Mũtumia Agĩrĩirũo Kwĩnyihĩria Ũtongoria wa Mũthuri Wake Nĩkĩ?
Mũtumia Agĩrĩirũo Kwĩnyihĩria Ũtongoria wa Mũthuri Wake Nĩkĩ?
“Mũtwe wa mũtumia nĩ mũndũrũme.”—1 KOR. 11:3.
1, 2. (a) Mũtũmwo Paulo aandĩkire atĩa ũhoro-inĩ wĩgiĩ mũbango wa Jehova wa ũtongoria? (b) Tũkwarĩrĩria ciũria irĩkũ gĩcunjĩ-inĩ gĩkĩ?
JEHOVA nĩwe wathondekire mũbango wa ũtongoria ũrĩa mũtũmwo Paulo oonanirie rĩrĩa aandĩkire atĩ “mũtwe wa mũndũrũme o wothe nĩ Kristo” na “mũtwe wa Kristo nĩ Ngai.” (1 Kor. 11:3) Thĩinĩ wa gĩcunjĩ kĩrĩa kĩhĩtũku, nĩ twerutire atĩ Jesu nĩ onaga arĩ gĩtĩo na agakena kwĩnyihĩria Jehova Ngai, o we mũtwe wake, na tũkĩĩruta atĩ mũtwe wa athuri Akristiano nĩ Kristo. Kristo aarũmbũyanagia na andũ na njĩra ya ũtugi, wororo, tha, na atarĩ na mwĩyendo. Arũme thĩinĩ wa kĩũngano magĩrĩirũo kũrũmbũiya andũ na njĩra ta ĩyo, makĩria atumia ao.
2 Ĩ nao atumia? Nũũ mũtwe wao? Paulo aaugire: “Mũtwe wa mũtumia nĩ mũndũrũme.” Atumia magĩrĩirũo gũkorũo na mawoni marĩkũ kwerekera ciugo icio ciatongoririo nĩ roho? Hihi mũtumia no ahũthĩre ũtaaro ũcio harĩ mũthuri wake ũtarĩ mwĩtĩkia? Hihi mũtumia kwĩnyihĩria mũthuri wake nĩ kuuga atĩ ndagĩrĩirũo kũruta mawoni make rĩrĩa maratua matua? Mũtumia angĩka atĩa nĩguo agaathagĩrĩrio nĩ mũthuri wake?
“Nĩ Ngũmũũmbĩra Mũteithia”
3, 4. Mũbango wa ũtongoria thĩinĩ wa kĩhiko ũkoragwo na ũguni ũrĩkũ?
3 Mũbango wa ũtongoria waambĩrĩirio nĩ Jehova. Thutha wa kũũmba Adamu, Jehova Ngai aaugire ũũ: “Ti wega mũndũ ũyũ athiĩ na mbere gũikara arĩ wiki. Nĩ ngũmũũmbĩra mũteithia, ũrĩa maganĩrĩirũo nake.” Thutha wa Hawa kũũmbwo, Adamu nĩ aakenire mũno nĩ kũgĩa na mũteithia na akiuga ũũ: “Ũyũ nĩwe ihĩndĩ rĩa mahĩndĩ makwa na nyama cia nyama ciakwa.” (Kĩam. 2:18-24) Adamu na Hawa maarĩ na mweke mwega mũno wa gũtuĩka aciari a ciana nginyanĩru, iria ingĩatũũrire tene na tene irĩ na gĩkeno thĩinĩ wa thĩ ĩrĩ paradiso.
