu ueji tumikisa o ji anju phala ku tungula o jimbutu jambote ku jimbundu ja iangu. Mu kiki, o ji anju jeji kuongeka o an’a Utuminu. (Matesu 13:24-30, 36-43) Kiebhi kia bhange kiki? Kiebhi o ku bhanga kiki, kia bhangesa Nzambi ku kala ni kibuka kia abhezi eji kituka o mundu uê mu ixi?

¹¹ “O izuua ia sukidila-ku,” ia mateka ku muvu ua 1914. Mu ithangana ienioió, kua kexile ngó midi ia Jikidistá a a undu mu ixi. Mu kithangana kia bhiti o ita ia dikota ku mundu uoso ku muvu uenió, o Jikidistá jiji, a a undu kala “an’a Utuminu,” exile hanji mu Babilonha ia dikota. Maji ku muvu ua 1919, Jihova ua a bhulula, mu kiki, o athu a tenene ku tungula kiambote o Jikidistá ja kidi ni ja makutu. Muéne uongeka o “an’a Utuminu,” phala ku kala o mundu uê, kala kia kanene Izaia: “Mua fika-phe oxi ia muvimba i tena ku di-vuala mu kizuua kimoxi? Kifuxi kia muvimba, a tena ku ki vuala mu kithangana kimoxi? Maji Ziione uedi ngó u túla ku isénda, ua banduluka kiá an’ê.”  (Izaia 66:8) Mu kibatulu kiki, Ziione ulombolola o kilunga kia Jihova kia ji anju. Ziione “ua banduluka,” kioso kia bhange o kifuxi kia an’a a undu mu ixi.

12. Mu ukexilu uebhi o Jikidistá a a undu, ene o mundu phala o dijina dia Jihova?

¹² Kála o Jikidistá ku hama ia dianga, lelu o Jikidistá a a undu mba o “an’a a Utuminu,” Jimbangi ja Jihova. (Tanga Izaia 43:1, 10, 11.) A tena ku a ejiia kiambote ni ku a tungula, mukonda dia uendelu uâ uambote, ni mukonda dia ku boka o njimbu iambote ia Utuminu, ni “kubhana umbangi ku akua jixi joso.” (Matesu 24:14; Filipe 2:15) Mu ku bhanga kiki, ene a kuatekesa athu avulu ku kala ni ukamba uambote ni Jihova.—Tanga Daniiele 12:3.

13, 14. Ihi ia tokala o ku bhanga o athu ka a undu, phala kua a xikina kua Jihova kala abhezi iê? Kiebhi kia ki kanene mu Bibidia?

¹³ Mu milongi ia bhiti tua di longo kuila, mu Izalaiele iokulu, Jihova ua xikinine o athu ka tokalele ku kifuxi kia Izalaiele, ku mu bheza kumoxi ni mundu uê. (1 Jisobha 8:41-43) Lelu, o athu ka a undu, a tokala a bheza Jihova kumoxi ni ió a a undu kua Jihova kala Jimbangi jê.

¹⁴ O jipolofeta ja kanene kiá kuila, mu izuua ia sukidila-ku, athu avulu eji bheza Jihova kumoxi ni mundu uê. Izaia ua kanena: “Miji iavulu, ia kèza anga ia kà zuela: Zenu tu bande ku mulundu ua Jihova, ku’bhata dia Nzambi ia Jakobo, phala a tu longese kioso kiene o jinjila jê, nda tuendele mu jihoka jê; mbata kitumu kia kà tunda mu Ziione, maka ma Jihova ma kèjila mu Jeluzaleme.” (Izaia 2:2, 3) Zakadiia ua kanene kuila, ‘miji iavulu ni ifuxi ia mazonda ia kéza mu Jeluzaleme mu ku sota Jihova dia Ilômbo Ieta ni ku dionda, phala ku tambula o mabesá a Jihova.’ O kibuka kiki, kieji tunda ku “madimi m’engi ma miji ioso mu ngongo.” Ene eji bheza Nzambi kumoxi ni Izalaiele ia nzumbi ni ku zuela: “Tua-nda kuia ni enu, mukonda tuene mu kuívua kuila o Nzambi uala ni enu.”—Zakadiia 8:20-23.

15. Ihi i lombolola o “jimbudi jamukuá” “kuia” kumoxi ni Izalaiele ia Nzambi?

¹⁵ O “jimbudi ja mukua,” ‘aia’ kumoxi ni Izalaiele mu nzumbi ku boka o njimbu iambote ia Utuminu. (Marku 13:10) Ene a kituka mbandu ia mundu ua Nzambi. Ene kumoxi ni Jikidistá a a undu, a “kala kilunga kimoxi” ni ku kala ni “mubidi uambote,” Jezú Kristu.—Tanga Nzuá 10:14-16.

16. Ihi ia-nda bhanga Jihova phala ku mateka o Alumajedone?

¹⁶ Kioso Babilonha ia Dikota kia-nda ku i buika, o mundu ua Nzambi a-nda ku u zukutisa. Tua-nda bhindamena o kikuatekesu kia Jihova phala ku bhuluka. Mu kithangana kia tokala, Jihova ua-nda kuendesa o ima mu ixi, ia-nda bhangesa ku zukutisa o mundu uê. Kiki kia-nda bhangesa ku mateka o Alumajedone, o kizulukutu kia sukidila-ku kia  ‘hadi ia dikota.’ (Matesu 24:21; Izekiiele 38:2-4) Mu kiki, Goge ua-nda zukutisa o “mundu ua diongeka mu’axaxi ka akua jixi.” (Izekiiele 38:10-12) Kioso kia-nda bhita o kizulukutu kiki, Jihova ua-nda bhanga ioso phala ku bhulula o mundu uê, ni ku luua ni Goge ni jinguma jê joso. Jihova ua-nda zangeleka o Ungana uê ni ku zelesa o dijina diê. Muéne ua-nda zuela: ‘Eme nga-nda ku di kudisa anga ngi di kolêsa, anga ngi bhangesa kuila a ng’ijiia bhu mesu a miji iavulu; hé a kà k’ijiia kuila eme muene ngi Jihova.’—Izekiiele 38:18-23.

17, 18. (a) Kioso Goge kia-nda zukutisa o mundu ua Jihova, itendelesu iahi ia-nda tu bhana Jihova? (b) Se tua mesena ku tambula o kikuatekesu kia Jihova, ihi i tua tokala o ku bhanga?

¹⁷ Kioso Goge kia-nda mateka ku zukutisa, Jihova ua-nda zuela ku jiselevende jê: “Enu mu mundu uami, ndenu, mu bokone mu jinzo jenu, mu di jikile momo, mu suame ngó kathangana, katé ki somboka o njinda.” (Izaia 26:20) Mu kithangana kia-nda bhita o izulukutu íii, Jihova ua-nda tu bhana itendelesu ia tokala phala ku tu langa. O “jinzo” nange o ilunga ietu.

¹⁸ Se tua mesena kuila a tu langa mu kithangana kia hadi ia dikota, tua tokala ku xikina kuila, Nzambi uala ni mundu uê mu ixi lelu, ni kuila muéne ua a uane mu ilunga. Tua tokala ku kala kumoxi ni mundu ua Jihova ni ku kolokota ku diongeka ni kilunga kietu. Kála o mukua jisalamu, tu tena ku zuela ni muxima uoso kuila: O “kubhuluka ku tunda kua Jihova; o ku thandu dia mundu uê ku kale dibesá.”—Jisálamu 3:8.