1. Jehova oku udite ngahelipi shi na sha noilonga, nokwa ninga po shike shi na sha nayo?

JEHOVA oha hafele oilonga yaye. (Eps. 135:6; Joh. 5:17) Opo oishitwa yaye inaendunge nayo i mone ehafo la faafana, ohe i pe oilonga ishambula. Pashihopaenenwa, okwa li a pitika Omona waye woshiveli a kufe ombinga moilonga yokushita. (Lesha Ovakolossi 1:15, 16.) Ombibeli oya ti kutya fimbo Jesus ine uya a dalwe kombada yedu e li omunhu, okwa li a longa pamwe naKalunga e li “omunongoelela,” ile tu tye, omulongi onghulungu. — Omayel. 8:30.

2. Oshike tashi ulike kutya oishitwa yopamhepo oya kala alushe hai longo oilonga ya fimana noishambula?

² MOmbibeli omu na oihopaenenwa okudja pehovelo layo fiyo opexulilo, oyo tai ulike kutya Jehova okwa kala alushe ha pe ovanamati vaye vopamhepo oilonga. Konima eshi Adam naEva va nyona nova li va tewa mo meumbo lavo moParadisa, Kalunga “okwa tula ovakerubi koushilo woshikunino shaEden, ve nomaongamukonda a xwama omundilo taa taima, vo va kelele omhito yokuya komuti womwenyo.” (Gen. 3:24) Ehololo 22:6 otali popi Jehova a “tuma omwengeli waye okuulikila ovapiya vaye eshi shi nokuningwa diva.”

3. Ongahelipi Jesus a li a landula oshihopaenenwa shaXe eshi a li kombada yedu?

³ Eshi Jesus a li kombada yedu e li omunhu a wanenena, okwa li ha longo nehafo oilonga oyo a pewa kuJehova. Okwa li yo a shikula oshihopaenenwa shaXe mokupa ovahongwa vaye oilonga ya fimana. Okwa li e va ningifa va kale va tunhukilwa oilonga oyo e va pa, moku va lombwela ta ti: “Oshilishili handi mu lombwele: Ou ta itavele nge, naye yo ota longo oilonga ei Ame handi i longo, ndele ta ka longa oilonga inene i dule inya, osheshi ohandi i kuTate.” (Joh. 14:12) Jesus okwa li a kwafela ovahongwa vaye va mone kutya oilonga yavo oya endelela, eshi a ti: “[Otu na, NW] okulonga oilonga yaau a tuma nge, fimbo omutenya; oufiku tau uya, ndele kape na ou ta dulu okulonga.” — Joh. 9:4.

4-6. (a) Omolwashike tu na okupandula Noa naMoses eshi va wanifa po oilonga oyo va li va pewa kuJehova? (b) Oilonga aishe oyo Kalunga a pa ovanhu va longe ohai etifa oidjemo yopavali ilipi?

⁴ Nokuli nofimbo Jesus a li ine uya kombada yedu, ovanhu ova li va pewa va longe oilonga ishambula. Nonande Adam naEva ova li va dopa okuwanifa po oilonga oyo va li va pewa, ovanhu vamwe ova li va longa ngaashi Kalunga e va lombwela. (Gen. 1:28) Jehova okwa li a pa Noa omalombwelo okondadalunde e na sha nanghee e na okutunga onguluwato opo ye noukwaneumbo waye va xupe pEyelu linene. Noa okwa li a ninga naanaa ngaashi Jehova a li e mu lombwela. Ovanhu ove li ko fiyo okunena omolwaNoa oo a li a landula filufilu omalombwelo aJehova. — Gen. 6:14-16, 22; 2 Pet. 2:5.

⁵ Moses naye okwa li a pewa omalombwelo okondadalunde e na sha nokutunga etwali nokuunganeka ovapristeri, nokwa li a ninga naanaa ngaashi a lombwelwa. (Ex. 39:32; 40:12-16) Nokuli nokunena ohatu mono ouwa moudiinini waye eshi a li a wanifa po oshilonga osho. Ngahelipi mbela? Omuyapostoli Paulus okwa ti kutya oinima oyo i na sha nOmhango oya li tai faneke ‘ouwa wokomesho.’ — Heb. 9:1-5, 9; 10:1.