4 Tondũ aciari aitũ a mbere nĩ maaremeire Ngai, nĩ moorirũo nĩ mweke wa gũtũũra tene na tene. (Thoma Aroma 5:12.) No mũbango wa Jehova wa mũthuri gũkorũo arĩ mũtwe wa mũtumia wake ndwacenjirie. Rĩrĩa mũbango ũcio warũmĩrĩrũo, kĩhiko nĩ kĩgacaagĩra na gĩgakorũo na gĩkeno. Andũ arĩa mahikanĩtie no makorũo na gĩkeno o ta kĩrĩa Jesu aarĩ nakĩo arĩ rungu rwa ũtongoria wa Jehova. Jesu atanoka gũkũ thĩ, nĩ ‘aakenaga arĩ mbere ya Jehova hĩndĩ ciothe.’ (Thim. 8:30) Nĩ ũndũ wa kwaga gũkinyanĩra, athuri matingĩhota gũtongoria famĩlĩ ciao na njĩra nginyanĩru, kana atumia mahote kwĩnyihĩria athuri ao na njĩra nginyanĩru. Rĩrĩa athuri na atumia mathiĩ na mbere kwĩrutanĩria ũrĩa wothe mangĩhota, nĩ marĩkoragwo na ihiko irĩ na gĩkeno o na angĩkorũo ti akinyanĩru.
5. Andũ arĩa mahikanĩtie magĩrĩirũo gwathĩkĩra ũtaaro ũrĩa ũrĩ thĩinĩ wa Aroma 12:10 nĩkĩ?
5 Nĩguo andũ arĩa mahikanĩtie makorũo na gĩkeno, nĩ marabatara kũrũmĩrĩra ũtaaro ũyũ wa Bibilia: “Ũhoro-inĩ wĩgiĩ wendo ta wa andũ a nyina ũmwe, koragwoi na wendo muororo harĩ mũndũ na ũrĩa ũngĩ. Harĩ kũheana gĩtĩo, koragwoi mũrĩ a mbere.” (Rom. 12:10) Ningĩ mũthuri na mũtumia nĩ magĩrĩirũo kwĩrutanĩria gũtuĩka ‘atugi kwerekera mũndũ na ũrĩa ũngĩ, na magacayanagĩra marĩ na wororo, makĩohanagĩra meyendeire.’—Ef. 4:32.
Rĩrĩa Ũrĩa Mũhikanĩtie Nake Atarĩ Mwĩtĩkia
6, 7. Maumĩrĩra mangĩkorũo marĩ marĩkũ mũtumia Mũkristiano angĩĩnyihagĩria mũthuri wake ũtarĩ mwĩtĩkia?
6 Ĩ angĩkorũo mũndũ ũrĩa mũhikanĩtie nake ti ndungata ya Jehova? Famĩlĩ-inĩ nyingĩ, mũthuri nĩwe ũtakoragwo arĩ mwĩtĩkia. Angĩkorũo nĩguo kũrĩ-rĩ, mũtumia agĩrĩirũo kũmwĩkĩra maũndũ na njĩra ĩrĩkũ? Bibilia yugaga ũũ: “Inyuĩ atumia, mwĩnyihagĩriei athuri anyu, nĩgetha angĩkorũo nĩ harĩ amwe ao matathĩkagĩra kiugo, magucĩrĩrio nĩ mĩthiĩre ya atumia ao o na hatarĩ kiugo, nĩ ũndũ wa kwĩyonera mĩthiĩre yanyu mĩtheru o hamwe na gĩtĩo kĩnene.”—1 Pet. 3:1, 2.
7 Kiugo kĩa Ngai gĩtaaraga mũtumia athiĩ na mbere kwĩnyihĩria mũthuri wake o na angĩkorũo ti mwĩtĩkia. Mĩthiĩre yake mĩega no ĩtũme mũthuri wake ende kũmenya nĩ kĩĩ gĩtũmaga akorũo na mĩthiĩre mĩega ũguo. Maumĩrĩra nĩ atĩ, mũthuri ũcio no ende kũmenya makĩria ũhoro wĩgiĩ wĩtĩkio wa mũtumia wake, na mũthia-inĩ oke ũhoro-inĩ wa ma.
