Jehovap oqaasia uumavoq

Mosesimik allakkat siulliit-nit pingaarnersat — I

MOSESIMIK ALLAKKAT SIULLIIT-ni oqaluttuarineqarpoq qanoq silarsuaq inunnut piareersarneqartoq qanorlu najugaqarfigileraat. Mosesip allakkani inoqajuitsumi Sinajimi allappaa, ukiumilu 1513-imi u.n.s. naammassisimassagunarlugu.

Mosesimik allakkat siulliit-ni silarsuaq ulersuup siornaneersoq oqaluttuarineqarpoq, ulersuullu kingorna qanoq pisoqartoq, Jehova Guutillu Aaperaat, Iisaaq, Jaaku Josefilu qanoq iliorfigigai. Allaaserisami matumani Mosesimik allakkat siulliit 1:1–11:9-mi pingaarnersat, tassa Jehovap ataataanerpaap Aaperaamik iliorfiginninnera tikillugu, sammineqassapput.

SILARSUAQ ULERSUUP SIORNA

(Mosesimik allakkat siulliit 1:1–7:24)

Mosesimik allakkat siulliit-ni oqaaseq „pileqqaarneranni“ aallarniutigineqartoq ukiut milliardilikkuutaat matuma siornatigut pisimavoq. ’Ulluni’, imaluunniit piffissani immikkut ittuni, pinngorfiusuni arfinilinni pisimasut allaatigineqarput inummit nunarsuarmiittumit isigineqarlutillusooq. Ullup arferngata naalernerani Guutip inuk pinngortippaa. Naak paratiisi inuup naalanngitsuunera pissutigalugu annaaneqarasuaraluartoq, Jehova neriuutissaqalersitsivoq. Biibilimi siulittuutit siullerpaartaanni ’kinguaassaq’ ajortip kingunerinik peersitsisussaq Saatanimillu aserortitsisussaq eqqaaneqarpoq.

Ukiut 1600-t tulliuttut ingerlanerini Saatanip iluatsitsilluni inuit tamangajaasa Guutimit allamut saatippai, ikittuinnaat kisiisa pinnagit, soorlu Abeli, Enoki Noalu. Assersuutigalugu Kainip qatanngunni naapertuilluartoq Abeli toquppaa. „Taamani [Jehova] aqqagut torlorfigisalerpaat“, qularnanngitsumillu Guutimik narrunarsaataasumik taamaaliortoqarluni. Nakuuserneq taamanikkut nalinginnaasuunera ersersillugu Lemekip imminut illersorluni qanoq nukappiaraq toqussimagini taalliorpoq. Guutip erneri inngiliusut naalanngitsut arnat nulissiuttarpaat qitornartaarfigalugillu inorujussuarnik nakuusertartunik nefiliminik taaneqartunik. Noali aalajaatsoq umiarsualiorpoq, sapiillunilu allat ulersuaqarnissamik mianersoqqullugit, naggataatigullu ilaquttanilu nungutinneqarnissamit aniguillutik.

Allassimaffinnut apeqqutit akineqartut:

1:16 — Ullormi siullermi Guutip qanoq qaamaneq pinngortissinnaavaa qaammaqqutaasut aatsaat ullut sisamaanni pinngortinneqarpata? Hebræerit oqaasiat versi 16-imi ’pinngortippai’-mik nutserneqartoq tassaanngilaq oqaaseq Mosesimik allakkat siulliit-ni kap. 1 versi 1-imi, 21-mi 27-milu ’pinngortippai’-mik nutserneqartoq. „Qilak“ qaammaqqussuit ilanngullugit ’ullut siulliata’ aallartilernera sioqquterujussuarlugu pinngortinneqarpoq. Qaammaqqussuilli nunarsuup qaavanut qaamanngikkallarput. Ullup siullianni ’qaammarpoq’, qaamanerup nuissat pitarpai nunarsuarmiillu takussaalerluni. Nunarsuarmi kaavittumi ulloqalertarlunilu unnuaqalertarpoq. (1 Mosesi 1:1- 3, 5) Qaamanerup pilerfii suli nunarsuarmit takuneqarsinnaanngillat. Pinngortitsinerulli sisamaata ingerlanerani maluginiarnartumik allanngortoqarpoq. Seqineq, qaammat ullorissallu maanna nunarsuarmut ’qaammaqqutaaqquneqarput’. (1 Mosesi 1:17) Qaammaqqussuit taakku ’Guutip pinngortippai’,  imaappoq nunarsuarmit takuneqarsinnaalersikkai.

