Nĩ kwarĩ mũndũ ũmwe wetagwo Ayubu watungatagĩra Jehova Bũrũri-inĩ wa Uzu. Aarĩ na famĩlĩ nene na aarĩ mũtongu mũno. Aarĩ mũndũ mũtaana na nĩ aateithagia andũ athĩni, atumia arĩa maakuĩrĩirũo nĩ athuri ao, na ciana iria itaarĩ na aciari. No hihi ũguo nĩ kuuga atĩ tondũ eekaga ũrĩa kwagĩrĩire ndangĩacemanirie na mathĩna?

Ayubu ndaamenyaga atĩ Shaitani nĩ aaroraga maũndũ marĩa eekaga. Jehova oririe Shaitani ũũ: ‘Hihi nĩ wonete ndungata yakwa Ayubu? Gũtirĩ mũndũ ũngĩ take thĩinĩ wa thĩ. Nĩ athikagĩrĩria na ageka ũrĩa kwagĩrĩire.’ Nake Shaitani akĩmũcokeria: ‘Nĩ ma Ayubu nĩ agwathĩkagĩra. Nĩ ũmũgitagĩra na ũkamũrathima. Ũmũheete mũgũnda na nyamũ nyingĩ cia kũrĩithia. Ta mũtunye indo icio ciothe arĩ nacio wone nĩ egũtiga gũgũtungatĩra.’ Jehova aamwĩrire ũũ: ‘No ũgerie Ayubu. No ndũkamũũrage.’ Jehova aarekire Shaitani agerie Ayubu nĩkĩ? Tondũ aarĩ na ma biũ atĩ Ayubu aarĩ mwĩhokeku harĩ we.

Shaitani nĩ aambĩrĩirie kũrehera Ayubu magerio matiganĩte. Aambire agĩtũma andũ meetagwo Asabea maiye ng’ombe na ndigiri cia Ayubu. Aacokire akĩrehe mwaki ũgĩcina ng’ondu ciothe cia Ayubu. Ningĩ gĩkundi kĩa andũ meetagwo Akalidei nĩ kĩaiyire ngamĩra ciake. Ndungata iria ciarĩithagia nyamũ cia Ayubu nacio nĩ cioragirũo. Thutha ũcio Ayubu nĩ aacemanirie na ũndũ ũrĩa warĩ mũũru mũno. Ciana ciake ciothe nĩ ciakuire hĩndĩ ĩrĩa ciagwĩrĩirũo nĩ nyũmba kũrĩa ciarĩ na iruga. Ayubu nĩ aakuire ngoro mũno, no ndaatigire gũtungatĩra Jehova.

 Shaitani eendaga Ayubu anyarirĩke o na makĩria, na nĩ ũndũ ũcio agĩtũma agĩe na mahũha maarĩ na ruo mwĩrĩ wothe. Ayubu aarĩ na ruo rũingĩ mũno. Ndaamenyaga maũndũ macio mothe maamũkoraga nĩkĩ. O na kũrĩ ũguo, no aathire na mbere gũtungatĩra Jehova. Ngai nĩ onire maũndũ macio mothe na nĩ aakenirio nĩ Ayubu mũno.

Thutha ũcio Shaitani nĩ aatũmire andũ atatũ makagerie Ayubu. Maamwĩrire ũũ: ‘No mũhaka akorũo nĩ wĩhĩtie na ũkahitha mehia maku. Ngai nĩ gũkũherithia arakũherithia.’ Ayubu aameerire: ‘Hatirĩ ũndũ mũũru njĩkĩte.’ No ningĩ akĩambĩrĩria gwĩciria atĩ Jehova nĩwe wamũrehagĩra mathĩna macio na atĩ Ngai ndaamwĩkaga maũndũ ma kĩhooto.

Mũndũ ũmwe mwĩthĩ wetagwo Elihu nĩ aathikagĩrĩria ũrĩa maaragia ekirĩire. Aacokire akĩmeera: ‘Maũndũ macio mothe mwoiga ti ma ma. Jehova nĩ mũnene gũkĩra ũrĩa tũngĩciria. Ndangĩka ũndũ o na ũmwe ũtarĩ wa kĩhooto. Onaga maũndũ mothe na agateithia andũ rĩrĩa marĩ na mathĩna.’

Jehova aacokire akĩarĩria Ayubu akĩmwĩra ũũ: ‘Warĩ kũ hĩndĩ ĩrĩa ndombaga igũrũ na thĩ? Ũroiga atĩ ndirĩ kĩhooto nĩkĩ? No kwaria ũraaria no ndũramenya maũndũ mekĩkaga nĩkĩ?’ Ayubu nĩ etĩkĩrire mahĩtia make na akiuga: ‘Ndiroigĩte ũrĩa kũrĩ. No kũigua njiguaga ũhoro waku no rĩu nĩ ngũmenyete. Gũtirĩ ũndũ ũngĩkũrema. Njohera nĩ ũndũ wa ũrĩa njugĩte.’

Hĩndĩ ĩrĩa magerio maathirire, Jehova nĩ aahonirie Ayubu na akĩmũhe indo nyingĩ gũkĩra iria aarĩ nacio mbere ĩyo. Ayubu nĩ aaikarire mĩaka mĩingĩ arĩ na gĩkeno. Jehova nĩ aarathimire Ayubu nĩ ũndũ wa kũmũthikĩrĩria o na hĩndĩ ĩrĩa aarĩ na mathĩna. Hihi nĩ ũgwĩka ta Ayubu na njĩra ya gũtungatĩra Jehova o na rĩrĩa kũrĩ na mathĩna?