Kuzuela Kiavulu: Ki kubhingi kuzuela o ima ioso. Mu kulonga, Jezú ua bhangele ibhuidisu phala kubhangesa o athu kuxinganeka ni kutendela o milongi. (Mat 17:24-27) O kubhanga ibhuidisu, kubhangesa o milongi kuenda kiambote ni ku kukuatekesa kuijiia ihi i banza ni ihi i xikina o dixibulu dié. (be 253 §§3-4) Kioso ki u bhanga kibhuidisu, kála ni muanhu, kingila o kitambuijilu. Se o dixibulu ka tambuijila kiambote, mu veji dia ku kutambuijila bhu kididi kiê, mu bhanga ibhuidisu ia mukuâ ia bhebhuluka (be 238 §§1-2) Zuela ni kutululuka phala o dixibulu na tena kukatula ioso ia mu kala ku muxima.—be 230 §4.

Kubhonzesa o Milongi: Aluka, kana kuzuela ioso i uejiia ia lungu ni milongi i ua mu longa. (Nz 16:12) Londekesa o pondo ia beta-o-kota ia kaxi. (be 226 §§4-5) O kujimbulula kiavulu, né muene se milongi ia uabhela o athu, ku tena kubhonzesa kutendela o jipondo ja tokala. (be 235 §3) Se o dixibulu ua tendela kiá o pondo ia tokala, suluke-nu mu kaxi ka mukuá.

Kuzubha Ngó o Divulu: Kioso ki tu longa, tu mesena kuila o milongi i tula ku mixima ia athu, mu veji dia kuzubha ngó o divulu. (Lu 24:32) Tanga o Mak’â Nzambi, phala kujimbulula o jipondo ja beta-o-kota mu disá. (2Ko 10:4; Jih 4:12 be 144 §§1-3) Bhanga ifika ia bhebhuluka. (be 245 §§2-4) Ijiia o ibhidi ni ihi i xikina o dixibulu dié, phala ku mu longa kiambote. Mu bhange ibhuidisu kála íii: “Kiebhi ki u dívua ia lungu ni ima i ua mu dilonga bhabha?” “Ihi i tu longa o milongi íii ia lungu ni Jihova?” “Mbote iahi i u katula se u belesela o milongi íii?”—be 238 §§3-5; 259 §1.