3:8 — Jehova Guutip Adami toqqaannartumik oqaluffigaa? Biibilimi paasitinneqarpugut Guutip inuit oqaluffigigaangamigit amerlanertigut inngili aqqutigalugu taamaaliortoq. (1 Mosesi 16:7-11; 18:1-3, 22-26; 19:1; Eqqartuussisut 2:1-4; 6:11-16, 22; 13:15-22) Guutip oqaaseqartitaa pingaarnerpaaq tassaavoq ernitua, ’Oqaaseq’-mik taaneqartoq. (Johannesi 1:1) Guutip Adami Evalu ’Oqaaseq’ aqqutigalugu oqaluffigisimagunarpai. — 1 Mosesi 1:26-28; 2:16; 3:8-13.

3:17 — Narsaat perloqqunarsimmat qanoq paasisariaqarpa, qanorlu sivisutigisumik taamaappa? Narsaat perloqqunarsimmat nunalerineq artornarnerungaalerpoq. Nuna perloqqunarsisoq ’orpikkanik naasupilunnillu kapinartulinnik’ naatitartaqartoq Adamip kinguaaviisa misigivissorpaat. Artornarsimaqimmat Noap ataataa Lemeki ima oqarpoq: „Taassuma erloqilluta nunaammi [Jehovap] perloqqusaani suleruloornitsinni oqilisaakkumaarpaatigut.“ (1 Mosesi 5:29) Ulersuup kingorna Jehovap Noa ernerilu pilluaqquai nalunaarlunilu nunarsuaq tamakkerlugu kinguaassiorlutik amerliartussasut. (1 Mosesi 9:1) Nunap Guutimut perloqqunarsinera qularnanngitsumik atorunnaarsinneqarpoq. — 1 Mosesi 13:10.

4:15 — Jehovap qanoq „Kaini nalunaaqutserpaa“? Biibilimi allassimanngilaq Kaini timimigut nalunaaqutserneqartoq. ”Nalunaaqut” tassaagunarpoq Guutip allat nalunngisaanik maleruagaanillu pingaartorsiorpaluttumik aalajangersaanera, taamaalilluni Kaini akiniaanermit toqunneqaqqunagu.

4:17 — Kainip nuliani sumit pivaa? Adami ’ernertaartarluni panissaartarpoq’. (1 Mosesi 5:4) Taamaappat Kaini najammi ilaannik soralussamiluunniit ilaannik nuliarsimavoq. Kingusinnerusukkut Guutip Israelikkunnut inatsisaalersippaa qatanngutigiit katissinnaanngitsut. — 3 Mosesi 18:9.

5:24 — Guutip Enoki qanoq ’peerutitippaa’? Enokip inuunera qularnanngitsumik navianartorsiortinneqarpoq, akeqqaminilli naalliutsitaanissaa Guutip akuerinngilaa. Apustili Paulusi allappoq ’Enoki peerutitaasoq toqu misigeqqunagu’. (Hebræerit 11:5) Tamanna isumaqanngilaq Guutip Enoki qilaliartikkaa tassani inuujuaqqullugu. Jiisusi siulliulluni qilaliarpoq. (Johannesi 3:13; Hebræerit 6:19, 20) Enoki ’peerutitaammat toqu misigeqqunagu’ isumaqarsinnaavoq Guutip Enok siulittuinerani qiimmattangaartikkaa taamalu misiginerani inuunera kipititaalluni. Taamaalilluni akeqqaminit toqup annernartui Enokip misiginngilai.

6:6 — Qanoq paasisariaqarpa allassimammat Jehovap inunnik pinngortitsisimanini ’peqqissimissutigileraa’? Hebræerit oqaasiat ’peqqissimissutigilerpaa’-mik nutserneqarami tassunga tunngatillugu pineqarpoq isiginnittaatsikkut siunertakkulluunniit allanngorneq. Jehova naammalluinnartuuvoq taamaattumillu inuk pinngortillugu kukkusimanani. Inuiaalli ajortut ulersuup siorna inuusut allatut isigilerpai. Guuti inunnik Pinngortitsisuugaluarluni ajussusiat akueriumanagu maanna inunnik suujunnaarsitsisuulerpoq. Inuit ilaat aniguisimmagit ersarippoq taamaallaat ajortut eqqarsaatigalugit peqqissimisoq. — 2 Petrusi 2:5, 9.