8, 9. Mũtumia Mũkristiano agĩrĩirũo gwĩka atĩa angĩkorũo mũthuri wake ũtarĩ mwĩtĩkia ndaragucĩrĩrio nĩ mĩthiĩre yake mĩega?
8 Ĩ mũthuri ũcio ũtarĩ mwĩtĩkia angĩaga kũgucĩrĩrio nĩ ũhoro wa ma? Maandĩko mekĩraga ngoro mũtumia athiĩ na mbere kuonania ngumo cia Gĩkristiano o na angĩkorũo ti ũndũ mũhũthũ. Kwa ngerekano, tũthomaga ũũ thĩinĩ wa 1 Akorintho 13:4: “Wendo nĩ ũrĩ wetereri.” Kwoguo mũtumia Mũkristiano nĩ agĩrĩirũo gũthiĩ na mbere kuonania ‘wĩnyihia wothe na ũhooreri, arĩ na wetereri,’ akĩonagia mũthuri wake wendo. (Ef. 4:2) Kũgerera ũteithio wa roho mũtheru wa Ngai, mũndũ no ahote gũthiĩ na mbere kuonania ngumo cia Gĩkristiano o na rĩrĩa aragerera maũndũ maritũ.
9 Paulo aandĩkire ũũ: “Maũndũ-inĩ mothe nĩ ngoragwo na hinya kũgerera ũrĩa ũũheaga hinya.” (Afil. 4:13) Roho wa Jehova nĩ ũhotithagia mũthuri kana mũtumia Mũkristiano gwĩka maũndũ maingĩ marĩa mangĩoneka ta matangĩhotekeka. Kwa ngerekano, mũndũ angĩkwo maũndũ moru nĩ mũndũ ũrĩa mahikanĩtie nake, no ũkorũo arĩ ũndũ mũhũthũ harĩ we kwĩrĩhĩria. O na kũrĩ ũguo, Bibilia ĩraga Akristiano othe ũũ: “Mũtikanarĩhe ũũru na ũũru harĩ mũndũ o na ũrĩkũ. . . . Tondũ nĩ kwandĩke ũũ: ‘Kũrĩhanĩria nĩ gwakwa; nĩ niĩ ngaarĩhanĩria,’ ũguo nĩguo Jehova ekuuga.” (Rom. 12:17-19) Ningĩ 1 Athesalonike 5:15 ĩtũtaaraga ũũ: “Tigagĩrĩrai atĩ gũtirĩ mũndũ ũrarĩha ũũru na ũũru kũrĩ mũndũ o wothe, no hingo ciothe thingatagai maũndũ mega gatagatĩ-inĩ kanyu na harĩ andũ arĩa angĩ othe.” Tũgĩteithio nĩ roho mũtheru wa Jehova, no tũhote kũhingia maũndũ marĩa tũtangĩhota kũhingia na hinya witũ ene. Nĩkĩo nĩ twagĩrĩirũo kũhoyaga ũteithio wa roho mũtheru wa Ngai.
10. Jesu aarũmbũyanirie na andũ atĩa rĩrĩa maaugaga na mageka maũndũ matarĩ mega?
10 Jesu nĩ aarũmbũyanirie na njĩra njega na andũ arĩa maaugaga na mageka maũndũ moru kũmwerekera, na kwoguo agĩtũigĩra kĩonereria kĩega. Petero wa mbere 2:23 yugaga ũũ: “Rĩrĩa aarumagwo ndaarumanire. Rĩrĩa aanyamarĩkaga, ndeehĩtanagĩra, ĩndĩ eeneanire kũrĩ Ũrĩa ũtuanagĩra na njĩra ya ũthingu.” Nĩ twĩkĩragwo ngoro kũrũmĩrĩra kĩonereria gĩake kĩega. Ndũkareke mĩtugo mĩũru ya andũ arĩa angĩ ĩtũme wĩke ũndũ ũtarĩ mwega. Bibilia ĩkagĩra Akristiano othe ngoro monanagie ‘ũcayanĩri muororo, na wĩnyihia, na matikarĩhage ũũru na ũũru kana kũrumana rĩrĩa marumwo.’—1 Pet. 3:8, 9.
