1, 2. Jehovap Nalunaajaasuisa ataqqinaat immikkut ittoq suna ataqqinaatigaat, tamannalu qanoq isumaqarfigaajuk?

INUIT ataqqineqartutut misigisarput immikkut ittumik suliaqarsimanertik pissutigalugu nersornaatisigaangamik. Assersuutigalugu inuiannik marlunnik eqqisseqatigiissitsisut nersornaatisisarput. Inuilli Guutimik eqqisseqatiginninnissaannik ikiorniarlugit Guutimit aallartitaagaanni nersornarnerungaarpoq!

² Jehovap Nalunaajaasuisut kisiartaalluta ataqqinaat immikkut ittoq tamanna ataqqinaatigaarput. Guutimit Kristusimillu siulersorneqarluta inuit ima qinnuigaavut: “Guutimut saammaannartigitsi!” (2 Kor 5:20) Tassa Jehovap inuit imminut kajungilersinniarlugit oqaluussitippaatigut. Tamatuma kingunerisaanik nunani 235-nit amerlanerusuni inuit millionilikkuutaat Guutimut ikinngutaalersimapput naassaanngitsumillu inuunissamik neriugisaqalersimallutik. (Tit 2:11) Oqaluussinitsinni aallussilluartuuvugut, ‘piumasullu’ kajumissaartarpavut sallusuissut ilinniaqqullugu. (Saqq 22:17) Suliaq tamanna pingaartillugulu sapinngisarput tamaat suliariniarsarigatsigu oqarsinnaavugut tassaalluta ‘ajunngitsuliornissamik noqqaassuteqartut’. (Tit 2:14) Maanna sammissavarput inuit Jehovamik ilisarisimannilernissamut aallussilluarnerput qanoq iluaqutigisinnaagaat. Assersuutigalugu oqaluussinitsinni.

3. Jehovap “ilungersornera” sumut uppernarsaataava?

³ Guutip ernerata kunngitut inuiannut ajunngitsuliornissaa pillugu Esaja 9:6-imi ima allassimavoq: “Katersaarsuit Naalagaata ilungersornera taamaalisitsiumaarpoq.” Ilungersorneq, noqqaassuteqarneq imaluunniit aallussilluarneq tassaavoq arlaannik iliuuseqarusungaarneq. Tassa versimi tamatumani allassimammat ‘Jehovap ilungersornera taamaalisitsiumaartoq’ erserpoq Jehovap inuit annaakkusungaarai. Jehova ilungersortuummat oqaluussinitsinni sapinngisarput tamaat ilungersortuusariaqarpugut.  Guutip suleqataatut sapinngisat tamaat nutaarsiassaq nuannersoq oqaluussissutigaajuk? — 1 Kor 3:9.

4. Jiisusi kiffartornermi aallussilluartuujuarnermigut qanoq maligassiuilluaqqissaarpa?

⁴ Jiisusi oqaluussinermi aallussilluartuujuarnermigut maligassiuilluaqqissaarpoq. Akerlilersorneqaraluarluni toqunniarneqaraluarlunilu nunarsuarmi naalliutsitaalluni toqussi tikillugu aallussilluarpoq. (Joh 18:36, 37) Jiisusi pilliutitut toqutaanissani qanilliartortillugu inuit Jehovamik ilisarisimannilersinniarlugit ilungersornerulerpoq.

5. Figenequt pillugu assersuusiamut naapertuuttumik Jiisusi qanoq iliorpa?

⁵ Ukiumi 32-mi Jiisusip orpik figenequt inerititaqanngitsoq assersuusiaraa. Piginnittuata ukiuni pingasuni pigereerlugu figenequt sulisuminut kipeqquaa, sulisuatali misilillugu naggorissaraluarnissaanut piffissaqarusuppoq. (Lukasi 13:6-9 atuakkit). Taamani Jiisusip oqaluussinerata kingunerisaanik ikittuinnaat ajoqersuganngorsimapput. Assersuusiamili ersersinneqarpoq Jiisusi toqunissami tungaanut piffissaarutilerami ilungersornerulerusuttoq. Taamaattumik Judæami Peræamilu qaammatit arfinillit missaanni aallussinerulluni oqaluussivoq. Toqussi ullualuit sioqqullugu Jiisusi qiavoq tusarliussani inunnit amerlanernit ilassineqanngimmat. — Matt 13:15; Luk 19:41.