⁶ Oilonga oyo Kalunga ha pe ovapiya vaye oya yoolokafana omafimbo nomafimbo, she likolelela kexumokomesho lokulongwa mo kwelalakano laye. Ndele nande ongaho, oilonga oyo hava pewa alushe otai fimanekifa Jehova notai etele ovanhu ovaitaveli ouwa. Osho otashi ulike koilonga oyo Jesus a wanifa po fimbo a li ine uya kombada yedu nosho yo lwanima eshi e ke uya kombada yedu. (Joh. 4:34; 17:4) Sha faafana, oilonga oyo Jehova e tu pa tu longe kunena otai mu fimanekifa. (Mat. 5:16; lesha 1 Ovakorinto 15:58.) Omolwashike hatu tile ngaho?

7, 8. (a) Tumbula oilonga oyo Ovakriste kunena ve na oufembanghenda wokulonga. (b) Otu na okulinyenga ngahelipi kewiliko laJehova?

⁷ Oshi li oufembanghenda eshi Jehova a shiva ovanhu inava wanenena va ninge ovalongi pamwe naye. (1 Kor. 3:9) Ovo tava tungu Omalupale Oyoongalele, Omalupale Ouhamba nosho yo oitaimbelewa, otava kufa ombinga moilonga yokutunga ngaashi oyo ya li ya longwa kuNoa naMoses. Kashi na nee mbudi kutya oto kufa ombinga moilonga yokuwapekulula Olupale lOuhamba lomoshitukulwa ile oto tungu eembelewa detu da kula koWarwick, New York, kala wa lenga oufembanghenda wokulonga monghedi ya tya ngaho. (Tala efano pehovelo loshitukulwa.) Oyo oilonga iyapuki. Kakele kaasho, Ovakriste otava shivwa va kufe ombinga moilonga ya fimanenena yokutunga pamhepo. Oilonga oyo nayo oya nuninwa okufimanekifa Jehova nokweetela ouwa ovanhu ovaduliki. (Oil. 13:47-49) Ehangano laKalunga ohali yandje ewiliko tali wapalele li na sha nanghee oilonga oyo ina okulongwa nomupondo. Osho omafimbo amwe osha kwatela mo okupewa oilonga ipe.

⁸ Ovapiya vaJehova ovadiinini ohava kala alushe va halelela okudulika kewiliko laye. (Lesha Ovaheberi 13:7, 17.) Omafimbo amwe otashi dulika tu kale tuhe udite ko filufilu kutya omolwashike tu na okuwanifa po oilonga oyo twa pewa  monghedi yonhumba. Ashike otu shii kutya ohatu ka mona ouwa ngeenge otwa tambula ko omalunduluko oo Jehova e wete kutya okwa pumbwa okuningwa.

9. Oshihopaenenwa shi na sha noilonga shilipi ovakulunhuongalo hava tulile po eongalo?

⁹ Ovakulunhuongalo ohava ulike kutya ova halelela okuwanifa po ehalo laJehova monghedi omo tava kwatele komesho eongalo. (2 Kor. 1:24; 1 Tes. 5:12, 13) Ohava ulike kutya ova halelela okulonga noudiinini nokuninga omalunduluko she likolelela kewiliko olo tava pewa. Ohava lundulukile nehalo liwa konghedi ipe omo oilonga yetu yokuudifa kombinga yOuhamba waKalunga oo wa dikwa po ina okulongwa. Nonande vamwe otashi dulika pehovelo va li tava ongaonga okuunganeka okuyandja oundombwedi okupitila mongodi, okuudifila pomatuliloshikepa ile oundombwedi womoipafi, ova li va mona kutya okuninga ngaho ohaku eta oidjemo iwa. Pashihopaenenwa, ovakokolindjila vane moGermany ova li va tokola va ka udife moshitukulwa sheengeshefa osho sha kala ihashi longwa. Omukulunhuongalo wedina Michael okwa ti: “Opa pita omido dihapu inatu udifila moitukulwa ya tya ngaho, onghee hano, otwa li twa tila neenghono. Jehova oku na okukala a li e shii oshinima sha tya ngaho molwaashi okwe tu kwafela tu hafele oukalele wetu monghedi oyo itatu dimwa nandenande. Katwa li tuu twa hafa eshi twa shikula omayele oo haa yandjwa mokafo Oukalele Wetu wOuhamba nokulineekela Jehova e tu kwafele!” Mbela ino hala okukendabala okuudifa meenghedi dimwe dipe moshitukulwa sheni?

