Elongifo leenghono omolwopolotika ola hapupala, nosha etela ovanhu oshisho mounyuni aushe.

•   Edipao lovanapolotika 39, olo la ya pombada shi dulife nale, pamwe nelongifo leenghono lopapolotika moMexico, oya li ya kumwifa ovanhu noye va ningifa vaha yandje elitulemo komahoololo aamo 2023-2024.

•   Efimbo opo la di ko, moEuropa omwa ningwa oiningwanima ihapu yelongifo leenghono omolwopolotika, mwa kwatelwa eshi omuprima waSlovakia hanga a dipawa mo 15 Mei 2024.

•   Ovanhu moUnited States ova kumwa neenghono, eshi Donald Trump, oo a li nale omupresidende, hanga a dipawa oshikando shitivali mo 15 Septemba 2024.

 Omolwashike elongifo leenghono omolwopolotika la hapupala? Mbela onali ka xule ngoo? Ombiibeli otai ti ngahelipi?

 Ombiibeli oya xunganeka kutya pefimbo letu, tali ulike ‘komafiku axuuninwa,’ ovanhu vahapu otava ka kala ve na oikala oyo tai ka etifa elongifo leenghono nokuhaudafana.

•   “Momafiku axuuninwa otapa ka kala omafimbo madjuu okukaliwa muo. Osheshi ovanhu otava ka kala . . . vehe shii okupandula, vehe fi ovadiinini, . . . vehe na elongelokumwe, . . . ovakwanyanya, . . . ovakengeleledi, ve na omitwe dikukutu, ve na ounhwa.” — 2 Timoteus 3:1-4.

 Ombiibeli oya xunganeka yo kutya omapiyaano, ngaashi ovanhu tava tukululile omapangelo ounashibofa nosho yo omakuyunguto opapolotika, otaa ka hapupala pefimbo eli. (Lukas 21:9) Ashike elongifo leenghono netukauko omolwopolotika itai kalelele.

 Ombiibeli oya popya kutya Kalunga ota ka pingena po omapangelo aeshe opanhu nepangelo laye lomeulu.

•   ‘Kalunga ou komeulu ota ka dika po ouhamba oo tau ka teyaula omauhamba aeshe noku a xulifa po, ndelenee woovene tau ka kala fiyo alushe.’ — Daniel 2:44.

 Ouhamba waKalunga otau ka hanganifa shili ovanhu nokweeta ombili mounyuni aushe.

•   Omupangeli wao, Jesus Kristus, oha ifanwa “Ohamba yombili,” nota ka shilipaleka kutya ‘ombili itai xulu po.’ — Jesaja 9:6, 7.

•   Nokuli nopaife, ovapangelwa vao otave lihongo nghee ve na okukala nombili. Oshidjemo, Ombiibeli oya ti: “Ndele vo otava ka hambula omaongamukonda omatemo, nomaonga avo oikashulifo; ndele itava ka lwifafana vali nongaashi itave lilongo vali oukwaita.” — Jesaja 2:3, 4.

 Opo u lihonge shihapu, lesha oshitukulwa “Ouhamba waKalunga otau uya okuninga shike?” nokutala okavidio Ouhamba waKalunga oshike?