7:2 — Suna tunngavigalugu nersutit mingunnaatsutut mingunnartutullu immikkoortinneqarpat? Nersutit qularnanngitsumik immikkoortinneqarput pallorfiginninnermi pilliutitut atortuunissaq eqqarsaatigalugu, nerineqarsinnaaneq eqqarsaatiginagu. Ulersuup siorna inuit nersutit neqaat nerineq ajorpaat. Mosesip inatsisaani nersutit nerisassatut ’mingunnaatsutut’ ’mingunnartutullu’ oqaatigineqalerput, killilikkallu tamakku atorunnaarput Inatsisit soraarsitaammata. (Apustilit Suliaat 10:9-16; Efesosimiut 2:15) Noap nalusimagunanngilaa nersutit suut Jehovamik pallorfiginninnermi pilliutitut naleqqunnersut. Umiarsuarmit  anereerami „[Jehovamut] pilliiviliorpoq nersutaatillu mingunnaatsut tamarmik timmissallu mingunnaatsut tamarmik ilaannik tigusilluni pilliiviup qaavani ikikkagassanik pilliivoq“. — 1 Mosesi 8:20.

7:11 — Nunarsuaq tamakkerlugu ulersuarmi erngit sumit pippat? Pinngortitsinerit ulluisa aappaanni nunap qulaani ’qilaanngusaasaqalermat’ qilaanngusaasap ’ataani’ ’qulaanilu’ imeqarpoq. (1 Mosesi 1:6, 7) Erngit ’ataaniittut’ nunameereerput. Erngit ’qulaaniittut’ tassaapput ’itinersuup puilasui’ nunarsuup qulaani qutsissumiittut. Noap nalaani erngit tamakku nunarsuarmut kuerarneqarput.

Ilinniarfigisinnaasavut:

1:26. Inuit Guuti assilillugu pinngortitaagamik Guutip pissusii pissuserisinnaavaat. Aap, asanninneq, naakkinninneq, inussiarnerneq, ajunngissuseq kamagittarneq taamaattullu ineriartortittariaqarpavut, taamaalilluta Pinngortitsisorput assilillugu.

2:22-24. Aappariinneq Guutip pilersitaraa. Aappariinneq ataavartussaavoq illernartuullunilu, uiusorlu ilaqutariit niaqoraat.

3:1-5, 16-23. Inuunitsinni Jehovap kisimi oqartussaanera akuerisariaqarparput. Tamanna pilluarnissatsinnut aalajangiisuuvoq.

3:18, 19; 5:5; 6:7; 7:23. Jehovap oqaasii naammassinneqartuartarput.

4:3-7. Abelip pilliutaa Jehovap iluaraa, taanna iluartuullunilu upperluartuummat. (Hebræerit 11:4) Akerlianik Kainip suliaani takuneqarsinnaavoq upperneq amigaatigigaa. Ajortuliorpoq, sinngalluni uumisuilluni toqutitsillunilu. (1 Johannesi 3:12) Qularnanngitsumik Kainip pilliineq malinniaannarlugu iliuuserisarsimavaa pilliutini eqqarsaatigivallaarnagu. Jehovamut unnersiutiginnilluta pilliuteqaraangatta uummatikkut iluunngartariaqannginnerpugut eqqortumik isiginnittaaseqarluta iliuuseqarlutalu?

6:22. Naak ukiorpassuarni umiarsualiortariaqarluni, Noa Guutip peqqusineratorluinnaq iliorpoq. Taamaattumik Noa ilaqutaalu ulersuarmit aniguisitaapput. Jehovap oqaatsimigut allanneqarsimasutigut peqatigiissortamigullu oqaluffigisarpaatigut. Tusarnaarlutalu naalakkutta iluaqutigissavarput.

7:21-24. Jehovap iluartut ajortut peqatigalugit nungutinneq ajorpai.

INUIANNUT UKIUT NUTAAT

(Mosesimik allakkat siulliit 8:1–11:9)

Ulersuup siorna silarsuaasimasoq peermat ukiut nutaat inunnut aallartipput, inuit uumasut neqaannik nerisinnaalerlutik aattoqqusaanatilli. Jehovap toqutsisunik toqumik pillaanissaq akueraa, neriusaarlu atatillugu angerusiliorluni, neriorsuillunilu ulersuaqartitseqqinnaviarani. Noap erneri pingasut inuiannut tamanut siuaasaalerput, erngutaqqiutaali Nimrodi ’Jehovap saavani’ ’Jehovamut assortuilluni’ piniartorsuanngorpoq. Nunarsuarmut tamarmut siammartitaaqqunatik inuit aalajangerput tusaamasanngorumallutik illoqarfiliorniarlutik napasuliartalimmik Babelimik taaguuteqartumik. Pilersaarutaalli Jehovap piviusunngortinngitsoortippai oqaasii ilatsikkamigit nunarsuarmullu siammartikkamigit.

