Athĩnjĩri-Ngai nĩ maatwarire Jesu kwa ngavana mũciĩ. Pilato aamoririe ũũ: ‘Mũndũ ũyũ mũramũthitangĩra kĩĩ?’ Nao makĩmũcokeria: ‘Aroiga atĩ we nĩ mũthamaki!’ Pilato akĩũria Jesu: “Wee nĩwe Mũthamaki wa Ayahudi?” Nake Jesu akĩmũcokeria: “Ũthamaki wakwa ti wa thĩ ĩno.”

Thutha ũcio Pilato nĩ oigire Jesu atwarũo kũrĩ Herode, ũrĩa wathanaga Galili, nĩguo one kana aarĩ na mahĩtia. Herode ndoonire mahĩtia o na manini harĩ Jesu, na nĩ ũndũ ũcio akiuga acokio kũrĩ Pilato rĩngĩ. Nake Pilato akĩra andũ ũũ: ‘Niĩ na Herode tũtinona mahĩtia o na manini harĩ mũndũ ũyũ. Nĩ ngũmũrekereria.’ Kĩrĩndĩ kĩanĩrĩire ũũ: ‘Mũũrage! Mũũrage!’ Thigari ciahũũrire Jesu na kĩboko, ikĩmũtuĩra mata, na ikĩmũringa. Maacokire makĩmwĩkĩra thũmbĩ ya mĩigua mũtwe makĩmwĩraga: ‘Geithĩka, wee Mũthamaki wa Ayahudi!’ Pilato eerire kĩrĩndĩ ũũ o rĩngĩ: ‘Niĩ ndinona ũndũ mũũru mũndũ ũyũ ekĩte.’ No maanĩrĩire makiuga ũũ: ‘Nĩ acuurio mũtĩ igũrũ!’ Nĩ ũndũ ũcio Pilato akĩmũneana nĩguo oragwo.

Maatwarire Jesu handũ heetagwo Gologotha, makĩmũhũũrĩra mĩcumarĩ mũtĩ-inĩ, magĩcoka makĩũrũgamia. Jesu aahoire ũũ: ‘Awa, mohere tondũ matiũĩ ũrĩa mareka.’ Andũ maanyũrũragia Jesu makĩmwĩraga: ‘Angĩkorũo ũrĩ Mũrũ wa Ngai wĩrute hau igũrũ! Wĩhonokie.’

Mũici ũmwe wacuurĩtio hakuhĩ na Jesu aamwĩrire ũũ: “Ũkaandirikana rĩrĩa ũkaaingĩra thĩinĩ wa Ũthamaki waku.” Nake Jesu akĩmwĩra: “Nĩ ũgaakorũo hamwe na niĩ thĩinĩ wa Paradiso.” Thutha wa mĩaraho, nĩ kwagĩire nduma bũrũri wothe kwa ihinda rĩa mathaa matatũ. Arũmĩrĩri amwe a Jesu nĩ maaikarire hakuhĩ na hau aacuurĩtio, na nginya nyina aarĩ ho. Jesu nĩ eerire Johana arũmbũyagie Mariamu ta arĩ nyina mũmũciari.

Thutha-inĩ, Jesu oigire ũũ: “Maũndũ mothe nĩ mahinga!” Aainamirie mũtwe na akĩhuuhia rĩa mũthia. O ihinda-inĩ rĩu nĩ kwagĩire gĩthingithia kĩnene mũno. Nakuo thĩinĩ wa hekarũ,  gĩtama kĩrĩa kĩagayanĩtie Harĩa Hatheru na Harĩa Hatheru Mũno nĩ gĩatũkire maita merĩ. Mũthigari ũmwe oigire ũũ: ‘Hatarĩ nganja ũyũ ararĩ Mũrũ wa Ngai.’