DILONGI 02

Biblia Ke Tubilaka Mambu ya Mbote Sambu na Bilumbu Ke Kwisa

TALA NA

Na ntoto ya mvimba, bantu ke kutana ti mambu yina ke sala nde bo kuma mawa-mawa, bo kuma kudiyangisa mpi nkutu bo mona mpasi. Keti yo me kuminaka nge dezia? Mbala ya nkaka nge ke mona mpasi sambu nge ke bela to sambu muntu mosi ya nge vandaka kuzola me fwa. Nge lenda kudiyula nde: ‘Keti luzingu ta bonga?’ Mvutu ya Biblia na ngiufula yai ke bwisa ntima.

1. Inki mambu ya mbote Biblia ke tubaka sambu na bilumbu ke kwisa?

Biblia ke tendulaka sambu na nki bampasi me fuluka mingi na ntoto mpi yo ke songaka beto nsangu yai ya mbote: Ntama ve bampasi yai yonso ta mana. Mambu yina Biblia ke tubaka lenda sadisa nge na kuvanda ti luzingu ya mbote na bilumbu ke kwisa mpi yo lenda pesa nge “kivuvu.” (Tanga Yeremia 29:11, 12.) Mambu yango ke sadisaka beto na kukanga ntima na bampasi, na kuvanda na kiese banda bubu yai mpi mvula na mvula.

2. Biblia ke tubaka nde luzingu ta vanda nki mutindu na bilumbu ke kwisa?

Biblia ke tuba nde na bilumbu ke kwisa “lufwa ta vandaka diaka ve; mawa, bidilu mpi mpasi ta vandaka diaka ve.” (Tanga Kusonga 21:4.) Mambu yina ke salaka nde bantu kumona mpasi bubu yai, mu mbandu kinsukami, kusadila bantu mambu ya mbi, maladi mpi lufwa ta vanda diaka ve. Biblia ke tubaka nde bantu ta zinga mvula na mvula na kiese na paladisu awa na ntoto.

3. Inki lenda sadisa nge na kundima mambu yina Biblia ke tubaka?

Bantu mingi ke kingaka mambu ya mbote na bilumbu ke kwisa kansi bo ke ndimaka mpenza ve nde yo ta salama. Ata mpidina, mambu ya Biblia ke tubaka ta salama mpenza. Beto ta kuma kundima mambu yina Biblia ke tubaka kana beto ke ‘longuka yo mbote-mbote.’ (Bisalu 17:11) Kulonguka Biblia ta sadisa nge na kupona kana nge ta ndima mambu yina yo ke tubaka sambu na bilumbu ke kwisa to ve.

LONGUKA MAMBU MINGI

Beto tala mambu ya mbote yina Biblia ke tubaka sambu na bilumbu ke kwisa mpi mutindu yo ke sadisaka bantu bubu yai.

4. Biblia ke tubaka nde bantu ta zinga mvula na mvula kukonda kumona mpasi

Tala mambu yina ta salama na bilumbu ke kwisa yina Biblia ke tubilaka. Inki diambu na kati ya mambu yai ke sepedisa nge mingi? Sambu na nki?

Beno tanga baverse yai ya ke landa mpi beno pesa mvutu na bangiufula yai:

Keti nge ke ndima nde mambu ya baverse yai ke tuba ta natila nge mambote? Keti nge ke ndima mpi nde yo lenda natila bantu ya dibuta na beno to banduku na nge mambote kana bo me longuka yo?

Yindula mutindu luzingu ta vanda awa na ntoto ntangu:

ATA MUNTU MOSI VE . . .	BANTU YONSO . . .
ta basisa mansanga, ta nuna to ta fwa.—Yezaya 25:8.	ta mona mutindu bantu ya bo vandaka kuzola mingi ta futumuka to ta vutuka na luzingu awa na ntoto.—Yoane 5:28, 29.
ta bela to ta vanda ti kifu na nitu.—Yezaya 33:24; 35:5, 6.	ta vanda ti sante ya mbote mpi ngolo bonso baleke.—Yobi 33:25.
ta mona mpasi sambu na mambu ya mbi.—Yezaya 32:16, 17.	ta vanda ti madia mingi, banzo ya kitoko mpi bisalu ya mbote.—Nkunga 72:16; Yezaya 65:21, 22.
ta niokwama sambu na bitumba.—Nkunga 46:9.	ta kuma kuzinga mpenza na ngemba.—Nkunga 37:11.
ta yindula to ta yibuka mambu ya ke pesa mpasi.—Yezaya 65:17.	ta zinga mvula na mvula kukonda kumona mpasi.—Nkunga 37:29.