Hihi Atumia no Marute Mawoni Famĩlĩ-inĩ?
11. Nĩ wĩra ũrĩkũ wa bata atumia amwe Akristiano maheetwo?
11 Hihi mũtumia kwĩnyihĩria mũthuri wake nĩ kuuga atĩ ndagĩrĩire kwĩra mũthuri mawoni make rĩrĩa maratua matua megiĩ famĩlĩ kana maũndũ mangĩ? Aca. Athuri o hamwe na atumia nĩ makoragwo maheetwo mawĩra maingĩ ma bata nĩ Jehova. Ta wĩcirie gĩtĩo kĩnene kĩrĩa kĩheetwo andũ 144,000 arĩa magaakorũo kũrĩa igũrũ marĩ athamaki na athĩnjĩri-Ngai rungu rwa Kristo rĩrĩa agaathana gũkũ thĩ! Amwe ao nĩ atumia. (Gal. 3:26-29) Nĩ ũndũ ũcio, Jehova nĩ aheete atumia gĩtĩo na njĩra ya kũmehokera mawĩra ma bata.
12, 13. Heana ngerekano ĩronania atĩ atumia nĩ maarathaga mohoro.
12 Kwa ngerekano, mahinda-inĩ ma Bibilia atumia nĩ maarathaga mohoro. Joeli 2:28, 29 yarathĩte ũũ: “Nĩ ngaaitĩrĩria andũ a mĩthemba yothe roho wakwa, na ariũ anyu na aarĩ anyu nĩ makaaratha mohoro. . . . O na ngombo ciakwa cia arũme na cia atumia nĩ ngaaciitĩrĩria roho wakwa matukũ-inĩ macio.”
13 Arutwo a Jesu ta 120 arĩa maagomanĩte nyũmba-inĩ ĩmwe ya igũrũ thĩinĩ wa Jerusalemu hĩndĩ ya Pentekoste ya mwaka wa 33 Mahinda Maitũ, maarĩ athuri o hamwe na atumia. Arutwo acio othe nĩ maaitĩrĩirio roho wa Ngai. Nĩkĩo Petero aacokerire ciugo iria ciaarĩtio nĩ mũnabii Joeli, na akĩonania atĩ ciahutĩtie arũme na atumia. Petero aaugire ũũ: “Ũndũ ũyũ nĩ ũrĩa woigirũo kũgerera mũnabii Joeli: ‘Ngai ekuuga atĩrĩ, “Matukũ-inĩ ma kũrigĩrĩria, nĩ ngaaitĩrĩria andũ a mĩthemba yothe roho wakwa, na ariũ anyu na aarĩ anyu nĩ makaaratha mohoro . . . ; o na ngombo ciakwa cia arũme na cia atumia nĩ ngaaciitĩrĩria roho wakwa matukũ-inĩ macio, nacio nĩ ikaaratha mohoro.”’”—Atũm. 2:16-18.
14. Nĩ itemi rĩrĩkũ atumia maahingirie matukũ-inĩ ma atũmwo?
14 Matukũ-inĩ ma atũmwo, atumia nĩ meerutanĩirie mũno kũhunjia ũhoro ũrĩa mwega, na gũteithĩrĩria mawĩra-inĩ mangĩ mahutanĩtie na wĩra wa kũhunjia. (Luk. 8:1-3) Kwa ngerekano, mũtũmwo Paulo aaugire atĩ ‘Fibi aatungataga thĩinĩ wa kĩũngano kĩrĩa gĩakoragwo Kenkirea.’ Na rĩrĩa aatũmagĩra Akristiano ngeithi, Paulo nĩ aagwetire atumia aigana ũna ehokeku, amwe ao marĩ “Trufena na Trufosa, atumia arĩa marutaga wĩra na kĩyo thĩinĩ wa Mwathani.” Ningĩ aaugire ũũ: “Geithiai Perisi, ũrĩa twendete, nĩ gũkorũo nĩ arutĩte wĩra na kĩyo thĩinĩ wa Mwathani.”—Rom. 16:1, 12.
