‘Maũndũ Make Marĩa Matonekaga nĩ Monagwo Wega’
KUHĨRĨRIA NGAI
‘Maũndũ Make Marĩa Matonekaga nĩ Monagwo Wega’
Wee nĩ wĩtĩkĩtie Ngai arĩ kuo? Angĩkorũo nĩ wĩtĩkĩtie-rĩ, hihi no ũheane ũira wa ũndũ ũcio? Ma nĩ atĩ, nĩ tuonaga ũira mũingĩ wa atĩ nĩ kũrĩ Mũũmbi ũrĩ na ũũgĩ, hinya na wendo. Ũira ũcio nĩ ũrĩkũ hihi? Nĩguo wone macokio, rora ciugo cia mũtũmwo Paulo iria aandĩkire marũa-inĩ make kũrĩ Akristiano a Roma.
Paulo oigire ũũ: “Gwata hĩndĩ ĩrĩa thĩ yombirũo, maũndũ [ma Ngai] marĩa matonekaga—na nĩmo hinya wake ũrĩa ũtũũraga o ho, o naguo ũngai wake-rĩ—nĩmonagwo wega tondũ wa ũrĩa makũũranĩkaga nĩ ũndũ wa indo iria ciombirũo. Na tondũ wa ũguo andũ matingĩgĩa na kĩĩgwatio.” (Aroma 1:20) O ta ũrĩa Paulo aandĩkire, Mũũmbi nĩ onanĩtie ũira atĩ arĩ kuo kũgerera indo iria ombire. Reke tũthuthurie na kinyi ciugo icio cia Paulo.
Paulo oigĩte atĩ ngumo cia Ngai nĩ cionekaga “gwata hĩndĩ ĩrĩa thĩ yombirũo.” Ũhoro-inĩ ũcio, kiugo gĩa Kĩngiriki kĩrĩa gĩtaũrĩtwo “thĩ” gĩtiarĩtie ũhoro wa Thĩ tĩri. Handũ ha ũguo, kĩarĩtie ũhoro wĩgiĩ andũ. Kwoguo, Paulo onanĩtie atĩ kuuma hĩndĩ ĩrĩa andũ moombirũo, nĩ meyonagĩra ngumo cia Mũũmbi kũgerera indo iria ombire.
Nĩ kũrĩ na ũira mũingĩ twĩyonagĩra wĩgiĩ ngumo cia Ngai. Ngumo icio itiĩhithanĩtie harĩ ũũmbi no nĩ ‘cionekaga wega.’ Ũũmbi wothe, wa indo iria nene na iria nini, nĩ wonanagia wega atĩ nĩ kũrĩ Mũũmbi na ũkonania ngumo ciake cia magegania. Na githĩ mũbango na kĩhaarĩro thĩinĩ wa ũũmbi wa Ngai ititũguũragĩria ũũgĩ wake? Na githĩ njata na maĩ ma iria itionanagia hinya wake? Na githĩ irio mwanya mwanya iria tũkenagĩra o na ũthaka wa riũa rĩkĩratha na rĩgĩthũa itionanagia wendo wa Ngai harĩ andũ?—Thaburi 104:24; Isaia 40:26.
Ũira ũcio ũigana atĩa hihi? Nĩ mũingĩ ũũ atĩ arĩa matawonaga na makarega gwĩtĩkia atĩ Ngai arĩ kuo “matingĩgĩa na kĩĩgwatio.” Mũthomi ũmwe aatarĩirie ũndũ ũcio ũũ: Ta hũũra mbica ndereba wagĩte gwathĩkĩra rũũri rũna rwa barabara. Akarũgamio nĩ mũthigari na akambĩrĩria kwandĩkĩrũo mahĩtia. Nake agetetera akiugaga atĩ ndanona rũũri rũu. No tondũ ndarĩ na thĩna wa kuona na rũũri rũu nĩ rũroneka wega, mũthigari akarega kũmũthikĩrĩria. Ningĩ-rĩ, ndereba nĩwe wagĩrĩire kũrora na gwathĩkĩra marũũri ma barabara. No taguo kũrĩ harĩ ũira wa Ngai thĩinĩ wa ũũmbi. “Rũũri” rũu, nĩruo ũũmbi, nĩ ruonekaga wega. Tondũ nĩ tũheetwo ũũgĩ, no tũhote kũruona. Tũtingĩgĩa na kĩĩgwatio.
Ũrĩa kũrĩ nĩ atĩ, ũũmbi nĩ ũguũragia maũndũ maingĩ megiĩ ũrĩa watũmbire. No nĩ harĩ ibuku rĩguũragia ũhoro makĩria ũmwĩgiĩ, nĩrĩo Bibilia. No tũmenye macokio ma kĩũria gĩkĩ kĩa bata tũngĩrĩthoma: Hihi muoroto wa Ngai harĩ thĩ na harĩ andũ nĩ ũrĩkũ? Kũmenya macokio ma kĩo no gũgũteithie ũkuhĩrĩrie Ngai o we ũrĩa maũndũ make ‘marĩa matonekaga, monekaga wega’ thĩinĩ wa thĩ.
Thoma gĩcunjĩ kĩa Bibilia mweri-inĩ wa Agosti
[Mbica karatathi ka 11]
Mũũmbi nĩ onanĩtie ũira atĩ arĩ kuo kũgerera indo iria ombire
[Mbica karatathi ka 11]
