MBELA oho mono shipu okulongela Jehova? —  Omuhongi Munene okwa ti kutya itashi ka kala shipu okulongela Jehova. Moufiku oo wa tetekela efyo laye, Jesus okwa li a lombwela ovayapostoli vaye a ti: “Ounyuni ngenge tau mu tondo, kaleni mu shi shii, owo wa tonda nge tete.” — Johannes 15:18.

Petrus okwa li e linoma kutya ita ka fiya po Jesus nandenande, ndele Jesus okwa li a popya kutya Petrus ote ke mu lidimbika lwoikando itatu oufiku oo tuu oo. Naasho osho naanaa Petrus a li a ninga shili. (Mateus 26:31-35, 69-75) Mbela oshike sha li sha ningifa Petrus e lidimbike Jesus? —  Omolwaashi Petrus nosho yo ovayapostoli vakwao ova li va tila.

Mbela ou shi shii kutya omolwashike ovayapostoli va li va tila? —  Ova li va dopa okuninga oshinima shimwe sha fimanenena. Ngeenge otwe lihongo kombinga yasho, otashi ke tu kwafela tu longele Jehova, kashi na nee mbudi kutya vamwe otava ti shike ile otave tu ningile shike. Ndele tete otwa pumbwa okushiiva kutya oshike sha li sha ningwa po moufiku waxuuninwa oo Jesus a li pamwe novayapostoli vaye.

Tete, Jesus novayapostoli vaye ova li va dana Opaasa pamwe. Opaasa oya li ouvalelo we likalekelwa oo wa li hau liwa omudo keshe okudimbulukifa oshiwana shaKalunga eshi sha li sha mangululwa moupika waEgipti. Opo nee konima yaasho, Jesus okwa li a tota po ouvalelo umwe vali we likalekelwa oo a li a lya pamwe navo. Metukulwa li li komesho, ohatu ka kundafana kombinga youvalelo oo nohatu ka yelifa nghee tau tu kwafele tu kale hatu dimbuluka Jesus. Konima eshi Jesus va lya ouvalelo oo ndele ta tu omukumo ovayapostoli vaye, Jesus okwa li e va twala koshikunino shaGetsemane, konhele oko va li ve hole okuya luhapu.

 Jesus okwa li a dja po puvo oshinano opo a ka ilikane. Okwa li yo a lombwela Petrus, Jakob naJohannes va ilikane, ndele ova li va kofa. Oikando aishe itatu oyo Jesus a li a alukila puvo, okwa li a hanga Petrus navakwao va kofa. (Mateus 26:36-47) Mbela ou shii kutya omolwashike ovayapostoli va li ve na okukala oupafi nokwiilikana? —  Natu ka kundafane shi na sha naasho.

Judas Iskariot okwa li yo pamwe naJesus novayapostoli vakwao konguloshi eshi va li tava dana Opaasa. Dimbuluka kutya Judas okwa li a ninga ombudi, ndele paife okwa ninga yo omukengeleledi. Okwa li e shii onhele moshikunino shaGetsemane oko Jesus a li ha i pamwe novayapostoli vaye. Onghee hano, Judas okwa li a twala ovakwaita konhele oko va ka kwate po Jesus. Eshi va fika po, Jesus okwa li e va pula a ti: ‘Olyelye tamu kongo?’

Ovakwaita ova li va nyamukula va ti: ‘OJesus.’ Jesus ka li a tila nomolwaasho okwa li e va nyamukula a ti: “Aame ou.” Ovakwaita ova li va kuminwa neenghono ouladi waJesus ndele tava shuna monima nokuwila poshi. Opo nee Jesus okwa ti vali: ‘Ngeenge Aame tamu kongo, efeni ovayapostoli vange va ye.’ — Johannes 18:1-9.

Eshi ovakwaita va li va kwata po Jesus ndele tave mu mange, ovayapostoli ova li va tila ndele tava i onhapo. Ndele Petrus naJohannes ova li va hala okutala kutya Jesus ota ka ningilwa shike, nomolwaasho ova li ve va landula ve li kokule. Xuuninwa, Jesus okwa li a twalwa keumbo laKajafas, omupristeri omukulunhu. Molwaashi Johannes okwa li e shiivike komupristeri omukulunhu, omukeleli wopomuvelo okwa li a efa Johannes nosho yo Petrus va ye moluumbo.

Ovapristeri ova li va hangwa va ongala nale keumbo laKajafas opo va pangule Jesus. Ova li va hala okudipaifa Jesus, nomolwaasho ova li va konga eendombwedi di lundile Jesus. Ovanhu ova li va denga Jesus neengonyo nosho yo nomanghava. Petrus okwa li popepi eshi oinima aishe oyo ya li tai ningwa.