6. Sooq oqaluussinermi iliuuseqarneruniarsarissaagut?

⁶ Naggatissap nalliutingajalernera eqqarsaatigalugu oqaluussinermi iliuuseqarnerunissarput pingaaruteqarpoq, ilaa? (Danieli 2:41-45 atuakkit). Jehovamut nalunaajaasuuneq ataqqinaataangaarpoq! Nunarsuarmi kisiartaalluta inuiaat ajornartorsiutaannut aaqqiissutissaq oqaluttuarisinnaavarput. Qanittukkut aviisimi allassimavoq apeqqut una akineqarsinnaanngitsoq: “Sooq inuit ajunngitsut ajortunik nalaataqartarpat?” Biibilimili tamanna akissutissaqarpoq tamannalu inunnut allanut oqaluttuarinissaa uagut kristumiutut akisussaaffigalugulu immikkut pisinnaatitaaffigaarput. Jehovap suliareqqusaa suliaritillugu ‘anersaakkut tamaviaarnissatsinnut’ pissutissaqarluarpugut. (Rom 12:11) Jehovap suliatsinnik pilluaqqusineratigut inuit ikiorlugit taassuminnga ilisarisimannilersissinnaavavut asannilersissinnaallugillu.

7, 8. Imminut pilliutiginninnerput qanoq Jehovamut ataqqinaataava?

⁷ Paulusip misigisimasaanit erserpoq oqaluussinerput pissutigalugu ‘sinissaarunneq’ nerisassaaleqinerlu misigisinnaagivut. (2 Kor 6:5) Versip tamatuma imminut pilliutigeriaannaaneq qanoq paasisariaqarnersoq takorlooruminarsisippaa. Tamatumunnga tunngatillugu immaqa pionerit aningaasarsiuutigalutik oqaluussinermik pingaarnerpaatitsisut eqqarsaatigaavut. Aamma ajoqersuiartortitat nunaginngisaminni inunnik ikiuiniarlutik ilungersortut eqqarsaatigikkit. (Fil 2:17) Ilaannikkut ilagiinniittut ilaannik isumaginninniarlutik utoqqaanertat nerinngitsoortarput sininngitsoorlutilluunniit. Utoqqaat napparsimasullu ilagiinniittut sapinngisaminnik ataatsimiinnerit najuuffiginiartarlugillu oqaluussisarput. Qiimmaallannarpoq takullugu Guutimut kiffaasut taakku qanoq imminut pilliutigeriaannaasut. Taamatut aallussilluarnerput inuit allat isiginnittaasiannut sunniuteqartarpoq.

⁸ Tuluit Nunaanni nalunaajaasuunngitsoq aviisimut ima allappoq: ‘Upperisarsiornerit tatigineerukkiartorput. Ullumikkununa palasit sulerisut? Kristusi inunnut orniguttarpoq, taakkuli inunnut ornigutinngisaannarput. Jehovap Nalunaajaasui upperisarsiortutuaagunarput inunnut allanut ornigullutik sallusuissut pillugu oqaluussinermikkut isumassuisut.’ Silarsuarmi namminissarsiorfiusumi imminut pilliutiginninnerput Jehovamut ataqqinaataavoq. — Rom 12:1.

9. Suna kajumississutigisinnaavarput oqaluussinitsinni ajunngitsuliornissamik noqqaassutiginninnissamut?

 ⁹ Siornatigutummi aallussilluartigiunnaarsimagutta? Taava Jehovap suliassiissutaata ajunngitsorpassuarnik kinguneqartarnera eqqarsaatigisinnaavarput. (Romamiut 10:13-15 atuakkit). Inuit aatsaat annaanneqarsinnaapput Jehovamik upperinnillutillu taassuma aqqanik torlorfiginnikkunik. Taamaaliornavianngillalli oqaluussiffigineqanngikkunik. Taamaattumik ajunngitsuliornissaq noqqaassutigerusupparput Guutillu naalagaaffia pillugu oqaluussissutiginninnermi sapinngisatsinnik iliorusulluta.

10. Pissuserinnerput inuit allat sorusulissutigisarpaat?

¹⁰ Inuit allat Guutimik ilisarisimannilerusulissappata oqaluussinermi aallussilluarnerput naammanngilaq. Aamma kristumiutut pissuserinnerput kajungilissutaasinnaavoq. Paulusip nassuiarpaa sooq pissuserinnerput pingaaruteqarnersoq ima allalluni: “Sumilluunniit naakkiuffissiiniartanngilagut kiffartuutigisarput tusaamanerlunneqaleqqunagu.” (2 Kor 6:3) Pissuserinnerput ineriartornartumillu oqaluttarnerput inuit allat Jehovamik pallorfiginnilerusulissutigisinnaavaat. (Tit 2:10) Aap, tusarajupparput inuit Kristusimik qanoq ilaarsinerput takugaangamikku sallusuissut pillugu ilinniarusulertartut.