15. Nĩ itemi rĩrĩkũ atumia mahingagia mahinda-inĩ maya?
15 Mahinda-inĩ maya, andũ aingĩ arĩa mahunjagia ũhoro ũrĩa mwega wa Ũthamaki wa Ngai makoragwo marĩ atumia. (Mat. 24:14) Aingĩ ao nĩ ahunjia a mahinda mothe, amishonarĩ, na angĩ matungataga Betheli. Daudi, mwandĩki wa Thaburi aaugire ũũ: “Jehova nĩ arutaga watho; atumia arĩa mamenyithanagia ũhoro ũrĩa mwega nĩ mbũtũ nene.” (Thab. 68:11) Ciugo icio nĩ ihingĩte na njĩra nene. Jehova nĩ akenagio mũno nĩ itemi rĩrĩa atumia mahingagia wĩra-inĩ wa kũhunjia ũhoro mwega na gwĩka wendi wake. Gũkorũo erĩte atumia Akristiano menyihagĩrie athuri ao, ti kuuga atĩ matiagĩrĩirũo kwaria.
Atumia Erĩ Mataakirire
16, 17. Kĩonereria gĩa Sara kĩonanagia atĩa atĩ atumia nĩ magĩrĩirũo kũruta mawoni mao kĩhiko-inĩ?
16 Angĩkorũo Jehova nĩ akenagio nĩ maũndũ marĩa atumia mahingagia-rĩ, na githĩ athuri matiagĩrĩirũo kwaranagĩria na atumia ao matanatua matua maritũ? No ũkorũo ũrĩ ũndũ wa ũũgĩ gwĩka ũguo. Bibilia nĩ ĩgwetaga ũhoro wĩgiĩ atumia maaririe kana makĩoya ikinya mategweterera nginya rĩrĩa athuri ao marĩmoria mawoni mao. Ta wĩcirie ũhoro wa atumia aya erĩ.
17 Sara mũtumia wa Iburahimu, aaikaraga akĩraga Iburahimu aingate Hagari mũtumia wake wa kerĩ na mũriũ wake tondũ matiamũheaga gĩtĩo. No “ũndũ ũcio ooigire . . . nĩ warakaririe Iburahimu mũno,” ĩndĩ Ngai oonaga wagĩrĩire. Jehova eerire Iburahimu ũũ: “Tiga kũrakario nĩ ũndũ ũcio Sara arakwĩra wĩgiĩ kamwana kau na wĩgiĩ ngombo ĩyo yaku ya mũirĩtu. Mũthikĩrĩrie.” (Kĩam. 21:8-12) Iburahimu nĩ aathĩkĩire Jehova, agĩthikĩrĩria Sara, na agĩka ũguo aamwĩraga eke.