5. Mambu yina Biblia ke tubaka sambu na bilumbu ke kwisa lenda sadisa nge

Bantu mingi ke lembaka nitu to nkutu ke waka makasi sambu na mambu ya ke salama na ntoto. Bantu ya nkaka ke salaka yonso sambu mambu kubonga. Tala mutindu mambu ya mbote yina Biblia ke tubaka sambu na bilumbu ke kwisa ke sadisaka bantu bubu yai. Beno tala VIDEO mpi na nima beno pesa mvutu na bangiufula yai ya ke landa.

VIDEO: Mono Zolaka Kunwanisa Kukonda Lunungu (4:07)

Mutindu video me monisa yo, nki mambu ya mbi vandaka kupesa Rafika mpasi?
Ata mambu ya mbi yina yandi vandaka kumona manaka ve, inki mutindu Biblia sadisaka yandi?

Mambu ya mbote yina Biblia ke tubaka sambu na bilumbu ke kwisa lenda sadisa beto na kulemba ve nitu mpi na kuvanda kaka na kiese ata beto ke kutana ti bampasi. Beno tanga Bingana 17:22 mpi Baroma 12:12. Na nima, beno pesa mvutu na bangiufula yai:

Nge ke ndima nde mambu ya mbote yina Biblia ke tubaka sambu na bilumbu ke kwisa lenda sadisa nge bubu yai? Sambu na nki?

BANTU YA NKAKA KE TUBAKA NDE: “Mambu ya mbote yina Biblia ke tubaka sambu na bilumbu ke kwisa ta salama ve.”

Sambu na nki yo kele mfunu na kutadila nge mosi bikuma yina ke monisa nde mambu yina Biblia ke tubaka ta salama?

NA BUNKUFI

Biblia ke tubaka nde mambu ya mbote ta salama na bilumbu ke kwisa. Yo ke sadisaka beto na kuvanda na kiese mpi na kuzinga mbote bubu yai.

Inki Nge Me Simba?

Sambu na nki yo kele mfunu nde bantu kuzaba mambu ya mbote yina ta salama na bilumbu ke kwisa?
Inki Biblia ke tubaka sambu na bilumbu ke kwisa?
Inki mutindu kuzaba mambu ya mbote yina ta salama na bilumbu ke kwisa lenda sadisa nge bubu yai?

Dati ya beno me manisa dilongi yai:

Mambu ya Kusala

Sambu na kuzaba mbote-mbote mambu ya mbote yina Biblia ke tubaka sambu na bilumbu ke kwisa, tanga diaka baverse yonso ya kele na dilongi yai.

Mambu ya Nkaka:

Your other goal

TALA MPI

Tala mutindu kuzaba mambu ya mbote yina ta salama na bilumbu ke kwisa lenda sadisa nge ntangu nge ke kutana ti bampasi.

“Kivuvu—Na Wapi Beto Lenda Zwa Yo?” (Disolo ya kele na Telama!)

Tala mutindu kuzaba mambu ya mbote yina Biblia ke tubaka sambu na bilumbu ke kwisa, lenda sadisa bantu yina ke belaka maladi yina ke manaka ve.

“Keti Biblia Lenda Sadisa Nge Kana Nge Ke Belaka Maladi Yina Ke Manaka Ve?” (Disolo ya kele na jw.org)

Ntangu nge ke landa nkunga yai, yindula mutindu nge ti dibuta na beno ta zinga na paladisu awa na ntoto.

Yindula Ntangu Yina (3:37)

Tanga Disolo ya muntu mosi yina vandaka kunwanina mambote ya bantu ya nkaka mpi tala mutindu luzingu na yandi sobaka ntangu yandi zabaka mambu ya mbote yina Biblia ke tubaka sambu na bilumbu ke kwisa.

“Mono Ke Monaka Diaka Ve Nde Mono Fwete Soba Nsi-Ntoto” (Nzozulu ya Nkengi, Yuli 1, 2013)

Nge Lenda Sepela Mpi Ti

BANGIUFULA YINA BANTU KE YULAKA MINGI

Inki Mutindu Bambangi ya Yehowa Ke Longukaka ti Bantu Biblia?

Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.

ZINGA MVULA NA MVULA!—KULONGUKA YA BIBLIA YINA TA NATILA NGE MAMBOTE