11. Sooq pissusitta allanut qanoq sunniuteqarnera eqqarsaatigalugulu qinnutitsinnut ilanngutissavarput?

¹¹ Aap, pissuserinnerput pissutigalugu inuit sallusuissummik soqutiginnilersinnaapput, pissusilukkuttali akerlianik pisoqarsinnaavoq. Taamaattumik suligaluarutta, angerlarsimagaluarutta atuarfimmiikkaluaruttaluunniit qulakkeertariaqarparput iliuutsitta suulluunniit oqaluussinitsinnut ajoqutaalinnginnissaat. Aammami piaaraluta  ajortuliortarutta kingunerlutsitserujussuassaagut. (Hebr 10:26, 27) Pissuserput tamatumalu allanut qanoq sunniuteqartarnera eqqarsaatigeqqissaartariaqarparput qinnutitsinnullu ilanngullugu. Silamiut pissusilussiartortillugit “Guutimik kiffartuussisoq kiffartuussisuunngitsumit” immikkoortikkuminarnerusariaqarpoq. (Mal 3:18) Aap, inuit Guutimut ikinngutaaleqqullugit ikiussagutsigit kristumiutut pissuserissaarnerput pingaaruteqarpoq.

12-14. Akerlilersorneqarnitsinni pinertusaarnerput inunnut allanut qanoq sunniuteqarsinnaava? Assersuuteqarit.

¹² Paulusip Korinthimiunut allakkamini siullerni nassuiarpaa annikilliuuteqartarsimalluni, annilaanngateqartarsimalluni parnaarussaasarsimallunilu. (2 Korinthimiut 6:4, 5 atuakkit). Akerlilersorneqarnitsinni pinertusaaraangatta allat sallusuissummik ilassinninnissaannut kajumissisissinnaavavut. Ukiualuit matuma siorna Angolap ilaani Jehovap Nalunaajaasui nungusarniarneqaraluarput. Nalunaajaasut marluk soqutiginnittullu 30-t kilertiterlugit iperartorneqarneranni taqqavani najugallit pinngitsaalillugit isiginnaartinneqarput. Allaat arnat meeqqallu iperartorneqarput. Jehovap Nalunaajaasuinut tusarnaarnissamut siooralersitsinissaq siunertaavoq. Kingusinnerusukkulli isiginnaartinneqartut taakkua ilarpassui Nalunaajaasunut ornigupput Biibilimik atuaqqissaaqatigineqarusullutik! Tamatuma kingunerisaanik oqaluussineq uninngilaq, amerlanerusut sallusuissut ilikkarpaat qatanngutillu pilluaqquneqarlutik.

¹³ Oqaluttuamit tamatumannga erserpoq misilinneqarnermi sapiitsuunitsinnik takunnittut sallusuissummik ilassinnikkusulersinnaasut. Petrusip apustilillu allat sapiitsuunerat inuit allat Guutimut ikinngutaalernissaminnut kajumississutigisimasinnaavaat. (ApS 5:17-29) Uagut atuaqatitta, suleqatitta ilaquttattaluunniit akerlilersorneqarnitsinni sapiitsuunerput takullugu immaqa sallusuissut ilasserusulissavaat.

¹⁴ Qatanngutitta ilaannik malersuisoqartuaannarpoq. Assersuutigalugu maannakkorpiaq Armeniami qatanngutit 40-t missaat parnaarussaaqqapput sakkutuunngorumannginnertik pissutigalugu. Nunamilu tamatumani suli amerlanerusut parnaarussaanissaat ilimanarpoq. Eritreami Nalunaajaasut 55-it parnaarussaaqqapput, taakkualu ilaat 60-it sinnerlugit ukioqarput. Korea Kujallermi Nalunaajaasut 700-t missaat sakkutuunngorumannginnertik pillugu parnaarussaaqqapput. Ukiuni 60-ini taqqavani pissutsit taamaapput. Qatanngutit taakku malersorneqartut aalajaannerat pissutigalugu Guutip ataqqineqarnissaa aamma inuit allat sallusuissummik ilassinnikkusulernissaat qinnutigitigu. — Tuss 76:9-11.