18. Nĩ ũndũ ũrĩkũ Abigaili eekire o na atekwĩra mũthuri wake?
18 Ningĩ ta wĩcirie ũhoro wa Abigaili, ũrĩa warĩ mũtumia wa Nabali. Rĩrĩa Daudi oorĩire Mũthamaki Saulu, kũrĩ hĩndĩ aambĩte hema hakuhĩ na ndũũru cia Nabali. Daudi na arũme arĩa aarĩ nao matieyoeire kĩndũ o na kĩmwe kĩa indo nyingĩ cia Nabali, handũ ha ũguo nĩ gũcigitĩra macigitĩrire. No Nabali “aarĩ mũũru mũno, na ndaarĩ na mĩtugo mĩega” na nĩ ‘aarumire’ arũme a Daudi. Aarĩ “mũndũ ũtarĩ kĩene,” na ũtarĩ na “wĩcirio.” Rĩrĩa arũme a Daudi maahoire Nabali gĩa kũrĩa, nĩ aamaimire. Hihi Abigaili eekire atĩa rĩrĩa aamenyire ũrĩa gwathiĩte? O na atekwĩra Nabali, Abigaili eekire o na ihenya “akĩoya mĩgate 200, ndigithũ igĩrĩ nene cia ndibei, ng’ondu ithano haarĩrie, ithimi ithano cia sea cia ngano hĩhie, keki 100 cia thabibũ nyũmithie, na keki 200 cia ngũyũ hihe” agĩcinengera Daudi na arũme ake. Hihi ũndũ ũcio Abigaili eekire warĩ mwega? Bibilia yugaga ũũ: “Jehova akĩgũtha Nabali na agĩkua.” Thutha ũcio Daudi nĩ aahikirie Abigaili.—1 Sam. 25:3, 14-19, 23-25, 38-42.
‘Mũtumia wa Kũgaathĩrĩrio’
19, 20. Nĩ ũndũ ũrĩkũ ũtũmaga mũtumia agaathĩrĩrio?
19 Maandĩko nĩ magaathagĩrĩria mũtumia ũrĩa wathĩkagĩra maũndũ marĩa Jehova aaugĩte. Bibilia ĩkĩgaathĩrĩria “mũtumia ngatha” thĩinĩ wa ibuku rĩa Thimo yugĩte ũũ: “Thogora wake nĩ mũnene mũno gũkĩra wa tũhiga twa goro twa iria-inĩ. Mũthuri wake amwĩhokete kuuma ngoro, na gũtirĩ kĩndũ kĩa bata mũthuri ũcio agaga. Ekagĩra mũthuri wake maũndũ mega, no ti moru, matukũ-inĩ mothe ma ũtũũro wake.” Makĩria ma ũguo, “atumũraga kanua gake na njĩra ya ũũgĩ; watho wa ũtugi ũkoragwo rũrĩmĩ-inĩ rwake. Nĩ aroraga mawĩra ma mũciĩ wake, na ndarĩaga mũgate wa ũgũta. Ciana ciake irũgamaga ikoiga nĩ mũrathime; mũthuri wake arũgamaga akamũgaathĩrĩria.”—Thim. 31:10-12, 26-28.
20 Nĩ ũndũ ũrĩkũ ũtũmaga mũtumia agaathĩrĩrio? Thimo 31:30 yugaga ũũ: “Ũgemu no ũkorũo ũrĩ wa maheeni, naguo ũthaka ũkorũo ũrĩ wa kahinda kanini, no mũtumia ũrĩa wĩtigĩrĩte Jehova nĩ arĩgaathagĩrĩrio.” Mũtumia wĩtigĩrĩte Jehova nĩ amenyaga atĩ nĩ ũndũ wa bata kwĩnyihĩria andũ arĩa Jehova aigĩte matongoragie maũndũ thĩinĩ wa famĩlĩ na kĩũngano-inĩ. Bibilia yugaga atĩ “mũtwe wa mũtumia nĩ mũndũrũme,” o ta ũrĩa “mũtwe wa mũndũrũme o wothe nĩ Kristo,” na “mũtwe wa Kristo nĩ Ngai.”—1 Kor. 11:3.
Cokagia Ngatho nĩ Ũndũ wa Kĩheo gĩa Kĩhiko
21, 22. (a) Akristiano arĩa marĩ thĩinĩ wa kĩhiko marĩ na itũmi irĩkũ cia gũcokeria Ngai ngatho nĩ ũndũ wa kĩheo gĩa kĩhiko? (b) Twagĩrĩirũo kwĩnyihĩria andũ arĩa Ngai aigĩte matongoragie maũndũ nĩkĩ? (Rora gathandũkũ.)
