Mĩaka ta 17 nĩ mĩhĩtũku kuuma rĩrĩa Jesu oragia arutani ciũria hekarũ-inĩ arĩ na mĩaka 12. Rĩu nĩ mweri wa Machi kana Ĩpuro mwaka wa 29. Andũ aingĩ mararia ũhoro wa Johana, wa mbarĩ cia Jesu ũrĩa ũrahunjia gĩcigo-inĩ gĩothe kĩa mwena wa ithũĩro wa Rũĩ rwa Jorodani.

Johana nĩ mũndũ wa kwendeka nĩ ũndũ wa ũrĩa ahaana, na mwarĩrie wake. Ehumbaga nguo cia guoya wa ngamĩra na akeyoha mũcibi wa rũũa njohero. Arĩaga ngigĩ na ũũkĩ wa gĩthaka. Arahunjia ndũmĩrĩri ĩrĩkũ? “Mwĩrirei, tondũ Ũthamaki wa igũrũ nĩ ũkuhĩrĩirie.”​—Mathayo 3:2.

Ndũmĩrĩri ĩyo ya Johana nĩ ĩrakenia arĩa maramũthikĩrĩria. Aingĩ nĩ marona bata wa kwĩrira, na njĩra ya kũgarũrĩra mĩerekera na mĩthiĩre yao, magatigana na ũtũũro wao wa hau kabere ũtarĩ mwega. Arĩa maramũthikĩrĩria moimĩte ‘Jerusalemu na Judea yothe na matũũra mothe marĩa mathiũrũrũkĩirie Jorodani.’ (Mathayo 3:5) Aingĩ ao moka kũrĩ we, makerira. Nake akamabatithia rũĩ-inĩ rwa Jorodani. Nĩkĩ?

Arabatithia andũ kuonania atĩ nĩ merirĩte kuuma ngoro, nĩ ũndũ wa mehia ma kuuna Watho wa Ngai. (Atũmwo 19:4) No ti othe maragĩrĩra kũbatithio. Atongoria amwe a ndini Afarisai na Asadukai moka kũrĩ we, Johana arameera atĩ o nĩ “njiarũa cia nyoka irĩ thumu.” Ningĩ akameera: “Ciarai maciaro maronania nĩ mwĩrirĩte. Mũtikeĩre atĩrĩ, ‘Ithuĩ tũrĩ ciana cia Iburahimu.’ Tondũ ngũmwĩra atĩ Ngai no ahote gũtũma Iburahimu agĩe na ciana kuuma mahiga-inĩ maya. Ithanwa nĩ rĩigĩtwo gĩtina-inĩ kĩa mũtĩ. Kwoguo mũtĩ ũrĩa wothe ũtaciaraga maciaro mega nĩ ũgũtemwo na ũikio mwaki-inĩ.”​—Mathayo 3:​7-10.

Andũ aingĩ nĩ marathiĩ kũrĩ Johana, ndũmĩrĩri yake ĩkamahutia ngoro, na akabatithia aingĩ, nĩ ũndũ ũcio athĩnjĩri-Ngai na Alawii magatũmwo mathiĩ makamũũrie: “Wee nĩwe ũ?”

Johana akameera: “Niĩ ti niĩ Kristo.”

Nao makamũũria: “Wee-rĩ, ũkĩrĩ ũ? Wee nĩwe Elija?”

Johana akamacokeria: “Aca.”

Nao makamũũria: “Wee nĩwe mũnabii ũrĩa weranĩirũo?” makĩaria ũhoro wa Mũnabii ũrĩa mũnene Musa oigĩte ũgooka.​—Gũcokerithia Maathani 18:​15, 18.

Nake akoiga: “Aca!”

Magathiĩ o na mbere kũmũũria: “Wee ũkĩrĩ ũ? Twĩre nĩguo tũgacokerie arĩa megũtũtũmĩte. Ũngiuga atĩa ũhoro-inĩ waku wee mwene?” Johana akameera: “Nĩ niĩ mũgambo wa mũndũ ũraanĩrĩra werũ-inĩ akiugaga, ‘Rũngai njĩra ya Jehova,’ o ta ũrĩa mũnabii Isaia oigire.”​—Johana 1:​19-23.

Makenda kũmenya makĩria makamũũria: “Na ũkĩbatithanagia nĩkĩ angĩkorũo wee tiwe Kristo kana Elija kana mũnabii ũrĩa weranĩirũo?” Nake akamacokeria: “Niĩ batithanagia na maĩ. Kũrĩ mũndũ ũrĩ gatagatĩ-inĩ kanyu, ũrĩa inyuĩ mũtoĩ, ũrĩa ũroka thutha wakwa.”​—Johana 1:​25-27.

Johana akonania atĩ we nĩ njĩra arahaarĩria. Areka ũguo na njĩra ya gũteithia andũ magĩe na mwerekera ũrĩa wagĩrĩire nĩguo maamũkĩre Mesia ũrĩa weranĩirũo, ũrĩa ũgũtuĩka Mũthamaki. Agacoka akoiga ũũ: “Ũrĩa ũroka thutha wakwa nĩ mũnene kũngĩra, nacio iratũ ciake ndirĩ mwagĩrĩru wa gũciruta.” (Mathayo 3:11) Na akongerera akoiga: “Ũrĩa ũroka thutha wakwa nĩ mũnene kũrĩ niĩ, nĩ gũkorũo itanaciarũo aarĩ kuo.”​—Johana 1:15.

Kwoguo ndũmĩrĩri ĩrĩa Johana arahe andũ atĩ “Mwĩrirei, tondũ Ũthamaki wa igũrũ nĩ ũkuhĩrĩirie,” nĩ ya ihinda rĩrĩa rĩagĩrĩire. (Mathayo 3:2) Nĩ ya kũmamenyithia atĩ Jesu Kristo, ũrĩa ũgaatuo Mũthamaki nĩ Jehova, arĩ hakuhĩ kwambĩrĩria ũtungata wake.