10. Ehangano ola li la ninga po omalunduluko elipi efimbo opo la di ko?

¹⁰ Omafimbo amwe ehangano ohali ningi omalunduluko. Omido opo da di ko, oitaimbelewa imwe oya li ya tulwa mumwe naikwao. Nonande omalunduluko a tya ngaho okwa pula ovamwatate novamwameme ovo tava longo koitaimbelewa ya tya ngaho va ninge omalunduluko, lwanima ouwa womalunduluko oo owe ke limonikila mo kwaaveshe ovo va li va kwatelwa mo. (Omuud. 7:8) Ovalongi ovo tava longo nehalo liwa inava hafa tuu eshi navo ve na ombinga mondjokonona yoshiwana shaJehova!

11-13. Vamwe ova shakeneka omashongo elipi olwomalunduluko oo a ningwa kehangano?

¹¹ Ohatu dulu okulihonga oilihongomwa ya fimana kwaavo va li hava longo moitaimbelewa oyo ya tulwa mumwe. Vamwe vomuvo ova longa moitaimbelewa ya tya ngaho oule womido omilongo. Ovalihomboli vamwe ovo va li tava longo moukwaneumbo waBetel munini moCentral America, ova li va pulwa opo va ka longe koBetel yaMexico oko ku na ovanhu vahapu neenghono ve dule vokoBetel oko va li lwomapa 30 lwaapo. Rogelio okwa ti: “Kashi pu okufiya po ovapambele nookaume.” Omumwatate vali umwe oo a pulwa a ka longe koshitaimbelewa shaMexico wedina Juan, okwa ti: “Owa fa ashike to tamekulula ko monghalamwenyo. Ou na okupanga oukaume umwe mupe. Otashi pula u tambule ko eputuko nonghedi yokudiladila ipe.”

¹² Ovabetel ovo va dja koilongo ikwao yaEuropa ovo va pulwa va tembukile koshitaimbelewa shaGermany navo ova li va shakeneka omashongo. Omunhu oo e hole omutalelo weemhunda ota dulu okuuda ko kutya osha li shidjuu shi fike peni kwaavo va tembuka koSwitzerland oko ku na eemhunda dihapu diwa nokutala. Naavo va dja koAustria, pehovelo ova li va djuulukwa koBetel inini oko va li.

¹³ Ovo va tembukila koilongo imwe, ove na okuninga omalunduluko mahapu, mwa kwatelwa okwiikilila eumbo lipe, okulonga novamwatate novamwameme ovo vehe shii nale notashi dulika nokuli ve na okulihonga okulonga oilonga imwe i lili. Ove na yo okwiikilila eongalo nokuudifila moshitukulwa shipe, omo tashi dulika nokuli hamu popiwa elaka limwe li lili. Kashi pu okuninga omalunduluko a tya ngaho. Ndele nande ongaho, Ovabetel vahapu ove a ninga. Omolwashike mbela?

14, 15. (a) Ongahelipi vahapu va ulika kutya ova lenga oufembanghenda wokulonga pamwe naJehova, kashi na nee mbudi kutya oilonga yoludi lilipi? (b) Omonghedi ilipi ve li oshihopaenenwa shiwa kufyeni atusheni?

 ¹⁴ Grethel okwa ti: “Onda dimina okutembuka opo ndi ulikile Jehova kutya ohole yange yoku mu hola inai likolelela koshilongo, ketungo ile koufembanghenda wonhumba.” Dayska okwa ti: “Eshi nda diladila moule onda mona kutya eshivo olo ola dja kuJehova, nonde li tambula ko nehafo.” André naGabriela ova dimina va ti: “Monghedi ya tya ngaho otwa mona omhito ya wedwa po yokulongela Jehova ponhele yokuyandja elitulemo komahalo etu. Otwe lilombwela hatu ti: ‘Oshiwa okutambula ko omalunduluko ehangano ponhele yoku a kondjifa.’”