 Allassimaffinnut apeqqutit akineqartut:

8:11 — Ulersuarmi orpiit nungutinneqarpata tuip olivenequtip pilutaa sumit pivaa? Marlunnik periarfissaqarpoq. Olivenequt orpiugami toqujaatsoq qaammatialuit imermiikkaluarluni aniguisinnaavoq ulersuaqartillugu. Imeq appariartulermat olivenequt qarsunneqarsimagaluartoq nunami panertumiileqqippoq pilutaqaleqqissinnaallunilu. Olivenequtip pilutaa tuip Noamut nassataa aamma imeq appariartortillugu orpimmi nutaami naasuusinnaavoq.

9:20-25 — Sooq Noap Kana’ani perloqquaa? Qularnanngitsumik Kana’ani aataminut Noamut atornerluisimavoq kanngunartuliorluniluunniit. Naak Kana’anip ataataa, Kami, najuukkaluartoq akuliutinngilaq, immaqalu pisimasumik oqaluttuarluni. Noalli erneri marluk allat, Semi Jafetilu, ataatartik ulillugu iliuuseqarput. Tamanna pillugu pilluaqquneqarput, Kana’anili perloqqusaavoq, Kamilu kinguaassami kanngusuutissaa pillugu naalliuttariaqarpoq.

10:25 — Pelegip nalaani nunarsuup inui qanoq siammarterpat? Pelegi ukioq 2269-imit ukioq 2030 u.n.s. tikillugu inuuvoq. Taassuma nalaani Jehovap Babelimik illoqarfiliortut oqaasii ilatsillugit inuit nunarsuarmut tamarmut siammartippai. — 1 Mosesi 11:9.

Ilinniarfigisinnaasavut:

9:1; 11:9. Jehovap siunertaa inuit pilersaarutaannit iliuusiinilluunniit allanngortinneqarsinnaanngilaq.

10:1-32. Ulersuarmik oqaluttuarneq sioqqullugu kingoqqullugulu kinguaassanik allattuinerit marluk — kapitali 5-imi 10-milu — inuiaat tamaasa, Noap erneri pingasut aqqutigalugit, inummut siullermut Adamimut atassuteqartippaat. Assyriamiut, Kaldæamiut, hebræerit, Syriamiut Arabiamiullu ilaat Semimik siuaasaqarput. Etiopiamiut, Egyptenimiut, Kana’animiut, Afrikamiut ilaat Arabiamiullu naggueqatigiivisa ilaat Kamimik siuaasaqarput. Indo-Europamiut Jafetimik siuaasaqarput. Inuiaat tamarmik eqqarleriipput, tamarmillu Guutimut assigiipput. (Apustilit Suliaat 17:26) Ilumoortoq tamanna allanut isiginnittaasitsinnut iliuusitsinnullu sunniuteqartariaqarpoq.

Guutip oqaasia sunniisinnaassuseqarpoq

Mosesimik allakkat siulliit aallarniutaanni inuiaat oqaluttuarisaanerata aallartilerneranik oqaluttuaq ilumoortutuaq nassaarineqarpoq. Quppernerni taakkunani paasitinneqarpugut suna siunertaralugu Guutip inuit pinngortikkai nunarsuarmiitillugillu. Nuanneqaaq paasillugu inuit iliuusiisa qanoq ittulluunniit, assersuutigalugu Nimrodip pilersaarutai, Guutip siunertaata piviusunngornissaa pinngitsoortissinnaanngikkaat!

Sapaatip akunneri tamaasa Teokratiimik Atuarfimmut piareersarlutit Biibilimik atuartaraangavit, immikkoortuni „Allassimaffinnut apeqqutit akineqartut“-mik qulequtalinni sammineqartut eqqarsaatigigukkit allassimaffiit paasiuminaassinnaagaluartut ilaasa paasinissaannut iluaqutigissavat. Immikkoortuni „Ilinniarfigisinnaasavut“-ni nassuiaanerit takutissavaatsit sapaatip-akunneranut atuagassat qanoq iluaqutigisinnaallugit. Naleqqutissagaluarpat sammisat tamakku aamma oqaluussinermut tunngasumik ataatsimiinnerni tamaani pisariaqartitat-ni atatillugit eqqartorneqarsinnaapput. Ilumut, Jehovap oqaasia uumavoq inuunitsinnilu sunniisinnaassuseqarluni. — Hebræerit 4:12. (wE 1/1 04)