15. Unneqqarissuunitta sallusuissummut kajungilersitsisinnaaneranik assersuuteqarit.

¹⁵ Aamma unneqqarissuunerput pissutigalugu inuit sallusuissut pillugu ilinniarusulersinnaapput. (2 Korinthimiut 6:4, 7 atuakkit). Assersuutigalugu qatanngut arnaq bussinut ikigami bilitsimik piniarluni automatimut aningaasanik ikisilermat ilisarisimasaata nangarpaa oqarluni bussernissaa taama sivikitsigissammat akiliisariaqanngitsoq. Qatanngutip arnap nassuiaappaa sivikikkaluamilluunniit busserniaraanni bilitsisinissaq eqqortuliornerusoq. Nassuiaaffigisaa niummat bussertitsisup qatanngut aperaa: ‘Jehovap Nalunaajaasuisa ilagaatsit?’ Ima akivoq: ‘Aap, sooq taama aperivit?’ ‘Bussimut bilitsisisarneq pillugu oqaloqatigiinnersi tusaavara, nalunngilaralu Jehovap Nalunaajaasui bilitsimut akiliisartut tamatigullu unneqqarissuusartut.’ Qaammatialuit tamatuma kingorna angutip ataatsimiigiartup qatanngut arnaq ima aperaa: ‘Ilisarivinga? Bussertitsisuuvunga bilitsimik akiliisarneq pillugu oqaloqatigiinnissinnik tusaasoq. Qanoq unneqqaritsiginerit  takoreerlugu aalajangerpunga Jehovap Nalunaajaasuinit Biibilimik atuaqqissaaqatigineqalerumallunga.’ Inuit unneqqarissuunerput takugaangamikku oqaluussisartutut tatiginartutut isigilertarpaatigut.

16. Kamagittartarutta, asannittuusarutta inussiarnersuusaruttalu qanoq pisoqarsinnaava? Upperisarsiornikkut siuttut qanoq iliortarnerannik assersuuteqarit.

¹⁶ Kamagittartarutta, asannittuusarutta inussiarnersuusaruttalu inuit allat Jehova, taassuma siunertaa innuttaalu pillugit ilinniarusussuseqalersissinnaavavut. Kristumiut ilumoortut isiginnittaasiat pissusiilu Guutimut ataqqinaataapput. Upperisarsiornikkut siuttut ilaat ajunngitsumik isiginnittaaseqartuusaarlutillu pissuserissaartuusaartarput. Tusarnaartigisartakkatilli salluliorfigisarpaat aningaasaataannillu arsaartarlugit. Taakkua ilaasa aningaasat taakku illunik biilinillu akisuunik pisissutigisarpaat. Allaat ataatsip qimmini illuliuuppaa nillalaarsaaserlugu! Jiisusip ‘akeqanngitsumik tuniseqqunera’ maleruanngilaat. (Matt 10:8) Israelikkulli palasii ajortut assigalugit “ilinniartitsisarput akissarsiumallutik”, ilinniartitsissutaasalu ilarpassui Biibilimut naapertuutinngillat. (Mika 3:11) Taamaaliortaramik kimilluunniit Guutimik ikinngutaalersitsinissamut ikiuisinnaanngillat.

17, 18. (a) Pissusilersornitsigut Jehova qanoq ataqqinartissinnaavarput? (b) Sooq ajunngitsuliornissat noqqaassutigiuarusuppiuk?

¹⁷ Inuit Guutimut ikinngutaarusulersarput paasigangamikku sallusuissut ilinniartitsissutigigipput inoqativullu inussiarnisaarfigisarivut. Assersuutigalugu pioneri illumiit illumut oqaluussitillugu naapitaata uillarnerup utoqqaap soqutiginninnginnerarluni oqarfigipallappaa. Oqarpoq matukkut sianermat igaffimmi majuartarfinnut qaqilluni qulleq iluarsiniarsarigini. “Kisimiillutit taamaaliornerit ulorianarpoq,” pioneri taama oqariarluni qulleq iluarsivaa anillunilu. Uillarnerup ernerata susoqarsimanersoq paasigamiuk tupigusungaarami pioneri qutsaviginiarlugu ujarpaa. Kingusinnerusukkut taassuma Biibilimik atuaqqissaaqatigineqarnissani akueraa.

¹⁸ Sooq illit ajunngitsuliornissaq noqqaassutigiuarumallugu aalajangiusimaviuk? Immaqa taamaaliorumavutit nalunnginnakku oqaluussinermi aallussilluaruit pissuserissaartuuguillu Jehovamut ataqqinaataassasoq inuillu allat annaanneqarnissaannut iluaqutaassasoq. (1 Korinthimiut 10:31-33 atuakkit). Oqaluussinermi aallussilluartuunitsinnut pissuserissaartuunitsinnullu pissutaasoq alla tassaavoq Guutimut inunnullu allanut asanninnerput ersersikkusukkatsigu. (Matt 22:37-39) Ajunngitsuliornerup noqqaassutiginera maannakkut nuannaarutigingaarlugulu nalerisimaassutigissavarput. Aamma qilanaarisinnaavarput pinngortitsiserput, Jehova, inunnit tamanit pallorfigineqalerlunilu ataqqineqalernissaa.