OSHO OVANHU HAVA TI

Ovanhu vahapu ohava tale ko okundobola ku li onghedi iwa noi nai nyika oshiponga, shimha ashike ku li paveta. Eenghedi dimwe dokundobola odo di li paveta, ngaashi odo da futilwa kepangelo, ohadi longifwa meeprograma odo tadi kwafele oshiwana.

OSHO OMBIIBELI TAI TI

Ombiibeli inai popya naanaa okundobola sha yukilila. Ashike oya yandja omafinamhango onhumba e shii okulineekelwa oo taa holola nghee Kalunga a tala ko okundobola.

Okundobola kwo vene ohaku ningwa, taku venwa oimaliwa, vo vamwe tava kana, naasho oshi li omhinge nelondwelo lOmbiibeli ‘lokulungamena olwisho keshe.’ (Lukas 12:15) Paulelalela, okundobola ohaku xwaxwamekwa kolwisho. Omahangano oo haa nduluka oidanaukifo, ohaa ningi omashiivifo e na sha nokuwina ee-jackpota dinene, molwaashi oku shii kutya etimaumbwile lokupunapala ohali ningifa ovadani va kendabale okutula oimaliwa ihapu momashina okundobola. Ponhele yokukwafela omunhu a lungamene olwisho, okundobola ohaku xumifa komesho ehalo lokumona oimaliwa inai longelwa.

Okundobola ohaku ningwa nelalakano lokuliholamwene: okuwina oimaliwa yovadani ovo inava lya mo sha. Ashike Ombiibeli otai ladipike omunhu aha “lalakanene ouwa waye mwene, ndele keshe umwe na lalakanene ouwa wamukwao.” (1 Ovakorinto 10:24) Noshipango shimwe shomOipango Omulongo otashi ti: “Ino haluka . . . keshe eshi shamukweni.” (Exodus 20:17) Ngeenge omundoboli okwa kala a halelela okuwina, oha kala lela a halelela vamwe va kane opo ye a mone sha.

Ombiibeli oya kunghilila yo okuhatala ko elao ku li onga oshinima osho omunhu a ningilwa keenghono donhumba noku shi tala ko onga enangekonoupuna. MuIsrael shonale, omwa li vamwe ovo vehe na eitavelo muKalunga nova li va hovela ‘okudikila oshikalunga shelao oshililo.’ Mbela okulongela “oshikalunga shelao” kwa tya ngaho okwa li ngoo kwa tambulwa ko kuKalunga? Hasho, molwaashi okwe va lombwela a ti: “Omwa ninga eshi handi tondo, nomwe lihoololela eshi inashi wapala momesho ange.” — Jesaja 65:11, 12.

Oshoshili kutya moitukulwa imwe mounyuni, oimaliwa ya dja mokundobola oko ku li paveta, ohai longifwa mokufuta oinima i na sha nehongo, mokuxwepopaleka eliko nomoinima ikwao yopashiwana. Ashike okulongifwa kwoimaliwa moinima ya tya ngaho, itaku lundulula onghedi omo ya monika, onghedi oyo tai xumifa komesho olwisho nokuliholamwene notai xwaxwameke ediladilo lokumona oinima inoi longela sha.

“Ino haluka . . . keshe eshi shamukweni.” — Exodus 20:17.

OSHO OMBIIBELI TAI TI

Ombiibeli oya londwela ya ti kutya “ovo va hala okupunapala otava wile momwiyo notava hangwa komayeleko, komadiladilo nokomahalo mai oo tae va twala mehanauno.” (1 Timoteus 6:9) Okundobola ohaku etifwa kolwisho, nolwisho oli li onga oudiyo oo wa tumbula mOmbiibeli momusholondodo woinima inai koshoka oyo i na okuhenukwa filufilu. — Ovaefeso 5:3.

Molwaashi okundobola ohaku ningifa omunhu a kale a hala okulikola oupuna noupu, ohaku ningifa omunhu a kale e hole oimaliwa, oshinima osho Ombiibeli ya popya kutya osho “efina lowii aushe.” Okukala wa hala oimaliwa otaku dulu okukala taku dana onghandangala neenghono monghalamwenyo yomunhu, ndele ta kala e na oshisho sha pitilila notashi nyono po ekwatafano lomunhu naKalunga. Oku shi popya pafaneko, Ombiibeli oya popya kutya ovo va ya momwiyo wohole yokuhola oimaliwa ova ‘ove lietela omaudjuu mahapu.’ — 1 Timoteus 6:10.

Olwisho ohali ningifa omunhu a kale ina wanenwa, noku mu ningifa a kale ina hafa omolwoimaliwa oyo e na noita kala a hafa. Ombiibeli oya ti: “Ou e hole oimaliwa ita wanenwa koimaliwa. Ndele ou e hole oupuna, ita wanenwa keliko.” — Omuudifi 5:10.

Ovanhu omamiliyona ovo va ya momwiyo wokundobola ova pikwa neenghono. Oupyakadi oo ou li apeshe. Ashike mOilongo ya Hangana omo amuke omu na ovanhu omamiliyona ovo va pikwa kokundobola.

Eyeletumbulo limwe ola ti: “Oinima tai hakanwa unene pehovelo, oxuuninwa itai eta enangeko noupuna.” (Omayeletumbulo 20:21) Okundobola okwa twala ovandoboli meendjo, ile nokuli okumbangolota, navamwe ova kanifa oilonga yavo, omaukwaneumbo amwe okwa teka po nosho yo oukaume. Okutula moilonga omafinamhango Ombiibeli otaku dulu okukwafela omunhu a henuke oidjemo ii oyo hai etifwa kokundobola, nohai kumu onghalamwenyo nehafo lomunhu.

“Ovo va hala okupunapala otava wile momwiyo notava hangwa komayeleko, komadiladilo nokomahalo mai oo tae va twala mehanauno.” — 1 Timoteus 6:9.