21 Akristiano arĩa marĩ thĩinĩ wa kĩhiko marĩ na itũmi nyingĩ cia gũcokeria Ngai ngatho. No mahote gũtũũrania hamwe marĩ na gĩkeno. No macokerie Ngai ngatho, makĩria tondũ kĩheo kĩu gĩa kĩhiko no kĩmahe mweke wa kũhũthĩra ũtũũro wao gũtungatĩra Jehova. (Ruth 1:9; Mik. 6:8) Tondũ Jehova nĩwe waambĩrĩirie kĩhiko, nĩ oĩ kĩrĩa kĩngĩtũma arĩa mahikanĩtie makorũo na gĩkeno. O na gũtuĩka tũratũũra thĩinĩ wa thĩ ĩrĩ na mathĩna maingĩ, ũngĩkaga maũndũ hĩndĩ ciothe kũringana na njĩra cia Jehova, ‘gĩkeno kĩrĩa kiumaga kũrĩ Jehova kĩrĩkoragwo kĩrĩ mwĩgitio waku.’—Neh. 8:10.
22 Mũthuri Mũkristiano wendete mũtumia wake o ta ũrĩa eyendete we mwene, atongoragia mũtumia wake na njĩra ya ũtugi na wendo. Nĩ ũkoragwo ũrĩ ũndũ mũhũthũ harĩ we kwenda mũtumia wake, tondũ mũtumia wake nĩ amũnyitaga mbaru na akamũhe gĩtĩo kĩnene. Na ũndũ wa bata makĩria, kĩhiko kĩao nĩ gĩtĩithagia Jehova.
Hihi nĩ Ũraririkana?
• Nĩ mũbango ũrĩkũ Jehova aigĩte thĩinĩ wa famĩlĩ?
• Nĩkĩ mũthuri na mũtumia nĩ magĩrĩirũo kũheana gĩtĩo?
• Mũtumia Mũkristiano agĩrĩirũo kũrũmbũyania na mũthuri wake ũtarĩ mwĩtĩkia na njĩra ĩrĩkũ?
• Nĩkĩ athuri nĩ magĩrĩirũo kwaranĩria na atumia ao matanatua matua manene?
[Ciũria cia wĩruti]
[Gathandũkũ]
Twagĩrĩirũo Gũtĩa Mũbango wa Ngai wa Ũtongoria Nĩkĩ?
Jehova nĩ aigĩte mũbango wa ũtongoria harĩ andũ na harĩ araika. Aigĩte mũbango ũcio ũrĩ wa kũmaguna. Nĩ ũmahotithagia gũtungatĩra Jehova na njĩra ya thayũ marĩ na ũrũmwe.—Thab. 133:1.
Akristiano aitĩrĩrie maguta nĩ menyihagia rungu rwa ũtongoria wa Jesu Kristo. (Ef. 1:22, 23) Tondũ Jesu nĩ atĩĩte ũtongoria wa Jehova, mũthia-inĩ “we mwene o nake nĩ akeeiga rungu rwa Ũrĩa waigire indo ciothe rungu rwake, nĩguo Ngai akorũo arĩ maũndũ mothe harĩ andũ othe.” (1 Kor. 15:27, 28) Nĩ ũndũ ũcio, andũ arĩa othe matungatagĩra Jehova nĩ magĩrĩirũo gũtĩa andũ arĩa Jehova ehokeire gũtongoria maũndũ thĩinĩ wa famĩlĩ na thĩinĩ wa kĩũngano. (1 Kor. 11:3; Ahib. 13:17) Tũngĩka ũguo, nĩ tũrĩtĩkĩrĩkaga harĩ Jehova na agatũrathima.—Isa. 48:17.
[Mbica karatathi ga 13]
Mahoya no mateithie mũtumia Mũkristiano kuonania ngumo cia Gĩkristiano
[Mbica karatathi ga 15]
Jehova nĩ akenagĩra mũno itemi rĩrĩa atumia mahingagia harĩ gũtwarithia na mbere maũndũ ma Ũthamaki