¹⁵ Molwaashi oitaimbelewa oya tulwa mumwe, Ovabetel vamwe ova tuminwa momapya va ka kokole ondjila. Osho osha li sha ningilwa Ovabetel vahapu eshi oshitaimbelewa shaDenmark, Norway, naSweden ya tulwa mumwe ndele tai ningi oshitaimbelewa shaScandinavia. Vamwe vomwaavo va tuminwa momapya, oFlorian naAnja, ovo va ti: “Otwa tala ko oshilonga shetu shipe shitunhula nonande otashi pula eenghendabala. Oshi li oufembanghenda kufye okulongifwa kuJehova kashi na nee mbudi kutya ohatu longo peni. Ohatu popi tashi di komutima kutya otwa nangekwa lela noupuna!” Nonande vahapu vomufye otashi dulika katu na fiku tu ka ninge omalunduluko a tya ngaho, mbela itatu dulu okuhopaenena oikala iwa yovamwatate novamwameme ovo yokupitifa komesho nehalo liwa oinima yOuhamba? (Jes. 6:8) Jehova oha nangeke noupuna alushe ovo va lenga oufembanghenda wokulonga pamwe naye, kashi na nee mbudi kutya oilonga yoludi lilipi.

16. (a) Ovagalati 6:4 otave tu lombwele tu ninge shike? (b) Oufembanghenda munenenene ulipi omunhu keshe ta dulu okukala e na?

¹⁶ Ovanhu inava wanenena ove na eamo lokuliyelekanifa navamwe, ndele Eendjovo daKalunga otadi tu lombwele opo keshe umwe a yandje elitulemo kwaasho ta dulu okuninga. (Lesha Ovagalati 6:4.) Haatusheni hatu dulu okuninga ovakulunhuongalo, ovakokolindjila,  ovatumwa ile Ovabetel. Nopehe na omalimbililo, oo omaufembanghenda mawa, ashike inatu dimbweni kutya oufembanghenda munenenene oyoo tu neni atusheni wokukala ovalongi pamwe naKalunga moukalele wopaKriste. Natu kaleni twa lenga oufembanghenda wa tya ngaho!

17. Oushili ulipi tu na okukaleka momadiladilo ofimbo tu li mounyuni waSatana, ndele omolwashike shihe na oku tu teya omukumo unene?

¹⁷ Otashi dulika itatu dulu okulongela Jehova monghedi omo twa hala ofimbo tu li mounyuni ou waSatana. Otashi dulika pe na eenghalo odo itatu dulu okuninga po sha shi na sha nado ngaashi oinakuwanifwa youkwaneumbo, oukolele nosho yo eenghalo dimwe vali. Ashike inatu pumbwa okuteka omukumo unene. Longifa omhito keshe u na u longe pamwe naKalunga mokuyandja oundombwedi kombinga yedina laye nokushiivifa Ouhamba waye. Osho sha fimanenena osho okulonga ngaashi to dulu pamwe naJehova nokwiilikana a nangeke noupuna ovamwaxo ovo tava dulu okuninga shihapu. Dimbuluka kutya omunhu keshe oo ta tange edina laJehova oku na ondilo momesho aye!

18. Oshike tu na okweefa po nehalo liwa, nomolwashike?

¹⁸ Nonande otu na omaunghundi noinatu wanenena, Jehova okwa hala oku tu longifa tu li ovalongi pamwe naye. Inatu lenga tuu oufembanghenda wokulonga pamwe naKalunga ketu momafiku aa axuuninwa! Onghee hano, otu na okweefa po nehalo liwa okukala twa pitifa komesho oinima yopaumwene, tu shii kutya mounyuni mupe Jehova ote ke tu pitika tu hafele “omwenyo waalushe” meenghalo dombili nodihafifa. — 1 Tim. 6:18, 19.

19. Jehova okwe tu tuvikilila shike shi na sha nonakwiiwa?

¹⁹ Molwaashi ounyuni mupe ou li poduka elela, diladila kwaasho Moses a li a lombwela Ovaisrael diva fimbo inava ya mEdu lEudaneko, a ti: ‘Omwene Kalunga koye ote ku monifile ouwa tau xunga moilonga aishe yomake oye.’ (Deut. 30:9) Konima yoita yaHarmagedon, ovo va li ve lipyakidila tava longo pamwe naKalunga otava ka fyuulula edu olo e va udanekela. Opo nee ohatu ka yandja elitulemo letu koilonga ipe, yokuninga edu oparadisa iwa!