Okakadona kokapiya oko ka li ka kelela poshivelo, oko ka li ka efela mo Petrus naJohannes moluumbo, oka li ka dimbuluka Petrus, ndele  taka ti: “Naave yo owa li pamwe naJesus.” Petrus okwa li e lidimbika Jesus. Konima yefimbo, okakadona kamwe vali oka li ka dimbuluka Petrus, ndele taka ti: “Naau yo okwa li pamwe naJesus.” Natango Petrus okwa li e lidimbika Jesus. Konima yefimbo vali, ovanhu vamwe ova li va mona Petrus ndele tava ti: “Oshili naave yo umwe waavenya.” Petrus okwa li e lidimbika Jesus oshikando oshititatu a ti: “Omulumenhu ou nghi mu shii.” Petrus okwa li a ana kutya ota popi oshili, na Jesus okwa li a punguluka ndele ta tale kuye. — Mateus 26:57-75; Lukas 22:54-62; Johannes 18:15-27.

Mbela ou shi shii kutya omolwashike Petrus a li a popya oipupulu? — Omolwaashi okwa li a tila ovanhu. Mbela omolwashike nee kwa li a tila? Okwa li a dopa okuninga shike opo a kale e na ouladi? Diladila kombinga yaasho. Jesus okwa li a ninga po shike opo a kale e na ouladi? — Okwa li a ilikana kuKalunga, na Kalunga okwa li e mu kwafela a kale e na ouladi. Dimbuluka yo kutya Jesus okwa li a lombwela Petrus lwoikando itatu a ilikane noku kale oupafi. Ndele mbela oshike sha li sha ningwa po?  — 

Petrus okwa kala ashike a kofa, noka li a ilikana. Onghee hano, eshi Jesus a kwatwa po, Petrus ka li e lilongekida. Konima yefimbo eshi Jesus  a li ta pangulwa, nokudengwa nosho yo eshi ovapristeri va li va pangela oku mu dipaifa, Petrus okwa li a tila. Ndele mbela Jesus okwa li a lombwela shike ovayapostoli vaye konima yeevili donhumba fimbo a li ina kwatwa po? — Okwa li e va lombwela kutya otava ka tondwa kounyuni ngaashi ashike u mu tonde.

Paife natu ka kundafaneni kombinga yoshinima osho tashi dulu oku tu ningilwa sha yukila kwaasho sha li sha ningilwa Petrus. Natu tye nee ngeno ou li mongudu yeni kofikola, ndele vamwe tava hovele okukembaula kombinga yovanhu ovo ihava shalutile epandela ile ihava dana Okrismesa. Mbela oto ka ninga po shike ngeenge umwe okwe ku pula ta  ti: “Oshoshili ngoo kutya iho shalutile epandela?” Ile vamwe va tye: “Otwa uda kutya iho dana Okrismesa.” Mbela oto ka kala wa tila oku va lombwela oshili? —  Mbela oto ka kendabala okupopya oipupulu, ngaashi Petrus a li a ninga?  — 

Konima yefimbo, Petrus okwa li a nyika oluhodi neenghono eshi e lidimbika Jesus. Eshi a li a didilika mo osho a ninga, okwa li a ya pondje ndele ta lili. Ndele nande ongaho, Petrus okwa li e livela ombedi ndele ta alukile kuJesus. (Lukas 22:32) Paife diladila kombinga yaasho. Oshike tashi dulu oku tu kwafela tuha kale twa tila neenghono ndele hatu ningi ngaashi Petrus a li a ninga? —  Dimbuluka kutya Petrus okwa li a dopa okwiilikana nokukala oupafi. Mbela oto diladila kutya otwa pumbwa okuninga shike opo tu kale ovashikuli vOmuhongi Munene?  — 

Otwa pumbwa filufilu okwiilikana kuJehova opo e tu kwafele. Mbela eshi Jesus a li a ilikana ou shi shii kutya Kalunga okwa li e mu ningila shike? —  Okwa li a tuma omweengeli waye e mu pameke. (Lukas 22:43) Mbela ovaengeli vaKalunga otava dulu oku tu kwafela kunena? —  Ombibeli oya ti: “Omwengeli wOmwene ota ongo nokudingilila onhanda kuava have mu tila, ndee te va xupifa.” (Epsalme 34:8) Ndele opo Kalunga e tu kwafele, otwa pumbwa okuninga shihapu shihe fi ashike okwiilikana. Mbela ou shi shii kutya otwa pumbwa vali okuninga shike? —  Jesus okwa li a lombwela ovashikuli vaye va kale oupafi. Mbela oshike tashi dulu oku tu kwafela tu kale oupafi?  — 

Otwa pumbwa okupwilikina nawa kwaasho hashi hongwa pokwoongala kwopaKriste nosho yo okuyandja elitulemo kwaasho hatu lesha mOmbibeli. Ndele otwa pumbwa yo okwiilikana kuJehova pandjikilile noku mu pula e tu kwafele tu mu longele. Ngeenge otwa ningi ngaho, ote ke tu kwafela tu finde oumbada wokutila ovanhu. Ohatu ka kala yo twa hafa ngeenge otwa mono omhito yokulombwela vamwe kombinga yOmuhongi Munene nosho yo Xe.