Poxolo Phawulu wasoneka kiki kwa Timote, kafunga ni mukwetu: “Nga mu kutendelesa bhupholo ya Nzambi ni ya Kidistu Jezú, ni jianju josole kwila, sota kukayela o itendelesu yiyi sé katombo né katungu.”—1 Ti. 5:21.

Phala kutukwatekesa kwijiya se ananyi o jianju jiji, twanda dilonga se jianju jebhi jakambe kubhanga mbandu ku kibuka kiki kya jianju. O jianju jiji kijitokala ku 144.000. Kyoso Phawulu kyasonekena Timote ku dyulu ki kukexile luwa Jikidistá a a undu. O jipoxolo ni Jikidistá ja mukwa a a undu kakitukile luwa athu mu nzumbi. Mu kiki o “jianju josole” ki Jikidistá a a undu.—1 Ko. 15:​50-54; 1 Te. 4:​13-17; 1 Nz. 3:2.

O “jianju josole” ki jianju jabhukumukina Nzambi mu kithangana kya dilúvyu. O jianju jojo akayela Satanaji, akituka madimonyo ni jinguma ja Jezú. (Dim. 6:2; Luk. 8:​30, 31; 2 Ph. 2:4) Ku hádya, o madimonyo anda kwatakula mu dikungu dyazongo ni kukala-mu mu 1.000 ya mivu, mukusuluka anda kwabwika kumoxi ni Dyabhu.—Jud. 6; Dij. 20:​1-3, 10.

O “jianju josole” jatumbula Phawulu, o jianju jafiyele, akalakala kumoxi ni ‘Nzambi ni Kidistu Jezú.’

Kwene mazunda ni mazunda a jianju jafiyele. (Jih. 12:​22, 23) Kitutokala kubanza kwila o kikalakalu kyene mubhanga o jianju, kyene kimoxi. (Dij. 14:​17, 18) Mu kifika, Jihova watumine anju imoxi phala kujibha 185.000 a masoladi akwa Asídya. (2 Jis. 19:35) Jianju javulu atambula o kikalakalu kya ku “katula mu Utuminu [wa Jezú] o ima yoso ibhangesa kudibhala, ni yó abhanga o ima yazembe Nzambi.” (Mat. 13:​39-41) Amukwa nange ala ni kikalakalu kya ku “bhongolola o athu ósole” ku dyulu. (Mat. 24:31) Amukwa hanji ala ni kikalakalu kya ‘kutulanga mu njila jetu joso.’—Jisá. 91:11; Mat. 18:10; sokesa ni Matesu 4:11; Luka 22:43.

O “jianju josole” jotumbule mu divulu dya 1 Timote 5:​2, nange atambula o kikalakalu kya kulanga o mundu wa Nzambu mu ilunga. Mu kibatulu kiki, Phawulu wabhana kitendelesu kyalungu ni kyebhi o tufunga kyatokalele kubhanga o kikalakalu kyâ ni kwila o jiphange mu ilunga atokalele kwaxila. O tufunga atokalele kubhanga o ikalakalu yâ “sé katombo né katungu,” ni kuxinganeka kyambote ande dya kubatula maka oso-oso. Phawulu wambe kwila o tufunga atokalele kubhanga kiki mukonda ene exile musidivila o jiphange “bhupholo ya Nzambi ni ya Kidistu Jezú ni jianju josole.” Mukiki-phe, sayi jianju ala ni kikalakalu kya kukwatekesa o ilunga. Ene alanga o jiselevende ja Nzambi, a akwatekesa mu kuboka, anga atangela Jihova yoso yamona.—Mat. 18:10; Dij. 14:6.